Ani ochériki echomí Roma, japoná echi pagótami we risóati nili. Ke ni machili nijé iyela alí ke me raʼichie nijé onolá yúa, jiti la ke ni kanilie. Bineli ni ochériki japoná piré wiká pagótami cha nokáami.

Japalí ni 10 bamibi ani chotásiki chikoa, alí japalí ni 12 bamibi ani chotásiki machinia nijé bitélachi jonsa. Wisabé niraa nijé onolá tamí ku machí pali echoná cárcel jonsa. Sinibí ni iyoa iyenie echi pagótami yúa alí ni we aparúami ke. Japalí ni 14 bamibi, checho ni ku simiki bitichí jonsa alí ma ke siné ku roʼiki. Nijé biteili echoná calles alí néeli echi drogas. Rokojó, irapie bilé carro alí echoná ochiyé; alí miná ko ni simiyé aamia japoná nirúe baʼwí jiti ni ubama.

We ni chikoli, japi riká bolsas echoná calles alí wiká namuti echoná pagótami pirélachi. Sinéami machiyé japi ni we machíami ke chikoa, jiti la, jarecho tamí bayeli jiti ni echi yúa chikoma. Echalí jonsa, ani chotásiki chikosia echoná bancos. Jarecho chikórami japi ni yúa napawíe we tamí riwiwie jiti nijé we aparúami ke. Ke ni siné riwei echi pistola, alí ni echi yúa ochiyé. Nijé we aparúami nili alí néeli echi drogas, ayénachó chikórami nili, wiká umukí yúa nasawili alí cha riká raʼíchiami ke. Echi policías sinibí tamí chapinalie alí wisabé niraa tamí tóoli echi cárcel. Jaré bamíali echi riká ni ikili.

Japalí ni ku machíniki echoná cárcel, ani simiki inemia bilé tía. Ke ni machiyé japi echi alí okuá primos testigos Jeobá nili. Echi ko tamí bayeli bilé napawíliwachi. Japalí ti siki echoná Salón japoná biné echi testigo Jeobá, ani ripiki mulipi yéwichi jiti ni machinalie jepi nawayé alí jepi ku machinie. Nijé ko toyé nijé níwala pistola.

We ni baʼóriki echi napawíliwachi. Sinéami japi echoná muchuwie we kanilie. Ani newalá japi echi testigos we simá nokali tamí yúa. ¡Ke siné echi riká ni nilie!

Jiti la ni chotásiki binea echi Biblia Testigos yúa. Ani bineki japi ni riwésaré isiá echi chati namuti japi ni isié. Ani nijéwiki japi riká aní Proverbios 13:20, japi aní: “Echi japi iyena pagótami yúa we aʼlá nátami, ayénachó we aʼlá natama. Nalí japi iyena pagótami yúa ke aʼlá nátami, risoa nílima”. Ani bineki japi ke napawisa riweili echi chikórami yúa. We jilí nili, nalí Jeobá tamí iʼwírili.

Ayénachó ni riweki echi drogas alí pewia. Ani ripúniki nijé kupala. Ma ni riweki uchayá wilá alí ni riweki cha riká raʼichia. Ani níliki japi ni a omeri riwea japi chati ju.

Ke ni sineti kanílili binea alí leeria, jiti la we ni jilí niraki binea echi Biblia. Nalí be, kilipi niraa ani chotásiki galea Jeobá. Pe aminánami, we ni siwea nilie. Jénilayé japi Jeobá ma ke tamí wikawama echi namuti chati jitra japi ni isili. Japalí ni echi nili, ani leériki japi ikili echi David. Japalí cha isili echi David, Jeobá ko a ku wikáwili. Echi ko a tamí ku kanílitili (2 Samuel 11:1–12:13).

Ayénachó ni we jilí niraki simiyá nawisasia echi pagótami pirélachi (Mateo 28:19, 20). ¡Ani we majá nilie echi pagótami tamí riwisá japi ni chabé risoa olali! Nalí be, kilipi ni ma ke majá nilie alí miná ko we kanilie simiyá nawesasia Jeobá jitra, japi we galéami ju alí wikáwiami.

Binea Jeobá jitra tamí niyúbitili, jiti echi japi nijé amígowala nili echoná cárcel muchuwi alí jaré ko ma suwili. Jipi ko ni we kaníliami ju alí pe aminana ani narema wiká namuti aʼláala. Ani bineki ma ke niráami niya. Ayénachó ni we aʼlá nijéwami ju alí ni ma ke sapú iyóami ju, jiti la jipi ko ni kilí niraa bité echi pagótami yúa. Alí ni we kaníliami ju nijé upila yúa japi we semati ju. Echi ko Carmen rewé. Ati napawika bineri echi pagótami Jeobá jitra.

Jipi ko ni ma ke chikó. Isini kaachi ani nocha echoná banco. Nalí ke ni simí chikosia, jipi ko ni nocha biʼwíami wilayá.