BINELÍWAMI 43
CANCIÓN sjj 90 Iʼwérili iʼyabo jarecho
Piri ta nokisáré ati nátiaká namuti japi isimí japi siwea nílipo
“Sinibí ne galá ʼnátaga machisí acha achigó yiri jú, Riosi Raʼíchala yuwa” (1 TES. 5:21).
JAPI TA JITRA BINEPO
Piri ta nokisáré japalí ti nata namuti japi isimí japi ta siwea nílipo nóchilia Jeobá.
1, 2. a) ¿Chu iyiri ju jaré namuti japi nárika nokiméeré echi japi Jeobá nijéwami ju? b) ¿Piri ta binepo jena binelíwami?
SINÉAMI tamujé isini kaachi jilí niraa bichiwia a japi ta natéami ju Jeobá jitra. Japi riká, natabo jepuná: bilé remalí ke me aʼlá bichiwi japi Jeobá a natéami niraa iné echi, alí jiti echi riká inili, echi ko ke me aʼlá machí achi pakoma. O natá bilé hermano japi remalí ka jonsa chotásili bachá nóchilia Jeobá alí ke ko mea wiká winomí. Nalí jipi ko ma niwili alí olá echi upila alí kúchuwala, alí ke sibaria inili winomí iyamia japi newalé echi téemala, jiti la echi ko nárika isíiré achi aʼlá nili japi isili chabé. Bilecho ejemplo ko ju, bilé hermana wiláami japi ma ke me jiweria nili alí siwea nili jiti ma ke omeri isiá japi riká isili chabé. A keʼré japi isini kaachi mujé nárika isili jepuná: “¿Achi Jeobá natéami niraa tamí inéiré? ¿Achi aʼlá níliré echi namuti japi ni isili Jeobá jitra? ¿Achi Jeobá ma ke tamí néemiré jiti ni echi nóchilima?”.
2 Echi riká natia isímiré japi ta ma ke me aʼlá bichíwipo Jeobá alí ayénachó japi ta riwepo echi nóchilia. Jenaʼí binelíwami binepo chúriká echi Biblia tamó iʼwiri japalí ti nata 1) japi tamujé ke me natéami ju Jeobá jitra, 2) japi ke aʼlá nili japi ta nokali chabé alí 3) japi Jeobá ma ke tamó néemiré echi nóchilimia.
PIRI TA NOKISÁRÉ ATI NÁTIAKÁ NAMUTI JAPI ISIMÍ JAPI SIWEA NÍLIPO
3. ¿Piri ta nokisáré ati jilí niráaká bichiwia jaré namuti?
3 Ati nátiaká namuti japi isimí japi siwea nílipo o ati jilí niráaká bichiwia jaré namuti, we natéami ju japi ta binepo echoná Biblia echi namuti jitra. Ati echi riká nokisáaká, tamujé ko aminabi we bichíwipo Jeobá alí ti aminabi we aʼlá amigos nipo echi yúa, alí ke ti siné riwepo bichíyami niya (1 Cor. 16:13, TNM).
4. Japi riká aní 1 Tesalonicenses 5:21, ¿piri ta nokisáré japalí ti jilí niraa bichiwia bilé namuti?
4 (Leeri 1 Tesalonicenses 5:21). Echi Biblia ko tamó ané: “Sinibí ne galá ʼnátaga machisí acha achigó yiri jú, Riosi Raʼíchala yuwa”. ¿Alí chúriká nokiboa jepuná? Japalí ti jilí niraa bichiwia bilé namuti, tamujé ko inésaré piri aní echi Biblia echi namuti jitra. Japi riká, natá jepuná: bilé remalí ke me aʼlá bichiwi japi Jeobá a natéami niraa iné echi. ¿Achi echi remalí echi riká inilia ripísaré? Ke tasi. Echi ko we aʼlá binésaré echi Biblia jiti machimea piri nata Jeobá echi jitra.
5. ¿Chúriká ti kipupo japi Jeobá tamó ané?
