NGÚERUÜ̃ 19

Eꞌna i Yeuwaarü Orearü Uruü̃gü i aicumaü̃tchi õgütanüü̃gü niĩgü?

NAPAÜ

Toma nüü̃ tayaõgü na aicumaü̃tchi õgütanüü̃gü tiĩgü. Rü ngẽma ngúeruü̃wa, ngĩã nüü̃ tacuaꞌ taꞌacüwa i Yeuwaarü Orearü Uruü̃gü nayaõgü, tüꞌcüü̃ naãégaü̃ i Yeuwaarü Orearü Uruü̃gü rü nhuãcü nanaweꞌgüü̃ na nügü nangetchaü̃güü̃.

1. Taꞌacüwa i Yeuwaarü Orearü Uruü̃gü nayaõgü?

Ngetchutchu nhanagürü: ‘Rü Tupanaarü Ore rü aicuma niĩ.’ (Juã́ũ 17:17) Rü Ngetchutchurüü̃ i tórü nguꞌẽẽtaegü nawüigu i Tupanaarü Oremaã. Nüü̃ nadau nhuãcü inaügü tórü ore wigutaaꞌ ngẽma taunecügügu 1870arü. Yímagü taunecügügu, wüi duü̃ü̃gütücumü inaügü na meã nanangugügüü̃ ga Tupanaarü Ore erü nanawaꞌegü meã nüü̃ nacuaꞌgüü̃ ga aicuma ga Tupanaarü Oretchiga. Yeguma marü nüü̃ nacuaꞌgü wüi Tupanaarü Orearü nguꞌẽẽtae ngẽmagu nayaõgüü̃ woo na yema nguꞌẽẽtae natoraü̃ü̃ taꞌacüarü ga tupaucagü nananguꞌẽẽ. Yicama togümaã nangau nhaã aicuma i nguꞌẽẽtaegü. a

2. Tüꞌcüü̃ taãégaü̃ i Yeuwaarü Orearü Uruü̃gü?

Yeuwa nüü̃ niu na yíema na nüü̃ icuaꞌüü̃gü rü ta aicuma natchiga nüü̃ iugü rü ngẽmagü niĩ orearü uruü̃gü. (Ebréugü 11:4–12:1) Cuaꞌãtchiruü̃, nũcümaü̃tchima ga Tupana ga norü duü̃ü̃güü̃ nhanagürü: “Pemagü niĩ tchorü orearü uruü̃gü.” (Nawa naugütae Isaías 43:10.) Rü Tupanaarü Ore nüü̃ niu na Ngetchutchu yiĩü̃ i ‘aicuma meãma nüü̃ iucü i Tupanaarü Ore’. (Apocaríchiu 1:5) Ngẽmagagu, yegumacürüwa 1931 taãégaü̃ Yeuwaarü Orearü Uruü̃gü. Rü ngẽmacaꞌ tomatama taãẽãcüma naégatchigaü̃ tiugü.

3. Ngetchutchurüü̃ nhuãcü i Yeuwaarü Orearü Uruü̃gü rü ngetchaü̃ naweꞌgü?

Ngetchutchu ga norü ngúeü̃güü̃ nangetchaü̃ erü wüitama natanüü̃rüü̃. (Nawa naugütae Marcu 3:35.) Ngẽmaãcü guü̃ i Naanewa i Yeuwaarü Orearü Uruü̃gü nawüigu wüitama natanüü̃rüü̃. Ngẽmacaꞌ nügüeneẽgü niĩgürüü̃. (Firemú 1, 2) Rü ngẽma muga taĩnüe na nhagu: “Rü nüü̃ pengetchaü̃ i taeneẽgü i yaõgüü̃!” (1 Pedru 2:17) Tanaweꞌ na aicuma tügü tangetchaü̃gü ngẽguma tügü tarüngü̃ẽẽgu.

YEERA NÜÜ̃ CUCUAꞌ

Nüü̃ nacuaꞌ i Yeuwaarü Orearü Uruü̃güarü ore rü nüü̃ nadau tüꞌcüü̃ niĩ i aicumaü̃tchi õgütanüü̃gü.

