NGÚERUÜ̃ 26

Tüꞌcüü̃ nangẽmaü̃ i tchieü̃gü rü oẽgü?

NAPAÜ

Ngẽguma wüi gutchaü̃ nüü̃ nangupetügügu i duü̃ü̃gü nagu narüĩnüẽ: “Tüꞌcüü̃ ngẽma nangupetü?” Rü name niĩ nüü̃ nacuaꞌü̃ i nhuãcü Tupanaarü Ore nanangãü̃!

1. Nhuãcü nhama ga Naanewa nangoꞌgu ga ngẽma tchieü̃gü?

Rü Ngoo i Tchataná taúegama naĩnü rü tama Yeuwaga naĩnütchaü̃. Erü nanawaꞌe togümaã inacuaꞌü̃. Rü Adáü̃ü̃ rü Ewaü̃ nawomüẽẽ na tama Tupanaga naĩnüẽgüü̃caꞌ. Nhuãcü Tchataná nanaü i ngẽma? Nüma rü Ewamaã nüü̃ niu wüi dea tama aicuma iĩü̃. (Gênesis 3:1-5) Nüma ga Ewaü̃ nüü̃ nacuaꞌẽẽ na Yeuwa ngĩna nicú ga taꞌacü niĩ i meü̃. Ngẽmamaã ga nüü̃ niutchaü̃ tchi duü̃ü̃gü rü tama Yeuwaga naĩnüẽgügu rü yeera nataãẽ tá. Nüma nüü̃ niu nüíra dora ga Ewaü̃ nhanagürü: ‘Taũtáma cuyu.’ Rü ngẽmacaꞌ na Tupanaarü Orewa i Tchataná naãégaü̃ “rü wüi i dorataꞌáü̃ niĩ. Rü guü̃ma i dorataꞌáü̃natü niĩ”. — Juã́ũ 8:44.

2. Taꞌacü ga Adáü̃ rü Ewa nüü̃ naunetagü nanaügü?

Yeuwa ga inaãwaꞌeü̃ niĩ rü Adáü̃maã rü Ewamaã. Rü nüü̃ niu na nanangõꞌgüü̃caꞌ i guü̃ma i nhaa Naanewa ngẽmaü̃ i nanetügüarü o. Notürü wüi nanetüarü oicatama tauü̃tama nanangõꞌü̃. (Gênesis 2:15-17) Notürü nümagü nüü̃ naunetagü tama Tupanaga naĩnü. Rü Ewa “iyacawe ga wüipüꞌü ga norü o rü inangõꞌ rü nhuꞌũtchi ngĩtemaã ingau rü nüma rü ta nanangõꞌ”. (Gênesis 3:6) Adáü̃ rü Ewa nameẽtchigütchire, rü ngẽmacaꞌ nüü̃ natautcha nanaügüü̃ ga taꞌacü niĩ i weꞌguü̃. Notürü nümagü nüü̃ naunetagü tama Yeuwaga naĩnüẽ. Ngẽmaãcü ga nipecadugü rü tama nanayaugü ga Tupanaarü Ãẽꞌgacü, rü ngẽmagagu ãũrima nioẽgü. — Gênesis 3:16-19.

3. Rü nagagu ga Adáü̃ rü Ewa ügüü̃, taꞌacü i torü maü̃maã nangupetü?

Yeguma ga Adáü̃ rü Ewa nüíra pecadu naügügu nipecadugü, ngẽmagagu guãma naacügü nipecaduãꞌgü. Rü Tüpanaarü Ore nüü̃ niu: “Rü wüitama ga yatü ga Adã́ũgagu niĩ ga nhama ga naãnewa nangóü̃ ga pecadu. Rü pecadugagu niĩ ga inaügüü̃ na nayueü̃ ga duü̃ü̃gü. Rü yemaãcü guü̃ma ga duü̃ü̃güwa naüe na nayueü̃, yerü guü̃ma nipecaduãꞌ.” — Romacü̃ãꞌ 5:12.

Nhuꞌmatchi, tüꞌcüü̃ tioẽgüü̃? Erü nhuguãcü tama meã nüü̃ naunetagü i taꞌacü tá taüü̃ ngẽmagagu tioẽgü. Rü ngẽguma togü tchieü̃ tomaã ügu urü ngẽguma i gutchaü̃gü tüü̃ ngupetügu erü ngora rü natchicawa tama i meü̃wa tangẽma.

YEERA NÜÜ̃ CUCUAꞌ

Nüü̃ nadau na tama Tupanagagu yiĩü̃ na ioẽgü rü na guü̃ i Naanewa nangẽmaü̃ i tchieü̃gü. Rü taꞌacü nümaü̃ nagu narüĩnü ngẽguma nioẽgügu.

