Ani ochériki echomí Sajonia, japi nili República Democrática Alemana (RDA). Echoná bitichí ko we simá nokáami ke, alí nijé wénwala ko tamí binérili namuti japi we natéami ju. Echi país República Democrática Alemana comunista nili, jiti la wiká pagótami japi piréili echoná Sajonia ke natéami niraa ineli echi religión. Nijé ke bichiwi Onorúami. Japalí ni jonsa dieciocho bamíbami ke, nijé ko ateo nili alí comunista.

¿Chúsiá ni comunista nili? Jiti ni nakiyé japi sinéami pagótami chopi riká pirélima. Alí ni nátiki japi suwaba namuti aʼlá rojanásaká, ke nirúlima pagótami japi risóati ju alí japi wiká namuti olá. Jiti la ni chotásiki nocha jarecho remalí yúa japi nocha echoná organización comunista. Japalí ni 14 bamíbami ke, ani nóchiki checho ku niwayá echi oselí japi ma ke néeliwa japi riká echi cartón alí periódico. Jiti la, echi silíami japi nulá Aue we kanili japi ni isimí jitra alí nokali japi ni we machirúami nima. Tákoré ni remalí nili, ma ni wiká wéala jáwami machiyé japi nulá Aue. Ani nili japi ni isimí tamí iʼwírima jiti ni pe aminana aʼlá bitélima.

Pe aminana ko, ma ke echi riká nili. Bamíali 1989, echi muro japi wilí Berlín imeli, alí echi gobierno comunista japi nulá Europa del Este, ma ke nulama. Wiká namuti ikísili japi ke tamí kanílitili. Japi riká echi japi ke bichiwie echi comunismo ke me natéami niraa ineni. Nalí, ¿chúsiá echi riká nili? ¿Kechi nulá echi comunismo japi sinéami chopi iyiri ju? Alí ko, ¿ke bichíwali nili japi riká nulayé echi comunismo? Inea suwaba echi namuti ke ni kanilie.

Ma ni ke natéami niraa ineni japi ni bachá bichiwie, jipi ko ni we kanili simea alí pintaria. Ani simí bilé escuela japoná binériwa simea jiti echi riká ni omérima simiyá universidad; echi riká ni isínali sinibí. Ma ni ke bilé natéami niraa ineni japi ni bineli taa ka. Nijé ko kaníliami nínali isiá jaré namuti; jiti la ni wiká tiwé yúa kochiyé. Nalí suwaba echi namuti japi ni isié ke tamí kanílitili, alí echi cuadros japi ni niwayé néwariwéliti japi ni ke kaníliami ju. Nalí ke ni machiyé chúriká nima pe aminana alí chúsiá ta piré jenaʼí.

Siné rawé ma aʼlí echoná escuélachi ani yúa asíbaki jaré remalí japi raʼicha muchuwi japi chúriká nima pe aminana. Echoná si asali Mandy, * japi testigo Jeobá ju. Echi ko tamí aneki: “Andreas, ami machináliaká chúsiá ti piré jenaʼí alí piri ikimea pe aminana, leeri japi aní echi Biblia”.

Ke ni me bichiwie suwaba japi tamí anéi, nalí jiti ni machinali jaré namuti, Mandy ko tamí leérili japi aní Daniel capítulo 2. Japalí ni ma leériki ke ni mayé japi echi namuti ruyema japi ni machinali. Echi profecía ko ruyé jaré isélikami jitra japi nuláami nili alí japi nulá jipi chéami. Mandy ayénachó tamí ruyeki jarecho profecías japi riká ikimea pe aminana. Jipi ko ni ma machí japi ni machinali. Nalí, ¿jépuká osali echi profecías? ¿Jépuká anili japi echi riká ikimea? ¿Néwariwéliti echi japi a bité Onorúami?

Ani machiki bilé niwíkami japi testigo Jeobá ju, Mandy amígowala. Echi tamí iʼwírili machiyá japi aní echi Biblia, echi ko riwéami ke Horst alí Angelika. Ayénachó ni machiki japi echi testigo Jeobá bi ju japi nee echi Onorúami rewalá alí bineri jarecho (Salmo 83:18; Mateo 6:9). Ani bineki japi Onorúami ko nakí japi echi pagótami we baʼóachi pirélima. Salmo 37:9 jéaní: “Japi a bichiwi ko Jeobá, kawí iyárami nima”. We ni kaníliki machisá japi sinéami pagótami japi iʼwérili noká ko Onorúami nijewia a omero sinibí pirelia.

Jilí nili isimia japi riká aní echi Biblia. Jiti ni we aʼlá siméami nili alí aʼlá pintáriami, ani we niráami nili; nalí ni bineki japi ni ke niráami nísaré. Ayénachó we jilí nili riwemia isiá echi namuti japi ni isíami nili. Ani waʼlú matétarabá iyá Jeobá jiti echi ko we galéami ju, kilí isíami alí natimáami sinéami yúa japi iʼwérili noká nijewia japi aní echi Biblia.

Japalí ni jonsa dieciocho bamíbami nili, ani we bichiwie comunismo alí ni ateo nili, nalí japi aní echi Biblia tamí iʼwírili jiti ni ma ke echi riká nima. Japi ni binéi tamí iʼwírili machiyá japi ikimea pe aminana. 1993 ko ni pakoki japi riká testigo Jeobá, alí bamíali 2000 ko ani niwiki Tabitha yúa, japi ayénachó testigo Jeobá nili. Jipi ko ti okuaka iʼwérili noká bineria echi pagótami japi aní echi Biblia .Wiká echi pagótami achó bichiwi echi comunismo alí ateo ju japi riká nijé nili bachá. We ni kanili iʼwiria echi pagótami machiyá Jeobá.

Japalí ni yúa napawí echi testigo Jeobá, nijé wénwala ko majali. Nalí pe aminana echi ko machili japi echi yúa napawía tamí iʼwírili. Ani we kanili jiti jipi echi ayénachó biné japi aní echi Biblia alí simía echi napawíliwachi.

Tabitha alí nijé si ati iʼwérili noká nijewia echi busuré japi Jeobá iyá echi japi niwíkami ju. Japi riká jepuná japi echi kunala alí echi upila, ke bilé pagótami isena yúa nasawima. Echi riká nokayá, ati we kaníliami ju (Hebreos 13:4).

Ma ni ke nárika isimí chúsiá ti piré jenaʼí o piri ikimea pe aminana. Jipi ko sinéami echi testigo Jeobá omáana Wichimóbachi piréami, a ju japi riká nijé téemala. Sinéami chopi iyiri ju alí ti we kaníliami ju anakupi niraa. Nijé ko sinibí nakili japi echi riká nima.