NGÚERUÜ̃ 11

Nhuãcü meã nayoniẽ curü Tupanaarü Ore ugütae?

NAPAÜ

Ngẽguma tá cunaügügu wüi taü̃ puracü, poraãcü curümaãtchiü̃. Notürü natautcha, ngẽguma írarüwa cupuracügu. Ngẽgumarüü̃ ta ngẽguma i Tupanaarü Orewa cuugütaegu. Bemana cugüãẽwa cugüna naca: Ngetá tá tchanaügü na Tupanaarü Orewa tchaugütae? Nhaa ngúeruü̃wa nüü̃ cucuaꞌ tá nhuãcü cuü̃ nameü̃ na Tupanaarü Orewa cuugütae rü nhuãcü tá nüü̃ cungetchaü̃ i taꞌacü nawa cunguꞌ.

1. Tüꞌcüü̃ nameü̃ na Tupanaarü Orewa guü̃ i nguneü̃gu iugütaeü̃?

Rü duü̃ü̃ iugütaeü̃ i Bíbliawa urü Yeuwaarü mugüwa rü nataãẽü̃tchi tá norü maü̃wa. (Nawa naugütae Salmos 1:1-3.) Naügü na Tupanaarü Orewa cuugütae írarüwatchigü guü̃ i nguneü̃gu. Rü nüü̃ cucuaꞌ tá taꞌacü Tupanaarü Ore nüü̃ iuü̃ rü yeera cuü̃ name nawa cuugütaeü̃.

2. Nhuãcü meã nayoniẽ curü Tupanaarü Ore ugütae?

Rü nayoniẽ na Tupanaarü Orewa cuugütae, rü meã nagu curüĩnü. (Josué 1:8) Rü ngẽmacaꞌ cugüãẽwa cugüna naca: Taꞌacü tá ngẽma tchoü̃ nanguꞌẽẽ i Yeuwatchiga? Nhuãcü meã tchanaüü̃ i tchorü maü̃wa? Ngẽma tchaugütaeü̃, nhuãcü togü i duü̃ü̃güü̃ narüngü̃ẽẽ?

3. Nhuãcü tá wüi nguneü̃ ícuüütchi na Tupanaarü Orewa cuugütaeü̃caꞌ?

Rü cucaꞌ nagutcha wüi nguneü̃ ícuüütchi na Tupanaarü Orewa cuugütaeü̃caꞌ? Rü muü̃ duü̃ü̃güü̃caꞌ ngẽma nagutcha. Rü ngẽmacaꞌ name na nüü̃ nacuaꞌ rü nhuãcü meã nayoniẽ i nguneü̃. (Epéchiucü̃ãꞌ 5:16) Rü guü̃ i nguneü̃gu rü name nüü̃ quideetchi i ngora na Tupanaarü Orewa iugütaeü̃caꞌ. Nümaü̃ i duü̃ü̃güü̃ name na Tupanaarü Orewa naugütae, cuaꞌãtchiruü̃: Rü paꞌmama, rü yauanecü urü tchütacü. Rü cuma, taꞌacü i ngora cuü̃ name na Tupanaarü Orewa cuugütaeü̃caꞌ?

YEERA NÜÜ̃ CUCUAꞌ

Rü nüü̃ cudau i ucuꞌẽgü na cuü̃ narüngü̃ẽẽ meã Tupanaarü Orewa cuugütaeü̃caꞌ, rü ta nhuãcü cugü ícumeẽẽ curü Tupanaarü Orearü nguꞌü̃caꞌ.

Cunangõꞌü̃rüü̃ i õna i nori tagutchire cungõꞌü̃, ngẽgumarüü̃ ta tá cuü̃ name na Tupanaarü Orewa cuugütae.

4. Nhuãcü tá cuü̃ name na Tupanaarü Orewa cuugütae?

Nhuguãcü tama nataucha inaügü i Tupanaarü Orewa ugütae. Notürü wüi õnarüü̃ na tagutchire cungõꞌü̃ na írarüwa ngẽma õna tá cuü̃ meü̃ ngẽgumarüü̃ ta írarüwa tá cuü̃ nameẽtchi Tupanaarü Orewa cuugütae. Nawa naugütae 1 Pedru 2:2. Yicama pegümaã pideagü ngẽmatchiga:

Wüitchigü i nguneü̃gu i Tupanaarü Orewa cuugütae, eꞌna ngẽma cuü̃ narüngü̃ẽẽ tá rü cuü̃ name nawa ugütae?

