Tupana ya tüü̃ Ücü rü cuaꞌwa tüü̃ narüyeera. Nüma rü Papa ya ngetchaü̃waecü niꞌĩ rü tüna nadau. Tüü̃ narüngüꞌẽẽgu rica ta niꞌĩ taãẽgüü̃. (Provérbios 20:⁠24) Nhama wüie ya bue ya tümanatü tüü̃ rüngüꞌẽẽrüü̃, Tupana rü ta tüü̃ narü­ngüꞌẽẽ. (Salmo 32:⁠8) Norü Oremaã niꞌĩ ngema naüü̃. Tupanaarü Ore rü nhama wüi amarerüü̃ niꞌĩ. Nawa naugütae i 2 Timúteu 3:⁠16.

Taꞌacü iyadau ngeguma Tupanaarü mugüga inüẽgu? Nhumatama tataãẽgü ta rü nhuꞌmatchi nüü̃ tacuaꞌe ta taꞌacü iügüü̃ na guü̃gu taãẽgüü̃caꞌ. Tupana niꞌĩ tüü̃ Ücü. Ngemacaꞌ naweguutchi na norü ucuẽgüga inüẽ. Nawa naugütae i Salmo 19:7, 11 rü Apocaríchiu 4:⁠11.

Tupanaarü Orewa nangema i mugü i tüü̃ mugüü̃ i taꞌacü ta niꞌĩ meü̃ rü tama meü̃ na iügüü̃. (Puracügü 15:⁠29) Nangema ucuẽgü i Tupanaarü Orewa ngemagüü̃ i torü maꞌü̃ rü­ngüꞌẽẽ. Yiema ta niꞌĩ nagu rüꞌinüẽü̃ na nhuãcü ta ngema ucuẽgü tüü̃ narüngüꞌẽẽ. Ngema ügügu rica ta niꞌĩ Tupanaarü Ore tüü̃ narüngüꞌẽẽ. (Provérbios 2:⁠10-15) Cuaꞌãtchiruü̃, Tupanaarü Ore namaã nangue na norü amare yiꞌĩü̃ i maꞌü̃. Ngemana cuaꞌãtchiegu meã ta torü maꞌü̃na tadaugü. Tautama ãũcümaü̃wa tanangemaꞌẽ ngeguma ipuracüegu, tapatawa ngemagügu rü nhuꞌmatchi ngeguma ngeta ĩgu. Nawa naugütae i Puracügü 17:⁠27, 28.

Ngetchutchu nüü̃ niꞌu na ngeü̃rüü̃ yiꞌĩü̃ ga tare mugü i yeeragüü̃. Nagagu i nüĩraü̃ü̃ i mu, Tupanaü̃ tangetchaü̃gü ta ngeguma ta nawaegügu, nüü̃ tacuaꞌetchaü̃ ta rü nhuꞌmatchi nüü̃ tapuracüe ta. Ngemana cuaꞌãtchie guü̃ma i taꞌacü iügü­tchaü̃ü̃wa. (Provérbios 3:⁠6)  Teꞌe yanguꞌẽẽ i ngema mu, Tupanamaã taamücü ta, aicuma tataãẽ ta rü nhuꞌmatchi maꞌü̃ i tauguma guꞌü̃ tayau ta. Nawa naugütae i Mateu 22:⁠36-38.

Nagagu i norü tare i mu, duẽꞌẽgümaã meã tamaꞌẽ ta. (1 Corĩ́tiucü̃ã 13:⁠4-⁠7) Ngeguma ta ngema mu inguꞌẽẽgu, Tupanarüü̃ togüegümaã tamecümagü ta. Nawa naugütae i Mateu 7:⁠12 rü 22:⁠39, 40.

Tupanaarü Ore nananguꞌẽẽ na yeera nügü nangetchaü̃güü̃caꞌ i wüitchigü i natanüꞌü̃gü rü nhuꞌmatchi meã nügümaã namaꞌẽü̃caꞌ. (Corochacü̃ã 3:⁠12-14) Tupanaarü Ore namaã nangue na tama nameü̃ na nügü inatagüü̃ i nügümaã ingĩgüü̃. Ngema mu natanüꞌü̃ inapoꞌü̃. Nawa naugütae i ­Génesis 2:⁠24.

Ngeguma ta yanguꞌẽẽgu i ngema Tupanaarü Orearü ucuẽgü, taugutama tangearü puracüã na ngemaü̃ãü̃caꞌ rü tataãẽgü ta. Cuaꞌãtchiruü̃, corigüü̃ tame ya duẽꞌẽ ya weguãcü puracüe rü i aicumaẽ. (2 Techarónicacü̃ã 3:⁠10, Ebréugü 13:⁠18) Rü nhuꞌmatchi Tupanaarü Ore nüü̃ niꞌu na narümeꞌmaẽ na Tupanamaãĩra i amücügüü̃ na tama dĩẽruguama rüꞌinüü̃caꞌ. Tupanaarü Ore namaã nangue na nameü̃ na torü iragüü̃maã itaãẽ. Nawa naugütae i Mateu 6:⁠24, 25, 33 rü 1 Timúteu 6:⁠8-10.

Ngeguma ta yanguꞌẽẽgu i ucuẽgü taugutama torü maꞌü̃ tatchieꞌẽẽ. (Provérbios 22:⁠24, 25) Cuaꞌãtchiruü̃, Tupanaarü mugüwa nanatchuꞌu na ingaꞌẽ, ngeguma ta naga inüẽgu i ngema mugü natautama i dawegü i yuwa tüü̃ gaü̃ rü tautama düwa taãnüpaa. (Romacü̃ã 13:⁠13) Yeuwa tama tüna nanatchuꞌu na iaꞌẽgüü̃, tüna nanatchuꞌu na aitchima nauü̃. (Salmo 104:⁠15, 1 Corĩ́tiucü̃ã 6:⁠10) Rü nhuꞌmatchi weguãcü tüü̃ narüꞌinüẽẽ i Tupanaarü Ore. (Salmo 119:⁠97-100) Nhuma rü nüü̃ tacuaꞌeütchi na torü mecaꞌ yiꞌĩü̃ ngeguma naügügu i taꞌacü Tupanaarü Ore nüü̃ iꞌuü̃. Ngema naügü i Yeuwaarü duü̃ü̃gü erü nüü̃ nicuaꞌüü̃gü. Nawa naugütae i Mateu 5:⁠14-16.