Echalí bamíali, echi organización suwinárika isili jaré namuti japi iʼwírili echi Biblia Binéami jiti napawika nóchilima Jeobá. Echi oselí The Watch Tower chotásili uchayá japi ruyéliwa bilé texto jitra japi napawika binerie echoná napawíliwachi riwéami Napawíliwami japoná raʼíchiwa Onorúami yúa alí walubéala anéliwa, japi olali sinibí tarali. Ayénachó, echi Biblia Binéami niwayé bilé calendario japoná sinibí tarali chukuli bilé texto alí ibili rawé bilé canción, japi omérima wikaraa bineli asisaa binea o echi téemala yúa.

Echoná napawíliwachi, echi Biblia Binéami raʼichie testimonios jitra, echi ko aniwáami nili japi ruyeli japi ikili japalí nawisasia simíali, matétara iyayé Jeobá, wikarali bilé canción alí ayénachó raʼichie Onorúami yúa. Eva Barney, japi pakoli 1923 japalí 15 bamibi, jéanili: “Bilé japi a ruyénilie japi ikili japalí nawesia iyénili, echi ko wilisie alí chotasie raʼichia jéaniyá ‘Ani matétara iyánili Onorúami jiti we aʼláala nili tamí yúa...ʼ”. Wiká hermanos we kanilie ruyea jarecho japi ikili. Echi hermana Barney jériká anili: “Godwin nili bilé hermano japi sinibí raʼichánilie japi ikili jiti olali wiká namuti japi jitra matétara iyama Onorúami. Nalí, japalí echi upila ineli japi echi hermano ma wilí raʼíchili, banisúe echi napáchala, alí echi hermano Godwin ku asiyé”.

Sinepi bilé michá, ibili congregación napawíe echoná Napawíliwami japoná raʼíchiwa Onorúami yúa alí walubéala anéliwa, japi we natéami nili. Echi oselí The Watch Tower 1 inárachi abril 1923, anili chúriká nokayé echoná: “Nasipa cheka inárachi echi napawíliwachi ruyésaré japi ikili japalí simíali nawisasia alí iʼwérili iyásaré echi nóchami [...]. Ata mayé japi sinéami chopi riká nokisaa, ati aminabi we napawíkami nipo”.

Echi napawíliwami we aʼlá iʼwírili bilé publicador riwéami Charles Martin, japi 19 bamíbami nili alí biteili echomí Vancouver (Canadá). Echi ko jéanili: “Echoná ni bineki piri ni animea japalí ni nawisasia simí. Sinibí ni kipúe bilé japi ruyeli japi ikili japalí nawesia iyénili. Echi tamí iʼwírili jiti ni machimea piri ni animea alí jiti echi pagótami a tamí kipúnilima”.

Echi rawé japalí echi hermanos simíali nawisasia iʼwírili jiti napawíkami nima. Echi oselí  The Watch Tower 1 inárachi abril bamíali 1923, anili: “Jiti sinéami napawíkami nima bilepi nóchali nokayá [...], echi martes 1 inárachi mayo 1923, bilé rawé nima japi ta sinéami simabo nawisasia. Alí echi riká nima echi bacháwala martes sinibí michá [...]. Sinéami japi napawíami ju echoná congregación simásaré nawisasia”.

Echi kúruwi alí iwé ayénachó simíali nawisasia. Bilé hermana Hazel Burford riwéami japi 16 bamíbami nili, jéanili: “Echi oselí Bulletin riwéami ma aniyé chúriká nokiboa nawesia alí binesa riweili jiti ta ke ineka aniboa. a Nijé palóchiwala yúa ani iʼwérili isiki kanila simiyá nawisasia”. Nalí Hazel ke mayeli japi bilé hermano ma ochérami ke kanílima japi echi simea nawisasia. Echalí, jaré Biblia Binéami ke aʼlá inámili japi echi ‘kúruwi alí iwéʼ ayénachó simásaré nawisasia jiti kanílitima Onorúami (Sal. 148:12, 13). Nalí Hazel ke riweli nawesia alí pe aminana simili echi osá Escuela de Galaad alí misionera nili echomí Panamá. Miná ko, echi japi nátili japi echi kúruwi alí iwé ke nawisásaré, ma riweli echi riká natia.

Suwaba echi asambleas japi niruili iʼwírili jiti echi hermanos aminabi napawíkami nima. Wiká echi asambleas olali bilé rawé jiti echi hermanos simama nawisasia, japi riká echi asamblea japi niruili echomí Winnipeg (Canadá). Echi 31 inárachi marzo nili bilé rawé jiti suwaba japi echoná napawili omérima simíaya nawisasia. Echalí wiká pagótami we aʼlá kipuli. Bilecho asamblea japi niruili echomí Winnipeg 5 inárachi agosto echalí bamíali, napawili 7,000 pagótami. Ke siné napawili echi ikí pagótami echoná Canadá.

18 aminá 26 inárachi agosto bamíali 1923, niruili bilé asamblea we natéami echomí Los Ángeles (California). Jaré tarali kecho séachi, echi periódicos ma nawésili echi waʼlú napawíliwami jitra alí echi Biblia Binéami 500,000 oselí nijili bayemia echi pagótami, ayénachó uchúchali letreros echi asamblea jitra echi níwala carros alí echoná camiones.

Sábado 25 inárachi agosto, echi hermano Rutherford nijili bilé nawésali riwéami “Boʼwá alí chibas”, japoná ruyeli japi echi boʼwá ko ju echi  aʼláala pagótami alí japi pirélima echoná Wichimóbachi we baʼóachi. Ayénachó nijili bilecho nawésali riwéami “Amonestación”, japoná raʼámili echi cristiandad alí iʼwérili iyali echi aʼláala pagótami jiti buyama echoná “walúlachi Babilóniachi” jonsa (Apoc. 18:2, 4). Miná ko niwali bilé tratado japi echi jitra raʼíchali, alí omáana Wichimóbachi echi Biblia Binéami nijili wiká millones tratados echi jitra.