5 Japalí ta leeri echi Biblia, jepuná ko ju japi riká ko Jeobá raʼichia tamujé yúa. Nalí be, jiti kipupo japi aní Jeobá echi namuti jitra japi ta jilí niraa bichiwia, ¿piri ta nokisáré? Ati leérisaré echi textos Bíbliachi uchúwami japi ruyé echi namuti jitra alí ti néesaré echi publicaciones japi nijí echi organización binemia echi tema jitra (Prov. 2:3-6). We natéami ju japi ta tánipo Jeobá japi tamó iʼwírima aʼlá inamia echi namuti jitra. Aapo echi busuréliami japi uchuwi echoná Biblia alí jarecho si namuti japi tamó iʼwírima. Ayénachó we aʼlá nima japi ta leéripo echoná Biblia jaré pagótami jitra japi ikili namuti japi riká tamujé.
6. Japalí ti jilí niraa bichiwia bilé namuti, ¿chúriká tamó iʼwiri echi napawíliwami?
6 Ayénachó ti kipú japi Jeobá tamó ané echoná napawíliwachi. Ati sinibí simásaká, a keʼré japi echoná kipupo bilé nawésali o bilé comentario echi namuti jitra japi ta jilí niraa bichiwia alí ti machinali (Prov. 27:17). Jipi ko binepo bikiá namuti jitra japi a keʼré japi ta jilí niraa bichiwia alí piri ta nokisáré.
“¿ACHI JEOBÁ NATÉAMI NIRAA TAMÍ INÉIRÉ?”
7. ¿Piri namuti a keʼré japi nárika nokiboa?
7 A keʼré japi siné kaachi mujé ko nárika isili jepuná: “¿Achi Jeobá natéami niraa tamí inéiré?”. Ami iníliaká japi mi ke me natéami ju, a keʼré japi mi we jilí niraa bichiwia japi mujé ko a omeri Jeobá amígowala niya, echi japi niwali suwaba namuti. Echi silíami David echi riká cho iníliliré. Echi ko ke mayea inilie japi Jeobá we natéami niraa iné echi pagótami, jiti la nárika isili: “Oh, Jeobá, ¿piri ju echi pagótami jiti mi sinibí newalama alí echi pagótami nolá jiti mi sinibí natama?” (Sal. 144:3). Ma inepo chúriká machiboa jepuná náriwami jitra.
8. Japi riká aní 1 Samuel 16:6, 7, 10-12, ¿piri iné Jeobá?
8 Echi Biblia tamó ané japi Jeobá we natéami niraa iné echi pagótami japi jarecho ko nata japi ke me natéami ju. Japi riká, japalí Jeobá júali Samuel jiti wilama bilé Jesé nolá jiti silíami nima echoná Israel, Jesé riwírili Samuel kichao binoy kúchuwala, nalí ke riwírili echi táala japi David nili. b Nalí be, David nili japi Jeobá nakili japi silíami nima (leeri 1 Samuel 16:6, 7, 10-12). ¿Chúsiá? Jiti Jeobá ineli japi chúriká nili David echoná sulachí alí japi we galeli echi.
9. ¿Chúsiá mi omeri bichiwia japi mi we natéami ju Jeobá jitra? (Ayénachó iné echi foto).
9 Natá echi namuti japi Jeobá isimí mi néwariwélitimia japi mi we natéami ju echi jitra. Echi ko mi iyá we aʼlá busuréliami japi mi iʼwiri (Sal. 32:8). Echi riká isimí jiti echi ko we aʼlá mi machí alí japi mi newalé (Sal. 139:1). Japalí mi iné japi we aʼlá ju nijewia echi busuréliami, mujé ko aminabi bichiwi japi mi we natéami ju echi jitra (1 Crón. 28:9; Hech. 17:26, 27). Jeobá ko iné suwaba namuti japi mujé isimí echi jitra alí japi mi we simá isíami ju (Jer. 17:10). Echi ko nakí japi mi echi amígowala nima (1 Juan 4:19).
“Ami áasaká echi, ami riwimea” (1 Crón. 28:9). (Iné echi párrafo 9). c
“¿ACHI AʼLÁ NÍLIRÉ ECHI NAMUTI JAPI NI ISILI CHABÉ?”
10. Japalí ti nata japi ta nokali chabé, ¿piri ta nárika nokiméeré?
10 Isini kaachi jaré ko nata achi aʼlá nili japi nokali chabé. A keʼré japi riweli bilé we aʼlá nóchali japoná mema wiká winomí jiti aminabi we nóchilima Jeobá. Nalí jipi ko ma jaré bamíali simírisa, echi ko iné japi jarecho japi a olali we aʼlá nóchali japoná meli wiká winomí, we aʼlá piré. Jiti la, a keʼré japi nárika noká: “¿Achi aʼlá níliré echi namuti japi ni isili Jeobá jitra? ¿O achi ni wabé aʼlá bitélimili ani isílaká bilecho namuti?”.
