Nameꞌẽtchi na Tupanamaã ideꞌagüü̃. Nüma nanawae na guü̃ma i duü̃ü̃ yumuꞌẽwa namaã yadeꞌagüü̃ rü nhuꞌmatchi namaã naamücügüü̃. (Salmo 65:⁠2) Notürü nüma tama ­guü̃ i yumuꞌẽ naꞌinü. Wüi cuaꞌãtchiruü̃: norü yumuꞌẽgü ya wüi ya yatü ya namaꞌü̃ üacü rü tama nüü̃ naꞌinü. (1 Pedru 3:⁠7) Yeuwa tama tümaarü yumuꞌẽ naꞌinü ya yiꞌema tchieü̃ üe rü tama nüü̃ rü otchaü̃ẽ i tümacüma i tchieü̃. Yema niꞌĩ nucüma Tupanaarü duü̃ü̃gümaã ngupetüü̃. Notürü Tupana tümaarü yumuꞌẽ naꞌinü ya yiꞌema wüi pecadu i tchieü̃tchi üe ngeguma ta nüü̃ tarüogu i tümacüma i tchieü̃. Nawa naugütae i Ichaía 1:⁠15 rü 55:⁠7.

Nüü̃ cudau i vídeo Eꞌna Guü̃ma i Yumüẽgü Naĩnüü̃ ya Tupana?

Yeuwa ya tüü̃ Ücücaꞌ rica yumuꞌẽgü. Ngema ügügu tayaꞌõgü na nüma rica Tupana yiꞌĩü̃. (Mateu 4:⁠10, 6:⁠9) Ngetchu­tchuẽgagu nayumuꞌẽ erü torü pecadugüca nayu. (Juã́ũ 14:⁠6) Yeuwa tama nanawae na yecü yaꞌuutchigüetchaü̃ i yumuꞌẽgü i poperagu ümatügüü̃. Nüma nanawae na torü yumuꞌẽwa namaã nüü̃ iꞌuü̃ i taꞌacü torü maü̃newa ne ĩü̃. Nawa naugütae i Mateus 6:⁠7(TNM) rü Piripucü̃ã 4:⁠6, 7.

Tupana nüü̃ naꞌinü i torü yumuꞌẽ i taãẽwa ügüü̃. (1 Chamué 1:⁠12, 13) Ngeü̃rüü̃ i ngoragumare name na yumuꞌẽgüü̃: Ẽü̃wa, ipeetchaü̃gu, itchibüetchaü̃gu rü nhuꞌmatchi ngeguma gutchaü̃ ngemagu. Nawa naugütae i Salmo 55:⁠22 rü Mateu 15:⁠36.

Nagutcha na Tupanamaã i amücüü̃ erü tümatanüwa tamaꞌẽ ya duẽꞌẽgü ya tama nüü̃ yaꞌõgüe rü tchiri  norü unetagütchiga ideꞌagüe. (2 Timúteu 3:⁠4, 2 Pedru 3:⁠13) Yiema na Tupanaü̃ ngetchaü̃güü̃ rü nüü̃ puracüetchaü̃, ngutaqueꞌewa ingugü na ngema wüitchigü yigü rüngüꞌẽẽgüü̃caꞌ. Nawa naugütae i Ebréugü 10:⁠24, 25.

Ngeguma ta yiꞌema Tupanaü̃ ngetchaü̃güemaã amücügu, tüü̃ ta tarüngüꞌẽẽgü na Tupanamaã iamücügüü̃. Yeuwaarü Orearü Uruü̃güarü ngutaqueꞌegüwa curü õ rü niporatchigü ta nagagu i togüarü õ. Nawa naugütae i Romacü̃ã 1:⁠11, 12.

Cuma Yeuwamaã cuamücü ngeguma ta aũrima nagu curüꞌinügu i taꞌacü Tupanaarü Ore namaã nangue. Tupana naüü̃gu rüꞌinü, nagu i norü ucuẽgü rü nagu i guü̃ma i norü unetagü. Ngeguma ta nagu rüꞌinüẽgu i ngemagü rü yumuꞌẽgu nüü̃ tacuaꞌgü ta na aũrima nangetchaü̃wae ya Tupana rü nhuꞌmatchi tauema cuaꞌwa nüü̃ rü yeera. Nawa naugütae i Josué 1:⁠8 rü Salmo 1:⁠1-⁠3.

Rü nhuꞌmatchi nagu yaꞌõ ya Tupana. Wüi cuaꞌãtchiruü̃: Naĩgu tanangu i õ. Dea naetügu cubaüügu rica ta niꞌĩ nayaü̃ i ngema naĩ. Torü õ rü ngegumarüü̃ niꞌĩ. Yeera ta Tupanaca cunguꞌgu rica ta niꞌĩ nayaü̃ rü nhuꞌmatchi naporaü̃ i curü õ. Nawa naugütae i Mateu 4:⁠4 rü Ebréugü 11:⁠1, 6.

Yeuwa namaã amücügüü̃na nadau. Nüma nanawae na maꞌü̃ i tauguma guꞌü̃ iyaugüü̃ rü tüü̃ inapoꞌü̃ natcheecü i ngema torü õ guꞌẽ. (Salmo 91:1, 2, 7-10) Nüma ta nüü̃ niꞌu nhuãcü ta taãẽgüü̃ rü tama i dawegüü̃. Nüma nacüma rümeꞌmaẽü̃caꞌ tüü̃ nanguꞌẽẽ. Nawa naugütae i Salmo 73:⁠27, 28 rü Tiagu 4:⁠4, 8.