NGÚERUÜ̃ 22
Nhuãcü tá togümaã nüü̃ quiu meü̃ i oretchiga?
Cuma marü nüü̃ cucuaꞌü̃tchi i Tupanaarü Oretchiga. Rü bemana nhaãcü nagu curüĩnü: ‘Name niĩ na guãma nüü̃ cuaꞌü̃ i ngẽmatchiga!’ Notürü bemana cumuü̃ na togümaã nüü̃ quiu i taꞌacü marü nüü̃ cucuaꞌü̃ i Tupanaarü Oretchiga. Nhaa ngúeruü̃wa nüü̃ cudau tá nhuãcü tá ngẽma muü̃ü̃ curüporamaẽ rü ta nhuãcü nangẽmaü̃ i taãẽ ngẽguma togümaã nüü̃ quiugu meü̃ i oretchiga.
1. Nhuãcü cuyoniẽ na togümaã nüü̃ quiuü̃caꞌ i taꞌacütchiga nüü̃ cucuaꞌ Tupanaarü Orewa?
Rü Ngetchutchuarü ngúeü̃gü nhanagürü: “Erü toma rü tauacüma nüü̃ tarüoe na nüü̃ tiuü̃ ga yema nüü̃ tadaugüü̃ rü nüü̃ taĩnüẽü̃.” (Puracügü 4:20) Nümagü ga Tupanaarü Oreü̃ nangetchaü̃gütchire rü nügü naporaẽẽ na muü̃ma duü̃ü̃gümaã nüü̃ niugüü̃caꞌ i ngẽmatchiga. Cuma rü ta narüü̃ nagu curüĩnü? Cuma nhamarüta cuãtchica rü mecümaãcü nüü̃ iu cutanüü̃maã rü cumucügümaã i taꞌacütchiga nüü̃ cucuaꞌü̃. — Nawa naugütae Corochacü̃ãꞌ 4:6.
Nümaü̃ i ĩnügü
-
Ngẽguma wüi cutanüü̃maã nüü̃ quiugu rü nüü̃ nhacurügü: “Nhaa yüügu rü nüü̃ tchacuaꞌü̃ wüi meü̃ i ore.”
-
Nüü̃ naweꞌ i Tupanaarü Orewa wüi wetchicuru i cumücücaꞌ na nidaꞌawe urü narümaãtchiü̃.
-
Ngẽguma wüi duü̃ü̃ norü puracütchicawa cucaꞌ nacagu taꞌacü cuüü̃ nhama yüüarü guꞌgu, rü namaã nüü̃ quiu i taꞌacü marü nüü̃ cucuaꞌ rü curü Tupanaarü Orearü nguꞌwa rü ta ngutaqueꞌegüwa.
-
Rü cumücügüü̃ naweꞌ i site jw.org.
-
Cuma rü wüi duü̃ü̃ü̃ quingĩã na curü Tupanaarü Orearü nguꞌü̃ urü nüü̃ cunaweꞌ nhuãcü nacaꞌ inaca wüi Tupanaarü Orearü nguꞌ i sitewa jw.org.
2. Tüꞌcüü̃ name niĩ wüigu yaõgüü̃tücumümaã nüü̃ iu i meü̃ i oretchiga?
Rü Ngetchutchuarü ngúeü̃gü ga guãma ga duü̃ü̃gümaã nüü̃ niugü i meü̃ i ore. Rü nümagü meãma nanaügü i ngẽma puracü. Ngetchutchu rü norü ngúeü̃güü̃ rü taretchigü inayamugü na ‘guü̃ ga yema ĩãnegügu’ nüü̃ niugüü̃caꞌ ga meü̃ i oretchiga. (Luca 10:1) Yemaétüwa yeguma wüigu napuracüegu rü ngẽma nüna nanaã ga taãẽ. (Luca 10:17) Eꞌna cuma rü ta cuü̃ nangútchaü̃ nawüigu yaõgüü̃tücumümaã nüü̃ quiu i meü̃ i ore?
