Yeuwa meã nuü̃. (1 Corĩ́tiucü̃ãꞌ 14:33) Ngẽmacaꞌ nanawaꞌe na norü duü̃ü̃gü meã nügü nanu. Notürü nhuãcu i natücumü meã nuü̃? Rü nhuãcü wüitchigü rü norü yaõgüü̃tücumüü̃ narüngü̃ẽẽ?

1. Teé niĩ tatücumüẽru?

“Cristu na guü̃ma i yaõgüü̃ẽru na yiĩü̃.” (Epéchiucü̃ãꞌ 5:23) Dauü̃wa, Ngetchutchu nüna nadau i puracü na Tupanaarü duü̃ü̃gü naügü guü̃ i Naanewa. Nüma nüü̃ nauneta i ‘coriarü duü̃ü̃ i aicuma yanguẽẽ rü naãẽ cuaꞌü̃’. Ngẽma natücumü i yatügü nüü̃ nacuaꞌgüü̃ na naãégaü̃ Natücumü i Wipeꞌe Ãgüü̃gu. (Nawa naugütae Mateu 24:45-47.) Nũcüma rü Yerucharéü̃wa rü ngúeü̃gü ga Ngetchutchu imugüü̃ rü guü̃ma ga yaõgüü̃tücumügüna nanaã ga nguꞌẽẽtaegü. (Puracügü 15:2) Ngẽgumarüü̃ nhuꞌma guü̃ i Naanewa i Natücumü i Wipeꞌe Ãgüü̃ i tatücumügüü̃ nanguꞌẽẽ. Notürü nhaa yatügü rü tama tórü Organizaçãoẽru niĩgü. Nümagü meã nanangugü i Tupanaarü Oretchiga na nüü̃ nacuaꞌü̃caꞌ taꞌacü Yeuwa nanawaꞌe na naüü̃ rü Ngetchutchuga naĩnüẽ.

2. Teé niĩ i anciãogü rü taꞌacü nanaügü?

Rü yatügü yaõgüü̃tücumügümaã icuaꞌgüü̃ rü Cristuwe narüĩ rü Tupanaarü duü̃ü̃güü̃ nanguꞌẽẽ rü Tupanaarü Oremaã. Yíema na Yeuwacaꞌ ipuracüe rü nüü̃ narüngü̃ẽẽ rü nüü̃ nataãẽẽẽ. Rü nümagü tama nüü̃ nanayau i puracütanüü̃. Notürü ‘rü nanawaꞌe i meü̃ i norü ngútchaü̃maã Tupana nawaꞌeü̃ãcüma nanaü i ngẽma puracü, rü tama teé nüü̃ muguica nanaü rü eꞌna dĩẽrucaꞌ nanaü’. (1 Pedru 5:1, 2) Rü tatücumügüwa nangẽma yatügü ngü̃ẽẽtaeruü̃gü yiĩgü (servos ministeriais) na yatügü yaõgüü̃tücumümaã icuaꞌgüü̃ü̃ narüngü̃ẽẽ. Rü nhaa yatügü aicuma nayanguẽẽgü i taꞌacü i Tupanaarü Ore nüü̃ niu rü ngẽmaãcü wipeꞌewa yatügü yaõgüü̃tücumümaã icuaꞌgü niĩgü tá.

Rü nümaü̃gü i yatügü yaõgüü̃tücumümaã icuaꞌgüü̃ rü Natücumü i Wipeꞌe Ãgüü̃ nüü̃ nauneta na natücumügüarü ngugütaeruü̃ yiĩü̃caꞌ. Rü nhaa yatügü natücumügüwa naĩgü na wüitchigü i taeneẽgüü̃ nataãẽẽẽü̃caꞌ rü nüü̃ nanguꞌẽẽtaeü̃caꞌ. Rü yatügü na natücumügüarü ngugütaeruü̃ niĩgüü̃ rü meã nangugü i Tupanaarü Orearü ucuꞌẽgü rü nhaãcü wüi naeneẽü̃ nauneta na natücumüwa ngü̃ẽẽtaeruü̃ iĩü̃caꞌ urü yatü yaõgüü̃tücumümaã icuaꞌü̃. — 1 Timúteu 3:1-10, 12 rü Titu 1:5-9.

