1. ¿Piri namuti jilírami ikili Jehoás, Uzías alí Josías?

 ¿CHUMI nílimili bilé towí ka o remalí ma, silíami niya echoná Onorúami puéblowala? ¿Chúriká mi isímili nulayá? Echi Biblia raʼicha jaré kúruwi jitra japi kuuchi ka jonsa nuláami nili echoná Judá. Japi riká, Jehoás ko 7 bamíbami nili, Uzías ko 16 alí Josías ko 8. ¡We jilí nili echi nóchali japi olali! Tákoré we jilí nili echi nóchali, sinéami echi olali japi newaleli anachamia echi karú ikiwáami alí echi riká aʼlá nokimea.

2. ¿Chúsiá we aʼlá ju binea japi nokali Jehoás, Uzías alí Josías?

² A bichíwali ju japi tamujé ko ke silíami ju, nalí jepuná bikiá silíami jitra japi uchuwi echoná Biblia, ati biné namuti we natéami. Japi riká, echi namuti jitra japi aʼlá nátika nokali alí ke aʼlá nátika, tamó bineri chúsiá we natéami ju aʼlá machiyá jépuká nima tamujé amígowala, ke niráami niya alí sinibí iʼwírili tania Jeobá.

3. ¿Chúriká iʼwírili Jehoás echi busuréliami japi Jehoiadá nijili?

³ Aʼlá nátika isí japi riká Jehoás. Japalí Jehoás taa nili, echi onolá ko mukuli alí echi sumo sacerdote Jehoiadá isili weelia japi riká ko binoy nolá alí binérili wiká namuti Jeobá jitra. Jehoás ko we aʼlá namuti isili jiti a nijéwili echi busuréliami japi Jehoiadá nijili. Jiti la nóchili Jeobá alí iʼwírili echi pueblo jiti echi riká cho nokimea. Ayénachó iʼwírili jiti ku atewárami nima echi templo (2 Crón. 24:1, 2, 4, 13, 14).

4. ¿Chúriká tamó iʼwiri we natéami niraa inea echi nulalíwami japi Jeobá nijí? (Proverbios 2:1, 10-12).

⁴ Mujé wénwala o jarecho pagótami mi binériaká galea Jeobá alí nijewia echi, jepuná ko ju japi riká bilé chiliwéliami we natéami (leeri Proverbios 2:1, 10-12). Echi wénwala omeri bineria echi kúchuwala sinúrika niraa. Ma  inepo japi isili Katia onolá iʼwírimia echi malala jiti aʼlá nátika isima. Sinibí rawé japalí simíaye echoná escuela, echi ko raʼichie echi malala yúa japi aní echi texto diario. Katia ko jenaʼí: “Japi ta raʼichie tamí iʼwirie anachia echi jilírami namuti japi ikiyé ibili rawé”. Ayénachó a keʼré japi mujé wénwala mi anema japi mi nijéwima japi aní echi Biblia, alí mujé ko nílimiré japi echi ke mi riwé isiá japi mujé nakí. Nalí, ¿piri mi iʼwírima nijewia japi echi mi ané? Bilé hermana Anastasia riwéami, ruyé japi echi ko newalá japi echi wénwala ke bi aneli piri namuti ke isima, nalí ayénachó ruyeli chúsiá. Echi ko jéaní: “Jepuná tamí iʼwírili aʼlá inamia japi nijé wénwala ke bi tamí anéi japi ni ke isima jaré namuti, nalí japi echi riká nokayé jiti we tamí galé alí tamí tibúnali”.

5. ¿Chu nílitima mujé wénwala alí Jeobá japi mi isimí? (Proverbios 22:6; 23:15, 24, 25).

⁵ Ami nijéwisaká echi busuréliami japi mujé wénwala mi iyá néeka echi Biblia, echi ko we kanílima. Ayénachó ami we kanílitima Jeobá alí mi sinibí echi amígowala nima (leeri Proverbios 22:6; 23:15, 24, 25). ¿Kechi ko mi mayé japi we aʼlá ju japi mi isima japi riká isili Jehoás?

6. ¿Jépuká kipuli Jehoás, alí piri ikili echi namuti jitra japi isili? (2 Crónicas 24:17, 18).

