1, 2. ¿Chúsiá we aʼlá ju japi Jeobá tamó niwali jiti ta aminabi wabé kaníliami nipo japalí ta nijí alí ke ko japalí ta naré?

 JEOBÁ ko tamó niwali jiti aminabi wabé kaníliami nipo japalí ti iyá jarecho alí ke ko japalí ti naré (Hech. 20:35, TNM). A bichíwali ju japalí bilé tamó iyá bilé namuti, ati we kanili. Nalí, ati aminabi wabé kanili japalí tamujé ju japi noká jaré namuti jarecho jitra. We aʼlá ju japi Jeobá echi riká tamó niwali. ¿Chúsiá?

² Jiti echi riká Jeobá ko isimí japi tamujé aboi nokiboa jaré namuti jiti aminabi wabé kaníliami nipo. Jiti la, ati áasaká chúriká iʼwíripo jarecho, ati olabo wiká namuti japi ta jitra kanílipo. ¿Kechi ko Jeobá we simárika tamó niwali? (Sal. 139:14).

3. ¿Chúsiá echoná Biblia aní japi Jeobá ju bilé Onorúami we kaníliami?

³ Echoná Biblia aní japi we kaníliami ju echi japi nijíami ju, jiti la ti machí japi Jeobá ko ju bilé Onorúami we kaníliami (1 Tim. 1:11, TNM). Echi ko ne bachá nijíami nili alí ke nirú bilecho japi riká echi. Japi riká anili echi apóstol Pablo, “Riosi jítita piré jenaʼí wichimóbachi, ayénachó Binói jítita ʼyena” (Hech. 17:28). Ayénachó, echoná Biblia aní japi “Riosi echoʼná ripá riwigachi jonsa jula ne suwaba echi wabé galabéala máputa ʼyárami ju” (Sant. 1:17).

4. ¿Piri tamó iʼwírima aminabi we kaníliami niya?

⁴ Ata wabé kaníliami nínalaká, ¿piri ta nokisáré? Jenaʼí binelíwami ata binepo japi ta a omeri nijíami niya japi riká Jeobá (Efes. 5:1). Ayénachó binepo piri ta nokisáré ata iníliaká japi jarecho ke natéami niraa iné japi ta noká echi jitra. Suwaba jepuná tamó iʼwírima jiti ta ke riwepo kanila nijía jarecho, alí jiti ta aminabi wabé kaníliami nipo.

 NIJÍAMI NIPO JAPI RIKÁ JEOBÁ

5. ¿Piri namuti tamó iyá Jeobá?

⁵ Ma inepo jaré namuti japi néwariwéliti japi Jeobá we nijíami ju. Japi riká, echi ko tamó iyá echi namuti japi ta newalé. A keʼré japi ta ke sinibí olabo namuti we natéami, nalí echi ko tamó iyá japi ta a newalé, japi riká echi koʼwáami, napacha alí japoná ti pirélipo (Sal. 4:8; Mat. 6:31-33; 1 Tim. 6:6-8). Alí ke echi riká bi isimí jiti echi riká isísaré. Nalí, ¿chúsiá echi riká isimí?

6. ¿Piri tamó bineri japi aní Mateo 6:25, 26?

⁶ Jeobá ko we tamó galé, jiti la echi ko tamó iyá japi ta newalé. Jesús echi jitra raʼíchili echoná Mateo 6:25, 26 (TNM, leeri). Jena versículo, Jesús raʼíchili echi chuluwí jitra japalí anili: “Echi ko ke tasi ichá, ke cho ʼwi alí ke cho jariwé echoná rikówachi”. Alí miná ko nárili: “¿Alí kechi ko emi nalí wabé natéami ju echi chuluwí yúa?”. Echi japi binérili ko nili japi Jeobá ko wabé natéami niraa iné echi japi nijéwami ju echi namuti jákami yúa. Alí Jeobá ko we aʼlá tibú echi namuti jákami, jiti la ti machí japi wabé aʼlá tamó tibuma. Jiti Jeobá ju tamujé Onolá alí we tamó galé, echi ko tamó iyá japi ta newalé (Sal. 145:16; Mat. 6:32).

7. ¿Chu iyiri ju jaré namuti japi riká ti néwariwélitipo japi ta nijíami ju japi riká Jeobá? (Ayénachó iné echi fotos).

