NATÁ japi mi iyena echoná museo japoná nirú namuti chabéwami. Ne sojí suwaba uwíkami ju o ma chiwali. Jaré ko ma ke jomarúami ju. Nalí, a nirú bilé japi a bijí aʼlá ju. Newaré japi riká niwali chabéi a bijí echi riká ju. Jiti la mi nari: “¿Achi kulíwami ju jarecho namuti yúa?”. “Ke —aní echi japi mi riwiri echi museo—, we chabéwami ju alí ke atewali”. Alí checho mi nari: “¿Wechi we aʼlá tibúrami nili?”. “Ke —aní echi rejoy—, jepuná ke namú ikili tákoré ikayá wilili alí samibali, alí ke cha ikili tákoré we cha olari”. Jiti la ami nátiré: “¿Piri jitra niwárami ju?”.

Echi Biblia echi riká cho ju japi riká echi namuti. Bilé libro we chabéwami ju jarecho yúa. Tákoré nirú jarecho oselí we chabéwami, ma uwíkami ju alí chiwákami. Wiká ma ke aʼlá ju jiti ma wiká bamíali simírili. Ayénachó japi aní echoná ma ke natéami ju jiti echi científicos ma machili kulíwami namuti. Ne sojí suwaba echi busuréwili japi iyá echi ówili jitra ke iʼwiri jiti ma ke aʼlá ju. Alí wiká echi oselí ma ke jomarúami ju, jiti ma biwili alí chiwali.

Nalí echi Biblia ko ke ju japi riká echi oselí. Tákoré ma simírili tres mil quinientos bamíali japalí jonsa oserúami nili, ke namú ikili. Alí wiká siglos nili japi cha olari —ikósili, ke nakili japi jarecho olama alí anili japi ke bichíwali ju—, japi oserúa uchuwi echoná Biblia ke namú ikili. A bijí natéami ju japi aní echoná alí ruyé japi riká aní echi ciencia (iné echi recuadro “¿Anticuada, o adelantada para su tiempo?”).

Nalí, ¿a bijí tamó iʼwiri jipi rawé japi oserúa uchuwi echoná Biblia? Jiti mi machimea, natá echi chati namuti japi ikísimi echi pagótami. Japi riká echi weli nakówami, jena kawí we cha riká wilí, echi pagótami we naʼawi alí jarecho si namuti. Jipi ko iné jaré namuti japi ruyé echi Biblia alí natá jepuná: “¿Achi we aʼlá pirélipo ata nokisáaká japi aní echi Biblia?”.

KILÍ OLOGÁ PIRÉLABO

We kaníliami ju japi kilí ologá piré “mapujiti Riosi anema aboni, Binói kúchuwala niráa” (Mateo 5:9). “Galá kilí ologá pirélabo siʼnéami echi auché jaré pagótami yuwa” (Romanos 12:18).

WABÉ NATIMASI ALÍ KU WIKÁWISI

We kaníliami ju echi “pagótami mapu ikí we natimáami juko, mapujiti Riosi ne wabé natimama aboni” (Mateo 5:7). “Sinibí aʼnagupi wabé natimasi, ayénachó aʼnagupi ku wikáwasi, achigórigá mapurigá Riosi ʼyemi mi ku wikáwali mapujítitamo bichíili Jesucristo niráa” (Efesios 4:32).

GALEPO SINÉAMI PAGÓTAMI

“Riosi chopi léami [o rejoy] niráa niwáli ne siʼnéami pagótami mapu ikí nirú jenaʼí wichimóbachi” (Hechos 17:26). “Riosi ne bichíwali galé echi auché jaré isena pagótami [...] mapu galá bichíiga majá Binói Riosi, siʼnéami mapu ikí galabé olako” (Hechos 10:34, 35).

TIBÚSARÉ ECHI WICHIMÓBACHI

“Jeobá ko niwali echi rejoy jiti bitélima echoná weʼé we baʼóachi Edén rewéami alí jiti ichimea alí tibuma” (Génesis 2:15). “Suwábama siʼnéami echi jaré chati oláami pagótami mapu ayénachó wikanáami suwábali jenaʼí wichimóbachi” (Apocalipsis 11:18).

