1, 2. ¿Chúsiá we natéami ju japi ta binepo Sansón jitra?

 ¿PIRI ju japi mi bachá newalá japalí mi kipú Sansón jitra? A keʼré japi mi newalá japi echi ko wabé jiwérami nili, alí a bichíwali ju. Nalí jepuná rijoi ayénachó isili namuti japi ke aʼlá nili alí japi binoy risoa nílitili. Tákoré echi riká isili Jeobá ko we natéami niraa ineli jiti we bichíyami nili japalí chéami biteili, alí isili japi echoná Biblia oserúa chukumea echi ejemplo jiti ta binepo echi jitra.

² Jeobá ko néeli Sansón isimia weli namuti jiti iʼwírima binoy puéblowala Israel. Ma jaré siglos simírisa japalí echi mukuli, Jeobá ko isili japi echi apóstol Pablo osimea Sansón riwalá echoná japoná uchuwi jarecho pagótami riwalá japi bichíyami nili (Heb. 11:32-34). Sansón sinibí iʼwírili tánili Jeobá japalí ikili namuti we jilírami. Jenaʼí binelíwami binepo chúriká tamó iʼwérili iyá japi isili echi alí jarecho namuti we natéami japi ta biné echi jitra.

3. ¿Piri nóchali iyali Jeobá echi Sansón?

³ Japalí Sansón ochérili, echi filisteos nuláami nili alí we risoa olali echi israelitas (Juec. 13:1). Jiti echi filisteos we cha nokáami nili, echi israelitas we risoa nilia pireili. Jiti la Jeobá ko chapili Sansón jiti niyúbima echi israelitas echi filisteos jitra (Juec. 13:5). ¡Echi nóchali we jilí nili! Jiti la Sansón newaleli japi Jeobá iʼwírima.

4. ¿Chúriká iʼwírili Jeobá echi Sansón? (Jueces 15:14-16).

 ⁴ Ma inepo chúriká siné kaachi Sansón néwariwélitili japi we bichiwie Jeobá. Echalí wiká sontarsi filisteos simíali chapimeya Sansón echomí Lehí japi nili Judá. Echi rijoi Judá piréami we majali, jiti la iyali Sansón echi sayérala. Echi israelitas japi echi téemala nili, okuá wía kulíwami jitra buleli echi Sansón alí iyali echi filisteos (Juec. 15:9-13). Nalí echi Jeobá jiwérala isili japi Sansón we jiwérima, jiti la echi ko ku sutali. Alí miná ko “echi ko riwali bilé burro chalówala japi a bijí samíami nili, chapili alí echi jitra miʼali 1,000” filisteos (leeri Jueces 15:14-16).

5. ¿Chúriká néwariwélitili Sansón japi we bichíwili Jeobá?

⁵ ¿Chúsiá Sansón néeli echi bilé burro chalówala? Jiti echi ko we natéami niraa ineli bichiwia Jeobá alí ke ko echi namuti japi jitra nikoma. Jepuná rijoi we nijéwami, néeli chuwé namuti japi riwali isimia japi Jeobá nakí. Alí, jiti we bichíwili Jeobá, echi ko niyúrili.

6. ¿Piri ju bilé namuti we natéami japi ta biné Sansón jitra?

⁶ Jeobá ayénachó tamó jiwérili iyama jiti nokiboa chuwé nóchali japi echi tamó iyá echoná organización, tákoré ti mayé japi ta ke oméripo nokayá. Echi ko suwinárika niraa tamó iʼwírima japi riká ti ke mayeli. Ami iʼwírili tánisaká Jeobá, ami bichíwisaré japi echi mi iʼwírima isiá echi nóchali, alí mi jiwérili iyama japi riká isili Sansón yúa (Prov. 16:3).

7. ¿Chu iyiri ejemplo néwariwéliti japi we natéami ju sinibí iʼwírili tania Jeobá?

