NGÚERUÜ̃ 42
Taꞌacü i Bíblia nüü̃ niu ingĩgütchiga rü teétchiga niĩ ngemaꞌcü rü ngetecü?
Nümaü̃gü i nacümagü rü duü̃ü̃gü nagu narüĩnüẽgü na wüi duü̃ü̃ nanawaꞌe yangĩü̃ na ngẽmaãcü nataãẽü̃caꞌ. Notürü nümaü̃gü ingĩcügüü̃ tama nataãẽgü, rü muü̃ma ngemaꞌcü rü ngetecü nataãẽgü. Rü Tupanaarü Ore nüü̃ niu teé nüü̃ uneta na tingĩü̃ urü tama taãteü̃ urü taãmaꞌü̃, ngẽma tare nacümagü wüi Yeuwaarü ãmare niĩ.
1. Tüꞌcüü̃ name ingemaꞌü̃ rü ingeteü̃?
Rü Tupanaarü Ore nhanagürü: “Rü ngẽma yatü i naxãcü ngĩxü̃ ütexü̃ rü mexü̃ naxü. Rü ngẽma yatü i tama naxãcü ngĩxü̃ ütexü̃ rü yexeraxü̃ i mexü̃ naxü.” (Nawa naugütae 1 Corĩ́tiucü̃ãꞌ 7:32-34, 38.) Tüꞌcüü̃ cungemaꞌü̃ rü cungeteü̃ yeera narümemaẽü̃tchi? Erü õgütanüü̃gü ngemaꞌcü urü ngetecü rü tama nanawaꞌe na tacücaꞌ naoégaãẽgüü̃, cuaꞌãtchiruü̃ nhuãcü tá nüna nadau ya namaꞌ urü nate. Nhaãcü ngẽma ngetegüü̃ rü ngemaꞌü̃cügü nayoniẽ i norü tempu na yeera Tupanacaꞌ napuracüe. Rü ngẽmacaꞌ muü̃tchiü̃ ngemaꞌcü rü ngetecü rü togü ĩãnewa naĩ na ngẽmaãcü togümaã nüü̃ yaugüü̃caꞌ i ore i meü̃tchiga. Ngẽmaẽ́tüwa nayoniẽ tá na yeera Yeuwana nangaicamagüü̃caꞌ.
2. Tüꞌcüü̃ nameü̃ na wüi yatü rü wüi ngeü̃ cartóriowa yangĩgüü̃?
Tchi naãmaꞌgu urü naãtegu ngẽma name niĩ. Rü tchi tama naãtegu urü naãmaꞌgu ngẽma ta name niĩ. Notürü Tupanaarü Ore nüü̃ niu na narümemaeü̃ wüi naãmücü. (Gênesis 2:18) Ngẽguma i õgütanüü̃gü rü Tupanaarü ucuꞌẽgüga naĩnüẽgügu i ngĩgütchiga rü meã nüü̃ nadawenü na ngẽma aicuma yiĩü̃. Ngẽguma wüi yatü rü wüi ngeü̃maã ningĩgu i cartóriowa rü nügümaã nanauegu na nügü tá nangetchaü̃gü rü nügüna nadaugü rü nügümaã niaicumaü̃. Ngẽguma ngẽmaãcü naügügu rü nüü̃ narüngü̃ẽẽ tá na meã nügümaã namaẽü̃caꞌ rü tá i naacügücaꞌ name tá. Notürü ngẽguma tama ngẽmaãcü nanaügügu rü tauü̃ tá nüü̃ ínapoü̃.
3. Taꞌacü Yeuwa nagu narüĩnü i ngĩgütchiga?
Yeguma Yeuwa ga nüíra yatü ga tüíra ngeemaã nayangĩgüẽẽgu rü nhanagürü: “Rü ngẽmaca̱x ya yatü, rü tá nanatüna rü naéna nixũgachi nax naxma̱xmaxã wüxiwa nangẽxmagüxü̃ca̱x.” (Gênesis 2:24) Yeuwa nanawaꞌe na ãteü̃ rü ãmaꞌü̃ nügü nangetchaü̃gü rü nataãẽgüü̃ i norü maü̃wa. Nhaãcü Yeuwa tama nanatchuꞌu nüicatama na wüi yatü rü wüi ngeü̃ nügü inawogü i wüi poperawa ngẽguma nate rü namaꞌ i tomaã ngẽãẽgu. (Mateu 19:9) Nhuꞌmatchi ngẽguma wüi duü̃ü̃ na ãteü̃ urü ãmaꞌü̃ i tomaã ngẽãẽgu, Yeuwa nüü̃ nanatautchaẽẽ na ngẽma duü̃ü̃ nüü̃ nauneta tchi nügü inataꞌgüü̃ urü tama i poperawa. a Yeuwa tama nanayau na õgütanüü̃gü na ãteü̃ urü ãmaꞌü̃ nangẽmaü̃ i togü yatügü urü ngeü̃gü. — 1 Timúteu 3:2.
