1, 2. ¿Jépuká tamó cha olámiré isini kaachi?

 JESÚS ko ruyeli bilé ejemplo bilé mukí kunámami jitra, japi wisabé niraa tanie echi oyériami japi echi iʼwírima. Echi discípulos ko aʼlá inámiliré japi chu inílili echi mukí kunámami, jiti echalí wiká cha olárami nili (Luc. 18:1-5). Jipi rawé, sinéami tamujé cha olárami ju isini kaachi, jiti la ti aʼlá machí japi chu iníliliré echi mukí kunámami.

² Jipi rawé nirú wiká pagótami japi cha nokáami ju, risoa olá jarecho alí we korúkami ju, suwaba echi namuti jitra ati machí japi tamujé isini kaachi ayénachó cha olárami nipo (Ecl. 5:8). Japi ta ke siné nata ko ju, japi bilé hermano o bilé hermana tamó cha olama. Nalí echi riká nokiméeré jiti ke sébali aʼlá nokáami ju alí ke aboi nátika japi riká noká echi japi tamó sayeri. Ata oméripo binea japi chu isili Jesús japalí echi sayérala cha olali. Ata iʼwérili nokisáaká kilí niya tamó sayérala yúa, ¿chúsiá ke echi riká cho nokiboa echi hermanos yúa? Nalí be, ¿chu inili Jeobá japalí bilé pagótami o bilé hermano tamó cha olasa? ¿Achi iné japi ta ikí?

3. ¿Chúriká ta machí japi Jeobá ko ke nakí japi ta cha olárami nipo?

³ Jeobá ko iné japalí jarecho tamó cha olá alí ke nakí japi ta echi riká olárami nipo. Echoná Biblia aní japi echi ko “we galé wachíniga isíami niya” (Sal. 37:28). Jesús ko anili japi “Riosi we yáati kuʼwírama” echi japi Onorúami nijéwami ju (Luc. 18:7, 8). Alí ma mulipi Jesús ko isima japi ma ke risoa nilia pirélipo alí japi ma ke bilé tamó cha olama (Sal. 72:1, 2).

4. ¿Chúriká tamó iʼwiri Jeobá?

 ⁴ Ata buwésaré japalí Jeobá ma suwábisa suwaba echi chati namuti, nalí jipi ko echi ko tamó bineri chúriká ti nokiboa japalí jarecho tamó cha olasa (2 Ped. 3:13). Japi riká, echi ko tamó bineri japi ta nokisáré jiti ke aminabi waʼlú nílima echi namuti. Ayénachó Jesús jitra tamó bineri chúriká ti nokiboa japalí ti cha olárami nisa. Alí echoná Biblia nirú wiká busuréliami japi tamó iʼwírima japalí ti cha olárami nisa.

ATI TIBUKA NOKISÁRÉ ECHI NAMUTI JITRA JAPI TA INILI

5. Japalí ti cha olárami nisa, ¿chúsiá ti we aʼlá tibuka nokisáré echi jitra japi ta inili?

⁵ A keʼré japi ta iyoa nílipo alí we omona nílipo echi namuti jitra japi tamó cha olali (Ecl. 7:7). Echi Onorúami nijéwami chabé piréami japi riká Job alí Habacuc ayénachó echi riká inílili (Job 6:2, 3; Hab. 1:1-3). Tákoré japi ta inili ke chati ju, ati we aʼlá tibuka nokisáré jiti ke nokiboa japi ke aʼlá ju.

6. ¿Piri tamó bineri japi isili Absalón? (Ayénachó iné echi dibujo).

