NGÚERUÜ̃ 4
Teꞌe niꞌĩ ya Ngetchutchu ya Cristu?
1. Ngeta niꞌĩ ninaũü̃ ga Ngetchutchu?
Tüꞌcüü̃ ga yeguma guanema tüü̃ nangutchaü̃ na Ngetchutchuna tangaicamagüü̃? (MATEU 11:29, MARCU 10:13-16)
Yeguma tauta nuã Naanewa naũgu ga Ngetchutchu, nüma rü wüi ga ãĩyu niꞌĩ rü nhuꞌmatchi dauü̃wa namaꞌü̃. (Juã́ũ 8:23) Ngetchutchu Nanatüü̃ narüngüꞌẽẽ na guü̃ma i taꞌacü i nhuma ngemaü̃ naüü̃caꞌ. Tupana rü Ngetchutchuĩra niꞌĩ naüü̃. Ngemacaꞌ niꞌĩ Tupanaarü Orewa Tupana Nane ya nügümaã nüü̃ wüicacügu naꞌuü̃ ya Ngetchutchu. (Juã́ũ 1:14) Ngetchutchu rü ‘Ore’ niꞌĩ erü Tupanaarü Ore niꞌutchigü. Nawa naugütae i Corochacü̃ã 1:15-17.
2. Tüꞌcüü̃ ga Ngetchutchu nuã ga Naanewa naũ?
Nüma rü nuã ga Naanewa naũ na (1) Tupanatchiga i aicumaü̃maã yangueü̃caꞌ, (2) nayaweü̃caꞌ nhuãcü Tupanaarü ngutchaü̃ iüama woo ngeguma gutchaü̃gü tüü̃ ngupetügu rü (3) yayuü̃caꞌ na pecaduwa rü yuwa tüü̃ i nanguꞌü̃ꞌẽü̃caꞌ. Nhuãcü numa Naanewa naũ ga Ngetchutchu? Tupana rü Maria ga tauguma yatüü̃ cuaꞌcüarü natchimaü̃gu Nanearü maꞌü̃ niaücutchi, yemaãcü nane numa ga Naanewa namu. (Luca 1:30-35) Nawa naugütae i Mateu 20:28.
3. Taꞌacüwa tüü̃ inanguꞌü̃ꞌẽẽ ga Ngetchutchu?
Pecadu rü yuwa tüü̃ inanguꞌü̃ꞌẽẽ ga Ngetchutchu. Yeguma Adãũ naügu ga Tupana, nüma rü tamatchire nanawae na tayae rü tayue ya duẽꞌẽgü. Nüma rü nanawaetchire na Adãũ naga naꞌinüü̃. Yegumatchi naga naꞌinügu guꞌü̃gutchi namaꞌü̃. Notürü Adãũ rü tama naga naꞌinü. (Génesis 2:16, 17, 5:5) Rü guanema ga Adãũwa ne ĩẽ rü pecadu rü yugu tapocue. Tayiema ya duẽꞌẽ ya naütanüẽ na nawa inguꞌutchigüü̃caꞌ i pecadu rü yu. (Êxodo 21:29, 30, TNM) Nawa naugütae i Romacü̃ã 5:12 rü 6:23.
Teꞌe tanaütanü na nawa inguꞌutchigüü̃caꞌ i pecadu rü yu? Wüie ya duẽꞌẽ ya ngearü pecaduãẽ tanaütanü. Nawa naugütae i Salmo 49:7-9.
4. Tüꞌcüü̃ nayu ga Ngetchutchu?
Ngetchutchu nayu yerü duẽꞌẽgüü̃ nangetchaü̃. Tama nawegu na nayuü̃ yerü tamatchire napecaduã. Yemaꞌẽtüwa nayuama ga Ngetchutchu na Nanatügaü̃ naꞌinüü̃caꞌ rü nhuꞌmatchi pecaduwa tüü̃ inanguꞌü̃ꞌẽü̃caꞌ. Tupana duẽꞌẽgüarü pecadugüü̃ nangetchaü̃ nagagu i yema Ngetchutchu naüü̃. Tupana nanawe na aũrima duẽꞌẽgüü̃ nangetchaü̃ yeguma Nane nuã ga Naanewa namugu na taca yayuü̃caꞌ. Nawa naugütae i Juã́ũ 3:16 rü Romacü̃ã 5:18, 19.
Nüü̃ cudau i vídeo Tüꞌcüü̃ nayu ga Ngetchutchu?
5. Taꞌacü i nhuma inaüü̃ ya Ngetchutchu?
Yeguma ga Naanewa nayemagu ga Ngetchutchu rü daweeü̃ narümeꞌẽẽ, yueü̃ wenaarü namaꞌẽẽẽ rü duẽꞌẽgü ga ioeẽgüeü̃ nataãẽꞌẽẽ. (Mateu 15:30, 31, Juã́ũ 5:28) Nayu ga Ngetchutchu notürü Tupana wenaarü nanamaꞌẽẽ rü dauü̃wa nimaꞌü̃. (Epéchiucü̃ã 1:19,20) Yeguma wenaarü namaꞌü̃gu ga Ngetchutchu rü inananguꞌẽẽ nhumata Yeuwa namaã nüü̃ iꞌu na ãẽꞌgacü yiꞌĩü̃. (Ebréugü 10:12, 13) Nhuma muũtchiema ya duẽꞌẽgü ya naanearü tawa ngemagüe rü naga taꞌinüẽ rü nhuꞌmatchi nüü̃ tiꞌugügü na ãẽꞌgacü yiꞌĩü̃. Nawa ga guü̃ma i meü̃ ga Ngetchutchu naüü̃ ga Naanewa nüü̃ tadaugü i ngema naüü̃ ta. Nawa naugütae i Apocaríchiu 11:15 rü Mateu 28:19.
Nawa nangu ta i nguneü̃ i Ngetchutchu nagu nadai i ngema tchieü̃ ügüü̃. Marü tautama teꞌe tioeẽ. Yiꞌema yaꞌõẽ rü nhuꞌmatchi ngetchutchuga inüe rü tüü̃ ta nangema i maꞌü̃ i tauguma guꞌü̃ numatatama nawa i Meẽtchiü̃ i Naane. Nawa naugütae i Salmo 37:9-11.
Tocaꞌ cuü̃ name i ngẽma
CAGÜ NA TUPANAARÜ ORE NANGÃÜ̃
Tüꞌcüü̃ nayu ga Ngetchutchu?
Nhuãcü i ngẽma Ngetchutchuarü yu rü tüü̃ rüngü̃ẽẽ?