3. Taꞌacü name niĩ na wüitchigü Yeuwaarü Orearü Uruü̃gü naügüü̃?

Rü wüitchigü Yeuwaarü Orearü Uruü̃gü natücumüwa ínawaꞌe rü nüü̃ nicuaꞌüü̃gü i Yeuwaéga. Ngẽguma nagu naãgügu i ngutaqueꞌegüwa rü ngẽguma nüü̃ yatautchaãtchigu rü woo nüü̃ nagutchaü̃gu rü nüü̃ niuama i ngẽma ore. — Nawa naugütae Salmos 148:12, 13.

 YEERA NÜÜ̃ CUCUAꞌ

4. Ngetchutchu niĩ ya ãẽꞌgacü ya mecümawaꞌecü

Rü Ngetchutchu rü ngetchaü̃cüma tüna nau. Nawa naugütae Mateu 11:28-30. Yicama pegümaã pideagü ngẽmatchiga:

• Nhuãcü ya Ngetchutchu rü tórü ãẽꞌgacü niĩ? Taꞌacü Ngetchutchu tacaꞌ nanawaꞌe?

5. Rü yatügü yaõgüü̃tücumügümaã icuaꞌgüü̃ norü cuaꞌruü̃gügagu nanguꞌẽẽ

1. Rü yatügü yaõgüü̃tücumügümaã icuaꞌgüü̃ poraãcü Yeuwamaã naãmücügü rü ngẽmaãcü napatacü̃ãꞌü̃ narüngü̃ẽẽ

2. Rü yatügü yaõgüü̃tücumügümaã icuaꞌgüü̃ rü natücumüwa i guãna nadau

3.   Rü yatügü yaõgüü̃tücumügümaã icuaꞌgüü̃ rü guü̃guma nüü̃ niugü i Tupanaarü Oretchiga

4. Rü yatügü yaõgüü̃tücumügümaã icuaꞌgüü̃ rü Tupanaarü Oretchiga nanguꞌẽẽtaegü. Rü nümagü ta i ngutaqueꞌepataü̃ nanameẽẽgü rü toomatchigü naügü.

6. Tanawaꞌe i yatügü yaõgüü̃tücumümaã icuaꞌgüü̃ tarüngü̃ẽẽ

Rü Tupanaarü Ore nüü̃ niu tüꞌcüü̃ nameü̃ i yatügü yaõgüü̃tücumümaã icuaꞌgüü̃ tarüngü̃ẽẽ. Nawa naugütae Ebréugü 13:17. Yicama pegümaã pideagü ngẽmatchiga:

• Tüꞌcüü̃ i Tupanaarü Ore nüü̃ niu na inawaꞌe i yatügü yaõgüü̃tücumümaã icuaꞌgüga taĩnüẽ? Taꞌacü nagu curüĩnü?

Nawa naugütae Luca 16:10. Yicama pegümaã pideagü ngẽmatchiga:

• Woo na meã tama nüü̃ tacuaꞌgü wüi natchiga, rü tüꞌcüü̃ name niĩ i yatügü yaõgüü̃tücumümaã icuaꞌgüü̃ga taĩnüẽ?

 TAꞌACÜ MARÜ NÜÜ̃ CUCUAꞌ?

Ngetchutchu rü tatücumüẽru niĩ, rü yatügü yaõgüü̃tücumümaã inacuaꞌgü i Ngetchutchuga naĩnüe. Rü tataãẽgü i yatügü yaõgüü̃tücumümaã icuaꞌü̃güü̃ tarüngü̃ẽẽgü rü namecümagü rü norü cuaꞌruü̃gagu rü tüü̃ nanguꞌẽẽ.

Ngeü̃rüüü̃ i curü ngãü̃?

• Teé niĩ tatücumüẽru?

• Nhuãcü i yatügü yaõgüü̃tücumümaã icuaꞌgüü̃ rü natücumüü̃ narüngü̃ẽẽ?

• Taꞌacü name niĩ na wüitchigü Yeuwaarü duü̃ü̃gü naügüü̃ i natücumüwa?