YEERA NÜÜ̃ CUCUAꞌ
Nüü̃ nadau nhuãcü ngemaꞌgüü̃ rü ngetegüü̃ rü teé ãteü̃ urü ãmaꞌü̃ nataãẽgüü̃ rü Yeuwaü̃ nataãẽgü tá.
4. Nhuãcü tá i ngemaꞌcü rü ngetecü meã nayoniẽ i norü maü̃wa
Ngetchutchu ngemaꞌcü niĩ rü ngẽma nacaꞌ name niĩ. (Mateu 19:11, 12) Nawa naugütae Mateu 4:23. Yicama pegümaã pideagü ngẽmatchiga:
-
Nhuãcu ga Ngetchutchu nayoniẽü̃ na ngemaꞌcü niĩ na yeera Nanatücaꞌ napuracüü̃ rü togüü̃ narüngü̃ẽẽ?
Rü õgütanüü̃gü ngemaꞌcü urü ngetecü rü Ngetchutchurüü̃ nanaügü. Nüü̃ cudau i VÍDEO. Yicama pegümaã pideagü ngẽmatchiga:
-
Nhuãcü tá i ngemaꞌcüü̃ rü ngetecüü̃ meã nayoniẽ i norü maü̃wa?
Marü nüü̃ cucuaꞌ i ngẽma?
Rü Tupanaarü Ore tama nüü̃ niu na nhure taunecü nüü̃ nangẽmagu i wüi duü̃ü̃ yaningĩü̃ tá. Notürü nawa nüü̃ niu na inayanguẽẽü̃ na taãmaꞌü̃ rü taãteü̃ nhuꞌmata tümaꞌarü pawena rüeꞌna marü tá ngetüꞌügüwena erü ngẽma naü̃nearü ngútchaü̃ rü naporaü̃tchi rü ngẽmagagu nhuguãcü tchieü̃ tá nüü̃ nauneta. — 1 Corĩ́tiucü̃ãꞌ 7:36.
5. Meã nüü̃ nauneta teémaã cungĩ tá
Nüü̃ naunetaü̃ i duü̃ü̃ i namaã cungĩü̃ tá rü wüi ngẽmaü̃gü ãũrima meẽtchiü̃ niĩ i torü maü̃wa. Nawa naugütae Mateu 19:4-6, 9. Yicama pegümaã pideagü ngẽmatchiga:
-
Tüꞌcüü̃ name na wüi õgütanüü̃ meã nagu narüĩnüẽ naü̃pa na yangĩü̃?
Rü Tupanaarü Ore cuü̃ narüngü̃ẽẽ tá na nüü̃ cucuaꞌü̃caꞌ ngeü̃rüüü̃ niĩ meü̃ i nacüma na wüi yatücaꞌ rü wüi ngeü̃caꞌ cudau na naü̃pa namaã quingĩü̃. Notürü narümemaẽ niĩ na Yeuwaü̃ nangetchaü̃. b Nawa naugütae 1 Corĩ́tiucü̃ãꞌ 7:39 rü 2 Corĩ́tiucü̃ãꞌ 6:14. Yicama pegümaã pideagü ngẽmatchiga:
-
Tüꞌcüü̃ name niĩ wüi Yeuwaarü duü̃ü̃maã nangĩ?
-
Ngẽguma wüi Yeuwaarü duü̃ü̃ rü namaã ningĩgu i wüi duü̃ü̃ na tama Yeuwaü̃ ngetchaü̃, rü taꞌacü Yeuwa nagu narüĩnü i ngẽmatchiga?
Tchi wüi woca rü burumaã nayangegu wüi ngẽmaü̃ yaü̃ rü tare nioẽgü tá erü tama nawüigu. Ngẽgumarüü̃ niĩ ega wüi õgütanüü̃ rü wüi duü̃ü̃maã ningĩgu i tama Yeuwaü̃ ngetchaü̃ rü nangẽma tá muü̃tchi gutchaü̃gü.
6. Tanawaꞌe i Yeuwarüü̃ nagu tarüĩnüẽ i ngĩgutchiga
Nũcüma ga nümaü̃gü ga yatügü iraéutanüü̃cü̃ãꞌ ga norütama ngútchaü̃maã namaꞌü̃ ínataꞌ rü wüi ga popera ga taꞌgüpane ngĩna naã. Nawa naugütae Malaquias 2:13, 14, 16. Yicama pegümaã pideagü ngẽmatchiga:
-
Ngẽguma wüi duü̃ü̃ rü namücüü̃ ítágu rü wüi popera i taꞌgüpane nüna naãgu ega tama tomaã ngẽãẽgagu yiĩgu, tüꞌcüü̃ Yeuwa ngẽma natchi naai?
Ngẽguma teé ãteẽ urü ãmaꞌẽ rü tomaã tangẽãẽü̃gu rü wüi popera i taꞌgüpane nüna taãgu ngẽma tá napatacü̃ãꞌgüü̃ nioẽẽẽ.