KE KORÚKAMI NIPO ALÍ KE CHATI NAMUTI NOKIBOA

“Ne galá ʼnátaga pirélasi. Ketasi korúkami níisi, mapujiti ʼyemi pagótami ketásitamo kanílaga pirélabo” (Lucas 12:15). “Ke siné chuwé bilétari yuwa kochisí, nibilé siné siʼwinárigá chati sitíi chuwé olasi, nibilé korusi auché jaré níwala namuti” (Efesios 5:3).

KE CHIKÓSARÉ ALÍ GALÁ NOCHÁSARÉ

“Mapujítita sinibí ne suwaba jiti ne wabé galabé olánali” (Hebreos 13:18). “Máputamo chabénala wabé chigórami níiliko [...] jipi jonsa galá nochasi” (Efesios 4:28).

IʼWÍRIPO JAPI NEWALÉ

“Galá kuʼwírabo echi jaré mapu ketasi ʼme jiwérami ju, ayénachó máputamo waminabi anáchaga, arigá galebo ne siʼnéami pagótami” (1 Tesalonicenses 5:14). “Sinibí galá kuʼwira echi jaré baʼlaguéchuli, echi jaré kunámani ayénachó” (Santiago 1:27).

Echoná Biblia ke oserúa bi uchuwi echi namuti, ayénachó aní japi ta nokiboa. ¿Achi mi mayé japi sinéami echi pagótami aʼlá pirélima a nijéwisaká japi aní echi Biblia? Ayena, we natéami ju jipi rawé. Nalí, ¿chúriká mi iʼwiri japi aní echi Biblia?

Bilé rejoy we machíami anili japi a newaré japi aʼlá ju japi bilé isimí jiti we aʼlá ikí (Mateo 11:19). A bichíwali ju. Machiboa achi bilé busuréliami aʼlá ju japalí ti nijewi alí we aʼlá namuti ikí. Jiti la, ami natámiré: “A we aʼlá nísakó japi riká aní echoná Biblia, ¿kechi ko tamí iʼwírima jiti ni aʼlá bitélima? ¿Achi ne bichíwali tamí iʼwírima japalí ni ikisaa karúa ikiwáami?”. Ma inepo bilé ejemplo.

Diana * ko we aʼlá bitéili alí we kanílika. Nalí, aminá ko, echi ko ikili jaré namuti we jilírami: echi ranala mukuli, bineli ripili jiti ma ke yúa biteli echi kunala alí risóati ripili. Echi ko jéaní: “Ma ke nili japi riká chabéi, ma ni ke olá ranala, kunala alí kalí. Ke ni jiweria nili alí ke ni machiyé chúsiá ni bité”.

Diana ko nátili japi a ne bichíwali ju jepuná raʼíchali: “Ata piré setenta bamíali, ochenta ma, ata jiwérali olásaká; nalí echi bamíali we jilí ju alí ta risoa nilia piré, we sapú simiri alí ti suwí” (Salmo 90:10).

Jiti anachama suwaba echi chati namuti japi ikili, Diana ko leérili japi aní echi Biblia alí we aʼlá iʼwírili. Japi riká mi binema che jaréala páginas,wiká pagótami ma machili japi nijewia echi busuréliami japi aní echi Biblia we aʼlá iʼwírili jiti aʼlá pirélima. Ayénachó japi echi Biblia ju japi riká echi namuti japi nirú echoná museo japi ta ma anili. Tákoré ma we chabé jonsa osari, ke ju japi riká jarecho libros japi ma ke natéami ju japi aní. ¿Achi echi Biblia bilecho nalí isíliré osayá? ¿A Onorúami Raʼicháala keʼré japi aní echoná? (1 Tesalonicenses 2:13).

Ayénachó mi nátiré japi ta we risoa nili alí echi bamíali japi ta piré we sapú simili. ¿Kumi aa echi busuréliami o jépuká mi iʼwírili tani japalí mi newalesa?

Ma inepo bikiá namuti japi chúriká echi Biblia mi iʼwiri:

1. Jiti mi ke isima echi namuti japi mi risoa níliti.

2. Jiti mi natama piri mi isima japalí mi olasa karú ikiwáami.

3. Jiti mi anachama echi namuti we jilírami.

Echi jaréala páginas, echi bikiá namuti mi binema.