NGÚERUÜ̃ 21
Teégü niĩ na togümaã nüü̃ iu i meü̃ i ore i nhuꞌma?
Paama i Yeuwaarü Ãẽꞌgacü i guü̃ma gutchaü̃güü̃ nanaoẽẽ tá. Guü̃ma i duü̃ü̃gü nanawaꞌe rü nüü̃ nacuaꞌ nhaa meü̃ i oretchiga. Ngetchutchu ga norü ngúeü̃gü nanamu na nhaa i meü̃ i ore rü duü̃ü̃gümaã nüü̃ niuü̃! (Mateu 28:19, 20) Nhuãcü i Yeuwaarü Orearü Uruü̃gü ngẽma naügü i nhuꞌma?
1. Nhuãcü Mateu 24:14 ningu i nhuꞌma?
Ngetchutchu nhanagürü: “Rü ngẽma Tupanaarü ore i meü̃ rü guü̃ i naãnewa tá nüü̃ niugügü na guü̃ i duü̃ü̃gü nüü̃ na cuaꞌgüü̃caꞌ.” (Mateu 24:14) Rü Yeuwaarü Orearü Uruü̃gü taãẽmaã ngẽma meü̃ i puracü naügü. Guü̃ i naanewa nüü̃ niugü meü̃ i ore yeera 1.000 nagawa! Rü nanawaꞌe pora naü rü meã wüigu nügü nanuü̃ na ngẽma puracü nanaügüü̃caꞌ. Ngẽguma nataugu i Yeuwaarü ngü̃ẽẽ rü taucürüwa nanaügü i ngẽma puracü.
2. Nhuãcü yigü iporaẽẽgüü̃ na duü̃ü̃gümaã nüü̃ tiugüü̃caꞌ?
Ngẽma rü tórü ngútchaü̃ niĩ i guü̃ i natchicagüwa rü duü̃ü̃gümaã nüü̃ tiugü i meü̃ i ore. Ngẽgumarüü̃ nũcümaü̃ü̃ ga õgütanüü̃gü rü nhuꞌma nüü̃ tiugü ‘ĩpatagüwatchigü’. (Puracügü 5:42) Ngẽmaãcü guü̃ taunecügü milhões duü̃ü̃gümaã nüü̃ tiugüü̃. Ngẽguma tama nüü̃ tayangaugu i duü̃ü̃gü norü ĩpatagüwa, rü meã nacaꞌ tadau rü togü natchicagüwa na nüü̃ tiugüü̃caꞌ i Yeuwaarü oretchiga.
3. Teégü tiĩgü na togümaã nüü̃ iu ngẽma meü̃ i ore?
Guãma aicumaü̃tchi õgütanüü̃gü nanawaꞌe rü togümaã nüü̃ niugü meü̃ i ore. Ngẽmagagu wüitchigü i toma rü yigü taporaẽẽgü na duü̃ü̃güü̃ tarüngü̃ẽẽü̃caꞌ rü nüü̃ ínanguü̃ẽẽü̃caꞌ. (Nawa naugütae 1 Timúteu 4:16.) Rü tama tanayau i püracütanü erü Tupanaarü Ore nüü̃ niu: “Rü tama name i penaãtanü ega teéü̃ perümeẽẽgu, erü pema rü peü̃́ nangetanümare i ngẽma pora.” (Mateu 10:7, 8) Woo na nümaü̃gü i duü̃ü̃gü tama tüü̃ naĩnüẽgü rü nüü̃ tiugüama ngẽma meü̃ i ore erü tanawaꞌegü i Yeuwaga taĩnüẽ rü nüü̃ tataãẽẽẽ.
YEERA NÜÜ̃ CUCUAꞌ
Nüü̃ nacuaꞌ i taꞌacütchiga nanaügü i Yeuwaarü Orearü Uruü̃gü guü̃ i naanewa na Tupanaarü Oretchiga tiugüü̃caꞌ. Rü nüü̃ nadau ta nhuãcü Yeuwa tüü̃ narüngü̃ẽẽ.
Guü̃ i naanewa i Tupanaarü Oretchiga nüü̃ tiugü: (A) Costa Ricawa, (B) rü Estados Unidoswa, (C) rü Beninwa, (D) rü Tailândiawa, (E) rü Yapwa, (F) rü Suéciawa
4. Yigü taporaẽẽ na duü̃ü̃gümaã nüü̃ tiugüü̃caꞌ ngẽma meü̃ i oretchiga
Rü Yeuwaarü Orearü Uruü̃gü nügü naporaẽẽgü i guü̃ i natchicawa na meü̃ i oretchiga duü̃ü̃gümaã nüü̃ niugüü̃caꞌ. Nüü̃ cudau i VÍDEO. Yicama pegümaã pideagü ngẽmatchiga:
-
Rü ngẽmatchiga naügüü̃ i Yeuwaarü Orearü Uruü̃gü na ngẽma meü̃ i oretchiga nüü̃ yaugüü̃caꞌ. Taꞌacügu curüĩnü?
Nawa naugütae Mateu 22:39 rü Romacü̃ãꞌ 10:13-15. Yicama pegümaã pideagü ngẽmatchiga:
-
Nhuãcü tórü puracü nanaweꞌ na duü̃ü̃güü̃ tangetchaü̃?