11. ¿Chúsiá we omona nilie echi japi osali echi Salmo 73?
11 Ami siné kaachi echi riká nárika isílaká, natá chu inílili echi japi osali echi Salmo 73. Echi ko ineli japi echi japi ke nijewi Jeobá we kanila pireili, ke nayúa alí olayá wiká winomí (Sal. 73:3-5, 12). Japalí ineli jepuná, echi ko nátili japi ke natéami ju suwaba japi echi isié nóchilia Jeobá. Echi salmista sinibí rawé we omonie natia echi namuti (Sal. 73:13, 14). ¿Piri iʼwírili jiti ma ke echi riká inílima?
12. Japi riká aní Salmo 73:16-18, ¿piri iʼwírili echi salmista aʼlá natia?
12 (Leeri Salmo 73:16-18). Echi salmista ko simili japoná binéi Jeobá jitra. Echoná echi ko we kilí nílili alí omérili aʼlá natia. Echi riká inámili japi echi japi we aʼlá piréi, chati namuti ikimea pe aminana. Ayénachó ineli japi nóchilia Jeobá wabé aʼlá ju, alí jepuná iʼwírili jiti kilí nílima alí jiwérili iyali aminabi nóchilimia Jeobá (Sal. 73:23-28).
13. ¿Piri mi iʼwírima jiti mi kilí nílima? (Ayénachó iné echi imagen).
13 Japi riká echi salmista, mujé ayénachó omeri kilí nilia. ¿Chúriká? Natá suwaba echi namuti aʼláala japi mi olá, japi riká japi mi we kaníliti Jeobá, alí newalá japi Jeobá ke iʼwiri echi pagótami japi ke nijéwami ju. Ne sojí sinéami echi pagótami japi ke nijewi Jeobá, wabé natéami niraa iné olayá bilé we aʼlá nóchali alí we aʼlá pirelia jipi rawé, jiti ke bichiwi japi aʼlá namuti ikimea pe aminana. Nalí Jeobá ko ané echi japi nijéwami ju japi iyama wiká namuti aʼláala jipi alí sinibisi (Sal. 145:16). Alí ayénachó natá japi mujé ke aʼlá machí chúriká mi bitélimili ami isílaká bilecho namuti. Nalí a nirú bilé namuti japi mi omeri aʼlá machiyá: japalí mi nata nóchilimia Jeobá jiti mi we galé echi alí echi pagótami, ami sinibí olama echi namuti japi mi newalé jiti mi kaníliami nima.
Sinibí natabo echi namuti aʼláala japi Jeobá aní japi isima pe aminana. (Iné echi párrafo 13). d
“¿ACHI JEOBÁ MA KE TAMÍ NÉEMIRÉ AMINABI ECHI NÓCHILIMIA?”
14. ¿Piri ikí jaré japi nijewi Jeobá, alí piri nárika nokiméeré?
14 Jaré japi nijewi Jeobá aminabi nóchinali echi, nalí ke omeri jiti ma wiká bamíbami ju, nayúa piré o ikí jarecho si namuti. Jepuná isímiré japi echi ko inílima japi ke me natéami ju Jeobá jitra alí nárika nokiméeré: “¿Achi Jeobá ma ke tamí néemiré aminabi echi nóchilimia?”.
15. ¿Piri namuti we aʼlá bichiwie echi japi osali echi Salmo 71?
15 Echi japi osali echi Salmo 71 echi riká cho inílili. Echi ko aneli Jeobá: “Japalí ni ma ke jiweria inílisa, kiti tamí riwé” (Sal. 71:9, 18). Nalí echi ko we aʼlá bichiwie japi echi ke riwésaká nijewia Onorúami, Jeobá ko echi iʼwírima alí tibuma. Echi ko bineli japi Jeobá we kanili echi yúa japi iʼwérili noká echi nijewia, tákoré ke omeri jaré namuti nokayá (Sal. 37:23-25).
16. ¿Piri namuti omeri nokayá echi hermanos japi ma wiká bamíbami ju? (Salmo 92:12-15).