⁶ Japalí ti iné japi wiká cha oláliwa o tamó cha olásaká, a keʼré japi sapú ku nimínalipo. Nalí echi riká ti nokisáaká, aminabi waʼlú nílimiré echi namuti. Echi riká isili Absalón, japi echi silíami David nolá nili. Echi ko we iyoli japalí machili japi echi Amnón, japi nasipa chéami echi rejimala nili, chapili echi wayela Tamar. Echi Moisés Nulalila, anili japi Amnón mukusaa riweili echi jitra japi isili (Lev. 20:17). Tákoré ke chati nili japi Absalón we iyoma, nalí echi ko ke ku nimisa riweili miʼayá echi Amnón (2 Sam. 13:20-23, 28, 29).

7. Japalí echi salmista ineli japi chu noká echi cha nokáami, ¿chu inílili?

⁷ Japalí ti iné japi echi cha nokáami ke namú ikí alí japi ke castigo iyáliwa, a keʼré japi ta natabo achi natéami ju aʼlá namuti nokayá. Echi riká nátili echi salmista japi ineli japi echi cha nokáami risoa olayé echi aʼláala pagótami alí tákoré echi riká nokayé we kanila pireili. Echi ko jéanili: “Echi riká ju echi cha nokáami, japi suwaba ke nóchali niraa” (Sal. 73:12). Echi salmista we risoa nilie inea echi chati namuti, jiti la echi ko ne sojí riweli nijewia Jeobá. Jéanili:  “Japalí ni ináminalie, ani we risoa nilie” (Sal. 73:14, 16). Ayénachó jériká anili: “Nijé ronola ko, ma sojí chakena simili alí ni ne sojí sitali” (Sal. 73:2). Echi riká cho ikili bilé hermano Alberto riwéami.

8. ¿Piri isili bilé hermano japalí cha olárami nili?

⁸ Jaré hermanos aneli Alberto japi winomí chiwali echoná congregación muchúwami, tákoré echi ko ke namú isili. Echi jitra Alberto ko riweli anciano niya alí echi hermanos echoná congregación muchúwami japi machili echi namuti ma ke riwíwili. Alberto jéaní: “Ke ni kanilie, alí ni sinibí we iyoa nilie”. Jiti echi ko aminabi nátili echi namuti japi ikili, echi ko riweli Jeobá alí malí bamíali ke simili napawíliwachi alí nawisasia. Jepuná ko tamó bineri piri ikimea ati ke riwésaká iyoa nilia japalí ti cha olárami nisa.

NOKIBOA JAPI RIKÁ JESÚS

9. ¿Piri chati namuti anáchili Jesús? (Ayénachó iné echi dibujos).

⁹ Jesús ko we aʼlá tamó binérili japi chúriká ti nokisáré japalí ti cha oláliwa. Wiká pagótami cha olali alí cha riká raʼíchili echi jitra. Japi riká, jaré echi téemala ke bichíwili japi Jesús echi Mesías nili  alí aneli japi ma lowili. Alí echi tiyópachi binériami anili japi echi ko niwali echi milagros jiti echi demonios iʼwírili. Ayénachó echi sontarsi romanos kawélika raʼíchili echi jitra, risoa olali alí miná ko miʼali (Mar. 3:21, 22, TNM; 14:55, TNM; 15:16-20, 35-37, TNM). Nalí Jesús ko anáchili suwaba echi chati namuti alí ke ku nimili. ¿Piri ta biné echi jitra?

10. ¿Piri isili Jesús japalí cha olárami nili? (1 Pedro 2:21-23).

¹⁰ (1 Pedro 2:21-23, TNM). a Jesús ko tamó binérili japi chúriká nokiboa japalí ti cha oláliwa. Echi ko machili chu kabú raʼichama alí chu kabú ke (Mat. 26:62-64). Japi riká, japalí jaré ikaleka raʼichie echi jitra, echi ko isini kaachi ke namú aniyé (Mat. 11:19). Alí japalí a raʼíchili, echi ko ke cha riká aneli echi sayérala. Jesús ko ke ku nimili, nalí riweli japi oyérima echi japi wachíniga oyériami ju. Echi ko aʼlá machiyé japi Jeobá ko a ineli suwaba namuti japi echi ikiyé alí bichíwili japi echi ku akaréwima echi namuti.