⁷ Wiká hermanos alí hermanas japi nocha echoná proyectos de construcción, néwariwéliti japi we bichiwi Jeobá. Chabé ko echi organización nátili chúriká nima bilé salón alí echi niwayé ne sojí suwaba salones alí jarecho si. Nalí japi riká echi Jeobá puéblowala sapú wiká muwésili, sinúrika nokisaa riweili echi nóchali. Echi hermanos japi jawárami ju,  iʼwírili tánili Jeobá alí chotásili ralayá kalí, edificios ma alí ku atewia. Robert, japi ma wiká bamíali nocha echoná proyectos de construcción omáana Wichimóbachi, jéaní: “Ne kulí ko a jilí nili sinéami jitra sinúrika nokayá echi nóchali, jiti we sinúrika nili japi riká ti nokayé ma we chabé jonsa. Nalí echi hermanos ko we kanílika nijéwili alí jepuná néwariwélitili japi Jeobá ju japi nikuuri”. Jiti la ti machí japi Jeobá ju japi iʼwiri echi puéblowala isimia japi echi nakí. Aʼlá ju japi isini kaachi nárika nokiboa: “¿Achi ni sinibí iʼwírili tani Jeobá alí ni iʼwérili isimí isiá japi riká echi nakí?”.

8. ¿Piri isili Sansón japalí we balámili?

⁸ A keʼré japi mi newalá jarecho namuti si japi isili Sansón. Japi riká, japalí nikóali bilé mauyá yúa alí miʼali, alí miná ko miʼali 30 filisteos japi piréami nili echoná Asquelón (Juec. 14:5, 6, 19). Sansón ko aʼlá machiyé japi ke nikúurisaká Jeobá, ke omérima niyuria. Ati machí japi echi riká nili jiti japalí miʼali 1,000 filisteos echi ko we balámili. Alí, ¿piri isili? Echi ko ke binoy aali baʼwí, nalí tánili Jeobá japi echi iʼwírima (Juec. 15:18).

9. ¿Chúriká iyali Jeobá japi Sansón tali? (Jueces 15:19).

⁹ ¿Chúriká iyali Jeobá japi Sansón tali? Echi ko isili japi chuwé rikáachi machínima baʼwí. Alí japalí ma bajili echi baʼwí, echi ko ku jiwérali (leeri Jueces 15:19). Pe aminana, japalí Jeobá isili japi echi profeta Samuel osimea echi libro Jueces, echi baʼwí ko a bijí manili. A keʼré japalí echi israelitas ineli echi baʼwí, echi ko newalali japi a sinibí bichíwisaká Jeobá alí iʼwírili tánisaká, echi ko ayénachó iʼwírima japalí ikisaa namuti jilírami.

10. ¿Piri ta nokisáré jiti Jeobá tamó iʼwírima? (Ayénachó iné echi imágenes).

¹⁰ Japi riká isili Sansón, sinéami ti iʼwírili tánisaré Jeobá. Ati newalé japi echi tamó iʼwírima tákoré ti machiyé nokayá jaré namuti o ma ti wiká namuti nokali echi nóchilia. Newalabo japi awénili ko ke ti oméripo nokayá echi nóchili ke ti anésaká Jeobá japi tamó iʼwírima. Sansón ko ku jiwérali japalí bajili echi baʼwí japi Onorúami iyali. Japi riká Sansón, ati riwésaré japi Jeobá tamó iʼwírima jiti ke siné riwepo nijewia echi (Mat. 11:28).

11. Jiti aminabi bichíwima Jeobá, ¿piri nokali bilé niwíkami, alí piri ta biné echi jitra?

¹¹ Ma inepo japi isimí Alexéi, bilé hermano Rusia bitéami japi we risoa nili jiti echoná país najátarami ju. ¿Piri iʼwiri echi hermano jiti anachama? Echi alí echi upila sinibí biné Jeobá jitra. Alexéi ko jéaní: “Ani olá bilé programa japoná ni inénika isimí jaré namuti, japi riká binea echi Biblia alí leeria sinibí rawé. Ayénachó sinibí biʼá, nijé alí nijé upila, ati napawika leeri echi texto diario alí ti raʼicha Jeobá yúa”. ¿Piri ta biné echi jitra? Japi ta sinibí we bichíwisaré Jeobá alí ke tamujé aboi. Alí, ¿chúriká nokiboa? Ke ti riwésaré binea Jeobá jitra leérika echi Biblia, raʼichia echi yúa, simíaya napawíliwachi alí nawisasia. Ati echi riká nokisáaká, Jeobá tamó iyama wiká namuti aʼláala alí tamó iʼwírima jiti ta aminabi echi nóchilipo. Jeobá ko jiwérili iyali Sansón alí ayénachó tamó iyama echi jiwérala.

