NGÚERUÜ̃ 7
Nhuãcü ya Yeuwa tamaã nacuaꞌü?
1. Nhuãcü ya Yeuwa tamaã nacuaꞌü̃ ta?
Tüꞌcüü̃ tama natchie na Ãẽꞌgacü yiꞌĩü̃ ya Ngetchutchu? (MARCU 1:40-42)
Tamaã nacuaꞌ ta nawa ya Nane ya Ngetchutchu ya Cristu erü Yeuwa dauü̃wa Ãẽꞌgacü nananguutchiẽẽ. Nawa naugütae i Apocaríchiu 11:15.
Tupana nanaütchicüü ta i guü̃ma i ãẽꞌgacügü i naanecü̃ã. Nüma ta Ngetchutchuü̃ guü̃ i naanearü ãẽꞌgacü niꞌĩẽẽ. Ngemaãcü natautcha ta na Tupanaarü ngutchaü̃ naüü̃ dauü̃wa rü nhuꞌmatchi Naanewa. Nagagu ya Yima Ãẽꞌgacü ya Tupana yautchicü tautama duü̃ü̃güü̃ natau. Naanecü̃ã meã nügümaã namaꞌẽ ta. Nameꞌẽtchima i ngema deꞌagü, cüna? Nawa naugütae i Danié 2:44, Mateu 6:9, 10, Mateus 24:14(TNM).
Nüü̃ cudau i vídeo Nhuãcü ya Tupana tamaã nacuaꞌü̃ ta?
2. Tüꞌcüü̃ tama natchie na Ãẽꞌgacü yiꞌĩü̃ ya Ngetchutchu?
Tama natchie na Ãẽꞌgacü yiꞌĩü̃ ya Ngetchutchu erü nüma namecüma rü nüü̃ nangetchaü̃ i taꞌacü weguü̃. (Mateu 11:28-30) Rü nhuꞌmatchi nüma dauü̃wa Ãẽꞌgacü niꞌĩ rü Naanemaã nacuaꞌ ta na duẽꞌẽgüü̃ narüngüꞌẽẽü̃caꞌ. Yeguma wenaarü namaꞌü̃gu ga Ngetchutchu dauü̃caꞌ nataegu, ngema na Yeuwaarü tügünecüwawa narütoü̃ rü inayanguꞌẽẽ na yangucutchiü̃. (Ebréugü 10:12, 13) Nhuma marü Tupana nayangucutchiꞌẽẽ na torü Ãẽꞌgacü yiꞌĩü̃caꞌ. Nawa naugütae i Luca 1:32, 33.
3. Teꞌegü ta tiꞌĩgü ya Ngetchutchumaã wüigu ãẽꞌgacügü iꞌĩgüe?
Yiꞌema Tupana tüü̃ ideꞌtchigügüe tiꞌĩgü na Ngetchutchumaã wüigu dauü̃wa ãẽꞌgacü tanguuü̃caꞌ. (Apocaríchiu 5:10) Yema Ngetchutchuarü ngueꞌü̃gü niꞌĩ nüĩra ideꞌetchigüü̃. Nhuma ta Yeuwa yatügüü̃ rü ngeegüü̃ nideꞌtchigü na dauü̃wa ãẽꞌgacü tanguuü̃caꞌ. Nayueguwena nümagü wenataarü namaꞌẽ na dauü̃wa naĩü̃caꞌ. Nawa naugütae i Juã́ũ 14:1-3 rü 1 Corĩ́tiucü̃ã 15:42-44.
Nhure ta dauü̃wa ĩü̃? Ngetchutchu nüü̃ niꞌu na noretama ngema ĩü̃ ta. (Luca 12:32) 144.000 ta niꞌĩ dauü̃wa ĩü̃ rü ngema ta niꞌĩ Ngetchutchumaã ãẽꞌgacügü yaꞌĩgüü̃. Nawa naugütae i Apocaríchiu 14:1.
4. Taꞌacü naüü̃ ga Ngetchutchu yeguma Ãẽꞌgacü nanguutchigu?
Naanegu Tchatanaü̃ narütae rü ãĩyugü i tchieü̃maã nanangaũẽẽ na nüĩraü̃ü̃ i norü puracü naüü̃caꞌ ya Ngetchutchu. 1914gu * niꞌĩ nangupetüü̃ i ngema. Yemacaꞌ aũrima nanu ga Tchatana rü nanaügü na gutchaü̃gü naca inanguꞌẽẽ i Naanecü̃ã. (Apocaríchiu 12:7-10, 12) Ngemacaꞌ niꞌĩ nhuma yeera duü̃ü̃gücaꞌ nataü̃ i gutchaü̃gü. Nhuma gueragü, taiya, dawegü rü Naane ĩãꞌãtchiane nangema. Guü̃ma i ngemagü cuaꞌruü̃ niꞌĩ na nüü̃ cuaꞌü̃caꞌ na wüigu Ngetchutchumaã Naanemaã nacuaꞌgütchaü̃ i 144.000. Nawa naugütae i Luca 21:7, 10, 11.
5. Taꞌacü inaüü̃ ya yima Ãẽꞌgacü ya Tupana yamucutchicü?
Tüü̃ narüngüꞌẽẽ ya duẽꞌẽgü ya Tupanaarü Oreca inguee. Yiꞌema duẽꞌẽgü Ngetchutchu ya Ãẽꞌgacüga taꞌinüẽ. Yiꞌemagü ta niꞌĩ tüü̃ inapoꞌü̃ü̃ ngeguma tchieü̃ ügüü̃ ta nadaigu. Guama ya teꞌe ya poꞌü̃waee name niꞌĩ Ngetchutchuga taꞌinüẽ. Nawa naugütae i Apocaríchiu 7:9, 14, 16, 17.
Tupanaarü ngutchaü̃ naü ta ya Ngetchutchu ya Ãẽꞌgacü tümaarü mecaꞌ ya duẽꞌẽgü. 1.000 a taunecüwena Naane rü meẽtchiü̃ i naane niĩĩtchi ta. Guü̃ma i ngemagüwena, Yeuwa rica ta Ãẽꞌgacü niꞌĩ erü Ngetchutchu marü tautama Ãẽꞌgacü niꞌĩ. (1 Coríntios 15:24-26, TNM) Cunawae na tüü̃ cucuaꞌemaã nüü̃ quiꞌuü̃ i ngema Tupana naüü̃ ta tümaarü mecaꞌ ya duẽꞌẽgü? Nawa naugütae i Salmo 37:10, 11, 29.
^ paragrafu 6 Meãma natchigaünawa naugütae i popera muãtüü Você Pode Entender a Bíblia! norü naãtügü 217-220wa, portuguêsgawa ümatüü̃ rü espanholgawa ngemaü̃.
