NGÚERUÜ̃ 15

Teé niĩ ya Ngetchutchu?

NAPAÜ

Rü Ore nanaweꞌ na muü̃tchi i duü̃ü̃gü meã Ngetchutchuü̃ nacuaꞌgüü̃. Notürü nümaü̃gü duü̃ü̃gü nangẽma to ĩnügü i Ngetchutchutchiga. Taꞌacü i Tupanaarü Ore yauü̃ i ngẽmatchiga?

1. Teé niĩ ya Ngetchutchu?

Ngetchutchu rü wüi ãĩyu poraü̃tchicü niĩ erü dauü̃wa namaü̃. Yeuwa rü Ngetchutchuíra niĩ naüü̃. Ngẽmacaꞌ, Tupanaarü Ore nüü̃ niu na “naü̃pa i guü̃ma i taꞌacü i nhuꞌma ngẽmaü̃, rü nüĩra nayema”. (Corochacü̃ãꞌ 1:15) Rü Tupanaarü Ore nüü̃ niu na Yeuwaicatama i Ngetchutchuü̃ nanaü. Ngẽmacaꞌ naãéga “nügümaã wüicacü”. (Juã́ũ 3:16) Nüma rü nanatücüwawa napuracü na guü̃ma i taꞌacü i Naanewa ngẽmaü̃ naüü̃caꞌ. (Nawa naugütae Provérbios 8:28-30.) Yeuwa rü Ngetchutchu nügümaã nangetchaü̃ naporaü̃tchi. Ngetchutchu i Tupanaarü Orearü ngeruü̃ niĩ rü nüü̃ niu i Yeuwaarü nguꞌẽẽtaegü. Ngẽmacaꞌ naãéga i “Tupanaarü Ore iĩcü”. — Juã́ũ 1:14.

2. Tüꞌcüü̃ Ngetchutchu Naanewa naũ?

Nũcümaü̃tchima rü Yeuwa rü meü̃ naü. Rü taꞌacü naüü̃? Ngetchutchu dauü̃wa namaü̃ rü Yeuwa naãẽ i üüneü̃maã rü Maríatchimüü̃gu nanearü maü̃ niaücutchi yemaãcü nane ga Naanewa namu. (Nawa naugütae Luca 1:34, 35.) Yeuwa rü Ngetchutchuü̃ namu na Metchía niĩü̃caꞌ urü Cristu niĩü̃ rü duü̃ü̃güü̃ ínanguü̃ẽẽü̃caꞌ. a Ngetchutchu guü̃ma profeciagü i Metchíatchiga ninguẽẽ. Rü ngẽma duü̃ü̃güü̃ narüngü̃ẽẽ na meã nüü̃ nacuaꞌgüü̃caꞌ na Ngetchutchu niĩü̃ ga ‘Cristu ya Tupana ya maü̃cü Nane niĩü̃’. — Mateu 16:16.

3. Ngetá Ngetchutchu namaü̃ i nhuꞌma?

Ngetchutchu nayuguwena, Tupana nüü̃ ínarüdaẽẽ rü ãĩyu nayaĩẽẽ i wena rü dauü̃wa namaü̃. Rü “Tupana rü guü̃ãrü ãẽꞌgacüü̃ nayaĩẽẽ”. (Piripucü̃ãꞌ 2:9) Nhuꞌma, Ngetchutchu wüi ãĩyu poraü̃tchiü̃ niĩ. Notürü Yeuwaicatama niĩ i norü yeera poracü.

YEERA NÜÜ̃ CUCUAꞌ

Rü nüü̃ nadau teé niĩ aicuma ya Ngetchutchu, rü tüꞌcüü̃ narümemaẽ nüü̃ icuaꞌ Ngetchutchutchiga.

4. Ngetchutchu tama Tupana ya guü̃arü yeera poracü niĩ

Rü Tupanaarü Ore tüü̃ nanguꞌẽẽ na Ngetchutchu rü wüi ãĩyu poraü̃tchicü niĩ rü dauü̃wa namaü̃. Notürü nüma rü nanatü ya Yeuwaga naĩnü. Nhuãcü nüü̃ tacuaꞌ i ngẽma? Nüü̃ cudau i VÍDEO rü nüü̃ nacuaꞌ nhuãcü Tupanaarü Orewa nanaweꞌ na Ngetchutchu natoraü̃ü̃ ya Tupana ya Guü̃arü Yeera Poracü.

