Nhuãcü nore diẽrumaã namaü̃?
Nhuꞌma nore diẽrumaã icumaü̃ nagagu i wüi i gutchaütchiü̃, eꞌna? Ngẽma pandemia, rü taütchiü̃ i gutchaü̃, rü gutchaü̃gü i políticawa, rü guera rü tá nacaꞌ ínangu i gutchaü̃gü i diẽrutchiga. Ngeguma ngürüãtchi noretama i diẽru cuü̃́ nangema rü tá ãũrima cuoégaãẽ. Notürü norü ucuꞌẽgü i Tupanaarü Orewa rü tá cuü̃ rüngü̃ẽẽ na nore diẽrumaã cumaü̃ü̃caꞌ.
1. Cunayau na marü nanaütchicüü i curü maü̃.
Tupanaarü Ore rü nhanagürü: “Rü nüxü̃ chacua̱x nax ñuxãcü yixĩxü̃ ega choxü̃́ nataxu̱xgu, rü ñuxãcü nax yixĩxü̃ ega choxü̃́ namuxgu.” — Piripucü̃ãꞌ 4:12.
Woo noretama i diẽru cuü̃́ nangema i nhuꞌma, cuü̃ name nanaütchicüü i curü maü̃ na noretama diẽrumaã cumaü̃. Ngemaãcü yeeraü̃ cutanüü̃caꞌ natautcha na namaẽü̃caꞌ.
Nacaꞌ cudau tchi nüü̃́ nangemagu i ãẽꞌgacüarü ngü̃ẽẽ na cunayauü̃caꞌ. Tama cunhucü erü aiꞌrünguma ngẽma ãẽꞌgacüarü programa rü paaãtchicaꞌ niĩ na nayanawǘcutchiü̃caꞌ.
2. Wüigu i cutanüü̃maã cupuracü.
Tupanaarü Ore rü nhanagürü: “Ngẽxguma taxúenama cuca̱xgu naxca̱x i ngẽma cuxüxchaü̃xü̃, rü tá chixri cuxü̃́ ínanguxuchi. Natürü ngẽxguma muxearü ucu̱xẽgüca̱x ícuca̱xgu, rü tá mea cuxü̃́ ínanguxuchi i ngẽma cuxüxchaü̃xü̃.” — Provérbios 15:22.
Namaã cuyarüdea i cumaꞌ rüeꞌna cute rü cuacügü. Ngeguma guü̃ma i cupatacüãꞌgü rü meã nüü̃ nacuaꞌgügu i ngẽma gutchaü̃, rü tá yeeraãcü natautchaü̃ nacaꞌ meã nanayaugü na marü nanaütchicüü i perü maü̃. Ngeguma guãma nacaꞌ nadaugügu na meã diẽrumaã nacuáü̃ rü tama nanaaiyaü̃caꞌ. Perü diẽru rü tama paa nanaguꞌẽẽ.
3. Cunangugü i curü diẽru.
Tupanaarü Ore rü nhanagürü: “¿Rü tama ẽ̱xna i tanangugüxíraxü̃ nax ñuxre i diẽrugu tá tüxü̃́ naxãtanüxü̃?” — Luca 14:28.
Ngeguma noretama diẽru nüü̃́ nangema rü name niĩ nüü̃ icuaꞌ i taꞌacücaꞌ natae tá. Nüíraü̃, poperawa cunawǘ i nhure i diẽru cunayau tá i norü tauemacügu. Yicama nawa cunawǘ i nhure niĩ i curü ngetanü i nhuꞌma, woo wipeꞌewa bemana nanaütchicüügu. Tchi cuü̃́ natautchaü̃gu rü namaã cunguü̃ i írarüwa i diẽru i wüitchigü i tauemacügu. Erü ngürüãtchi cucaꞌ ínangu i gutchaü̃gü.
Ucuꞌẽ. Ngeguma cunangugügu i curü diẽru rü ta cunawǘ i ngẽma íraü̃ i ngetanü. Namaã cubaiãtchi tá i nhure i diẽru naguꞌẽẽ i ngẽma íraü̃ i ngetanügü. Cuaꞌãtchiruü̃, wüi i yatü rü nüü̃ nacuaꞌama na marü nanaguꞌẽẽ i muũtchiĩü̃ma i diẽru i chicletemaã.
4. Mea cunangugü i taꞌacü niĩ i ãurima nameẽtchi, rü cunaü.
Tupanaarü Ore rü nhanagürü: “Mea penangugüxü̃ i ta̱xacü nixĩ i aixcüma mexü̃ i Tupanape̱xewa.” — Piripucü̃ãꞌ 1:10.
