Yeuwa duẽꞌẽgüna nanaꞌã i Naane na tatchiü̃ yaꞌĩü̃caꞌ. Tupana Adãũü̃ rü Ewaü̃ naü. Wüi ga natchica i meü̃gu nanamugü. Edeü̃gu naãẽga yema natchica. Yeuwa nanawaetchire na Adãũ rü Ewa naãcügümaã Naanegu naãtchiü̃güü̃ nhumata taugu. (Génesis 2:⁠15-17) Ngema nanawe na tatchiü̃ yiꞌĩü̃ i Naane. Ãĩyugü niꞌĩ dauü̃wa maꞌẽü̃. (1 Reis 22:⁠19) Nawa naugütae i Salmo 37:⁠29 rü 115:⁠16.

Noriitchima naane ga Edeü̃ rica niꞌĩ Meẽtchiü̃ i Naane iꞌĩü̃. Nimuẽtanü ga duü̃ü̃gü yerü Adãũ rü Ewa niããcüetanütchigü. Naanena tchi nadaugü düwa tchi wüi meẽtchiü̃ i naane yiꞌĩ i norü ta. (Génesis 1:⁠28) Taugutama niyaguꞌ i Naane. Guꞌü̃gutama tatchiü̃ niꞌĩ. Nawa naugütae i Eclesiastés 1:⁠4.

Nüü̃ cudau i vídeo Tüꞌcüü̃ Naane naü a Tupana?

Yerü Adãũ rü Ewa tama Tupanagaü̃ naꞌinüẽ. Yemacaꞌ yema naanewa inawoꞌü̃. Nümagü nanataũꞌẽgü i meẽtchiü̃ i naane. Yemawena natauma i wüi natchica i yemarüü̃. Yemacaꞌ niꞌĩ Tupanaarü Ore nüü̃ yaꞌuü̃ na Naanewa tayiemaü̃ ya duẽꞌẽgü ya tchieü̃ ügüe. Nawa naugütae i Génesis 3:⁠23, 24.

Tama eꞌna marü nanawae a Yeuwa na duẽꞌẽgüna naꞌããü̃ i meẽtchiü̃ i naane na nagu tapegüü̃caꞌ? Nanawae ni. Yeuwa rü naporaü̃tchi. Nayanguꞌẽẽ ta i ngema nüü̃ yaꞌuü̃. (Isaías 45:⁠18, TNM) Guꞌü̃gutama meẽtchiü̃ i naanewa tamaꞌẽ ya duẽꞌẽgü. Ngema Naane rü nuãtatama niꞌĩ, Tupanaarü ngu­tchaü̃ãcü. Nawa naugütae i Salmo 37:⁠11, 34.

Naanearü Ãẽꞌgacü ta niꞌĩ ya Ngetchutchu. Nüma ta 1.000 ya taunecü nanapocu i ­Tchatana. Tupanaarü Ore nüü̃ niꞌu na Ngetchutchu ãĩyugümaã wüigu ta tüü̃ nadai ya duẽꞌẽgü ya tama Tupanaü̃ cuaꞌgütchaü̃ẽ  nagu i guera i Armajedõũgu ãẽgaü̃. Tupanaarü duü̃ü̃gü rü tautama nayue erü Ngetchu­tchu ta niꞌĩ nüna daugüü̃. Nümagü rü guꞌü̃gutama namaꞌẽ nawa i Meẽtchiü̃ i Naane. Nawa naugütae i Apocaríchiu 20:⁠1-⁠3 rü 21:⁠3, 4.

Nhugu ta ni Tupana yaguꞌẽẽü̃ i guü̃ i tchieü̃? Guü̃ma i taꞌacü i nhuma ingupetüü̃ nanawe na marü nüma nayaguꞌẽẽü̃ ta, ngematchiga niꞌĩ Ngetchutchu ya deꞌaü̃. Nhuma Naanewa namuũtchi i ãũcümaü̃ ngemacaꞌ niꞌĩ yaguꞌü̃ ta i guü̃ma i tchieü̃. Nawa naugütae i Mateus 24:3, 7-14, 21,22, TNM.

Dauü̃wa ãẽꞌgacü ta niꞌĩ ya Ngetchutchu, 1.000 a taunecü ta niꞌĩ Naanecü̃ãarü ãẽꞌgacü yiꞌĩü̃ rü nhuꞌmatchi guü̃ma i oeẽ niguꞌẽẽ ta. (Ichaía 9:⁠6, 7, 11:⁠9) Ngetchutchu tüü̃ nayaguꞌẽẽ ta ya duẽꞌẽgü ya Tupanaü̃ ngetchaü̃güe i tümaarü pecadugü. Yeuwa Naneü̃ ta namu na daweü̃ rü yuü̃ narüoꞌẽü̃caꞌ rü nhuꞌmatchi yaü̃. Nawa naugütae i Isaías 25:8, 33:⁠24, TNM.

Yiꞌema Tupanaga inüẽ ta tiꞌĩ ya Meẽtchiü̃ i Naanewa maꞌü̃ẽ. (1 Juã́ũ 2:⁠17) Ngetchutchu norü ngueꞌü̃güü̃ namu na duẽꞌẽgü ya Tupanatchigaü̃ cuaꞌgütchaü̃ẽcaꞌ yadaugüü̃caꞌ rü nhuꞌmatchi tüü̃ nangueꞌẽẽü̃caꞌ. Nhuma, Yeuwa muũtchiema ya duẽꞌẽgü inameꞌẽẽ na Meẽtchiü̃ i Naanewa tamaꞌẽü̃caꞌ, ngema Naane rü nuãtatama niꞌĩ. (Ichaía 55:⁠6) Yeuwaarü Orearü Uruü̃güarü Ngutaqueꞌepataü̃güwa, yatü ya ãmaꞌü̃, ngee ya ãtee rü naca nangue na nhuãcü namecümagüü̃. Papa rü mama wüigu naãcügümaã Tupanaü̃ nicuaꞌüü̃gü rü ­nataãẽgü. Nawa naugütae i Miquéa 4:⁠1-⁠4.