-
Taꞌacügu Yeuwa narüĩnü i teétchiga nüü̃ iu i meü̃ i ore? — Nüü̃ cudau i wetchicuru 15wa.
5. Rü Tupanaãü̃́ tapuracüe
Muü̃ma cuaꞌruü̃gü nanaweꞌ na Yeuwa namaã inacuaꞌü̃ ngẽma puracü. Nüü̃ nadau i Paul-arü cuaꞌruü̃ na nüü̃ nangupetüü̃ i Nova Zelândiawa. Yeguma ĩpatachigüwa nüü̃ niugu i Tupanaarü Oretchiga, rü tüü̃ nayangau wüi ngee i naü̃pa ngẽma nguneü̃gutama i Tupanacaꞌ iyumüẽ, rü nacaꞌ ica na wüi norü duü̃ü̃ rü ngĩpatawa naũü̃caꞌ. Paul nhanagürü: “Rü tamaepüꞌ ngoragüwena ngĩpatawa tchanguꞌ.”
Nawa naugütae 1 Corĩ́tiucü̃ãꞌ 3:9. Yicama pegümaã pideagü ngẽmatchiga:
-
Nhuãcü ngẽma cuaꞌruü̃gü nanaweꞌ na Yeuwa namaã inacuaꞌ i ngẽma puracü?
Nawa naugütae Puracügü 1:8. Yicama pegümaã pideagü ngẽmatchiga:
-
Tüꞌcüü̃ tanawaꞌe i Yeuwaarü ngü̃ẽẽ na ngẽma puracü taügüü̃caꞌ?
Marü nüü̃ cucuaꞌ i ngẽma?
Rü yüügu nangẽma wüi ngutaqueꞌe na tüü̃ nanguꞌẽẽ nhuãcü ngẽma puracü tanaügü. Cuma marü nhaa ngutaqueꞌegüwa cuũ? Taꞌacügu curüĩnü ngẽma nguꞌẽẽtaegütchiga?
6. Naga taĩnüẽ i ngẽma mu i Tupana tüna ãü̃
Nũcümaü̃ nümaü̃gü i duü̃ü̃gü rü Ngetchutchuarü ngúeü̃güna nanatchuꞌu na nüü̃ niugüü̃ meü̃ i ore. Notürü i õgütanüü̃gü nügü ínapoü̃gü norü direitomaã i ãẽꞌgacügüarü mugümaã wüigu na nüü̃ niugüü̃caꞌ i meü̃ i ore. (Piripucü̃ãꞌ 1:7) Nhuꞌma i Yeuwaarü Orearü Uruü̃gü ngẽmatama naügü. a
Nawa naugütae Puracügü 5:27-42. Yicama pegümaã pideagü ngẽmatchiga:
-
Tüꞌcüü̃ nüü̃ tiugüama i meü̃ i oretchiga? — Nüü̃ cudau i wetchicurugü 29, 38 rü 39wa.
WÜI DUÜ̃Ü̃ CUNA NACA: “Tüꞌcüü̃ i Yeuwaarü Orearü Uruü̃gü ĩpatagüwatchigü naĩ?”
-
Taꞌacü curü ngãü̃?
TAꞌACÜ MARÜ NÜÜ̃ CUCUAꞌ?
Ngetchutchu nüü̃ namu norü ngúeü̃gü na nüü̃ niugüü̃caꞌ meü̃ i ore i guü̃ma natchiü̃ãnewa. Yeuwa rü norü duü̃ü̃güü̃ narüngü̃ẽẽ na nhaa puracü naügüü̃caꞌ.
Ngeü̃rüüü̃ i curü ngãü̃?
-
Teé niĩ na togümaã nüü̃ iu i meü̃ i ore guü̃ i Naanewa?
-
Nhuãcü tórü puracü nanaweꞌ na duü̃ü̃güü̃ tangetchaü̃?
-
Cucaꞌ ngẽma puracü üü̃ rü tona nanaã i taãẽ? Tüꞌcüü̃?
YEERA NACAꞌ NADAU
Nüü̃ nadau nhuãcü ĩãne ya taü̃newa i Yeuwaarü Orearü Uruü̃gü nüü̃ niugü.
Nhuãcü i Yeuwaarü Orearü Uruü̃gü rü duü̃ü̃güü̃ narüngü̃ẽẽ na togü natchiü̃ãnegüwa ne naĩ?
Margarita guü̃guma meü̃ i ore nüü̃ iuü̃, rü nüü̃ nadau tüꞌcüü̃ ngẽma ngĩna ãü̃ i aicuma i taãẽ.
Yeguma ga ãẽꞌgacügüpeꞌewa nüü̃ napocuegu rü nüü̃ nadau nhuãcü nüü̃ narüporamaẽü̃.
a Tupana tüü̃ namu na meü̃ i ore nüü̃ tiugü. Nhuꞌmatchi, ngẽguma tüü̃ nanatchuꞌu ngẽma meü̃ i ore nüü̃ tiugügu rü toma Yeuwaga taĩnüeü̃ rü tama i yatügüga.
