Yeuwa rü nataãẽ rü nanawae na natanüꞌü̃gü rü ta nataãẽgüü̃. (1 Timóteo 1:⁠11, TNM) Nüma niꞌĩ ngĩtchiga nangoꞌẽ. Teꞌe ya tüü̃ nangemaꞌẽ i ngĩpane yeera tataãẽ. Weguü̃ naügü i yatüü̃ rü ngeü̃ ngeguma nügümaã yangĩgügu. Guẽtama ya natanüꞌü̃wa ngemagüe rü tüü̃ nangegü ta na aicuma tataãẽgüü̃ rü nhuꞌmatchi tügü tangetchaü̃güü̃. Name niꞌĩ ngĩpane nayaugüü̃ i nügümücü iꞌĩgüü̃ i cristurüü̃ iꞌĩgüü̃, nanawegüü̃caꞌ na ãẽꞌgacügü i naanecü̃ãarü mugüga naꞌinüẽ. Nawa naugütae i Luca 2:⁠1, 4, 5.

Nhuãcü niꞌĩ nanaãẽguü̃ ya Tupana i ngĩ? Ngeguma tama nügüna yaĩgatchigu i yatüü̃ rü ngeü̃. Rü nhuꞌmatchi ngeguma nügümaã ingĩgüü̃ nügüarü rica aꞌĩgügu. (Ebréugü 13:⁠4) Nüma rü natchi naꞌai nügü inatagüü̃ i yatüü̃ rü ngeü̃ i noritchire nügümaã ingĩgüü̃. (Maraquía 2:⁠16) Taꞌacü ta iadaũ ngeguma togüemaã napegu ya wüi ya yatücü ya ingĩcü rüeꞌna naĩmaã tapegu ya ngee ya ingĩẽ? Tama nacaꞌ natchie a Tupana na namaꞌ nüü̃ itataü̃ rü tümate tüü̃ itaü̃ rü nhuꞌma­tchi wenaarü tingĩü̃ ya ngee rü yatüe. Nawa naugütae i ­Mateu 19:⁠3-⁠6, 9.

Yeuwa nanawae na nügü narüngüꞌẽẽgüü̃ i yatüü̃ rü ngeü̃ i nügümaã ingĩgüü̃. (Génesis 2:⁠18) Yatü ya ingĩcü rü natanüꞌü̃eru niꞌĩ ngemacaꞌ nüma ta niꞌĩ natchiruca rü õꞌnaca nadauü̃ naãcügüãü̃ rü namaꞌü̃ rü nhuꞌmatchi nüma ta niꞌĩ Tupanaarü Orecaꞌ tüü̃ nangueꞌẽẽ. Yatü ya namaꞌü̃ ngetchaü̃cü rü tümaguĩra narüꞌinü. Ngema ingĩgüü̃ rü nügü narüngüꞌẽẽgü rü nügü nangetchaü̃gü. Nügü arü gutchinügüü̃ nangetchaü̃gü i natanüꞌü̃ nangemaü̃caꞌ i taãẽ erü yiema rü tapecaduãgü. Nawa naugütae i Epéchiucü̃ã 4:⁠31, 32, 5:⁠22-25, 33 rü 1 Pedru 3:⁠7.

Nangema i norü gutchaü̃gü i nügümücü iꞌĩgüü̃. Tautama nanuẽyani nanameꞌẽẽgü i ngema norü gutchaü̃gü i yatüü̃ rü ngeü̃ i nügümaã ingĩgüü̃. (1 Corĩ́tiucü̃ã 13:⁠4, 5) Tupanaarü Ore tama peü̃ naucuẽ na pegü ipetaꞌgüü̃ na gutchaü̃gü pemeꞌẽẽü̃caꞌ nawa i ngĩ. Nawa naugütae i 1 ­Corĩ́tiucü̃ã 7:⁠10-13.

Yeuwa nanawae na petaãẽgüü̃. Ngemacaꞌ ni meü̃ i ucuẽgü pemaã yaꞌuü̃. Penatü rü pee marü mucü ya taunecü namaꞌẽ rü marü naãẽ nacuaꞌgü rü nawagü ta niꞌĩ cuaꞌ peyaugüü̃. ­(Corochacü̃ã 3:⁠20) Yeuwaga ta peꞌinüẽ pa naãcügü. Ngetüꞌü̃ rü paü̃ nataãẽgü ngeguma Yeuwaga naꞌinüẽgu rü nhuꞌmatchi Ngetchutchuga. Nawa naugütae i Eclesiastés 11:⁠9–12:⁠1, ­Mateu 19:⁠13-15 rü 21:⁠15, 16.

Nataãẽgüü̃caꞌ i naãcügü penaüwemü rü penaütchiru rü wüiwa namaã pemaꞌẽ. (1 Timúteu 5:⁠8) Tupanaü̃ nange­tchaü̃gügu rica ta niꞌĩ aicuma nataãẽgüü̃ rü nhuꞌmatchi naca penangueꞌẽẽgu. (Epéchiucü̃ã 6:⁠4) Penawaegu na peãcügü Tupanaü̃ nangetchaü̃güü̃, pema rü ta nüü̃ pengetchaü̃gü. Tupanaarü Orecaꞌ penangueꞌẽẽ na ngemaãcü nüü̃ nacuaꞌeü̃caꞌ na taꞌacü rümeꞌmaẽ naügüü̃. Nawa naugütae i ­Deuteronómio 6:⁠4-⁠7 rü ­Provérbios 22:⁠6.

Ngeguma meü̃ naügügu i peãcügü, namaã nüü̃ peꞌu na peü̃ nameü̃ i taꞌacü naügüü̃. Nüü̃ peoregü ngeguma tchieü̃ naügügu. Penaucuẽgü rü nüna petchogüe. Ngemaãcü tautama namuũtchi i norü gutchaü̃gü. (Provérbios 19:⁠18) Ngeguma ta cuyaucuẽgu tautama cutchiecümaü̃tchi rü bai ta cuyamaü̃tchi. Nawa naugütae i Corochacü̃ã 3:⁠21.

Yeuwaarü Orearü Uruü̃gü muũma i poperagü inaüü̃ nacaꞌ i papagü rü mamagü rü naãcügü. Ngema poperagüwa na­ngema i nguꞌẽẽ i Tupanaarü Orewa ne ĩü̃. Nawa naugütae Salmo 19:7, 11.