1, 2. ¿Chúsiá ti we kaníliami ju japi ta Jeobá nijewi? (Santiago 1:22-25).

 JEOBÁ alí binoy Nolá nakí japi ta we kaníliami nipo. Echi japi osali Salmo 119:2 anili: “We kaníliami ju echi japi nijewi japi echi nulá, japi aa echi ne sulachí jonsa”. Alí Jesús ayénachó anili: “¡Waminabi ne wabé kaníliami ju siʼnéami echi jaré mapu ikí galá kipusa Riosi Raʼíchala, echirigá ne galá nijéwaga olako!” (Luc. 11:28).

² Japi ta Jeobá nijewi, we ti kaníliami ju. ¿Chúsiá? Nirú wiká namuti japi jitra ti we kanili. Bilé echi ko ju japi ta sinibí leeri echi Onorúami Raʼicháala alí ti iʼwérili noká nijewia japi ta biné echoná (leeri Santiago 1:22-25).

3. ¿Piri ti aʼláala namuti naré japalí ta nijewi japi ta biné echoná Biblia?

³ ¿Piri ti aʼláala namuti naré japalí ta nijewi japi ta biné echoná Biblia? Bilé ko ju japi ta kaníliti Jeobá, alí machiyá jepuná tamó iʼwiri kaníliami niya (Ecl. 12:13). Alí bilecho ko ju japi ata nijéwisaká echi busuréliami japi aní echoná Biblia, tamó iʼwiri jiti ta kanílipo tamujé téemala yúa alí we aʼlá amigos nipo echi hermanos yúa echoná congregación. A keʼré japi mujé binoy ma ineli japi echi riká ju. Bilecho namuti ko ju japi ta ke me ikí namuti we jilírami japi riká ikí jarecho japi ke nijewi japi Jeobá nulá. Jepuná ko ju japi riká anili echi silíami David japalí raʼíchili echi Jeobá nuláala jitra echoná bilé canción: “Aʼlá nijéwami nísaká aʼlá natétitami nima” (Sal. 19:7-11).

4. ¿Chúsiá isini kaachi a jilí ju nokayá japi ta biné echoná Biblia?

⁴ Nalí be, isini kaachi a jilí ju nokayá japi ta biné echoná Biblia. Jiti la, tákoré ti wiká namuti nokayé, ati iʼwérili nokisáré jiti ikíripo leeria alí binea echi Biblia, jiti  echi riká inámipo japi Jeobá nakí japi ta nokiboa. Jenaʼí binelíwami binepo jaré namuti japi tamó iʼwírima sinibí rawé leeria echi Biblia. Ayénachó ti binepo piri tamó iʼwírima natia japi ta leeri alí we aʼlá machiyá chúriká nokiboa japi riká ti biné.

IʼWÉRILI ISÍ JITI MI IKÍRIMA LEERIA ECHI BIBLIA SINIBÍ RAWÉ

5. ¿Piri ju echi wiká nóchali japi ta noká?

⁵ Sinéami japi ta testigo Jeobá ju, ati noká wiká nóchali tamujé aboi níwala alí jarecho nóchali japi echi Biblia aní japi ta nokisáré. Japi riká, ne sojí sinéami tamujé, ati nochásaré jiti ta olabo japi ta newalé alí tamujé téemala si (1 Tim. 5:8). Wiká hermanos tibú téemala japi nayúami ju o ma ochérami ju. Alí sinéami ti iʼwérili nokisáré jiti ta aboi ke nayupo. Ayénachó ti olá nóchali echoná congregación. Bilé nóchali we natéami ko ju, simiyá nawisasia. Jiti ta noká wiká namuti, a keʼré japi mi nárika isima: “¿Piri ni omeri isiá jiti ni ikírima leeria echi Biblia sinibí rawé, natia japi ni leeri alí nijewia japi ni biné echoná?”.

6. ¿Piri mi isísaré jiti mi sinibí rawé leérima echi Biblia? (Ayénachó iné echi foto).