YEERA NÜÜ̃ CUCUAꞌ
Nüü̃ nacuaꞌ nhuãcü tá rü muü̃ü̃ curüporamaẽ na togümaã nüü̃ quiuü̃caꞌ meü̃ i oretchiga, rü ngẽma puracüwa cutaãẽ.
3. Yeuwa rü cucüwawa nangẽma
Nümaü̃gü i duü̃ü̃gü nanawaꞌe i togümaã nüü̃ niugü i meü̃ i oretchiga. Notürü naoegaãẽ na nhuãcü i duü̃ü̃gü tá nüü̃ nanayauü̃ rü taꞌacü tá nagu narüĩnü i natchiga.
-
Cumuü̃ na togümaã nüü̃ quiu i taꞌacütchiga nüü̃ cucuaꞌü̃? Tüꞌcüü̃?
Nüü̃ cudau i VÍDEO. Yicama pegümaã pideagü ngẽmatchiga:
-
Nhuãcü ngẽma ngetüꞌüü̃gü rü paü̃gü na Yeuwaarü Orearü Uruü̃gü niĩ rü norü muü̃ü̃ narüporamaẽgü?
Nawa naugütae Isaías 41:10. Yicama pegümaã pideagü ngẽmatchiga:
-
Ngẽguma cumuü̃gu na togümaã nüü̃ quiu i meü̃ i ore rü nhuãcü tá i yumüẽ cuü̃ narüngü̃ẽẽ?
Marü nüü̃ cucuaꞌ i ngẽma?
Muü̃ i Yeuwaarü Orearü Uruü̃gü marü nagu narüĩnü na taguma togümaã nüü̃ niugü i meü̃ i ore. Rü nüü̃ nadau i cuaꞌruü̃ rü taeneẽ i Russiacü̃ãꞌ, naéga Sergey. Rü nüma ĩnü i tchieü̃ nüü̃ nangẽma i natchiga, rü nüü̃ nagutcha i togümaã nideaü̃. Notürü inanaügü i Tupanaarü Orecaꞌ nanguꞌ, rü ngẽmatchiga nhanagürü: “Woo na tchamuü̃ rü itchanaügü na togümaã tchideaü̃ i taꞌacütchiga nüü̃ tchacuaꞌü̃ i Tupanaarü Oretchiga, ngẽma tchoü̃ narüngü̃ẽẽ i ĩnü meü̃ tchautchiga nangẽmaü̃. Rü ta tchorü õ naporaẽẽü̃ i Tupanaarü Oregu.”
4. Mecümaãcü quidea
Ngẽguma togümaã nüü̃ quiugu i meü̃ i oretchiga rü name niĩ meã nagu curüĩnü i taꞌacü tá nüü̃ quiu rü ta nhuãcü tá nüü̃ quiu. Nawa naugütae 2 Timúteu 2:24 rü 1 Pedru 3:15. Yicama pegümaã pideagü ngẽmatchiga:
-
Ngẽguma togümaã nüü̃ quiugu i Tupanaarü Oretchiga, nhuãcü tá ngẽma wetchicurugü naü i curü maü̃wa?
-
Bemana nümaü̃ i cutanüü̃ urü cumücügü tama nanayaugü i taꞌacü nüü̃ quiuü̃. Taꞌacü tá cuüü̃? Taꞌacü name niĩ na tama cuüü̃?
-
Taꞌacügu curüĩnü? Rü name niĩ na mecümaãcü nüü̃ quiuü̃ urü namaã quidea tagaãcü aita cuü ngẽgumarüü̃ namaã cunanga?
5. Rü togümaã nüü̃ iu i meü̃ i oretchiga rü ngẽma tüna nanaã i taãẽ
Yeuwa rü Ngetchutchuü̃ namu rü togümaã nüü̃ iu meü̃ i ore. Taꞌacü ga Ngetchutchu nagu narüĩnü i ngẽma puracütchiga? Nawa naugütae Juã́ũ 4:34. Yicama pegümaã pideagü ngẽmatchiga:
-
Rü õna rü toü̃ narüngü̃ẽẽ na meã tamaü̃caꞌ rü tüna nanaã i taãẽ. Ngetchutchu nüü̃ niu na Tupanaarü ngútchaü̃ naüü̃, rü cuaꞌãtchiruü̃ togümaã nüü̃ iu i meü̃ i ore rü ngẽma õnarüü̃ yiĩü̃, tüꞌcüü̃?
