NGÚERUÜ̃ 14
Tüꞌcüü̃ nhuma nangema wüi natücumü ya Tupana ideꞌetchi?
1. Tüꞌcüü̃ ga Tupana nucümaü̃ i iraéucü̃ãgüü̃ nideꞌetchi na norü duü̃ü̃gü yaꞌĩgüü̃caꞌ?
Tupana nüü̃ niꞌu na Abraáũ natanüꞌü̃ namuũtama. Duü̃ü̃gü ga Iraéutanüꞌü̃gü Abraáũwa niꞌĩ ne naĩ. Yeuwa yema duü̃ü̃güü̃ nideꞌetchi na nüü̃ napuracüeü̃caꞌ. Yema duü̃ü̃güü̃ norü mugüü̃ nacuaꞌẽẽ na norü ngutchaü̃ãcü nüü̃ yacuaꞌüü̃güü̃caꞌ. (Salmo 147:19, 20) Iraéuãnecü̃ãü̃ narüngüꞌẽẽü̃rüü̃ ya Yeuwa, nüma nanangüꞌẽẽ ta ta i duü̃ü̃gü i to i natchiü̃ãnecü̃ã iꞌĩgüü̃. Nawa naugütae i Puracügü 3:25.
Iraéucü̃ãgüü̃ nideꞌetchi ga Tupana na natchiga yaꞌugügüü̃caꞌ. Yemaãcü Yeuwaü̃ tacuaꞌgütchi ga togüe ga duẽꞌẽgü. Norü ore i iraéucü̃ãgü duẽꞌẽgüü̃ nüü̃ nacuaꞌẽẽ na tümaarü mecaꞌ yiꞌĩü̃, ngeguma Tupanaarü mugügaü̃ taꞌinüẽgu. (1 Reis 2:3) Nawa naugütae i Isaías 43:10, 12, TNM.
2. Tüꞌcüü̃ ya Tupana cristurüü̃ iꞌĩgüü̃ü̃ nideꞌetchi na norü duü̃ü̃gü yaꞌĩgüü̃caꞌ?
Inangu ga nguneü̃ na tama marü Tupanaarü duü̃ü̃gü yiꞌĩgüü̃ ga iraéucü̃ãgü yemacaꞌ aicuma cristurüü̃ iꞌĩgüü̃maã nanaütchicüü ga Yeuwa. (Mateu 21:43, 23:37, 38) Nhuma ngema cristurüü̃ iꞌĩgüü̃ niꞌĩ Yeuwatchiga ideꞌagüü̃. Nawa naugütae i Puracügü 15:14, 17.
Ngetchutchu norü ngueꞌü̃güü̃ nangueꞌẽẽ na nhuãcü Tupanatchiga yaꞌugügüü̃ rü duü̃ü̃gü i guü̃ i natchiü̃ãnecü̃ã nangueꞌẽẽ. (Mateu 10:7, 11, 28:19) Ngema puracü nanawe na guü̃ma i tchieü̃ narüogütchaü̃. Nhuma Naanearü tawa namuũtchima i Yeuwaarü duü̃ü̃gü. (Apocaríchiu 7:9, 10) Aicuma cristurüü̃ iꞌĩgüü̃ nügü nataãẽꞌẽẽgü rü nügü narüngüꞌẽẽgü. Naanearü tawa ngematama i nacüma na norü ngutaqueꞌegüwa Tupanaarü Oreca nangue. Nawa naugütae i Ebréugü 10:24, 25.
3. Nhuãcü naügü ga natücumü i Yeuwaarü Orearü Uruü̃gügu ãẽgagüü̃?
1870gu nayema wüi natücumü ga Tupanaarü Oreca ngueü̃ ga weguãcüüra nüü̃ cuaꞌe ga norü nguꞌẽẽtaegü ga Tupana. Yeguma niꞌĩ nüü̃ nacuaꞌgüü̃ na Ngetchutchu namugüü̃ ga cristurüü̃ iꞌĩgüü̃ yaꞌugügüü̃caꞌ Tupanatchiga. Yemacaꞌ nümagü yema naügü naanearü tawa. 1931gu niꞌĩ Yeuwaarü Orearü Uruü̃gügu nügü naꞌugüü̃. Nawa naugütae i Puracügü 1:8, 2:1, 4, 9-11 rü 5:42.
4. Teꞌe namaã cuaꞌü̃ i Yeuwaarü Orearü Uruü̃güarü puracü?
Ngetchutchu niꞌĩ naeru iꞌĩcü i aicuma cristurüü̃ iꞌĩgüü̃. Nucüma nayema wüi natücumü i wipee ãgüü̃ i guü̃ma i yaꞌõgüü̃tücumüü̃ rüngüꞌẽẽgüü̃ rü nhuꞌmatchi nangueꞌẽẽ. Yema natücumüwa yemagüü̃ rü ngueꞌü̃gü ga Ngetchutchu imugüü̃ niꞌĩ rü nümaü̃tchigü ga yaꞌõgüü̃tücumümaã cuaꞌgüü̃. (Puracügü 16:4, 5) Nhuma rü ta nangema i yatügü i guü̃ma i Yeuwaarü Orearü Uruü̃güarü puracümaã cuaꞌgüü̃. Nümagü Natücumü i Wipee Ãgüü̃gu nügü naꞌugü. Nümagü niꞌĩ namaã nacuaꞌgüü̃ i puracü na poperagü i Tupanaarü Oretchiga ideꞌaü̃ to i nagawa naꞌugüü̃caꞌ rü nuẽruü̃ yiꞌĩü̃caꞌ. Ngema poperagü 750 nagaarü yeerawa naꞌugü. Tupanaarü Oremaã nanaucuẽ rü nanangueꞌẽẽ i Natücumü i Wipee Ãgüü̃ i Yeuwaü̃ yaꞌõgüü̃ i guü̃ma i naanewa ngemagüü̃ i natücumütchigü 110.000ü̃ rümumaẽ. Natanüwa i wüitchigü i natücumü i Yeuwaü̃ yaꞌõgüü̃ nangema i yatügü i namaã cuaꞌgüü̃ i Tupanaarü Oreca ngue na ngetchaü̃ãcü Yeuwaarü duü̃ü̃güna nadaugüü̃caꞌ. Nawa naugütae i 1 Pedru 5:2, 3.
Yeuwaarü Orearü Uruü̃gü Tupanaarü Ãẽꞌgacügütchiga niꞌugügü. Wüitchigü a ĩpatawa Tupanaarü Ore tiꞌugüetanütchigü na ngemaãcü Ngetchutchuarü ngueꞌü̃güü̃ tidaũgüü̃caꞌ. (Puracügü 20:20) Nhuꞌmatchi Tupanaarü Oreca tüü̃ tangueꞌẽẽ ya duẽꞌẽgü. Yeuwaarü Orearü Uruü̃gü rü tama to i õgütanüü̃maã nawüigu. Toma rü nhamatchi togütanüꞌü̃ tiꞌĩgüü̃rüü̃ tiꞌĩgü. Torü Papa ya Yeuwa rü nangetchaü̃wae. Togüene rü togüeya tiꞌĩgüü̃rüü̃ tiꞌĩgü rü togü tarüngüꞌẽẽgü. (2 Techarónicacü̃ã 1:3) Ngema natanüꞌü̃ niꞌĩ Naanewa yeera taãẽ erü duü̃ü̃gü i Yeuwaarü ngutchaü̃ ügüü̃ niꞌĩgü rü togüe ya duẽꞌẽgüü̃ narüngüꞌẽẽgü. Nawa naugütae i Salmo 33:12 rü Atos 20:35, TNM.
