Rü Tupanaarü Ãẽꞌgacü marü namaã inacuaꞌ i dauü̃wa. Paama nanaütchicüü tá i nhama i Naane. Ngĩã nüü̃ tadau i ngẽmaü̃gü i meü̃gü na Tupana Ãẽꞌgacü naüü̃ tá.

1. Ngẽguma i Tupanaarü Ãẽꞌgacü i Naanemaã inacuaꞌgu, rü guü̃ i duü̃ü̃gü nime tá rü meã nügümaã namaẽ tá, nhuãcü tá naü i ngẽma?

Rü Ngetchutchu ya Ãẽꞌgacü nanaoẽẽ tá i duü̃ü̃gü tchieü̃gü rü yatüarü ãẽꞌgacügü i guerawa na naãégaü̃ Armaguedóü̃gu. (Apocaríchiu 16:14, 16) Ngẽguma ngẽma nangupetügu, rü ngẽma Tupanaarü uneta nayanguẽẽ tá: “Rü noretama i nguneü̃ natau na ngẽma tchieü̃ ügüü̃ rü na iyanaoü̃.” (Salmos 37:10) Ngẽguma i Ngetchutchu guü̃ma i Naanemaã inacuaꞌgu, rü guü̃ i duü̃ü̃gü nime tá rü meã nügümaã namaẽ tá. — Nawa naugütae Isaías 11:4.

2. Ngẽguma i Naanewa rü Tupanaarü ngútchaü̃ naügu, nhuãcü tá niĩ i torü maü̃?

Cuãẽwa nagu curüĩnü, nhuãcü tá niĩ i naanewa cumaü̃ü̃ wüigu i meü̃ i duü̃ü̃gümaã, rü nügü nangetchaü̃güü̃ rü Yeuwaü̃ nangetchaü̃güü̃. Ngẽmaãcü tá niĩ ngẽguma i Tupanaarü Ãẽꞌgacü i Naanemaã inacuaꞌgu, erü “ngẽma meü̃gü rü norü tá niĩ i nhaa naane rü guü̃gutáma nawa namaẽ”. (Salmos 37:29) Taugutáma i duü̃ü̃gü nidaꞌawegü, rü guü̃gutáma namaẽ.

3. Nawena na tchieü̃gü naoü̃, taꞌacü tá i Tupanaarü Ãẽꞌgacü naü?

Nawena na tchieü̃gü naoü̃, rü Ngetchutchu namaã inacuaꞌü̃ tá rü mil taunecügü. Rü ngẽma nguneü̃gügu rü 144.000 (cento e quarenta e quatro mil) i duü̃ü̃gü rü namaã wüigu i Naanemaã inacuaꞌgü tá, rü duü̃ü̃güü̃ narüngü̃ẽẽ tá na yamegüü̃caꞌ. Ngẽma mil taunecügü i nawa iyacuaꞌgüü̃gu, rü guü̃ma i Naane wüi natchica i meẽtchiü̃ tá yiĩü̃, rü guü̃ma i duü̃ü̃gü nataãẽgü tá erü i Tupanaarü mugüga naĩnüẽgü tá. Nhuꞌmatchi rü Ngetchutchu tá i Nanatü ya Yeuwana naãü̃ i guü̃ma na Nüma namaã inacuáü̃caꞌ. Düwa guü̃gutáma i Yeuwaéga naüüneü̃. (Mateu 6:9, 10) Ngẽmawena guü̃ma nüü̃ icuaꞌgü tá na Yeuwa niĩ wüi Ãẽꞌgacü na duü̃ü̃gücaꞌ nagutchaãẽ. Rü Yeuwa nayanaoẽẽ tá i Tchataná rü norü ngoogü rü ta i duü̃ü̃gü na tama naga naĩnüẽgütchaü̃. (Apocaríchiu 20:7-10) Nhaãcü i Tupanaarü Ãẽꞌgacü guü̃ i Naanemaã inacuaꞌü̃ tá, rü ngẽmacaꞌ guü̃gutáma i duü̃ü̃gü aicuma nataãẽgü.

 YEERA NÜÜ̃ CUCUAꞌ

4. Rü Tupanaarü Ãẽꞌgacü nanaoẽẽ tá i yatüarü ãẽꞌgacügü

Rü Tupanaarü Ore nüü̃ niu na “ngẽma ãẽꞌgacügü i natchiü̃anemaã icuaꞌgüü̃ rü tümamaã inacuaꞌgü ya norü duẽẽgü i ngẽma nüma nanawaꞌeü̃ãcüma, rü ngẽmaãcü nanatchieẽẽ ya norü ĩane”. (Miquéias 7:3) Rü Yeuwaarü Ãẽꞌgacü nanaoẽẽ tá i guü̃ma i tchieü̃gü.

Nawa naugütae Daniel 2:44 rü 2 Techarónicacü̃ãꞌ 1:6-8. Yicama pegümaã pideagü ngẽmatchiga:

• Taꞌacü i Yeuwa rü Ngetchutchu nanaügü tá i yatüarü ãẽꞌgacügümaã rü ngẽma duü̃ü̃gümaã na nüü̃ rüngü̃ẽẽ?

• Nüü̃ cucuaꞌwena i Yeuwatchiga rü Ngetchutchu, tüꞌcüü̃ cuyaõ na nümagü meã nangugügüãü̃ tá i guü̃ma i ngẽmaü̃gü?

5. Ngetchutchu wüi Ãẽꞌgacü nameẽtchi

Rü tórü Ãẽꞌgacü ya Ngetchutchu naü tá muü̃ma ngẽmaü̃gü i meü̃gü na duü̃ü̃güü̃ rüngü̃ẽẽü̃caꞌ i Naanewa. Nüü̃ cudau i VÍDEO. Ngẽma vídeowa nanaweꞌ tá nhuãcü i Ngetchutchu rü Tupanaarü poramaã i duü̃ü̃güü̃ narüngü̃ẽẽ tá.

Taꞌacü ga Ngetchutchu nanaüü̃ yeguma ga Naanewa nayemagu, ngẽma nanaweꞌ i taꞌacü tá naü ngẽguma i Naanemaã inacuaꞌgu i wipeꞌewa. Ngeü̃rüüü̃ i unetagü na ngẽma quadruwa nangẽmaü̃ na cunawaꞌeü̃tchi na nayanguẽẽü̃? Nawa naugütae ngẽma wetchicurugü na naweꞌ ngẽma unetagütchiga.

6. Rü Tupanaarü Ãẽꞌgacü tüna nanaã tá wüi meẽtchi maü̃ i wipeꞌewa

 TAꞌACÜ MARÜ NÜÜ̃ CUCUAꞌ?

Rü Ngetchutchu ya Ãẽꞌgacü rü guü̃ma Tupanaarü ngútchaü̃ nanaü tá. Rü nhama Naane wüi natchica i meẽtchiü̃ tá yiĩü̃, rü duü̃ü̃gü i meü̃gü nawa namaü̃ tá rü guü̃gutáma i Yeuwaü̃ nicuaꞌüü̃gü.

Ngeü̃rüüü̃ i curü ngãü̃?

• Nhuãcü tá i Tupanaarü Ãẽꞌgacü rü Yeuwaégaü̃ naüüneẽẽ?

• Tüꞌcüü̃ tayaõgü na Tupanaarü Ãẽꞌgacü nayanguẽẽ tá guü̃ma i norü unetagü?

• Ngeü̃rüüü̃ niĩ i Tupanaarü unetagü na cunawaꞌeü̃tchi na nayanguẽẽ?