-
Ngẽguma togümaã nüü̃ quiugu i meü̃ i ore, tüꞌcüü̃ ngẽma tá cuna nanaã i taãẽ?
Ucuꞌẽgü
-
Rü yüügu nangẽma wüi ngutaqueꞌe na toü̃ nanguꞌẽẽ nhuãcü tá togümaã nüü̃ tiugü i meü̃ i oretchiga. Rü name niĩ na nawa meã i curüĩnü.
-
Rü nagu curüĩnü rü ngẽmawa ngutaqueꞌegu cuã. Nhuãcü tá cunaüü̃ i ngẽma? Rü yatügü yaõgüü̃tücumümaã inacuaꞌü̃maã nüü̃ quiu. Ngẽguma nagu cuãgu i ngutaqueꞌe, ngẽma cuü̃ narüngü̃ẽẽ tá na tama cumuü̃ü̃caꞌ na togümaã nüü̃ quiuü̃ i meü̃ i ore.
-
Meã ícunameẽẽ i ucuꞌẽgümaã nangẽmaü̃ i ngẽmawa i quadrugü: “Wüi Duü̃ü̃ Cuna Naca” rü to “Nümaü̃ Duü̃ü̃gü Nüü̃ Niu”. Rü ngẽma cuü̃ tá narüngü̃ẽẽ na meã cunangãü̃caꞌ i guü̃ma i duü̃ü̃gü i cuna caü̃ curü õtchiga. Rü ngẽguma wüi duü̃ü̃ tama nanayaugu i taꞌacü namaã nüü̃ quiuü̃.
WÜI DUÜ̃Ü̃ CUNA NACA: “Marü nhunhaü̃ i ngẽma?”
-
Nhuãcü tá cuyoniẽ na namaã nüü̃ quiuü̃caꞌ i taꞌacü nüü̃ cucuaꞌü̃ i Tupanaarü Oretchiga?
TAꞌACÜ MARÜ NÜÜ̃ CUCUAꞌ?
Ngẽguma togümaã nüü̃ tiugügu i meü̃ i oretchiga rü ngẽma tüna nanaã i taãẽ, rü ngẽma puracü tama nagutcha niĩ.
Ngeü̃rüüü̃ i curü ngãü̃?
-
Tüꞌcüü̃ togümaã nüü̃ tiugü i meü̃ i oretchiga?
-
Nhuãcü tá cuma mecümaãcü ngẽma puracü cuüü̃?
-
Nhuãcü tá rü muü̃ü̃ nüü̃ curüporamaẽ na togümaã nüü̃ quiuü̃caꞌ i meü̃ i oretchiga?
YEERA NACAꞌ NADAU
Rü nüü̃ nadau i ãgümücü i nacüma na togümaã nüü̃ iugüü̃caꞌ i meü̃ i oretchiga rü ngẽmamaã i sitepaneacü na naweꞌ i site jw.org.
Nhuãcü togümaã iugü i meü̃ i oretchiga: Sitepaneacü na naweꞌ i site jw.org (1:43)
Rü nüü̃ nacuaꞌ i ãgümücü i meü̃gü i nacümagü na cuü̃ tá narüngü̃ẽẽ na togümaã nüü̃ quiuü̃caꞌ i meü̃ i ore.
Nüü̃ nadau nhuãcü tá ngẽma Tupanaarü Orearü cuaꞌruü̃ cuü̃ narüngü̃ẽẽ rü tama cumuü̃ na togümaã nüü̃ iugüü̃caꞌ i meü̃ i oretchiga, woo na cuma ngetüꞌüü̃, rü pacü rü buü̃ quiĩü̃.
Nüü̃ nacuaꞌ nhuãcü tá meü̃ i ore rü namaã nüü̃ quiu i cutanüü̃gü na tama Yeuwaü̃ nacuaꞌü̃.