Nüü̃ cudau i VÍDEO na nanaweꞌ taꞌacü nümaü̃ duü̃ü̃gü nanaü na nüü̃ nameü̃caꞌ Tupanaarü Orewa ugütae. Yicama pegümaã pideagü ngẽmatchiga:

VÍDEO: Rü ngetüꞌüü̃güü̃ rü paü̃güü̃ na Tupanaarü Oreü̃ nangetchaü̃gü (5:33)

Ngẽma vídeo, taꞌacü ngetüꞌüü̃güü̃́ rü paü̃güü̃́ nanagutchaü̃ẽẽ na Tupanaarü Orewa naugütaegü?
Taꞌacü ngetüꞌüü̃güü̃ rü paü̃güü̃ narüngü̃ẽẽ i Tupanaarü Orewa naugütaegüetcha?
Taꞌacü ga nümagü nanaü na nüü̃ nameü̃caꞌ Tupanaarü Orewa ugütae?

Nüü̃ cudau i nhuãcü tá cunaügü i Tupanaarü Orewa cudaumatü:

Nangẽma i Tupanaarü Ore togü i nagagüwa nanaümatü, nhaãcü nüü̃ cuuneta wüi Bíblia na meãma nüü̃ cucuaꞌü̃caꞌ. Wüi meü̃ cuaꞌruü̃ niĩ Tradução do Novo Mundo.
Rü capituru na cuü̃ nameẽtchiü̃caꞌ, ngẽmawa cunaügü cuugütae. Nhuãcü tá cunaü i ngẽma? Nüü̃ cudau nawa i quadru: “Inaügü i Tupanaarü Orewa cuugütae.”
Ngetá íquiyatchaãtchi curü ugütae i Tupanaarü Orewa cunawüü̃ ngẽmawa i quadru: “Ngetá íquiyatchaãtchi?”
Ngẽmamaã i aplicativo JW Library^® rü computadogu, rü tabletgu urü ceruragu i Tupanaarü Orewa cuugütae rü áudioü̃ cuĩnüü̃.
Cuugütae i apêndices nawa Tradução do Novo Mundo. Rü nawa nangẽma rü mapagü rü tabelagü rü glossário, na yeera cuna nanguꞌẽẽ tá.

5. Cugü ícumeẽẽ curü Tupanaarü Orearü nguꞌü̃caꞌ

Nawa naugütae Salmos 119:34. Yicama pegümaã pideagü ngẽmatchiga:

Tüꞌcüü̃ name niĩ iyumüẽ naü̃pa na Tupanaarü Orewa iugütae urü ngẽguma tá cugü ícumeẽẽgu curü Tupanaarü Orearü nguꞌü̃caꞌ?

Nhuãcü tá cuyoniẽ wüitchigü ngẽmawa ngúeruü̃gü? Ngẽguma tá cugü ícumeẽẽgu curü Tupanaarü Orearü nguꞌü̃caꞌ, ngẽma naü:

Naugütae rü nüíragü i natchimaü̃gü ngúeruü̃wa.
Naugütae Tupanaarü Orewa i wetchicurugü, rü nagu curüĩnü nhuãcü ngẽma wetchicurugü yangicu i ngúeruü̃maã.
Nawüü̃ unetatchigü i nhaã deagü i norü ngãü̃ü̃patchigü i cagü. Ngẽma cuü̃ narüngü̃ẽẽ tá curü nguꞌẽẽtaeruü̃maã quideaü̃ i ngúeruü̃tchiga.

Marü nüü̃ cucuaꞌ i ngẽma?

Rü Yeuwaarü Orearü Uruü̃gü togü i Tupanaarü Orearü traduçãogü marü nüü̃ nanangugü, notürü nhuꞌma toü̃ name tanangugü ngẽmawa Tradução do Novo Mundo da Bíblia Sagrada erü ngẽma niĩ iaicumacü rü nawa dea i tautchaü̃, rü nanaweꞌ i Tupanaéga. — Nüü̃ nadau i sitewa “Eꞌna i Yeuwaarü Orearü Uruü̃güarü Bíblia natoraü̃?”

NÜMAÜ̃ DUÜ̃Ü̃GÜ NÜÜ̃ NIU: “Rü nagutcha i Tupanaarü Ore nanguꞌ erü tchapuracüü̃tchi rü tchipaꞌü̃tchi.”

Taꞌacü nagu curüĩnü i ngẽmatchiga?

TAꞌACÜ MARÜ NÜÜ̃ CUCUAꞌ?

Rü meãma nangugü i Tupanaarü Ore, rü inaüütchi wüi nguneü̃ na Tupanaarü Orewa cuugütaeü̃caꞌ, rü naü i yumüẽ na meã nüü̃ cucuaꞌü̃caꞌ, rü meã cugü ínameẽẽ wüitchigü i ngúeruü̃caꞌ.