⁶ Leeria echi Biblia ko ju bilé namuti wabé natéami echi cristianos jitra, jiti la ti iʼwérili nokisáré sinibí echi riká nokayá (Filip. 1:10). Echi libro Salmos chotasi aniyá japi echi rijoi japi we kaníliami ju “we kanila leeri Jeobá nuláala; sinibí rawé alí rokó leeri echi nuláala alí we aʼlá nata japi leeri” (Sal. 1:1, 2). Jepuná jitra ati machí japi ta iʼwérili nokisáré jiti ikíripo leeria echi Biblia. Nalí, ¿chúrikó wabé aʼlá ju leeria echi Biblia? Ibili tamujé machí. We be nalí, japi natéami ko ju, japi ta aʼlá machiboa chúrikó wabé aʼlá nima jiti ta sinibí rawé leéripo. Bilé hermano Víctor riwéami jéaní: “Ani kanili biʼá leeria echi Biblia. Ke ni echi riká isimí jiti ni kanili biʼá oyesia, nalí ani machí japi echalí ke nirú namuti japi tamí nukumema alí japi ke tamí riwema kanila leériami echi  Biblia. Echalí ke ni wiká namuti nata alí ni we aʼlá biné”. ¿Achi mi nata japi riká Víctor? Nárika isí: “Tamí jitra, ¿chúrikó wabé aʼlá ju leeria echi Biblia?”.

AʼLÁ NATÁ JAPI MI LEERI

7, 8. Néeka bilé ejemplo ruyé piri ta ke nokisáré japalí ti leeri echi Biblia.

⁷ Ma ti aʼlá machiyáaká chúrikó leéripo echi Biblia, ayénachó ti newalásaré japi ta ke bi leérisaré, nalí ti aʼlá inámisaré japi ta leeri. Sinibí rawé ata leeri wiká namuti, nalí wisabé niraa ke ti newalá japi ta leérili. ¡Ke aʼlá nima echi riká cho ikisaa echi Biblia yúa! A keʼré japi ta ma nátili chu kipi capítulos leéripo sinibí rawé, alí jepuná ko we aʼlá ju, ayénachó japi ta iʼwérili nokiboa echi riká nokayá japi riká ti ma nátili (1 Cor. 9:26). Nalí ke bi ju leeria echi Biblia. Ata nakiyáaká japi ta leeri tamó iʼwírima, ata nokisáré bilecho namuti.

⁸ Natabo jepuná ejemplo. Echi ukí we natéami ju jiti iʼwiri japi ochérima echi riyawi. Nalí sapú waʼlú ukusáaká, waʼlú baʼwí bochima alí ke iʼwírima echi riyawi. Jiti la, wabé aʼlá ju japi ke me jiwera ukumea jiti echi riká aʼlá samibama echi weʼé alí echi riyawi a omérima ocheria. Echi riká cho, japalí ta leeri echi Biblia, ati ke sapú leérisaré jiti ta oméripo aʼlá inamia, néwalayá alí nokayá japi riká ti bineli (Sant. 1:24).

9. ¿Piri ta nokisáré ati we sapú leériaká echi Biblia?

⁹ Natá japi mi leeria atí echi Biblia alí mi inili japi mi we sapú leeri. Echi riká mi ikiyáaká, ¿piri mi isísaré? Kilí niraa leeri jiti echi riká a mi omérima aʼlá natia japi mi leeri. Nalí, ami jilí niráaká natia japi mi leeri, kiti siwé. Ami omeri leeria kuabi versículos jiti mi ikírima natia japi mi leeri o che wilí binea jiti mi omérima aʼlá natia. Víctor, japi ta jitra raʼíchiki echoná párrafo 6, aní: “Ke ni wiká versículos leeri, a keʼré japi bilepi bi capítulo. Jiti ni we biʼá leeri, ani omeri suwaba rawé natia japi ni leérili”. Ke natéami ju  chu kipi capítulos o versículos ti leeri o chu kilí ti noká leeria, nalí wabé natéami ko ju japi ta kilí niraa leéripo jiti ta oméripo aʼlá natia japi ta leeri (Sal. 119:97; iné echi recuadro “ Náriwami japi mi iʼwírima aʼlá natia japi mi leeri”).

