Ani ochériki bamíali 1934. Nijé wénwala ko piréami nili echomí Suiza, nalí simíali pirélisia echomí Timmins, bilé pueblo echomí Ontario (Canadá), japoná wiká pagótami nocha echoná mina. Ne nokí bamíali 1939, nijé iyela chotásili leeria echi oselí La Atalaya alí simiyá echoná napawíliwachi japi niwá echi testigo Jeobá. Tamí yurie alí usani nijé rejimala si. Nijé iyela ko sapú pakoli.

Nijé onolá ke kanílili japalí nijé iyela pakoli, nalí echi ko ke siweli. Ke riweli nijewia Jeobá, ayénachó echi bamíali 1940, japalí echi gobierno ke riweli japi echi testigos nawesama echoná Canadá. We simá isíami ke alí we riwíwili nijé onolá, tákoré echi ko sinibí we cha riká raʼichie echi. Jiti we aʼlá isíami nili, echi tamí iʼwírili alí kini rejimala jiti ayénachó Testigos nipo. We aʼlá nili japi pe aminana kini onolá ma sinúrika ko nili alí chotásili we simá isíami niya tamujé yúa.

Nasipa inárachi bamíali 1950, ani simiki bilé waʼlú napawíliwachi riwéami “Aumento de la Teocracia”, echomí Nueva York. Echoná ni machiki wiká hermanos alí hermanas omáana Wichimóbachi piréami, alí ni kipuki we semati namuti japi ikili echi hermanos japi simíali echoná Escuela de Galaad. Jepuná we tamí iʼwérili iyali jiti ni aminabi nóchilima Jeobá. Chabé jonsa nijé ko ma natie nóchilimia Jeobá tiempo completo niraa, nalí jepuná isili japi ni aminabi we inílima echi riká isínalia. Jiti la, japalí ni kulí ku séaki bitichí, ani júlaki bilé solicitud jiti ni precursor regular nima. Echi sucursal japi wilí echoná Canadá tamí aneki japi ni bachá pakoma. Alí echi riká ni isiki 1 inárachi octubre bamíali 1950. Bilé michá simírisa, ani  chotásiki precursor regular niya alí tamí júali echomí Kapuskasing, bilé pueblo japi we miká ju nijé bitélachi jonsa.

Bamíali 1951, echi sucursal iʼwérili iyali echi hermanos japi francés raʼíchami nili, jiti simama iʼwírimia echomí Quebec japoná echi pagótami francés niraa raʼicha alí japoná niruili pe kuabi Testigos. Nijé ko machiyé raʼichia francés alí inglés, jiti la ni simiki alí tamí juláari echomí Rouyn. Ke ni wesi machiyé echoná alí, japi riká ni aniki kulí chotasia, ani machiyé bilepi kalí japoná ni nawama. Nalí we ni kaníliki echoná nawayá, jiti Marcel alí nijé we ti aʼlá amigos níliki alí ni simíriki naó bamíali we kanílika nóchilia echoná, japoná pe aminana tamí wilaari japi riká precursor especial.

Japalí ni a bijí atiyé echomí Quebec, ani bayeri echoná clase 26 echi Escuela de Galaad, japi nili echomí South Lansing (Nueva York). Ani we kaníliki. Echi escuela sunili 12 inárachi febrero bamíali 1956, alí tamí juláari japoná jipi ko ju Ghana, b echomí África Occidental. Kecho bijí simiyá, ani ku roʼiki Canadá jiti ni atéwima jaré oselí. Ani mayéi japi kuabi tarali bi nima.

Nalí be, ani asali kichao michá echomí Toronto japalí chéami ni olasa echi oselí japi ni newaleli. Echalí ani ripiki bilé niwíkami yúa Cripps riwéami. Echi ko olayé bilé ranala riwéami Sheila, alí ti koruki anakupi niraa. Japalí ni ma nátiki anemia japi ta niwipo, ma nawali echi oselí japi ni newaleli jiti ni simea echomí África. Sheila alí nijé ati raʼíchiki Jeobá yúa alí ti aniki japi aʼlá nima japi ni simea japoná tamí juláari, nalí japi ta a bijí raʼíchipo cartas niraa, jiti pe aminana ati oméripo niwía. Tákoré we jilí nili echi riká nokayá, pe aminana ati ineki japi ti we aʼlá nokali.

Bilé michá ni isiki seaya echomí Accra, japi ju echoná Ghana, ani simiki trenchi, bárcochi  alí avionchi. Echoná ani wilaari japi riká superintendente de distrito alí ni simisaa riweili omáana echoná Ghana, Costa de Marfil alí Togolandia (jipi ko ju Togo). Echi sucursal tamí iyali bilé troca japi omeri omáana simiyá. Ne sojí sinibí ani bineli iyenie, alí ni we kanílika simirie inesia echi hermanos.