11. ¿Chúriká nokiboa japalí ti cha oláliwa? (Ayénachó iné echi fotos).

¹¹ Ati oméripo nokayá japi riká Jesús japalí ti we aʼlá nátika raʼicha japalí ti cha oláliwa. Nalí ke me chati nísaká japi tamó olari, a keʼré japi echi riká riwepo. Ayénachó a keʼré japi ta ke namú aniboa jiti ke aminabi waʼlú nílima echi namuti (Ecl. 3:7; Sant. 1:19, 20). We be nalí, a keʼré japi ta a anisáré japi ikí japalí ti riwisaa japi bilecho cha oláliwa o japalí ta ruyésaré japi ta bichí (Hech. 6:1, 2). Echi riká nísaká, ata iʼwérili nokiboa  riwíwika raʼichia alí kilí niraa (1 Ped. 3:15). b

12. ¿Chúriká ti riwepo japi oyérima echi japi wachíniga oyériami ju?

¹² Ati nokiboa japi riká Jesús japalí ti riwé japi oyérima echi japi wachíniga oyériami ju. Nalí, ¿chu kabú echi riká nokiboa? Japalí bilé nata bilé namuti japi ke bichíwali ju tamujé jitra o tamó cha olá, ati bichíwipo japi Jeobá machí chu iyiri ju echi bichíwali. Jepuná tamó iʼwírima anachia japalí ti cha oláliwa jiti ta machí japi Jeobá ku akaréwima echi namuti. Japalí ti riwé japi Jeobá tamó iʼwírima, ke ti aminabi iyoa nílipo alí ke aminabi omónipo. Jiti ke ti riwésaká echi riká inilia, echi namuti isímiré japi ta ke aʼlá nokiboa alí riwepo Jeobá amígowala niya (Sal. 37:8).

13. ¿Piri namuti tamó iʼwírima anachia japalí ti cha olásiwa?

¹³ A bichíwali ju japi ta ke sébali aʼlá nokiboa japi riká Jesús. Jiti isini kaachi aniboa o nokiboa jaré namuti japi miná ko tamó cha nílitima (Sant. 3:2). Alí a keʼré japi echi namuti japi ta olari, isímiré japi ta risoa nílipo japalí chéami Jeobá suwábisa echi chati namuti. Echi riká mi ikiyáaká, kiti wikawá japi Jeobá we aʼlá machí japi mi ikí alí Jesús ayénachó aʼlá machí japi mi inili jiti echi riká cho olari (Heb. 4:15, 16). Jeobá ko ke Jesús bi jitra tamó bineri, echi ko tamó iyali echi Biblia jiti echoná nirú busuréliami japi tamó iʼwírima machiyá chu nokiboa japalí ti cha olárami nisa. Ma inepo okuá versículos echoná oserúami Romanos.

RIWÉ “MAPURIGÁ RIOSI KASTIGO ʼYAMA”

14. ¿Chúriká nijéwipo echi busuréliami japi Pablo anili echoná Romanos 12:19?

¹⁴ (Leeri Romanos 12:19). Pablo ko aneli echi cristianos japi riwema “mapurigá Riosi kastigo ʼyama echi auché jaré chati oláami”. Japalí ta nijewi jepuná busuréliami, ata riwé japi Jeobá oyérima japalí binoy nakí alí japi riká binoy aní. Echi riká isili bilé hermano John riwéami, japalí bilecho hermano cha riká olali. Echi ko jéaní: “We ni iʼwérili isiki jiti ni ke ku akaréwima echi namuti japi riká nijé binoy nakí. Romanos 12:19 we tamí iʼwírili kilí niya alí bichiwia Jeobá”.

15. ¿Chúsiá wabé aʼlá ju japi Jeobá akaréwima echi namuti japi ta ikí?