Nüü̃ cudau i VÍDEO. Yicama pegümaã pideagü ngẽmatchiga:
-
Tchi marü wüi duü̃ü̃maã cungĩgu na tama Yeuwaü̃ cuaꞌüü̃, taꞌacü tá cuüü̃ na wüi ngĩ taãẽü̃ cuü̃ ngẽmaü̃?
7. Yeuwa tüü̃ narüngü̃ẽẽ na norü mugüga iĩnüẽgüü̃caꞌ i ngĩgütchiga
Bemana wüi duü̃ü̃ nügü naporaẽẽ na Yeuwaarü ucuꞌẽgüga naĩnü i ngĩtchiga. c Notürü Yeuwa rü duü̃ü̃ü̃ narüngü̃ẽẽ na ngẽma naüü̃caꞌ. Nüü̃ cudau i VÍDEO.
Nawa naugütae Ebréugü 13:4. Yicama pegümaã pideagü ngẽmatchiga:
-
Cucaꞌ, eꞌna taucürüwa niĩ i Yeuwaarü mugüga iĩnüẽgüü̃ i ngĩgütchiga? Tüꞌcüü̃?
Muü̃tchi natchiü̃anegüwa rü ãẽꞌgacügü i duü̃ü̃gü nanamu na nayawücutchiü̃ i poperawa ngẽguma yangĩgügu urü ngẽguma nügü ínatágügu. Yeuwa nanawaꞌe õgütanüü̃gü ngẽma mugüga naĩnüẽgü. Nawa naugütae Titu 3:1. Yicama pegümaã pideagü ngẽmatchiga:
-
Tchi cuãtegu rüeꞌna cuãmaꞌgu rü curü ngĩ quiwücutchigu i poperawa rü nayangicu i natchiü̃anegüarü mugümaã?
WÜI DUÜ̃Ü̃ CUNA NACA: “Tchi wüiwa namãẽgu ngẽma rü marü name, taꞌacücaꞌ ingĩü̃?”
-
Nhuãcü nüü̃ cunangãü̃?
TAꞌACÜ MARÜ NÜÜ̃ CUCUAꞌ?
Tchi naãtegu urü naãmaꞌgu rü nangemaꞌgu urü nangetegu ngẽma wüi Yeuwaarü ãmare niĩ. Rü teé naãtegu urü naãmaꞌgu rü teé ngemaꞌgu urü ngetegu i Yeuwaarü mugüga taĩnüẽgü rü tataãẽgü.
Ngeü̃rüüü̃ i curü ngãü̃?
-
Nhuãcü tá i ngemaꞌcü rü ngetecü meã nayoniẽ i norü maü̃wa?
-
Tüꞌcüü̃ i Tupanaarü Ore tamaã nüü̃ niu na Yeuwaarü duü̃ü̃maã ingĩgüü̃caꞌ?
-
Ngeü̃rüüü̃ niĩ i Tupanarü Ore nüü̃ niuü̃ na nameü̃ cumaꞌü̃ rüeꞌna cuteü̃ ícutáü̃?
YEERA NACAꞌ NADAU
Taꞌacü nhaü̃tchiga niĩ ngẽma wetchicuru na nhanagürü: Ínawaꞌe na wüi ya duü̃ü̃ ya yaõcümaã nangĩü̃?
Nüü̃ nadau i ngẽma vídeogü na cuü̃ narüngü̃ẽẽ tá ngẽguma wüi duü̃ü̃maã tá cungĩgu.
Nüü̃ nadau wüi taeneẽarü ore na nümaü̃gü i ngẽmaü̃gü nũcümaü̃ü̃ ínatáü̃ rü ngẽma ngẽmaü̃güarü yeera niĩ i Yeuwa nüna ãü̃.
Taꞌacü wüi duü̃ü̃ nanawaꞌe meã nagu narüĩnü na naü̃pa natena urü namaꞌna niũgatchiü̃ urü nüna nanaãü̃ wüi i popera i taꞌgüpane?
“Tautáma nagu nidaucüraü̃ i ngĩgütchiga” (Dauü̃taecü, dezẽbruarü 2018gu)
a Nüü̃ nacuaꞌ i ngẽmatchiga ngẽguma wüi duü̃ü̃ ãteü̃ urü ãmaꞌü̃ nügüna niũgatchigu woo na tama i tomaã nangẽãẽü̃ ngẽma quadruwa Meã Nüü̃ Nacuaꞌ 4wa.
b Nümaü̃gü natchiü̃ãnegüarü nacümawa, rü papagü rü mamagü naacügüü̃ nüü̃ nauneta na teémaã tá yangĩgüü̃. Notürü wüi papa rü wüi mama na naacügüü̃ ngetchaü̃ü̃ rü tá nüü̃ naunetagü wüi duü̃ü̃ na Yeuwaü̃ ngetchaü̃ rü tama norü dĩẽruü̃ urü norü puracüü̃.
c Tchi cuma rü wüi duü̃ü̃maã cumaü̃ notürü taũta pengĩgü i poperawa, ícunatáü̃ i ngẽma duü̃ü̃ rüeꞌna namaã quingĩü̃ rü wüi cuica cuyauü̃ niĩ.