⁶ Biné echi namuti jitra japi ke aʼlá nátika isili Jehoás. Japalí ma Jehoiadá mukuli, Jehoás ko napawili ke aʼlá amigos yúa (leeri 2 Crónicas 24:17, 18). Echi ko kipuli echi busuréliami japi anili echi príncipes Judá piréami japi ke nijéwami nili Jeobá. Jehoás ke kipusa riweili jiti echi ko we chati namuti nokáami nili (Prov. 1:10). Nalí echi ko we chati isili japalí kipuli echi pagótami alí nijéwili. Alí japalí Zacarías busuré iyali, echi ko nulali japi miʼlirúami nima (2 Crón. 24:20, 21; Mat. 23:35). ¡We chati nili japi isili Jehoás! Echi ko ke aʼlá nátami nili. Ne kulí ko echi ko aʼlá isíami nili, nalí miná ko bilé apóstata nílili alí bilé miʼáami. Alí pe aminana japi Jehoás nóchiliami nili nokali ku miʼayá (2 Crón. 24:22-25). ¡Jehoás a nijéwilaká Jeobá alí japi echi nijéwami nili, echi ko we aʼlá bitélimili! ¿Piri mi biné jepuná jitra?

7. ¿Jépuká nísaré mujé amígowala? (Ayénachó iné echi foto).

⁷ Echi namuti japi ke aʼlá nátika isili Jehoás, tamó bineri bilé namuti we natéami: japi ta we aʼlá amigos olásaré japi tamó iʼwírima we galea Jeobá alí japi  kanílitinali echi. Alí ati omeri olayá amigos japi ke chopi ikí bamíbami ju japi riká tamujé. Newalá japi Jehoás ko we remalí nili Jehoiadá yúa. Natá mujé amígowala jitra alí nárika isí: “¿Achi tamí iʼwiri aminabi we bichiwia Jeobá? ¿Achi tamí iʼwiri jiti ni aminabi nijéwami nima Jeobá? ¿Achi kanili raʼichia Jeobá jitra alí japi biné echoná Biblia? ¿Achi riwiwi japi Jeobá nulá? ¿Achi tamí busuré iyá japalí ni ke aʼlá isisa o wechi ko tamí ané bi japi nijé kipúnali?” (Prov. 27:5, 6, 17). Mujé amígowala ke galéaká Jeobá, ke nísaré mujé amígowala. Nalí mujé amígowala a galéaká Jeobá, kiti riwé echi amigos. ¡Echi ko we mi iʼwírima! (Prov. 13:20).

8. ¿Piri namuti mi natásaré ami néeaká redes sociales?

⁸ Echi redes sociales we tamó iʼwiri jiti oméripo raʼichia tamujé téemala yúa alí amigos. Nalí jaré ko uchá fotos alí videos echi namuti jitra japi ralali o japi nokali, jiti jarecho inema. Ami néeaká echi redes sociales, nárika isí: “¿Piri ni nakí japi natama jarecho jepuná jitra? ¿Achi ni iʼwérili iyánali jarecho o wechi ko ni nakí japi simárika raʼichama tamí jitra? ¿Achi ni riwé japi echi namuti japi jarecho uchá echoná redes sociales isima japi ni cha riká natama, raʼichama alí isínalima?”. Siné kaachi echi hermano Nathan Knorr, japi nili Aʼlá Nisériami, nijili jepuná busuréliami: “Kiti kanílitinalisí echi pagótami, jiti pe aminana emi ke wesi kanílitima. Kanílitisi Jeobá alí timí ayénachó kanílitima sinéami japi echi nijéwami ju”.

9. ¿Piri isili Uzías jiti Jeobá iʼwírili? (2 Crónicas 26:1-5).

⁹ Aʼlá nátika isí japi riká Uzías. Remalí ka, echi silíami Uzías ke niráami nili alí bineli “majaa echi Onorúami ne bichíwali”. Echi ko biteili 68 bamíali, alí ne sojí sinibí Jeobá ko iʼwírili echi (leeri 2 Crónicas 26:1-5). Uzías ko niyúrili nikoa wiká naciones japi sayérili echi Onorúami puéblowala alí isili japi echoná Jerusalén we aʼlá tibuta wilimea (2 Crón. 26:6-15). Uzías ko we kanílili jiti Jeobá iʼwírili isiá wiká namuti (Ecl. 3:12, 13).

10. ¿Piri ikili Uzías?

¹⁰ Biné echi namuti jitra japi ke aʼlá nátika isili Uzías. Echi silíami Uzías sinibí nuláami nili alí jarecho ko sinibí nijéwili japi echi anili. Jiti la a keʼré japi echi ko nátili japi omerie isiá japi echi binoy nakí. Siné kaachi, echi ko bakili echoná templo Jeobá níwala alí ikósili echi incienso, bilé namuti japi echi silíami ko ke omérili isiá (2 Crón. 26:16-18). Echi sumo sacerdote Azarías raʼámili Uzías, nalí echi ko we iyoli. Uzías ko ke nijéwili Jeobá, jiti la Jeobá ko isili japi nayuma lepra jitra (2 Crón. 26:19-21). ¡Uzías ke niráami nílaká, echi ko we aʼlá bitélimili!