Rü taꞌacü i Tupanaarü Ore nüü̃ yau rü ngẽma i aicumaü̃tchi õgütanüü̃gü togüü̃ nanguꞌẽẽ

4. Rü tórü nguꞌẽẽtaegü nawüigu i Tupanaarü Oremaã

Nũcüma Yeuwa nüü̃ niu na wipeꞌewa meaü̃ratchigü nüü̃ tacuaꞌgü tá i norü oretchiga. Nawa naugütae 2 Corĩ́tiucü̃ãꞌ 4:6. Yicama pegümaã pideagü ngẽmatchiga:

Yeguma ga Tupanaarü duü̃ü̃gü meã nanangugügügu ga Tupanaarü Ore, taꞌacü nüü̃ nacuaꞌgüü̃?

Nüü̃ nadau nhuãcü wüi yatü Charles Russell rü wüi duü̃ü̃gütücumümaã rü meãma nanangugügü ga Tupanaarü Ore. Nüü̃ cudau i VÍDEO. Yicama pegümaã pideagü ngẽmatchiga:

VÍDEO: Rü aicuma i Tupanaarü Ore wenaarü nüü̃ nayangau (7:45)

Vídeowa, rü nhuãcü ga Charles Russell rü namücügümaã meã nanangugügü ga Tupanaarü Ore?

Marü nüü̃ cucuaꞌ i ngẽma?

Nhuguãcü rü tanaweãtchigüẽẽ i taꞌacü marü nüü̃ tacuaꞌgü i Tupanaarü Oretchiga. Tüꞌcüü̃? Erü Tupana írarüwatchigü tüü̃́ nüü̃ nacuaꞌẽẽ i norü oretchiga. Nhama üaꞌcü nidautchiü̃rüü̃ rü yeera ningótchigü nhuꞌmatáta nangóoneütchi. (Nawa naugütae Provérbios 4:18.) Aicuma niĩ na Tupanaarü Ore tama nanatoraü̃ẽẽ, notürü ngẽguma meã nüü̃ tacuaꞌgügu i taꞌacü Tupanaarü Ore nüü̃ iuü̃, rü ngẽmagagu tanatoraü̃ẽẽ i tórü nguꞌẽẽtaegü.

5. Rü aicuma i Yeuwatchiga nüü̃ tiugü

Tüꞌcüü̃ nüü̃ tideetchi ngẽma Yeuwaarü Orearü Uruü̃güéga? Nüü̃ cudau i VÍDEO. Yicama pegümaã pideagü ngẽmatchiga:

VÍDEO: Taégamaã niĩ nüü̃ nacuaꞌgüü̃ na teé iĩgüü̃ (2:56)

Rü ngẽma Yeuwaarü Orearü Uruü̃güéga, tüꞌcüü̃ ga name na nüü̃ iyadeetchi?

Tüꞌcüü̃ ga Yeuwa ga duü̃ü̃güü̃ nauneta na natchiga niugüü̃caꞌ? Erü ngẽmagü i Yeuwaü̃ ínapoü̃ doragüna na togü duü̃ü̃gü natchiga niugü. Ngĩã nüü̃ nadau tare doragü.

Nümaü̃gü yaõgüü̃tücumügü rü nananguꞌẽẽ na Tupana nanawaꞌeü̃ na duü̃ü̃gü rü natchicünaꞌãgüü̃ nicuaꞌüü̃gü, eꞌna ngẽma rü aicuma niĩ? Nawa naugütae Êxodo 20:4. Yicama pegümaã pideagü ngẽmatchiga:

Eꞌna Tupana nanawaꞌe na natchicünaꞌãgüü̃ icuaꞌüü̃gü? Taꞌacü Yeuwa nagu narüĩnü i natchicünaꞌãgütchiga?