VÍDEO: Ngetchutchu rü Tupana eꞌna yiĩü̃? (3:22)

Rü nüü̃ nadau i wetchicurugü naweꞌ na Ngetchutchu rü Yeuwa tama nawüiguü̃. Naugütae wetchicurugütchigüwa rü yicama pegümaã pideagü ngẽmatchiga:

Nawa naugütae Luca 1:30-32.

Ngẽma ãĩyuarü deagü rü “Tupana ya Taütchicü”, nhuãcü ngẽma nanaweꞌ na Ngetchutchu rü Yeuwa tama nawüiguü̃?

Nawa naugütae Mateu 3:16, 17.

Yeguma Ngetchutchu ínabaiegu rü dauü̃wa inanaũ wüi naga, rü taꞌacü ga yema naga ga yema nüü̃ yau?
Taꞌacügu curüĩnü rü teéga niĩ i yema?

Nawa naugütae Juã́ũ 14:28.

Wüi natanüü̃wa teé niĩ ya ãẽꞌgacü: Rü papa urü nane?
Ngetchutchu nüü̃ niu na Yeuwa norü papa niĩü̃. Taꞌacü tüü̃ nanguꞌẽẽ?

Nawa naugütae Juã́ũ 12:49.

Eꞌna Ngetchutchu nüü̃ niu na nüma rü nanatümaã nawüiguü̃? Taꞌacügu curüĩnü rü nümagü nawüiguü̃?

5. Aicumacü nanaweꞌ na Ngetchutchu rü Metchía niĩü̃

Rü Tupanaarü Ore nüü̃ nanaweꞌ na profeciagü marü duü̃ü̃güü̃ narüngü̃ẽẽ rü nüü̃ nacuaꞌ na teé ga Metchía niĩ rü guẽma na Tupana nüü̃ nauneta na duü̃ü̃güü̃ ínanguü̃ẽü̃caꞌ. Nüü̃ cudau i VÍDEO na nüü̃ nacuaꞌü̃caꞌ i nhuãcü profeciagü marü Ngetchutchu nayanguẽẽ yeguma nhama Naanewa nayemagu.

VÍDEO: Rü profeciagü i Ngetchutchutchiga rü marü nügü ningugü (3:03)

Nawa naugütae nhaa profeciagü rü yicama pegümaã pideagü ngẽmatchiga:

Nawa naugütae Miquéias 5:2 na nüü̃ nacuaꞌü̃caꞌ ngetá ga Metchía nabuü̃. b

Nhuãcü ngẽma profecia ga yanguü̃? — Mateu 2:1.

Nawa naugütae Salmos 34:20 rü Zacarias 12:10 na nüü̃ nacuaꞌü̃caꞌ i profeciagü i Metchíarü yutchiga.

Nhuãcü ngẽma profeciagü ga yanguü̃? — Juã́ũ 19:33-37.
Eꞌna Ngetchutchu naü̃pa nügü ínameẽẽ na ngẽma profeciagü yanguẽẽgüü̃caꞌ?
Taꞌacügu curuĩnü i ngẽmatchiga?

6. Toü̃ name na Ngetchutchutchiga tanguꞌgü

Rü Tupanaarü Ore nüü̃ niu na narümemaẽü̃tchi i Ngetchutchutchiga nacaꞌ inangúeẽü̃ rü ta i taꞌacü Tupana nanawaꞌe na nüma naüü̃. Nawa naugütae Juã́ũ 14:6 rü 17:3. Yicama pegümaã pideagü ngẽmatchiga:

Tüꞌcüü̃ narümemaeü̃tchi Ngetchutchutchiga nacaꞌ inangúeẽü̃?

Ngetchutchu niĩ i nama na Tupanamücü iĩgüü̃caꞌ. Rü aicuma Yeuwatchiga tüü̃ nanguꞌẽẽ. Rü Ngetchutchugagu tanayaugü i maü̃ i taguma gúü̃.

NÜMAÜ̃ DUÜ̃Ü̃GÜ NÜÜ̃ NIU: “Rü Yeuwaarü Orearü Uruü̃gü rü tama Ngetchutchuü̃ nayaõgü.”