⁷ Japi riká Jeobá, tamujé ayénachó we galé jarecho, jiti la ti iyá echi namuti japi newalé. Japi riká, ¿achi mi machí bilé hermano japi newalé koʼwáami alí napacha? A keʼré japi Jeobá ko mi néema iyamia echi hermano japi newalé. Japi ta Jeobá nijéwami ju, ati machirúami ju japi riká we nijíami japalí karú ikisaa. Natabo japi ikili japalí niruili echi COVID-19. Wiká hermanos iyali jarecho echi namuti japi newaleli, japi riká koʼwáami, napacha alí jarecho si namuti. Ayénachó, wiká ko nijili donaciones jiti echi hermanos iʼwíritami nima omáana Wichimóbachi japalí karú ikisaa. Sinéami echi nokali japi riká aní Hebreos 13:16: “Ke siné ariwesi galabé olayá. Sinibí aʼnagupi nachútaga olasi mapu ikítamo níwa, mapujiti Riosi waminabi wabé kaníila mapalita echirigá olá”.

8. ¿Piri ta omeri nokayá jiti Jeobá tamó jiwérili iyá? (Filipenses 2:13).

⁸ Jeobá tamó jiwérili iyá. Echi ko wabé  jiwérami ju alí we kanila iyá jiwérili echi japi nijéwami ju (leeri Filipenses 2:13, TNM). ¿Ami siné kaachi jiwérili tánili Jeobá jiti mi iʼwírima ke isimia chati namuti, anachamia bilé jilírami namuti o jiti mi jiwérili olama echalí rawé? Japalí Jeobá mi kipuli alí mi iyali echi jiwérili, ami iníliré japi riká echi apóstol Pablo, japi osali: “Ani olá jiwérali isimia suwaba echi namuti matétarabá echi japi tamí jiwérali iyá” (Filip. 4:13, TNM).

9. ¿Chúriká ti nokiboa jiti nijíami nipo japi riká Jeobá? (Ayénachó iné echi foto).

⁹ Tamujé ko ke oméripo jiwérili iyayá jarecho japi riká isimí Jeobá. We be nalí, ati oméripo nijíami niya japi riká echi, néea tamujé jiwérali iʼwírimia jarecho. Japi riká, bilé hermano ma we ochérami nísaká o nayúami ma, ati oméripo ralilia echi namuti japi newalé o iʼwiria nochia echoná bitélachi. Alí ati omériaká si iʼwíripo biʼwayá echoná salón o atewia ma. Echi riká ti nokisáaká, ata we iʼwíripo echi hermanos.

10. ¿Chúriká néepo tamujé raʼicháala jiwérili iyamia jarecho?

¹⁰ Kiti wikawá japi echi raʼíchali japi ta aní jiwérili iyama jarecho. ¿Achi mi machí bilé japi ku kanílima anésiwa japi we aʼlá isimí, o bilé japi omona atí? Echi riká nísaká, ¿chúsiá mi ke isimí bilé namuti iʼwírimia echi? Japi riká simiyá inesia, raʼichia teléfono néeka, oselia bilé tarjeta o mensaje ma. Ke newalé japi mi animea wiká raʼíchali, nalí mi raʼichásaré ne sulachí jonsa, isini kaachi echi hermano o hermana, echi bi newalé ku kanílimia alí aminabi nijéwimia Jeobá (Prov. 12:25; Efes. 4:29).

11. Jiti Jeobá we nijíami ju, ¿chúriká tamó iʼwiri?

¹¹ Jeobá ko tamó iʼwiri jiti ta machíami nipo. Echi discípulo Santiago osali: “A jaré ʼyemi ketasi ʼme galá machíami níisagá, galá tansi Riosi”. Ayénachó jéanili: “Mapujiti Riosi sinibí ʼya mapurigá echi jaré bichíyami galá machíami níima, ayénachó Binói ke siné tamujé tamí riwélata” (Sant. 1:5). Japi riká aní na versículo, Jeobá ko we machíami ju alí ke binoy bi echi riká nínali, nalí ayénachó iʼwiri jarecho jiti machíami nima. Ayénachó “ke siné tamujé tamí riwélata”, jepuná ko aniwáami ju japi echi ko ke nakí japi ta riwela nílipo japalí ti iʼwírili tani echi, jiti ta machíami nipo. Nalí echi ko tamó ané japi ta iʼwírili tánipo (Prov. 2:1-6).

12. ¿Chúriká nokiboa bineria jarecho japi ta machí?

¹² Tamujé ayénachó omeri nokayá japi riká Jeobá. ¿Chúriká nokiboa? Bineria jarecho japi ta machí (Sal. 32:8).  Japi riká, ati omeri bineria echi japi kulí publicadores ju, jiti we aʼlá machimea nawesia. Alí echi ancianos kilí niraa bineri japi siervos ministeriales ju alí jarecho hermanos japi ma pakótami ju, jiti we aʼlá nochama echoná congregación. Ayénachó wiká hermanos alí hermanas japi we machíami ju nochia echoná construcción, tibúa alí atewia echi salones alí jarecho si, omeri bineria jarecho jiti echi riká cho nokimea.