12. ¿Piri namuti ke aʼlá isili Sansón, alí chúsiá sinúrika nili?

¹² Sansón ayénachó ke sébali aʼlá isíami nili japi riká tamujé, jiti la isini kaachi ke aʼlá nátika isili jaré namuti. Bilé echi namuti ko nili japalí ke aʼlá nátika isili japi Jeobá nakili. Japalí ma wilí pee iyénili oyériami ka, echi ko koruli bilé tiwé Sorec bitéami, Dalila riwéami (Juec. 16:4). Nalí japi riká isili, ke nili japi riká isili bachá. Kecho bijí machiyá Dalila, echi ko niwili bilé tiwé filistea yúa. Nalí echi Biblia ko aní japi Jeobá a echi riká nakili, jiti echi ko nakiyé japi nikoma echi filisteos yúa. Pe aminana Sansón ko simili echoná ciudad Gaza riwéami, japoná filisteos mochili, alí ripili echoná bilé mukí lowíami bitélachi. Echalí Jeobá ko iyali jiwérili Sansón jiti tomea echi yewi japi jitra érili echi ciudad alí jiti echi riká ke omérima nimía (Juec. 14:1-4; 16:1-3). Nalí jipi ko koruli Dalila japi a keʼré israelita nili. Jiti la jepuná ko ke iʼwírili Sansón jiti niyúrima echi filisteos.

13. ¿Piri isili Dalila ékimia Sansón?

¹³ Echi filisteos ko nakiyé japi Dalila ékima Sansón. Jiti la aneli japi iyama wiká plata, alí Dalila ko a nakili. Nalí, ¿chúsiá Sansón ke machíliré chúsiá echi riká isimí Dalila? ¿Achi níliré jiti we koruli echi? Ke ti machí, nalí Dalila ko wisabé niraa iʼwérili aneli Sansón japi echi anema chúsiá we jiwérami nili, jiti la pe aminana Sansón ko ruyeli alí echi riká ma ke nijéwili Jeobá, alí ayénachó ma ke jiwérami nili (Juec. 16:16-20).

14. ¿Piri ikili Sansón jiti bichíwili Dalila?

¹⁴ Sansón ko bichíwili Dalila alí ke ko Jeobá. Jiti la echi ko risoa ikili. Echi  filisteos ko chapili Sansón alí machí aʼwánili echi busila. Miná ko erta achari echoná cárcel ciudad Gaza —japoná chabé echi binoy iyeli echi yewi— alí echoná pioni niraa wilari jiti batuma echi namuti rakala. Miná ko, echi filisteos niwali bilé omáwali niwilia echi dios ke bichíwali Dagón riwéami, jiti mayeli japi echi iʼwírili niyuria Sansón. Miná ko Sansón machí pátami nili echoná cárcel jonsa jiti echi filisteos kawélima echi jitra (Juec. 16:21-25).

15. ¿Chúriká checho néwariwélitili Sansón japi bichíwili Jeobá? (Jueces 16:28-30; iné echi bachá dibujo japi chukú jena oselí).

¹⁵ Tákoré Sansón ke aʼlá isili, echi ko ke siweli. Echi ko aminabi isínili echi nóchali japi Jeobá iyali, japi nili nikoa echi filisteos yúa (leeri Jueces 16:28-30). Jiti la, Sansón ko aneli Jeobá: “Tamí iʼwiri nimía echi filisteos jitra”. Onorúami ko a kipuli japi anili Sansón, jiti la checho ku iyali echi jiwérala. Echi riká Sansón wabé wikabé rasía filisteos miʼali alí ke ko japi riká japalí biteili.

