Bilé onolá ko ané echi ranala japi kichao bamíbami ju: “Ma chabé, Onorúami ko niwali echi Wichimoba alí suwaba japi ikí nirú echoná. Ayénachó niwali echi rayénali, michá alí sipolí”. Echi ranala ko teeli nata ripí alí jéané: “Papá... ¿jepi niwali Onorúami?”.

Echi onolá ko jéané: “Ke bileti, Onorúami ko sinibí bitéami ju”. Echi towí ko kilí ripí kipusa japi aní echi onolá. Aminabi ochérisia, echi ko a bijí machinalia nili echi jitra, jiti ke mayea nili chúriká ochérili bilé japi ke niwárami nili. “¿Chúriká ju echi? Jiti echi universo ayénachó niwárami ju”. Nalí echi ko machinali jepi niwali Onorúami.

¿Piri aní echi Biblia? Ayénachó aní japi riká echi onolá aneli echi ranala. Moisés ko aneli Jeobá: “Kecho bijí nirúachi echi kawí o ke mi cho niwayachi echi Wichimoba alí echi wasá japoná ichawá, chabé jonsa alí sinibí mujé ju Onorúami” (Salmo 90:1, 2). Echi profeta Isaías chopi riká cho anili: “¿Wechi mi ke machí? O, ¿ke mi kipuli? Jeobá, japi niwali suwaba japi ikí nirú omáana wichimóbachi, echi ko sinibí bitéami ju” (Isaías 40:28). Ayénachó echi carta japi osali Judas aní japi echi Onorúami ne sinibí bitéami ju (Judas 25).

Jepuná versículos néwariwéliti japi Onorúami ko ne sinibí niraa bitélama o ke siné mukumea (1 Timoteo 1:17). Ayena, echi ko sinibí bitéami ju (Apocalipsis 1:8, TNM). Onorúami ko ke niwárami nili; ke bilé ité japi riká echi.

¿Chúsiá we jilí ju bichiwia jepuná namuti? Jiti tamujé ko ke wilí piré, jiti la ti tamujé ko ke inami chúsiá Jeobá sinibí bité. Japi riká, Jeobá ko iné mil bamíali japi riká bilé rawé jiti sinibí bité (2 Pedro 3:8). Inepo bilé ejemplo. Bilé ochípili pe 50 rawé bi bité. ¿Achi námima chu ju bitelia 70 u 80 bamíali japi riká bilé pagótami? ¡Ke tasi! Tamujé echi riká cho ju, japi riká bilé ochípili Onorúami yúa. Ke ti siné inámipo wiká namuti japi riká echi (Isaías 40:22; 55:8, 9). Jiti la we jilí ju inamia chu iyiri ju Onorúami.

Tákoré a jilí ju namia japi Onorúami sinibí bité, a echi riká ju. ¿Chúsiá? Jiti a bilé nísakó japi niwali Onorúami, echi ko nima ne Walúala japi niwali suwaba namuti (Apocalipsis 4:11). Nalí echoná Biblia aní japi Jeobá ju japi niwali suwaba namuti. Alí ayénachó ta machí japi echi universo bachá ko ke iteili (Génesis 1:1, 2). ¿Chúriká machínali? A bilé isili niwayá. Ayénachó echi ko bachá biteili echi Ranala yúa alí echi ángeles (Job 38:4, 7; Colosenses 1:15, TNM). Echi riká newaré japalí kecho niwayá echi namuti, Onorúami bineli asali. Ke niruili bilecho japi echi niwali.

Tamujé jitra alí echi universo a newaré japi a nirú bilé Onorúami japi sinibí bitéami ju. Echi ju japi niwali echi universo alí japi nulá echoná. Ayénachó echi bi ju japi niwali suwaba namuti japi ikí nirú jenaʼí Wichimóbachi (Job 33:4).