11. ¿Piri isimí bilé pagótami japi ke niráami ju? (Ayénachó iné echi fotos).

¹¹ Japalí Uzías bilé silíami we omériami nili, echi ko ma ke newalali japi Jeobá isili japi we omériami nima. ¿Piri ta biné jepuná jitra? Japi ta ke siné wikawásaré japi Jeobá ju japi tamó iʼwiri echi nóchilia alí japi isimí japi aʼlá pirélipo. Ke ti siné aniboa japi tamujé awénili omeri nokayá suwaba echi namuti, nalí sinibí walubéala anepo Jeobá (1 Cor. 4:7). b Ke ti niráami nísaré alí ti newalásaré japi ta ke sébali aʼlá nokáami ju alí ti newalé japi jarecho tamó raʼámima. Bilé hermano japi aminá  60 bamíbami ju osali: “Ani bineki japi ni ke we natéami niraa inésaré nijé binoy. Japalí bilé tamí ané japi ni ke aʼlá isili, aní iʼwérili isimí aʼlá ku isiá alí echi riká aminabi nóchilia Jeobá”. Sinibí ti ke niráami nísaká alí ti majaa nílisaká Jeobá, ati we aʼlá pirélipo (Prov. 22:4).

12. Japalí Josías remalí nili, ¿piri isili aamia Jeobá? (2 Crónicas 34:1-3).

¹² Aʼlá nátika isí japi riká Josías. Josías ko chotásili aa Jeobá japalí remalí nili. Echi ko we aʼlá machinalie Onorúami alí isínilie japi echi nakí. Nalí Josías jitra we jilí nili silíami niya, jiti echalí ko wikabéala echi pagótami nijewie echi dioses ke bichíwali. Echi ko ke majáami nisa riweili jiti nimima echi religión ne bichíwali. ¡Alí a echi riká isili! Japalí echi ko suwábili echi dioses ke bichíwali echoná país, echi ko kecho bijí 20 bamíbami nili (leeri 2 Crónicas 34:1-3).

13. Ami katúwika raʼichásaká Jeobá yúa, ¿piri ikimea?

¹³ Tákoré mi we remalí ke, mujé ko a omeri niya japi riká Josías. Nalí, ¿chúriká mi isima? Aa Jeobá alí aminabi biné japi chu isíami ju echi. Isiá jepuná mi iʼwírima jiti mi katúwika raʼichama Jeobá yúa. Alí, ¿piri ikimea ami katúwika raʼichásaká Jeobá yúa? Luke, japi pakoli japalí 14 bamíbami nili, jéanili: “Jipi jonsa ani wabé natéami niraa inema bachá nóchilia Jeobá alí ni we iʼwérili isima kanílitimia echi” (Mar. 12:30). Ami echi riká cho isísaká, ami narema wiká namuti aʼláala.

14. ¿Chúriká noká jaré remalí japi riká echi silíami Josías?

¹⁴ ¿Piri namuti jilírami ikí jaré remalí japi Jeobá nijéwami ju? Johan, japi pakoli japalí 12 bamíbami nili, aní japi echi compañeros echoná escuela iʼwérili ané japi pewama cigarrillos electrónicos o vapear. ¿Piri isimí Johan jiti ke isima echi chati namuti? Echi ko nata japi nayuma a pewásaká echi cigarrillos electrónicos alí japi ma ke amigo nima Jeobá yúa. Bilé tiwé Rachel riwéami, japi pakoli japalí 14 bamíbami nili, aní japi isimí  anachamia echi namuti jilírami japi ikí echoná escuela: “Ani iʼwérili isimí natia echi namuti japi ni bineli Jeobá jitra alí japi aní echi Biblia. Japi riká, japalí ni biné echi historia jitra echoná escuela, ani newalá bilé ejemplo Biblia nirúami o japi aní echi profecías. Alí isini kaachi japalí ni raʼicha bilé compañero yúa, ani newalá bilé texto japi ni omeri ruyea alí japi iʼwírima echi”. A keʼré japi echi namuti jilírami japi mi ikí ke ju japi riká ikili Josías, nalí ami omeri aʼlá nátika isiá alí we nijéwami niya japi riká echi. Ami anachásaká jipi jonsa echi namuti jilírami, ayénachó mi anachama pe aminana.

15. ¿Piri iʼwírili Josías jiti ke riwema nijewia Jeobá? (2 Crónicas 34:14, 18-21).