16 Mujé bilé cristiano ma wiká bamíbami nísaká, binoy iné japi riká Jeobá mi iné. Tákoré mi ke omeri wiká namuti isiá, Jeobá ko omeri mi iʼwiria jiti mi ke riwema echi nijewia (leeri Salmo 92:12-15). Kiti natá echi namuti japi mi ke omeri isiá, nalí natá echi namuti japi mi a omeri. Japi riká, ami omeri iʼwérili iyayá jarecho echi namuti jitra japi mi isimí alí néwariwélitia japi mi natéami niraa iné echi. Ayénachó mi omeri ruyea jarecho chúriká Jeobá mi iʼwírili chabé alí japi mi we inili inénalia echi namuti aʼláala japi Jeobá isima pe aminana. Alí newalá japi we natéami ju japi mi Onorúami yúa raʼichama jarecho jitra (1 Ped. 3:12). Tákoré ti ikiyé suwinárika namuti jilírami, sinéami ti omeri nokayá jaré namuti nóchilimia Jeobá alí iʼwírimia jarecho.
17. ¿Chúsiá ti iʼwérili nokisáré ke natia japi ta nokisáré japi riká noká jarecho?
17 Ami omona níliaká jiti mi ke omeri isiá wiká namuti Jeobá jitra, newalá japi Jeobá ko we natéami niraa iné japi mi iʼwérili isimí. Ayénachó a keʼré japi mujé ko nata japi mi isísaré japi riká noká jarecho, nalí kiti echi riká natá. ¿Chúsiá? Jiti Jeobá ko ke siné nata japi mujé ayénachó isísaré japi riká noká jarecho (Gál. 6:4). Japi riká, natabo María jitra, echi ko roʼeli echoná Jesús ronólachi aceite we simá júkami alí we natéami (Juan 12:3-5). Nalí echi mukí kunámami awali echoná templo okuá monedas bi japi ke me natéami nili (Luc. 21:1-4). Jesús jitra, echi namuti japi nokali jepuná okuá umukí, néwariwélitili japi we bichíyami nili. Tákoré mujé ko nata japi ke me natéami ju japi mi isimí, Jeobá ko we natéami niraa iné chuwé namuti japi mi isimí echi jitra jiti mi we galé alí mi we bichiwi echi.
18. ¿Piri mi iʼwírima japalí mi jilí niraa bichiwia jaré namuti? (Ayénachó iné echi recuadro “ Echi Biblia mi iʼwírima japalí mi jilí niraa bichiwia jaré namuti”).
18 Sinéami tamujé isini kaachi nata namuti japi isimí japi ta siwea nílipo o jilí niraa bichiwia jaré namuti. Nalí japi riká ti ma bineli, echi Biblia tamó iʼwiri sinúrika natia. Aa echoná Bíbliachi echi namuti jitra japi mi jilí niraa bichiwia. Echi riká mi isísaká, ami machimea japi mi machinali alí aminabi mi bichíwima. Jeobá ko we natéami niraa mi iné alí echi namuti japi mi isimí echi jitra, jiti la echi ko mi ané japi mi iyama wiká namuti aʼláala. Kiti wikawá japi Jeobá ko we galé alí tibú ibili echi japi nijéwami ju.
CANCIÓN sjj 111 Matétarabá Jeobá, we ti kanili
a RAʼÍCHALI JAPI WE NATÉAMI JU: Jepuná binelíwami ke ruyá aní bilé japi ke bichiwi Jeobá alí echi namuti japi echi isima, nalí ruyá aní bilé japi jilí niraa bichiwia japi natéami ju Jeobá jitra o japi nárika isimí achi aʼlá nili echi namuti japi isili chabé.
b Tákoré echi Biblia ke aní chu kipi bamíbami nili David japalí Jeobá anili japi echi silíami nima, a keʼré japi remalí nili (iné echi oselí La Atalaya 1 inárachi septiembre bamíali 2011, página 29, párrafo 2).
c JAPI RUYÉ JAPI MACHINA ECHONÁ IMAGEN: Jiti machimea piri nata Jeobá echi namuti jitra japi we jilí niraa bichiwia, bilé hermana japi tiwé ju aa busuréliami echoná Biblia.
d JAPI RUYÉ JAPI MACHINA ECHONÁ IMAGEN: Bilé hermano nochia iyena biʼwayá bilé ventana memia winomí jiti iyama echi téemala japi newalé, alí nata japi chúriká nima japalí pirélima echoná Wichimóbachi we baʼóachi.
