NGÚERUÜ̃ 15
Tüꞌcüü̃ tautama iquitchaãtchi na Yeuwatchigaca cunguꞌ?
1. Tüꞌcüü̃ name niꞌĩ na Tupanaarü Oreca quinguꞌtchigüü̃?
Yema cuma Tupanaarü Orewa nüü̃ cucuaꞌü̃ aũrima Yeuwaü̃ cuü̃ nangetchaü̃ẽ. Ngeguma tchi tautama iquitchaãtchigu na Tupanaarü Orecaꞌ cunguꞌü̃, yeera ta aũrima Yeuwaü̃ cungetchaü̃. (1 Pedru 2:2, 3) Aũrima Yeuwamaã cuamücü ngeguma ta norü oreca cunguꞌgu. Ngemaãcü yiꞌĩgu düwa ta cuü̃ nangema i maꞌü̃ i tauguma guꞌü̃. Nawa naugütae i Juã́ũ 17:3.
Tupanatchigaca nanguꞌtchigü na curü õ naporaü̃caꞌ. Ngema õmaã ta niꞌĩ Tupanaü̃ cutaãẽꞌẽẽ. (Ebréugü 11:1, 6) Ngema õgagu cucüma i tchieü̃ icuta ta rü meü̃ ta cuü. Nawa naugütae i Puracügü 3:19, 20.
2. Nhuãcü ta cuma toguãü̃ curüngüꞌẽẽ?
Yeuwa rü cunatürüü̃ ta niꞌĩ
Yiema rü tüü̃ name na megüü̃tchiga iꞌuü̃. Ngemacaꞌ toguãmaã nüü̃ iꞌu i Tupanaarü Oretchiga i megüü̃ i nüü̃ quicuaꞌtchigüü̃. Ngema cuüü̃caꞌ Tupanaarü Orecaꞌ nanguꞌtchigü. Tupanaarü Orewa cunaweü̃caꞌ i yema nüü̃ cucuaꞌü̃, taꞌũ itchaãtchi na Tupanaarü Oreca cunguꞌü̃. Nawa naugütae i Romacü̃ã 10:13-15.
Namaã cuamücügüü̃maãĩra nüü̃ iꞌu rüeꞌna cutanüꞌü̃maã i ngema nguꞌẽẽgü i megüü̃. Meã ta quideꞌaü̃. Taꞌũta nüü̃ quiꞌuü̃ na norü natücumü i Tupanaü̃ i cuaꞌüü̃ rü doratamaã nangueü̃. Nüü̃ iꞌu i taꞌacü i meü̃ i Tupana naüü̃ ta. Duẽꞌẽgücaꞌ narümeꞌmaẽ i taꞌacü cuüü̃, tama i taꞌacü nüü̃ quiꞌumareü̃. Ngemana nacuaꞌãtchi. Nawa naugütae i 2 Timúteu 2:24-26.
3. Nhuãcü ta cuü̃ narüngüꞌẽẽ i Tupanaarü Ore ngeguma ta naca cunguꞌgu?
Naca nanguꞌtchigü i Tupanaarü Ore na Yeuwaü̃ cungetchaü̃ü̃caꞌ. Cuma rü meãma ta Yeuwamaã cuamücü. Cuma rü naãcüãrüü̃ ta quiꞌĩ. Ngema rü nameꞌẽtchi, cüna? Nawa naugütae i 2 Corĩ́tiucü̃ã 6:18.
4. Nhuãcü ta naporaü̃ i curü õ?
Naca quinguꞌtchigügu i Tupanaarü Ore curü õ napora ta. (Ebréugü 5:13, 14) Wüi Yeuwaarü Orearü Uruü̃maã ideꞌa naca cunguꞌegagu i Tupanaarü Ore rü nüma ta cuü̃ nanguꞌẽẽ nawa i popera muãtüü̃ Você pode entender a Bíblia!. Yeera Tupanatchigaü̃ quicuaꞌtchigügu, yeera cutaãẽ ta. Nawa naugütae i Salmo 1:1-3 rü 73:27, 28.
Guü̃ma i taꞌacü i meü̃ rü Yeuwawa ne naĩ. Cuma rü yeera ta namaã cuamücü ngeguma ta norü duü̃ü̃gümaã wüigu ngutaqueꞌegüwa nüü̃ quicuaꞌüü̃gu. (Ebréugü 10:24, 25) Naütchigü i Yeuwaarü ngutchaü̃ na yicüra cunayauü̃caꞌ i maꞌü̃ i aicuma iꞌĩü̃ i maꞌü̃ i tauguma guꞌü̃ iꞌĩü̃. Tupanamaã cuamücüü̃ rü guü̃maü̃ narümeꞌmaẽ. Nawa naugütae i 1 Timúteu 1:11, 6:19.
Tocaꞌ cuü̃ name i ngẽma
MEẼTCHIÜ̃ I PURACÜ
Tüꞌcüü̃ Tupanaarü Orecaꞌ inguꞌ?
Muũtchiema ya duẽꞌẽgü rü Tupanaarü Orewa ngaü̃güü̃ tingaugü. Tupanaarü Orecaꞌ cunguegaü̃?