Cunangugü i nhure i diẽru cuyauü̃ rü cunangugü i nhure i diẽru cunguẽẽü̃. Nüü̃ cudau i ngẽma i taꞌacü name nüü̃ rüoü̃ na ngemaãcü nüü̃́ yangu i ngẽma diẽru na cunaütanüü̃caꞌ. Nüü̃ cudau i nhaa cuaꞌãtchiruü̃gü:
Naweü̃tchiga. Ngeguma tchi cuü̃́ nangema i wüiarü yeera i caru rüeꞌna moto, eꞌna name nacaꞌ cutae i wüi? Eꞌna name to caru rüeꞌna moto i yeeraü̃ naítanüü̃ namaã naütchicüü? Eꞌna cuü̃́ natautcha na nagu cuũ i transporte públicomaã, rü biscicletamaã rüeꞌna cucutügumare cuũ?
Taãẽruü̃. Eꞌna name paaãtchicaꞌ yaguẽẽü̃ i puracüü̃ i ãtanüü̃ i terevisãoarü rüeꞌna site rü aplicativogü i filmegüarü rü paetagüarü?
Ĩpataarü ngetanü. Cupatacüãꞌgümaã quidea natchiga tama nanaaiyaꞌü̃ü̃caꞌ i deá rü omü rü gás. Inanaoẽẽ ya omü rü paa naaiya rü nüü̃ rüngü̃ẽẽ na meã diẽrumaã icuáü̃caꞌ.
Õna. Tama name na õna ímemareü̃gu tüü̃ cuguẽü̃ ya perü dĩẽru. Narümemae na cupatawatama cuüwemüü̃. Ü̃paãcü nagu curüĩnü i taꞌacü cutchibü tá. Ngeguma nüü̃ natautchagu rü cuüwemü i muũma õna rü namaã cunguü̃ i natchipeꞌegü. Poperawa cunawǘ i taꞌacü tá nacaꞌ cutaetchaü̃ naü̃pa mercaduwa cuũ, na ngemaãcü tama nacaꞌ cutae i ngẽma i taꞌacü tama inawaꞌeü̃. Nacaꞌ cutae i ngẽma nanetüarü ogü i dama tauemacüwa, erü aiꞌrüguma naítanü niĩ. Nüü̃ rüo i ngẽma õna na tama taü̃necaꞌ nameü̃. Wüi i verduranecü cunaü i cupatawatama.
Natchirugü. Nacaꞌ cutaerica i ngẽma natchirugü i cuü̃ natauü̃. Nacaꞌ cutae ngeguma inanaĩtanüẽẽgu i ngẽma natchirugü rüeꞌna ngẽma weꞌatchiru i meü̃. Guü̃guma i nüü̃ natautchagu rü üaꞌcügu ínanapa i natchirugü. Ngemaãcü nüü̃ narüo i ngẽma ipaẽẽrüü̃arü pora.
Nacaꞌ nataeü̃. Naü̃pa nacaꞌ cutae i taꞌacürüü̃, rü cugüna cuca i nhaü̃: ‘Eꞌna diẽruãꞌ na nacaꞌ tchataeü̃caꞌ? Aicuma tchanawaꞌeü̃ i ngẽma?’ Aicuma cunawaꞌe i wüi ngewacaü̃ i caru, urü moto rüeꞌna cerura? Cuü̃ natautcha na nacaꞌ cutae i curü ngemaü̃gü na tama cunaüü̃? Ngẽmaãcü yeera natautchaãcü cumaü̃ rü cunayau tá i nhure diẽru.
Ucuꞌẽ: Ngeguma tchi cuma rü noretama diẽruãꞌü̃, rü cuyonie na nüü̃ rüo i ngẽma tchiecüma na poraãcüma nüü̃ natchieẽẽ rü natatanü niĩ. Cuaꞌãtchiruü̃, nayipe, rü naĩnücaꞌwaꞌe i diẽrucaꞌ, rü nangãe. Ngeguma nüü̃ rüogu i ngẽma tchiecüma rü meã curü diẽrumaã icuáü̃ rü narümemae tá i naü̃ne.
5. Yeeraãcü nüü̃ cucuaꞌ i Tupanatchiga.
Tupanaarü Ore rü nhanagürü: “Tataãẽgü ya yíxema nüxü̃ icua̱xãchitanüxe i tümaarü pecadu rü Tupanawe rüxĩxe”. — Mateu 5:3.
Tupanaarü Ore rü nanaucuꞌẽ i nhaü̃: “Erü ngẽma cua̱x rü ngẽma diẽrurüxü̃ tüxü̃ ínapoxü̃. Natürü ngẽma cua̱x rü nüxü̃́ nangẽxma i pora nax tüxna naxããxü̃ i maxü̃ ya yíxema cua̱x tüxü̃́ ngẽxmaxe.” (Eclesiastes 7:12) Ngẽma cuaꞌ rü Tupanaarü Orewa ngemaü̃. Muũma i duü̃ü̃gü marü nüü̃ nacuaꞌgü na Tupanaarü ucuꞌẽgü rü nüü̃ rungü̃ẽẽrüü̃ ngeguma gutchaü̃wa nangema i diẽrugagu, rü nhuãcü tama poraãcü nacaꞌ naoegaãẽü̃. —Mateu 6:31,32.