Sábado alí oméachi, ani nochie iʼwiria echoná waʼlú napawíliwachi japi bilé rawé rojorá. Ke ti olayé japoná ti napawipo, jiti la echi hermanos usí jitra alí echi rakú sawala, niwayé japi jitra ipórima japoná ti muchuwie. Jiti ke niruili japi jitra rituma echi koʼwáami, echi hermanos ko ma echoná uchúchali echi namuti jákami japi miʼlimea jiti iyama koʼwáami sinéami japi siyé echoná.

Echoná waʼlú napawíliwachi isini kaachi ikiyé namuti japi isili japi ta we achiboa. Ani newalá japalí echi hermano Herb Jennings, c japi misionero nili, nawesia wilili alí chuwétali bilé toro echomí nasipa we jiwérami maa simírili japoná muchuwie echi hermanos. Echi toro anajumi máali, jiti la echi hermano Herb ke namú aniká ripili. Miná ko, naó hermanos we jiwérami ku chapili echi toro alí ku tóoli japalí echi hermanos sikachonia mochili.

Nasipa tarali ani riwirie echi película riwéami La Sociedad del Nuevo Mundo en acción echi pueblos mulipi nirúami. Ani wijawa uchayé bilé chiní rosákami, buleka echoná okuá tona o okuá rojá ma. Echi pagótami we kanilie inea alí wiká ke siné inéami nili bilé película. We kanila sikachonie japalí inéi wiká pagótami pakóami. Echi película iʼwírili jiti machimea japi omáana nirú wiká pagótami japi Jeobá nijéwami ju.

Japalí ni ma okuá bamibi echoná África, ani simiki bilé asamblea internacional bamíali 1958 echomí ciudad Nueva York. ¡We ni kaníliki checho ku inea Sheila! Echi ko nochia asali japi riká precursora especial echomí Quebec alí echoná jonsa simili echoná asamblea. Ati anakupi oséliki néeka echi carta alí japalí ti napawika ku mochili, ani aneki achi tamí yúa niwínilia alí echi ko anili japi ayena. Ani oséliki echi hermano Knorr d nárimia achi Sheila omerie simiyá echoná Escuela de Galaad alí miná ko japi  julárami nima echomí África, alí echi hermano anili japi ayena. Japalí Sheila nawali echomí Ghana, ati niwiki echomí Accra, 3 inárachi octubre 1959. Ati iníliki japi Jeobá tamó iʼwírili jiti ta bachá nokali japi echi aní.

Bamíali 1961, ata juláari echomí Camerún japoná ni aneri japi ni iʼwírima niwayá bilé kulíwami sucursal. Ani olali wiká nóchali alí ayénachó tamí wilaari japi riká siervo de sucursal, jiti la ni wiká namuti binesa riweili. Bamíali 1965, ati machiki japi Sheila ropéami nili alí ti we jilí niraki natia japi ta wénwala nipo. Nalí japalí ti ma we kaníliki jiti ta wénwala nipo alí ti chotásiki akarewia jaré namuti jiti ku simabo echomí Canadá, ata ikili bilé namuti we jilírami.

Echi taa muchi mukuli ropálachi asaká. Echi doctor tamó aneli japi towí nili. Tákoré ma 50 bamíali simírili, ati bijí newalá japi ikili. Nalí be, tákoré ti we risoa nili, ati nátiki japi a bijí ripibo nóchilia Jeobá echoná.

Echi hermanos Camerún piréami, wisabé niraa najátarami nili jiti ke iʼwírinali echi política. Alí echi namuti aminabi wabé jilí nílisili ma séachi echi votaciones. 13 inárachi mayo 1970 ikili bilé namuti japi ta we majae: echi Gobierno ma ke nakíwili japi echi testigo Jeobá nawisama. Ati iyeri echi sucursal we baʼóami japi ta olali, japi malí michá bi néerami nili. Alí kecho séachi bilé tarali, sinéami echi misioneros japi ta muchuwie echoná, ati machí awátami nili echoná país jonsa. Ati we omona nilie riwea echi hermanos jiti ta we galéi alí ti we natie piri ikimea.

Usani michá ti mochili echoná sucursal japi wilí echomí Francia, alí echoná jonsa ati iʼwirie echi hermanos Camerún piréami. Diciembre bamíali 1970, ati juláari echoná sucursal japi wilí echomí Nigeria, japi chotásili inea chúriká nokiwá echi nóchali echoná Camerún. Echi hermanos Nigeria piréami we kanílika tamó nareli, alí ti we kanílika simárili suwaba echi bamíali japalí ti mochili echoná.