Nümaü̃gü yaõgüü̃tücumügü nananguꞌẽẽ na Ngetchutchu rü Tupana niĩ. Notürü eꞌna ngẽma rü aicuma niĩ? Nawa naugütae Juã́ũ 20:17. Yicama pegümaã pideagü ngẽmatchiga:

Eꞌna Ngetchutchu rü Tupana ya guãétüwa ngẽmacü niĩ? Tupana rü Ngetchutchu rü wüitama niĩgü?
Tupana rü wüi duü̃ü̃gütücumü nideetchi na togümaã nüü̃ niugüü̃caꞌ i aicuma natchiga rü Nanetchiga. Taꞌacügu curüĩnü i ngẽmatchiga?

6. Tatanüwa rü yigü tangetchaü̃gü

Rü Tupanaarü Ore nüü̃ niu na õgütanüü̃gü rü nhama naü̃nerüü̃ niĩgü. Cuaꞌruü̃ rü taünewa nangẽma i taeru rü tatchacüügü rü muü̃ma i to i taünearü ngẽmaü̃gü. Nawa naugütae 1 Corĩ́tiucü̃ãꞌ 12:25, 26. Yicama pegümaã pideagü ngẽmatchiga:

Taꞌacü wüi aicumaü̃tchi õgütanüü̃ nanaü ngẽguma naeneẽgü rü naeyagü ngúü̃ ningegügu?
Taꞌacü nüü̃ cucuaꞌü̃ i ngetchaü̃tchiga natanüwa i Yeuwaarü Orearü Uruü̃gü?

Ngẽguma i Yeuwaarü Orearü Uruü̃gü rü togü natchiü̃ãnewa gutchaü̃gü nüü̃ nangupetügu, rü guü̃ i Naanewa naeneẽgü ínamemare nüü̃ narüngü̃ẽẽgü. Nüü̃ nadau wüi cuaꞌruü̃. Nüü̃ cudau i VÍDEO. Yicama pegümaã pideagü ngẽmatchiga:

VÍDEO: Rü buanecü ya tacü naãégaü̃ Matthew na Haitiwa ngupetüü̃ (5:29)

Ngẽguma gutchaü̃gü nangupetügügu rü Yeuwaarü Orearü Uruü̃güü̃ rü paama naeneẽgüü̃ narüngü̃ẽẽ. Nhuãcü ngẽma naweꞌ na nügü nangetchaü̃?

Rü aicumaü̃tchi õgütanüü̃gü nanaweꞌ i ngetchaü̃ rü duü̃ü̃güü̃ na nanawaꞌe na nüü̃ rüngü̃ẽẽ

NÜMAÜ̃ DUÜ̃Ü̃GÜ NÜÜ̃ NIU: “Rü Yeuwaarü Orearü Uruü̃gü rü duü̃ü̃güü̃ nawomüẽẽgü.”

Nhuãcü cunangãü̃ü̃?

TAꞌACÜ MARÜ NÜÜ̃ CUCUAꞌ?

Rü Yeuwaarü Orearü Uruü̃gü i aicumaü̃tchi õgütanüü̃gü niĩgü. Guü̃ i Naanewa wüi natanüü̃rüü̃ tiĩgü, rü taꞌacü i Tupanaarü Ore nüü̃ yau i Yeuwatchiga rü ngẽma togüü̃ tanguꞌẽẽ.

Ngeü̃rüüü̃ i curü ngãü̃?

Tüꞌcüü̃ taãégaü̃ i Yeuwaarü Orearü Uruü̃gü?
Nhuãcü tanaweꞌ na tügü tangetchaü̃gü?
Taꞌacügu curüĩnü, eꞌna i Yeuwaarü Orearü Uruü̃gü i aicumaü̃tchi õgütanüü̃gü niĩgü?

Nhaa ngúeruü̃ rü nagu niguꞌ nguneü̃:

Ngẽma naü

Wüi Yeuwaarü Orearü Uruü̃güna cuca: Taꞌacü cuü̃ nüü̃ cuaꞌẽẽ na nüü̃ cuyangau aicuma i ore?

Rü to:

Ngema nawa nangutchaü̃ü̃