¹⁵ Japalí echi silíami Josías 26 bamíbami nili, echi ko chotásili ku atewia echi templo. Alí japalí nochia járili, riwirúami nili “echi libro japoná oserúa uchuwi Jeobá Nulalila, japi nijírami nili Moisés jitra”. Ma kipusa japi aniyé echi libro, echi silíami ko iʼwérili isili nijewia japi aniyé echoná (leeri 2 Crónicas 34:14, 18-21). ¿Achi mi kanílisa nili sinibí leeria echi Biblia? Ma mi echi riká isíaká, ¿achi mi galé japi aní echoná? ¿Achi mi osaká riwésimi jaré versículos japi mi iʼwírima? Luke, japi ta jitra raʼíchiki echoná párrafo 13, olá bilé cuaderno japoná osísimi echi namuti we natéami japi biné. ¿Achi mi mayé japi echi riká isiá ayénachó mi iʼwírima néwalayá echi textos alí echi namuti we natéami japi mi bineli? Japalí mi aminabi machí echi Biblia alí mi we galé japi aní echoná, aminabi mi we inílima nóchinalia Jeobá. Alí japi riká echi silíami Josías, echi Onorúami Raʼicháala mi iʼwírima aʼlá isiá.

16. ¿Chúsiá Josías isili bilé namuti japi ke aʼlá nili, alí piri ta biné?

¹⁶ Biné echi namuti jitra japi ke aʼlá nátika isili Josías. Japalí Josías pe 39 bamíbami  nili, echi ko isili bilé namuti japi ke aʼlá nili, jiti la miʼliri. Echi ko ke tánili Jeobá japi echi anema japi isima, nalí binoy nátika echi riká isili (2 Crón. 35:20-25). ¿Piri ta biné? Japi ke natéami ju chu kipi ta bamibi o chu kipi ta bamíali olá binea echi Biblia, aminabi iʼwérili nokisáré aa Jeobá. Alí, ¿chúriká aapo Jeobá? Tánipo japi tamó iʼwírima, binepo echi Raʼicháala alí kipupo echi busuréliami japi nijí japi we aʼlá amigos ju Jeobá yúa. Ati echi riká nokisáaká, a keʼré japi ta ke nokiboa echi namuti japi we chati ju alí ti kanílika pirélipo (Sant. 1:25).

17. ¿Piri ta biné echi bikiá silíami jitra?

¹⁷ Echi kúruwi alí iwé omeri nokayá wiká namuti we semati. Japi riká nokali Jehoás, Uzías alí Josías néwariwéliti japi echi kuuchi alí echi remalí a omeri aʼlá nátika nokayá alí kanílitia Jeobá. A bichíwali ju japi echi ko ke aʼlá nátika nokali jaré namuti alí risoa nílili. Nalí, ami isísaká echi aʼláala namuti japi nokali echi alí mi iʼwérili isísaká ke isiá echi chati namuti japi echi nokali, mujé ko we aʼlá bitélima.

18. ¿Chu iyiri ejemplos néwariwéliti japi ta a omeri aʼlá pirea? (Ayénachó iné echi dibujo).

¹⁸ Echi Biblia ayénachó raʼicha jarecho kúruwi jitra japi mulíwili Jeobá, kanílitili echi alí aʼlá pireili, japi riká David. Japalí remalí nili, echi ko nakili Jeobá amígowala niya alí pe aminana echi ko bilé silíami we aʼlá nijéwami nili. A bichíwali ju japi echi isili jaré namuti we chati, nalí Onorúami ko ineli japi riká bilé rijoi we aʼlá nijéwami (1 Rey. 3:6; 9:4, 5; 14:8). Ami binésaká japi isili David, jepuná mi iʼwírima jiti mi ke riwema nijewia Jeobá. Ayénachó mi omeri aminabi binea Marcos o Timoteo jitra. Okuánika echi chotásili nóchilia Jeobá japalí remalí nili alí ke riweli echi riká nokayá. Jiti echi riká nokali, echi ko we kanílitili Jeobá alí aʼlá pireili.

19. ¿Chúriká mi bitélimiré?

¹⁹ ¿Chúriká mi bitélinali pe aminana? Japi riká mi isimí jipi, néwariwéliti chúriká mi bitélima pe aminana. Ami we bichíwisaká Jeobá alí ke mi isísaká echi namuti japi riká mujé binoy nata, echi ko mi iʼwírima jiti mi aʼlá nátika isima (Prov. 20:24). Mujé ko a omeri we aʼlá bitea alí we kanílika. Kiti wikawá japi Jeobá ko we natéami niraa iné suwaba japi mi isimí echi jitra. We aʼlá ju nóchilia tamujé Onolá Jeobá japi we tamó galé. ¡Ke nirú bilecho nóchali japi wabé tamó kaníliti!