Bamíali 1973 ati nokali bilé namuti we jilírami. Sheila ko ma wilí pe nayúa iyénili. Jiti la, japalí ti simíaki bilé asamblea echomí Nueva York, echi ko nalaka tamí jéaneki: “Ma ni ke omeri anachia. We ni risí, alí ni sinibí rawé nayú”. Echi ko ma 14 bamíali iyénili tamí yúa nóchilia Jeobá echomí África Occidental. Nijé ko we galeli japi echi ko we nóchami ke, nalí ata sinúrika nokisaa riweili jaré namuti. Japalí ti ma napawika raʼíchiki alí ti iʼwírili tániki Jeobá, ati aniki japi checho ku simabo echomí Canadá japoná echi omérima owia. Riwea nóchilia Jeobá echomí África alí tiempo completo niraa, we jilí nili alí ti we omóniki.

Ma sisaa echomí Canadá, bilé amigo tamí iyali nóchali ralinea echi trocas echoná bilé pueblo japi norte ju echomí Toronto. Ati rentárili bilé kalí alí ti ralaki jaré namuti ke me natéami jiti echi riká ke wikajá ripibo. Echi riká ti nokaki jiti checho ku oméripo  nóchilia Jeobá tiempo completo niraa. Alí pe aminana a echi riká ikili. Ke ti mayéi japi sapú echi riká ikimea.

Sábado rawé ani chotásiki nochia japi riká voluntario iʼwiria niwayá bilé Salón de Asambleas echomí Norval (Ontario). Pe aminana, ani aneri japi ni nima superintendente echoná Salón de Asambleas. Alí japi riká Sheila ma ku saʼwisie, ati nátiki japi narepo echi kulíwami asignación. Jiti la junio inárachi 1974, ati simíaki pirélisia biléana kalí japi wilili echoná salón. Ati we kanilie checho ku nóchilia Jeobá tiempo completo niraa.

Sheila ko aminabi ku saʼwísili. Alí ma simírisa okuá bamíali tamó aneri japi ta nochabo japi riká circuito, alí ti aneki japi a simabo. Ata simíaki inesia echi congregaciones echomí Manitoba nirúami japoná we ruláachi ke, nalí echi hermanos echoná congregaciones we simá nokáami nili. Ata bineli japi ke me natéami ju japoná ti nochi Jeobá, nalí japi wabé natéami ko ju japi ta iʼwérili nokiboa echi nóchilia.

Ati wiká bamíali nóchili japi riká circuito japalí ti bayeri nochamia Betel echomí Canadá bamíali 1978. Pe aminana, ani bineki bilé namuti we natéami alí japi we tamí omonáritili. Ani aneri japi ni nijima bilé nawésali japi rojorá bilé hora miná nasipa francés raʼicháliami niraa echoná napawíliwachi we natéami japi nili echomí Montreal. Nalí echi nawésali japi ni nijili ke isili japi echi hermanos aʼlá kipúa mochima, jiti la bilé hermano japi nochie echoná Departamento de Servicio raʼíchili tamí yúa. Echalí ke ni machiyé bilé namuti japi ni jipi ma aʼlá machí: japi nijé ko ke aʼlá machí nijía nawésali. Ke ni aʼlá isili iyoa japalí echi hermano tamí busuré iyali. Ani inilie japi ta we sinúrika nátami ju alí japi echi hermano tamí aneli bi namuti japi ni ke aʼlá isili. Ke ni aʼlá kipuli echi busuréliami jiti ni ineli jépuká tamí iyali alí chúriká tamí iyali.

Ma jaré rawé simírisa, bilé hermano japi nochie echoná Comité de Sucursal tamí yúa raʼíchili. Ani aneki japi ni ke aʼlá isili japalí ni busuré iyáari alí japi ni we omona inilie echi jitra. Miná ko, ani simiki ku wikáwili tánimia echi hermano japi tamí busuré iyali, alí echi ko we kanílika tamí ku wikáwili. Jepuná tamí binérili bilé namuti we natéami japi ni ke siné wikawama, japi ni ke niráami nísaré (Prov. 16:18). Ani wisabé niraa raʼíchili Jeobá yúa echi namuti jitra japi ni ke aʼlá isili, alí ni nata ma ke echi riká isimia japalí tamí busuré iyásiwa.

Ma simírikami 40 bamíali ju japi ni nocha echoná Betel japi wilí echomí Canadá, alí 1985 jonsa ani nocha echoná Comité de Sucursal. Febrero 2021, Sheila mukuli alí ni we niwemi. Ayénachó nijé nayú. Nalí ani we kanilia atí nóchilia Jeobá alí ke ni newa inili simíriachi echi rawé (Ecl. 5:20, nota). A bichíwali ju japi ni ikili wiká namuti jilírami, nalí wabé ni rasíruka kaníliki nóchilia Jeobá. Ma 70 bamíali ju japi ni nochi Jeobá tiempo completo niraa alí ni we kanílili. Ani tani Jeobá japi sinéami echi kúruwi alí iwé we natéami niraa inema nóchilia echi, jiti ni machí japi echi riká echi ko we kanilia pirélima.