4. Teégagu yiĩü̃ na ioẽgü

Muü̃ma duü̃ü̃gü nayaõgü na Tupana nhama naanemaã inacuaꞌü̃. Eꞌna aicuma yiĩü̃ i ngẽma? Nüü̃ cudau i VÍDEO.

VÍDEO: Teé niĩ i Naanearü ãẽꞌgacü? (1:24)

Nawa naugütae Tiagu 1:13 rü 1 Juã́ũ 5:19. Yicama pegümaã pideagü ngẽmatchiga:

Eꞌna Tupanagagu yiĩü̃ nangẽmaü̃ i tchieü̃gü rü oẽgü?

5. Rü taꞌacü nangupetü na Tchataná naanemaã icuaꞌü̃gagu

Nüü̃ cudau i VÍDEO.

VÍDEO: Tüꞌcüü̃ ãũrima tioeẽgüü̃? — Natchipeꞌe (3:07)

Nawa naugütae Gênesis 3:1-6. Yicama pegümaã pideagü ngẽmatchiga:

Taꞌacü niĩ i dora Tchataná nüü̃ niu? — Nüü̃ nadau i wetchicurugü 4 rü 5.
Tchataná ga Ewaü̃ nüü̃ nacuaꞌẽẽ na Yeuwa duü̃ü̃gütchawa yacúü̃ ga taꞌacü niĩ i meü̃. Taꞌacü ga nüü̃ niuü̃?
Eꞌna Tchatanácaꞌ ya duẽẽgü nanawaꞌegüü̃ i Yeuwaarü Ãẽꞌgacü na nataãẽgüü̃caꞌ?

Nawa naugütae Miquéias 7:3. Yicama pegümaã pideagü ngẽmatchiga:

Marü nüü̃ tacuaꞌgü na Yeuwa tama nhama naanemaã inacuaꞌü̃, rü ngẽmagagu taꞌacü nangupetü?

Tupana ga Adáü̃üne rü Ewaüne memareãcü naü rü natchica i meẽtchiü̃wa namaẽü̃. Notürü nümagü rü Tchatanága naĩnüegü rü tama Yeuwaga naĩnüẽgütchaü̃.
Nhama ga Naanewa nangoꞌ ga pecadu rü oẽ rü yu.
Yeuwa rü pecadu rü oẽgüü̃ rü yu nayaguꞌẽẽ tá. Rü duü̃ü̃güüne memareü̃ tá niĩ rü meẽtchiü̃ i Naanewa nanamaẽẽ tá.

6. Yeuwa naoégaãẽ i torü oẽgümaã

Eꞌna Tupana naoégaãẽ i torü oẽgümaã? Nüü̃ tadaugü tá taꞌacü ya ãẽꞌgacü ga Dawi rü Pedru naümatüü̃ i ngẽmatchiga. Nawa naugütae Salmos 31:7 rü 1 Pedru 5:7. Yicama pegümaã pideagü ngẽmatchiga:

Nhaa wetchicurugü nanaweꞌ na Yeuwa nüü̃ nadau i torü oẽgü rü nanawaꞌe tüü̃ narüngü̃ẽẽ. Taꞌacü nagu curüĩnü i ngẽmatchiga?

7. Tupana nayaguꞌẽẽ tá i torü oẽgü

Nawa naugütae Isaías 65:17 rü Apocaríchiu 21:3, 4. Yicama pegümaã pideagü ngẽmatchiga:

Yeuwa nayaguꞌẽẽ tá i torü oẽgü rü tchieü̃. Tüꞌcüü̃ name na nüü̃ icuaꞌü̃ i ngẽma?

Marü nüü̃ cucuaꞌ i ngẽma?

Yeguma Tchataná nüü̃ niugu ga nüíraü̃ ga dora, nüma tchiri Yeuwaégatchiga nidea. Rü nüü̃ niutchaü̃ na Yeuwa rü tama wüi ãẽꞌgacü iaicumacü niĩ rü bai ngetchaü̃waꞌecü niĩ. Notürü, paama Yeuwa nayaguꞌẽẽ tá i oẽ rü nüü̃ naweꞌ tá na norü ãẽꞌgacü yeera narümemaẽ, rü nanaüüneẽẽ tá i naéga. Ngẽma nanaweꞌ tá na Tchataná rü wüi i dorataꞌáü̃ niĩ. — Mateu 6:9, 10.

NÜMAÜ̃ DUÜ̃Ü̃GÜ NÜÜ̃ NIU: “Tupana rü duü̃ü̃güü̃ nioẽẽẽ na nüü̃ nacuaꞌü̃caꞌ tchi nagu nayaõgügu.”