16. ¿Piri ta biné Sansón jitra?

¹⁶ Tákoré Sansón risoa ikili echi namuti jitra japi ke aʼlá isili, ke riweli iʼwérili isiá japi Jeobá nakili. Jiti la, tamujé ayénachó ke ti siwésaré japalí ti ke aʼlá nokisaa alí echi jitra ati wikawásaká bilé nóchali o ati busuré iyárami nísaká. Newalabo japi Jeobá ko a bijí we natéami niraa tamó iné (Sal. 103:8-10). Tákoré ti ke aʼlá nokali, ati checho ku we natéami nipo Jeobá jitra japi riká Sansón.

17, 18. ¿Chúriká mi iʼwiri japi isili Michael? (Ayénachó iné echi imágenes).

¹⁷ Ma inepo japi ikili bilé remalí Michael riwéami. Echi ko siervo ministerial nili alí precursor regular, alí we iʼwérili isié nóchilia Jeobá. Nalí echi ko isili bilé namuti japi ke aʼlá nili, jiti la ma ke omérili olayá echi nóchali echoná congregación. Echi ko jéaní: “Japalí kecho ikiyé echi namuti, ani we iʼwérili isié nóchilia Jeobá. Nalí ke sayiná ani níliki japi ni ma ke bilé namuti omerie isiá. Nijé ko machiyé japi Jeobá ke siné tamí riwema, nalí ani nárika isié achi siné kaachi checho ni ku we aʼlá amigo nima echi yúa o achi ni omérima checho ku olayá nóchali echoná congregación japi riká chabé”.

¹⁸ ¡Michael we aʼlá isili ke siwea! Echi ko  jéaní: “Ani iʼwérili isiki aminabi muliwia Jeobá. Japi tamí iʼwírili ko nili, ne sulachí jonsa raʼichia Jeobá yúa, binea echi Biblia alí natia japi ni biné”. Pe aminana, Michael ko checho ku olali echi nóchali echoná congregación, alí jipi ko anciano ju alí precursor regular. Echi ko jéaní: “Japi riká nokali echi ancianos alí echi hermanos, tamí newalárili japi Jeobá ko a bijí tamí we galé. Ani checho ku omeri we aʼlá nóchilia Jeobá alí kilí nilia. Japi ni ikili tamí binérili japi Jeobá ko a omeri ku wikawia echi pagótami japi ne bichíwali omona nili”. Japi riká Michael, ati nokisáaká namuti japi ke aʼlá ju, ati bichíwisaré japi Jeobá ko a bijí we natéami niraa tamó iné alí japi ta narepo echi namuti aʼláala japi echi nijima ati iʼwérili nokisáaká aʼlá ku nokayá alí ti tánisaká japi echi tamó iʼwírima (Sal. 86:5; Prov. 28:13).

19. ¿Chúriká mi iʼwírili japi isili Sansón?

¹⁹ Jenaʼí binelíwami ata bineli jaré namuti bi japi isili Sansón. Tákoré echi ko ke sébali aʼlá isíami nili alí ke aʼlá isili japalí koruli Dalila, echi ko ke siweli alí aminabi iʼwérili isili nóchilia Jeobá. Alí Jeobá ko a bijí we natéami niraa ineli alí ayénachó néeli isimia namuti we natéami. Echi ko ineli japi riká bilé rijoi we bichíyami alí isili japi echi riwalá oserúa chukúbama echoná Hebreos capítulo 11 japoná uchuwi sinéami jarecho pagótami riwalá japi we nijéwami nili. We ti kanili machiyá japi tamujé Onolá Jeobá we tamó galé alí japi echi ko tamó iyá jiwérili japalí ti olasa karú ikiwáami alí ti newalesa iʼwírili. Jiti la, japi riká Sansón, tánipo Jeobá: “Périkó, tamí newalá. Oh, Onorúami, tamí iyá jiwérili” (Juec. 16:28).