10. Néeka bilé ejemplo ruyé chúriká mi omeri isiá japi riká mi leeri echoná Biblia (1 Tesalonicenses 5:17, 18).

¹⁰ Ke natéami ju chúrikó mi leeri echi Biblia alí chu kilipi, nalí wabé natéami ko ju japi mi isima japi riká mi biné echoná. Jiti la, japalí mi leeri echi Biblia, nárika isí: “¿Chúriká ni omeri isiá jepuná jipi rawé o pe aminana?”. Japi riká, natá japi mi leeria atí 1 Tesalonicenses 5:17, 18 (leeri). Miná ko, pe teeli natá japi chúriká mi raʼicha Jeobá yúa. ¿Achi mi ne sulachí jonsa raʼicha Jeobá yúa? ¿Chu kisapi mi raʼicha echi yúa? ¿Chu iyiri ju echi namuti japi mi jitra matétara iyánali? A keʼré japi mi nata bikiá namuti japi mi jitra matétara iyama Jeobá. Ami pe teeli natásaká jepuná namuti, mujé ko ke bi leeria asimea echi Biblia, nalí ayénachó ma mi chotásima isiá japi mi leeri. Alí sinibí rawé ami echi riká isísaká japi riká mi leeri echoná Biblia, pe aminana mujé ko wabé aʼlá nijéwami nima Jeobá. Nalí, ¿piri mi omeri isiá ami inésaká japi nirú wiká namuti japi mi aminabi wabé aʼlá isísaré?

AʼLÁ NATÁ CHU IYIRI JU ECHI NAMUTI JAPI MI OMERI BACHÁ ISIÁ

11. ¿Chúsiá isini kaachi ami siwea nílimiré japalí mi leeri echi Biblia? Ruyé bilé ejemplo.

¹¹ Japalí mi leeri echi Biblia, a keʼré japi mi siwea nílima inea japi mi wiká namuti aʼlá ku isísaré. Natá jepuná namuti. Bilé rawé ami leeri jaré versículos japoná aní japi ke aʼlá ju japi jaré pagótami bi galepo alí jarecho ko ke (Sant. 2:1-8). Jiti mi iné japi mi simá isísaré jarecho yúa, echi riká mi isimí. ¡Echi ko we aʼlá ju! Miná ko, baʼalínala rawé, ami leeri jaré textos japoná aní japi mi ke cha riká raʼichásaré (Sant. 3:1-12). Alí mi newalá japi isini kaachi ami anili namuti japi ke aʼlá nili o ke mi simárika raʼíchili, alí mi nata japi mi wabé aʼlá raʼichama alí iʼwérili iyama jarecho. Ma bikiá rawé kaachi, ami leeri japi ke amígowala nísaré echi pagótami yúa japi ke nijewi Jeobá (Sant. 4:4-12). Alí mi nata japi mi wabé aʼlá tibuka isísaré echi películas jitra japi mi iné alí echi música japi mi kipú. Alí naó rawé kaachi, ma mi siwea nílimiré natia japi wiká namuti ju japi mi aʼlá ku isísaré.

12. ¿Chúsiá mi ke siwésaré ami leérisaká echoná Biblia japi nirú wiká namuti japi mi aʼlá ku isísaré? (Ayénachó iné echi nota).

 ¹² Ami inésaká japi nirú wiká namuti japi mi aʼlá ku isísaré, kiti siwé. Jiti jepuná ko néwariwéliti japi mujé ko we aʼlá nátika leeri echi Biblia, japi mi ke niráami ju alí japi mi we aʼlá machí chu iyiri ju echi namuti japi mi aʼlá ku isísaré. a Ayénachó newalá japi sinéami tamujé sinibí iʼwérili nokisáré jiti ta “siʼnú bukulíwami galabé oláami” niraa ku nipo (Col. 3:10). Nalí, ¿piri mi iʼwírima aminabi isiá japi riká mi biné echoná Biblia?