13. ¿Chúriká ti omeri nokayá japi riká Jeobá japalí ti bineri jarecho?

¹³ Japalí ti bineri jarecho, ati nokisáré japi riká isimí Jeobá. Jenaʼí ati bineli japi Jeobá ko iʼwiri alí bineri sinéami jiti machíami nima. Tamujé ayénachó binérisaré jarecho japi ta machí. Ati suwaba ruyésaré japi ta machí alí ke ti natásaré japi echi riká ti nokisáaká, echi japi ta bineri tamó iyema echi nóchali japi ta noká, alí ke cho ti anisáré: “¡Tamí ko ke wesi binérili! Jiti la echi ayénachó binoy binésaré”. Ke bilé japi atí echoná Jeobá puéblowala echi riká natásaré. Tamujé ko ke bi ruyé jarecho japi ta machí, nalí ayénachó ati iʼwérili noká bineria (1 Tes. 2:8). Ati bichiwi japi echi riká ti nokisáaká, echi ko we aʼlá machimea alí binérima jarecho (2 Tim. 2:1, 2, TNM). Sinéami ti iʼwérili nokisáaká echi riká nokayá, ati aminabi wabé machíami nipo alí wabé kaníliami.

ATI INÍLIAKÁ JAPI KE NATÉAMI NIRAA INÉ JAPI TA NOKÁ ECHI JITRA

14. ¿Piri ikí japalí ti noká namuti jarecho jitra?

¹⁴ Wisabé niraa japalí ti noká namuti jarecho jitra, alí wabé japalí ti noká namuti echi hermanos jitra, echi ko néwariwéliti japi we natéami niraa iné japi ta nokali echi jitra, japalí tamó matétara iyá. A keʼré osaká jaré raʼíchali o sinúrika niraa (Col. 3:15). Echi namuti isimí japi ta we kanílipo.

15. Japalí jaré ke tamó matétara iyá echi namuti jitra japi ta noká, ¿piri ta newalásaré?

¹⁵ Nalí be, ke sinéami japi ta iʼwiri tamó matétara iyá echi namuti jitra japi ta noká. A keʼré japi ta riweli nokayá jaré namuti echi iʼwírimia o ata suwábiliré winomí, nalí miná ko ti inili japi echi pagótami ke natéami niraa iné japi ta nokali echi jitra. Echi riká ikisáaká, ¿piri tamó iʼwírima jiti ta ke siwepo alí ke riwepo kaníliami niya? Newalabo japi aní Hechos 20:35. Tamujé ko kanili jiti ta nijí, ke ko jiti echi pagótami tamó matétara iyá. Jiti la ti iʼwérili nokisáré sinibí kanílika iyayá jarecho, tákoré ti inili japi ke natéami niraa iné japi ta noká. Ma inepo jaré namuti japi tamó iʼwírima.

16. ¿Piri ta newalásaré japalí ta iyá jarecho?

¹⁶ Ati newalásaré japalí ti nijíami ju, ati noká japi riká Jeobá. Echi ko iyá namuti we aʼláala sinéami echi pagótami, tákoré a matétara nijí o ke (Mat. 5:43-48). Alí echi ko ayénachó jériká ané japi echi nijéwami ju: “Ketasi buwesi mapurigá aboni ʼyemi mi ku kuwana natétama”. Alí ayénachó ané: “[Nijé] binói ʼyemi mi galá ku natétama” (Luc. 6:35). Jiti la, ke ti omona nílisaré japalí jarecho ke tamó matétara iyá. Ati newalásaré japi Jeobá ko tamó natétima jiti ta noká namuti we aʼláala jarecho jitra alí jiti ta kanila nijí (Prov. 19:17; 2 Cor. 9:7).

17. ¿Piri bilecho namuti tamó iʼwírima jiti ta nokiboa japi riká isimí Jeobá? (Lucas 14:12-14).

