Jiti echi 70 discípulos ke mochili Jesús yúa japalí niwali echi Conmemoración, ke ti natásaré japi echi ko riweli Jesús o japi Jesús ma ke nakili japi echi yúa járima. Echalí Jesús ko asinali bi echi apóstoles yúa.

Jesús ko a bijí nakili japi echi 12 apóstoles alí echi 70 discípulos echi yúa járima. Jesús ko bachá chapili 12 rijoi alí riwarali apóstoles (Luc. 6:12-16). Japalí asali echoná Galilea “napabuli echi jaré makói miná okuá” alí “júuli aboni nawisánala” alí “ku saʼwánala echi jaré nayúkami” (Luc. 9:1-6). Miná ko echomí sur echoná Judea, “chapili auché jaré kicháosa makói rijói bichíyami, mapurigá Binói nawisánala julama [...] okuá niráa” (Luc. 9:51; 10:1). Jiti la omáana japoná járili nawesia niruili discípulos.

Echi judíos japi Jesús najátowala nílisili, ke riweli omawia echi Pascua sinibí bamíali echi téemala yúa (Éx. 12:6-11, 17-20). Kecho bijí mukuyá, Jesús ko simili echi apóstoles yúa echomí Jerusalén. Nalí echi ko ke aneli sinéami echi discípulos Judea piréami, Galilea alí Perea, japi omawama echi Pascua echi yúa. Echi ko asinali bi echi apóstoles yúa echalí rawé. Jiti la aneli :“¡Nijeni ne wabé nakili mapurigani koʼmea jeʼná boʼwá sapala awérami ʼyemi mi yuwa mapalini abijí ke cho miʼlirúami níisa!” (Luc. 22:15).

¿Alí chúsiá asinali bi echi apóstoles yúa? Jiti ma mulipi mukumea riweili japi riká “echi Riosi níwala Méchuli [...] mapu we omériami ju biʼwayá jenaʼí wichimóbachi piréami chati olalila” (Juan 1:29). Mukumea riweili echoná Jerusalén, japoná chabé jonsa nijírami nili echi chiliwéliami iyamia Jeobá. Echi Jesús mukúala isima riweili japi ke omérili olayá echi israelitas japi koʼali echi méchuli echalí rokojó japalí buyali Egipto jonsa (1 Cor. 5:7, 8). Matétarabá jiti Jesús mukuli, echi 12 apóstoles nima riweili japoná jonsa chotásima echi congregación cristiana (Efes. 2:20-22). We natéami ju machiyá japi echi Jerusalén ripá nirúami olá “makói miná okuá oʼweli rité” alí echoná “osirúami níili ibili aboni riwalá mapurigá riwéami níili echi jaré makói miná okuá nawésami” o apóstoles (Apoc. 21:10-14). Echi apóstoles nokimea riweili bilé nóchali we natéami jiti ikimea japi riká Jeobá nakili. Jiti la ti machí japi echi jitra Jesús ko asinali bi echi apóstoles yúa omawamia echi upáwala Pascua alí miná ko niwamia echi Conmemoración.

Echi 70 discípulos alí jaréala, ke mochili Jesús yúa echalí rokojó. Nalí sinéami echi discípulos narema riweili bilé namuti aʼláala echi Conmemoración jitra. ¿Piri namuti nili? Sinéami japi cristianos ungidos nima, omérima riweili nulayá ripá rewegachi japi riká Jesús aneli echi apóstoles echalí rokojó (Luc. 22:29, 30).