13. ¿Piri mi iʼwírima jiti mi a omérima isiá echi namuti japi mi aʼlá ku isísaré? (Ayénachó iné echi fotos).

¹³ Bilé namuti japi mi iʼwírima ko ju, aʼlá machiyá japi mi ke omeri sinepi niraa isiá suwaba echi namuti japi mi aʼlá ku isísaré, nalí japi mi kilipi niraa isima ibili echi namuti (Prov. 11:2). Japi riká, ami omeri isiá jepuná: osá suwaba echi namuti japi mi aʼlá ku isísaré, miná ko natá bilé o okuá namuti japi mi bachá isima alí pe aminana isí echi jaréala. Jiti la, nárika isí jepuná: “¿Chu iyiri namuti aʼlá nima japi ni bachá chotásima isiá?”.

14. ¿Chu iyiri ju echi namuti japi mi omérima bachá isiá?

¹⁴ Bachá isí echi namuti japi mi ke jilí niraa isiá o japi mi wabé newalé aʼlá ku isiá. Alí japalí mi ma aʼlá machisá chu iyiri ju echi namuti japi mi bachá chotásima isiá, aa echoná publicaciones echi namuti jitra. Japi riká echoná Índice de las publicaciones Watch Tower o echoná Guía de estudio para los testigos de Jehová. Ayénachó raʼichá Jeobá yúa alí tani  japi mi iʼwírima jiti mi a isínalima echi namuti alí japi mi jiwérili iyama (Filip. 2:13, TNM). Miná ko isí echi namuti japi mi bineli. Japalí mi inésima japi mi ma aʼlá ku isili bilé namuti, jepuná mi iʼwérili iyama jiti mi a isínalima echi jaréala namuti japi mi osali. Ayénachó, a keʼré japi echi namuti japi mi ma aʼlá ku isili, mi iʼwírima jiti mi ke me jilí nirama isiá echi jaréala namuti alí mi sapú echi riká isima.

ISÍ JAPI RIKÁ MI BINÉ ECHONÁ BIBLIA

15. ¿Piri namuti ke chopi iyiri ju japi Jeobá nijéwami ju alí jarecho pagótami japi leeri echi Biblia? (1 Tesalonicenses 2:13).

¹⁵ Wiká pagótami aní japi ma wisabé niraa leérili echi Biblia. Nalí, ¿achi ne bichíwali bichiwi japi aní echoná? ¿Achi ne bichíwali noká japi riká bineli echoná Biblia? Wikabéala echi ke tasi echi riká noká. Nalí, japi ta Jeobá nijéwami ju ko, ¡we sinúrika ju! Japi riká echi cristianos bachá siglo piréami, tamujé ko ayénachó iné echi Biblia “mapurigá ne bichíwali Riosi Raʼíchala niráa”. Jiti la, ati iʼwérili noká sinibí rawé nokayá japi riká ti biné echoná (leeri 1 Tesalonicenses 2:13).

16. ¿Piri tamó iʼwírima nokayá japi riká ti biné echoná Biblia?

¹⁶ Isini kaachi a jilí ju leeria echi Biblia alí isiá japi riká ti biné echoná. A keʼré japi ta we jilí niraa ikiria jiti leéripo echi Biblia. Ayénachó a keʼré japi ta we sapú leeri alí ke ti aʼlá inami japi ta leeri. O a keʼré japi ta we siwea nílipo inesa japi wiká namuti ju japi ta aʼlá ku nokisáré. Nalí tákoré echi riká ju, Jeobá ko a tamó iʼwírima. We be nalí, tamujé ko riwésaré japi echi tamó iʼwírima. ¿Chúriká? Ati iʼwérili nokisáré leeria echi Biblia sinibí rawé, ke ti wikawásaré japi ta biné echoná alí ti nokisáré japi riká ti biné. Echi riká, ati aminabi leérisaká echi Biblia alí ti nijéwisaká japi aní echoná, ati aminabi we kaníliami nipo (Sant. 1:25).