Adãũ rü Ewa naꞌãꞌacügü rü duü̃ü̃gü muü̃ma niꞌĩgü i Naanewa. Nhure ga ãĩyugü Tchatanamaã tama Tupanaga naꞌinüẽtchaü̃ rü nua Naanewa naꞌĩ.

Ãĩyugü duẽꞌẽgü niꞌcaꞌitchigü rü niꞌãmaꞌgü. Ngegü taꞌãꞌacügü rü itaütchiü̃ rü matchaneü̃tchiü̃ niꞌĩgü i tümaãcügü. Tümaãcügü naporaütchigü rü aũrima natchiecümagü.

Rü yeguma i Naanewa duü̃ü̃gü rü tchieü̃rica naügü. Tupanaarü Ore rü yatügütchiga nhaü̃ niu: “rü nüü̃ nadau na poraãcü tchieü̃ naügüü̃ rü tchieü̃guꞌicatama naꞌinüẽü̃.”

Noe rü nucüma wüi ga yatü ga mecü niꞌĩ. Yeuwa nüü̃ niu Noemaã na duü̃ü̃gü i tchieü̃ ügüü̃ nadai, wüi ga taütchicü ga mucümaã.

Tupana rü Noeꞌü̃ namu na naꞌüãü̃caꞌ ga wüi ga wapuru ga taütchine ga caitchaũrüü̃ iꞌĩꞌü̃ne. Rü Noe guma wapuru ga taütchinegu niꞌüe namaã i natanüꞌü̃ rü namaã ta i guü̃ma i naẽꞌü̃gü.

Woo na Noe duü̃ü̃gümaã nüü̃ yauü̃ na taütchicü ga mucü inangutchaü̃ü̃, tümagü tama nüü̃ taꞌinüẽgüꞌama. Rü nhure ga nüü̃ tacugüeꞌama rü natchi taꞌaieꞌama.

Yeguma ga Noe marü wapuru ga taütchine naügu, Noe naeꞌü̃gü namatchiü̃wa nagagü.