¹⁷ Bilecho namuti japi tamó iʼwírima jiti ta nokiboa japi riká isimí Jeobá, echi ko ju nokayá japi riká anili Jesús echoná Lucas 14:12-14 (leeri). A bichíwali ju japi  ke chati ju japi ta simá nokiboa o iʼwíripo echi japi ayénachó omeri tamó iʼwiria. Nalí, ¿piri ta nokisáré ati machisáaká japi ta iʼwírili bilé jiti ta nakí japi echi ko ayénachó tamó iʼwírima? Echi riká nísaká, ati iʼwérili nokisáré nokayá japi riká Jesús anili: simá nokiboa echi yúa japi ta machí japi ke omérima tamó iʼwiria. Echi riká ti nokisáaká, we ti kaníliami nipo jiti ta noká japi riká isimí Jeobá. Ayénachó, ke ti buwésaká japi jarecho ayénachó tamó iʼwírima japalí ti echi iʼwiri, sinibí ta kanila nijibo tákoré echi japi ta iyá ke tamó matétara nijí.

18. ¿Piri tamó iʼwírima jiti ke cha riká natabo jarecho jitra?

¹⁸ Ke ti cha riká natásaré jarecho jitra (1 Cor. 13:7). Ati nokisáaká bilé namuti jarecho jitra, nalí echi ko ke bilé namuti tamó anésaká, ati omeri nárika nokayá jepuná: “¿Achi ne bichíwali ke natéami niraa ineli japi ni isili, o ke newaláliré matétara tamí iyayá?”. Ayénachó a keʼré japi nirú jarecho namuti japi jitra echi pagótami ke tamó matétara iyali. A keʼré japi echi ko a we natéami niraa ineli japi ta nokali echi jitra, nalí we jilí niraa aniyá japi inili, o riwela iníliré japi jarecho echi iʼwírima. Echi riká iníliré jiti chabé echi ko omérili isiá wiká namuti jarecho jitra, nalí jipi ko ma ke omeri. Tákoré echi riká ju, ati we galésaká echi hermanos, ke ti cha riká natabo echi jitra alí ti we kanílika nijibo (Efes. 4:2).

19, 20. ¿Chúsiá we aʼlá ju japi ta kilí buwéami nipo? (Ayénachó iné echi fotos).

¹⁹ Ati kilí buwésaré. Echi silíami Salomón ayénachó anili bilé namuti we natéami japi ta nokisáré: “Pa echi pan echoná baʼwírili, jiti miná ko ma wiká rawé simírisa ami ku riwimea” (Ecl. 11:1). Jepuná raʼíchali tamó bineri japi isini kaachi jaré pagótami ke sapú tamó matétara iyama. Ma inepo bilé ejemplo japi echi riká ikili.

²⁰ Ma jaré bamíali simírili japalí bilé superintendente de circuito upila, osélili  jaré raʼíchali bilé hermana japi kulí pakoli iʼwérili iyamia jiti sinibí nijéwami nima. Nalí, ma osá naó bamíali simírisa, echi hermana osélili bilé carta echi superintendente de circuito upila japoná anéi: “Ani mi oséliki jiti ni mi ruyénali japi mi we tamí iʼwírili, tákoré mujé ko ke machiyé”. Ayénachó aniyé: “We semati nili japi mi tamí osélili, nalí japi we tamí iʼwírili ko ju echi texto echi Biblia jitra, alí ke ni siné wikáwili”. a Ma ruyesa echi namuti japi ikili, echi ko anili: “Isini kaachi ani inilie ma riwénalia testigo Jeobá niya. Nalí echi texto japi mi osali, tamí jiwérili iyali jiti ni aminabi nijéwami nima. Echi osá naó bamíali japi simírili, ke niruili bilecho namuti japi wabé tamí iʼwírili”. ¡We kaníliliré echi superintendente de circuito upila japalí nareli echi carta! Tamujé, ati nokálaká jaré namuti jarecho jitra, a keʼré japi pe aminana matétara iyárami nipo “ma wiká rawé simírisa”.

21. ¿Chúsiá mi mayé japi we natéami ju japi ta iʼwérili nokiboa nijíami niya japi riká Jeobá?

²¹ Japi riká ti ma bineli, Jeobá ko tamó niwali jiti ta wabé kaníliami nipo japalí ta nijí alí ke ko japalí ta naré. Ati simá inili japalí ti iʼwiri echi hermanos alí ti simá inili japalí echi ko tamó matétara iyá. Nalí, ke echi riká nokisáaká, ata kanili jiti ta we aʼlá nokali. Tákoré ti chuwé namuti nijili, newalabo japi aní 2 Crónicas 25:9, japoná ruyé japi Jeobá wabé wiká namuti tamó iyama. ¡Ke nirú bilecho japi wabé nijíami ju japi riká Jeobá! Alí ti we kanili machiyá japi echi ko tamó ku natétima. Jiti la, we natéami ju japi ta iʼwérili nokiboa nijíami niya japi riká tamujé Onolá Jeobá.