¹⁵ Riwea japi Jeobá akaréwima echi namuti wabé aʼlá ju. ¿Chúsiá? Jiti echi riká ti nokisáaká, ata we kilí nílipo alí ke ti me natia járipo chúriká aboi akaréwipo echi namuti japi ta ikí. Jeobá ko aní japi tamó iʼwírima, japi riká ko jéaniyá: “Riwé japi ni mi iʼwírima, nijé akaréwima echi namuti”. Jeobá ko aní chúriká isima tamó iʼwírimia alí wabé aʼlá niraa. Ata we bichíwisaká japi echi aní, ke ti me jilí nirabo riwea iyoa nilia. Echi riká isili John japi ta jitra raʼíchiki echoná párrafo 14. Echi ko jéaní: “Ani riwésaká japi Jeobá tamí iʼwírima, ani machí japi echi ko wabé aʼlá akaréwima echi namuti, ke ko japi riká nijé”.

“NIYURI ECHI CHATI AʼLÁ ISIKA”

16, 17. ¿Chúriká tamó iʼwiri raʼichia Jeobá yúa jiti niyúripo echi chati aʼlá nokayá? (Romanos 12:21).

¹⁶ (Leeri Romanos 12:21, TNM). Pablo ko anili: “Kiti riwé japi echi chati niyúrima, nalí niyuri echi chati aʼlá isika”.  Jesús ayénachó anili japi ta galepo tamujé sayérala alí tánipo Jeobá echi jitra japi tamó najati (Mat. 5:44). Alí Jesús binoy echi riká isili. Echi ko wiká namuti chati anáchili japalí echi sontarsi romanos echoná ripáami tonchi michónika uchali. Ayénachó echi sontarsi cha riká raʼíchili echi jitra alí we risoa olali. Ke ti omeri sébali aʼlá machiyá japi chu yena risoa nílili Jesús. ¡Echi ko we cha olari!

¹⁷ Jesús ko ke riweli galéami niya alí nijewia Jeobá tákoré we risoa olari. Echi ko ke aneli Jeobá japi castigo iyama echi sontarsi, nalí echi ko jéanili: “¡Keni Onó, galá wikáwi aboni, mapujiti aboni ketasi machí mapurigá aboni olá!” (Luc. 23:34). Ata tánisaká Jeobá echi jitra japi tamó cha olá, tamó iʼwírima jiti kilí nílipo alí ke me iyoa nílipo, alí ayénachó jiti ta sinúrika ku natabo echi jitra.

18. ¿Chúriká iʼwírili raʼichia Jeobá yúa echi Alberto alí John?

¹⁸ Jenaʼí binelíwami ati bineki okuá hermanos jitra japi raʼichia Jeobá yúa we aʼlá iʼwírili japalí risoa olárami nili. Alberto jéaní: “Ani tániki Jeobá echi hermanos jitra japi tamí cha olali. Wisabé niraa ni anéi japi tamí iʼwírima ma ke natia echi namuti japi ikili”. We aʼlá ju japi Alberto checho ku we kanílika nóchili Jeobá. John jéaní: “Wisabé niraa ni tániki Jeobá echi hermano jitra japi tamí cha olali. Raʼichia Jeobá yúa tamí iʼwírili jiti ni ke cha riká natama echi hermano jitra alí ke iyoa nilia, nalí japi ni ku kilí nílima”.

19. ¿Piri ta nokisáré kecho bijí suwábitami kaachi echi chati namuti? (1 Pedro 3:8, 9).

¹⁹ Ke ti oméripo machiyá piri namuti tamó olama jarecho kecho bijí suwábitami kaachi echi chati namuti. Jiti la, ke ti siné riwepo tania Jeobá japi tamó iʼwírima. Ayénachó iʼwérili nokiboa nokayá japi riká isili Jesús japalí cha olárami nili alí nijewia echi busuréliami japi uchuwi echoná Biblia. Echi riká ti nokisáaká, Jeobá tamó iyama wiká namuti aʼláala (leeri 1 Pedro 3:8, 9).