Echi upáwala rawé echi asamblea, simírikami 30,000 pagótami kipuli echi nawésali japi nijili echi hermano Rutherford, riwéami: “Suwaba echi naciones suwábitami nima japalí nisa Armagedón, nalí wiká millones japi jipi piré ke siné suwimea”. Japi riká ma machili japi wiká napawima, echi Biblia Binéami ko natétili echi estadio riwéami Coliseo de los Ángeles, japi kulí niwárami nili. Jiti sinéami aʼlá kipuma echi nawésali, echi hermanos ko néeli echi bocinas japi olali echi estadio, echi nili wabé kulíwami tecnología japi machínali echalí. Ayénachó, wiká jarecho pagótami japi ke mochili echoná, achó kipuli echi nawésali radio jitra.

Bamíali 1923, aminabi nawisárami nili echomí África, Europa, India alí Sudamérica. Echomí India, Adavimannathu Joseph, japi niwíkami nili alí usani kúchuwami, iʼwírili niwayá publicaciones raʼicháliami hindi, tamil, telugu alí urdu.

Echoná Sierra Leona, Alfred Joseph alí Leonard Blackman, oseli bilé carta iʼwírili tania echi central mundial echomí Brooklyn (Nueva York). Alí 14 inárachi abril bamíali 1923, jepuná hermanos iyárami nili japi tánili. Alí, ¿piri tánili? Alfred jéaní: “Siné sábado ma we rokojó, ani kipuki echi teléfono japi bilé tamí marcárili alí tamí náriki: ‘¿Mujé ju japi oseli echi Sociedad Watch Tower tania nawésiami?ʼ. Alí ni aneki ‘Ayenaʼ. Alí echi ko anili: ‘Nijé ju japi ni juláariʼ”. Alí, ¿jépuká nili echi hermano? Echi ko nili William Brown, japi echalí rawé nawali Caribe jonsa echi upila Antonia yúa alí echi kúchuwala Louise alí Lucy. Ke wilí buweli japalí echi hermanos machili echi hermanos Brown.

Alfred ayénachó aní: “Baʼalínala rawé japalí Leonard alí nijé binea muchuwie echi Biblia japi riká ti nokayé sinibí tarali, echoná yéwichi wilíali bilé waʼlú rijoi: echi ko nili William Brown. Echi ko we kanílili nawesia Jeobá jitra, jiti la echi ko anili japi nijima bilé nawésali baʼalínala rawé”. Kecho simíriachi bilé michá, echi hermano  Brown nijili suwaba echi publicaciones japi tóoli alí ke wilí simírili japalí nareli auché 5,000 libros alí miná ko auché wiká newaleli. Nalí, echi pagótami ko ke ineli japi riká libros ralinéami. Suwaba echi bamíali japalí jonsa chotásili nóchilia Jeobá, echi ko sinibí néeli echi Biblia japalí nijili nawésali, jiti la Brown machirúami nili japi riká Brown echi japi sinibí nee echi Biblia.

Echi Sucursal Barmen (Alemania) ma taa nili alí echoná ciudad simea riké echi sontarsi franceses. Echi Biblia Binéami riwali jaré edificios echomí Magdeburgo japoná aʼlá nili jiti imprimírima echi publicaciones. 19 inárachi junio, echi hermanos suwénili atewia suwaba namuti japi tomea riké japi riká echi imprenta, alí simíali kulíwami Betel echomí Magdeburgo. Japalí ma simírili bilé rawé, echi hermanos ma ruyeli echi central mundial japi ma mochili echoná kulíwami Betel, echalí echi periódicos ruyeli japi Francia najúnili echi ciudad Barmen. Echi riká echi hermanos nílili japi Jeobá we aʼlá tibuli alí iʼwírili.

Echoná Brasil, George Young simili omáana país nawesia echi Onorúami Raʼicháala. Echoná iʼwírili jiti nirúlima bilé sucursal alí ayénachó japi nirúlima echi oselí The Watch Tower portugués niraa. Jaré michá bi simírisa, echi ko nijili 7,000 simírikami publicaciones. Echi hermano George Young ayénachó iʼwírili bilé mukí Sarah Ferguson riwéami, japi 1899 jonsa leérili echi oselí The Watch Tower nalí kecho pakótami nili. Ma simírisa jaré michá japalí George Young nawali, echi mukí alí echi naó kúchuwala ma omérili pakoa.

Ma sojí suníachi echi bamíali 1923, echi oselí The Watch Tower 15 inárachi diciembre, ruyeli suwaba echi namuti aʼláala japi ikili jiti suwinárika nokali echi napawíliwami, asambleas alí nawisasia. Anili: “Ke jilí ju machiyá japi echi congregaciones [...] we bichíyami ju [...]. Napachabo echi armadura espiritual jitra alí aminabi nóchilipo Onorúami we kanílika echi bamíali japi ma mulipi chotásima”.

Bamíali 1924 nima riweili bilé bamíali we natéami echi Biblia Binéami jitra. Echi hermanos central mundial nóchami echomí Brooklyn ma wiká michá nochia mochili niwayá jaré edificios echoná Staten Island. Sunili niwayá chotásiachi bamíali 1924. Echi edificios iʼwírili jiti echi Onorúami puéblowala aminabi napawíkami nima alí jiti nawisárami nima echi Onorúami Raʼicháala tákoré we jilí nili nawesia.