Ngetchutchu nüü̃ niu na yaõgüü̃tanüü̃ nawaꞌe ínanabaieü̃gü. (Nawa naugütae Mateu 28:19, 20.) Notürü taꞌacü niĩ i baie? Taꞌacü wüi duü̃ü̃ nanawaꞌe naü na ínabaieü̃caꞌ?

1. Taꞌacü niĩ i baie?

Ngẽma dea “baie” i gregugawa rü nhaü̃tchiga “inangu”. Rü yema Ngetchutchumaã ngupetüü̃ rü yeguma ga natü ga Judã́ũwa ínabaiegu. Rü inangu guü̃ i naü̃ne deágu rü ngẽma nawüigu i taꞌacümaã i Tupanaarü Ore nüü̃ yau na Ngetchutchu ínabaiewena rü “deáwa ínaü̃ãtchigu”. (Marcu 1:9, 10) Ngẽmaãcü Ngetchutchurüü̃ i aicumaü̃tchi õgütanüü̃gü nanawaꞌe ínabaiegü.

2. Taꞌacü wüi duü̃ü̃ naweꞌü̃ ngẽguma ínabaiegu?

Ngẽguma wüi duü̃ü̃ ínabaiegu naweꞌ na Yeuwana nügü naãü̃. Nhuãcü i duü̃ü̃ nanaü i ngẽma? Rü Yeuwacaꞌ nayumüẽ naü̃pa na ínabaieü̃ rü namaã nüü̃ iu na guü̃gutáma nüü̃ nangetchaü̃. Rü Yeuwamaã nauneta na nüü̃ricatama nicuaꞌüü̃ü̃ tá, rü norü ngútchaü̃ naüü̃ rü narümemaẽ. Rü ‘nüü̃ narüo i norü ngútchaü̃’ rü ngẽmaétüwa i ‘Ngetchutchuwe narüũãma’. (Mateu 16:24) Ngẽguma wüi duü̃ü̃ Yeuwana nügü naãgu rü ínabaiegu, rü namaã naãmücü rü ta ngẽma duü̃ü̃gü i nüü̃ nicuaꞌüü̃güü̃maã.

3. Taꞌacü wüi duü̃ü̃ nanawaꞌeü̃ naü na ínabaieü̃caꞌ?

Rü baieü̃pa rü name na nüü̃ cucuaꞌü̃ i natchiga ya Yeuwa na curü õ naporaẽü̃caꞌ. (Nawa naugütae Ebréugü 11:6.) Erü ngẽma cuaꞌ rü ngẽma õ nanaporaẽẽ tá i curü ngetchaü̃ i Yeuwacaꞌ. Ngẽmaãcü tá cunawaꞌe nüü̃ quiu i natchiga rü norü mugüga cuĩnü i taꞌacütchiga niĩ weꞌguü̃ rü taꞌacü tama weꞌguü̃. (2 Timúteu 4:1, 2 rü 1 Juã́ũ 5:3) Ngẽguma wüi i duü̃ü̃ nanawaꞌegu i Yeuwacaꞌ namaü̃ rü nüna nügü naã rü ta ínabaie. — Corochacü̃ãꞌ 1:9, 10. a

 YEERA NÜÜ̃ CUCUAꞌ

4. Taꞌacü tá nüü̃ tacuaꞌgü natchiga i Ngetchutchuarü baie

Rü nüü̃ tacuaꞌgü natchiga i Ngetchutchuarü baie. Nawa naugütae Mateu 3:13-17. Yicama pegümaã pideagü ngẽmatchiga:

• Yeguma Ngetchutchu ínabaiegu eꞌna wüi õtchana niĩ?

• Ngẽma wetchicurugügu nüü̃ iuü̃ãcü, eꞌna ga Ngetchutchu ínabaieü̃ urü naüégaü̃?

Rü yicama na Ngetchutchu ínabaieü̃, ínanaügü ga meẽtchiü̃ Tupanaarü puracü. Nawa naugütae Luca 3:21-23 rü Juã́ũ 6:38. Yicama pegümaã pideagü ngẽmatchiga:

• Rü yicama Ngetchutchu ínabaieü̃, ngeü̃rüüü̃ i puracü nacaꞌ rümemaẽü̃?

5. Rü nameẽtchi na cugü cuporaẽẽ na ícubaieü̃caꞌ

Ngẽguma i Yeuwana cugü cuãgu rü ícubaiegu rü ngẽma niĩ wüi taütchi i uneta na namaã nüü̃ quiuü̃. Notürü tchi yeera nüü̃ cucuaꞌgu i Yeuwatchiga rü cunaü i taꞌacü nüma nanawaꞌe, rü ngẽma cuü̃ naporaẽẽ tá na ícubaieü̃caꞌ. Nüü̃ nadau nümaü̃ i cuaꞌruü̃gü. Nüü̃ cudau i VÍDEO.

Nawa naugütae Juã́ũ 17:3 rü Tiagu 1:5. Yicama pegümaã pideagü ngẽmatchiga:

• Taꞌacü tá wüi duü̃ü̃ü̃ rüngü̃ẽẽ na meã nügü ínameẽẽü̃ ínabaieü̃caꞌ?

1. Rü Yeuwana tügü taãgü ngẽguma nacaꞌ tayumüẽgu rü namaã tanauegu na guü̃gutáma nüü̃rica ticuaꞌüü̃gütchaü̃

2. Ngẽguma ítabaiegu rü duü̃ü̃güü̃ tanaweꞌ na Tupanana marü tügü taãgüü̃

 6. Ngẽguma ítabaiegu marü Yeuwatanüü̃ tiĩgü

Ngẽguma ítabaiegügu marü Yeuwatanüü̃gü tiĩgü guü̃ i naanewa. Woo wüitchigü i toma rü toü̃ nangẽma i tórütama tacümagü rü toraü̃ü̃ tatchiü̃anecü̃ãꞌgü, notürü tangẽma i nguꞌẽẽtaegüetama rü ngẽmaãcütama i Tupanaarü mugüga taĩnüe. Nawa naugütae Salmos 25:14 rü 1 Pedru 2:17. Yicama pegümaã pideagü ngẽmatchiga:

• Baiewena, nhuãcü Yeuwamaã yeera iãmücü rü ta ngẽma duü̃ü̃gü i nüü̃ nicuaꞌüü̃güü̃maã?

 TAꞌACÜ MARÜ NÜÜ̃ CUCUAꞌ?

Ngetchutchu ga nanguꞌẽẽ na õgütanüü̃gü nawaꞌe na ínabaieü̃. Nhaãcü wüi duü̃ü̃ nanawaꞌe ãũrima Yeuwagu nayaõ, rü norü mugüga naĩnüü̃ i taꞌacütchiga niĩ weꞌguü̃ rü taꞌacü tama weꞌguü̃ rü ta nüna nanaã i norü maü̃.

Ngeü̃rüüü̃ i curü ngãü̃?

• Taꞌacü niĩ i baie? Tüꞌcüü̃ ngẽma nameẽtchi?

• Tüꞌcüü̃ i Yeuwana nügü naã rü íbaie nameẽtchima niĩ?

• Taꞌacü wüi duü̃ü̃ nanawaꞌeü̃ naü na ínabaieü̃caꞌ?