NGÚERUÜ̃ 6
Taꞌacü duẽꞌẽmaã ngupetüü?
1. Taꞌacü i meü̃ yueü̃maã ngupetüü̃ ta?
Yeguma Betániãwa nangugu ga Ngetchutchu, Jerucharéü̃arü ngaicamana, marü ãgümücü ga nguneü̃ naetü niꞌĩ ga nayuü̃ ga Lázaru. Naeyagü Marta rü Maria inataü̃wa tanagagü ga Ngetchutchu. Paꞌama yeꞌma timuãtchi ga duẽꞌẽgü. Nagu rüꞌinü ga tümaarü taãẽ ga Marta rü Maria yeguma Ngetchutchu wena Lázaruü̃ namaꞌẽgu. Nawa naugütae i Juã́ũ 11:21-23, 38-44.
Marta yeguma marü nüü̃ icuaꞌtchire i ngema meü̃ i yueü̃maã ngupetüü̃ ta. Yeuwa ta wena nanamaꞌẽẽ i yueü̃ rü nhuꞌmatchi Naanewa namaꞌẽ ta. Nawa naugütae i 1 Reis 17:17-24.
2. Taꞌacü ngupetüü̃ ngeguma yuegu?
Tupana Adãũü̃ nhanagürü: ‘Waiꞌümü quiꞌĩ rü wena ta arü ngemaꞌü̃ quiꞌĩ.’(GÉNESIS 3:19)
Ngeguma yuegu tauma taünewa namaꞌü̃. Yeuwa waiꞌümüteewa tüü̃ naü. Natauma i natchii tawa maꞌü̃ü̃. (Génesis 2:7, 3:19) Tauguma narüꞌinü i torü oꞌta ngeguma yuegu. Yema niꞌĩ Lázaruü̃ ngupetüü̃. Ngemacaꞌ tauma norü yutchiga niꞌu yeguma wena namaꞌü̃gu ga Lázaru erü cü yueü̃ rü tauma naügü. Nawa naugütae i Salmo 146:4 rü Juã́ũ 11:11-14.
Aicuma eꞌna tüü̃ naüaü̃ ya Tupana yiꞌema yue namaã ya üꞌü ya tauguma i oüne? Tupanaarü Ore nüü̃ niꞌu na tauma naügüü̃ i yueü̃ ngemacaꞌ yima üꞌü ya tauguma i oünetchiga rü doramare niꞌĩ rü nhuꞌmatchi Tupanaü̃ natchiecümaꞌẽẽcüraü̃. Tupana natchi naꞌai i ngematchiga. Nawa naugütae i Yeremía 19:5.
Nüü̃ cudau i vídeo Taꞌacü ngupetüü̃ ngeguma yuegu?
3. Maꞌẽü̃maã ya deꞌagüü̃ eꞌna i yueü̃?
Yueü̃ tama nideꞌagü rü tama tüü̃ naꞌinüẽ. (Salmo 115:17) Notürü nümaü̃tchigü i ãĩyugü i tchieü̃, duẽꞌẽ ya yue nügü niꞌĩẽ rü tümatanüꞌü̃maã nideꞌa. (Yuda 6) Yeuwa nanatchuꞌu na yueü̃maã ideꞌagütchaü̃. Nawa naugütae i Deuteronómio 18:10, 11.
4. Teꞌe ta wenaarü maꞌü̃ẽ?
Muũtchiema ya duẽꞌẽgü ya yue rü wenaarü tamaꞌẽ ta Naanewa. Wenaarü tamaꞌẽ ta ya tümaü̃ẽtchigü nori tamaꞌẽgu tama Tupanaü̃ cuaꞌgüe rü tchieü̃ ügüe. Nawa naugütae i Salmo 37:29 rü Atos 24:15(TNM).
Guanema ya wenaarü maꞌẽẽ ta Tupanatchigacaꞌ tangue ta rü nhuꞌmatchi Ngetchutchuü̃ tiaꞌõgü ta rü nüma nanawaeü̃ taügü ta. (Apocaríchiu 20:11, 12) Guꞌü̃gutama Naanewa tamaꞌẽ ngeguma ta meü̃ taügügu ya wenaarü maꞌẽẽ. Nawa naugütae i Juã́ũ 11:25, 26.
5. Yeuwa wenaarü nanamaꞌẽẽẽ ta i yueü̃, taꞌacü ngema nguꞌẽẽwa nüü̃ cuaꞌgüü̃?
Wenaarü tamaꞌẽ ta ya yuee erü Yeuwa Nane ga Naanewa namu na taca ya yuü̃caꞌ. Ngema nguꞌẽẽwa nüü̃ tacuaꞌgü i norü ngetchaü̃ rü nhuꞌmatchi norü mecüma ya Yeuwa. Curü teꞌemaã curüꞌũegaü̃ ngeguma wenaarü tamaꞌẽgu ya yuee? Nawa naugütae i Juã́ũ 3:16 rü Romacü̃ã 6:23.
