“Rü namaã pengúeẽẽtae.” (Ebr 5:12) Nagu rüĩnü! Yeuwa Taü̃tchicü Nguꞌẽẽtaeruü̃ niĩ, tona nau i natchiga duü̃ü̃güü̃ tanguꞌẽẽ! Rü aicuma Yeuwatchiga tanguꞌẽẽ i tapatacü̃ãꞌ, yaõgüü̃tücumü rü ngẽguma tá Tupanaarü Oretchiga tiugu rü ngẽmacaꞌ nameẽtchima. Nhuũtchi, nhuãcü tá meãma nguꞌẽẽtaeruü̃ iĩgüü̃?

Rü nüü̃ nacuaꞌgü ngẽma deagümaã na Pauru ga Timúteuü̃ nangãü̃: ‘Rü guü̃ i duü̃ü̃güpeꞌewa nüü̃ cudaumatü i Tupanaarü Ore, rü ngẽmaãcü cunangúeẽẽ rü nüü̃́ cunangútchaü̃ẽẽ i ngẽma taeneẽgü.’ Rü nüma meã namaã nüü̃ niu erü nameẽtchima niī: “Ngẽguma meã cunaüꞌgu i guü̃ma, rü tá cunayau i maü̃ i taguma gúü̃ rü ngẽma togü i cuü̃́ irüĩnüẽü̃ rü tá ta nüü̃ curüngü̃ẽẽ na nümagü rü ta nayaugüãü̃caꞌ i ngẽma maü̃.” (1 Tim 4:13, 16) Rü duü̃ü̃gü i ore namaã iugüü̃ rü tá nüü̃́ nangẽma i maü̃ taguma gúü̃. Ngẽmacaꞌ nameẽtchima na yigü iporaeẽẽ na meã nguꞌẽẽruü̃ iĩgüü̃caꞌ rü meã nawa iugütaegüü̃caꞌ. Ngẽmaãcü nhaa popera cuü̃ narüngü̃ẽẽ tá. Düca i taꞌacü ngẽmaü̃.

Nhaa popera tá cuü̃ narüngü̃ẽẽ na meã nguꞌẽẽtaeruü̃ quiĩ rü meã nawa cuugütae. Notürü nüna nacuaꞌãtchi na ‘natauma i nguꞌẽẽtaeruü̃ i Yeuwamaã wüiguü̃’. (Jó 36:22) Ngẽma ore nawa ne naĩ rü nüma niĩ duü̃ü̃güü̃ nauneta. (Juã́ũ 6:44) Ngẽmacaꞌ guü̃guma cuyumüẽ nacaꞌ ícuca norü naãẽ i üüneü̃. Rü guü̃guma Tupanaarü Oremaã cunguꞌẽẽ. Rü taü̃́ cugü cudautchaẽü̃ notürü Yeuwa nüicatama. Cugü naporaẽẽ na duü̃ü̃güü̃ curüngü̃ẽẽ na Yeuwaü̃ nangetchaü̃güü̃tchi.

Yeuwa cuna nau na duü̃ü̃gümaã nüü̃ quiu i ore rüyeeramemaeü̃. Guü̃guma nagu yaõ Tupanaarü pora rü meã peü̃́ ínanguutchi tá. —1 Pe 4:11.

Peü̃ narümoẽgü i taeneẽgü i yaõgüü̃ i wüigu tamaã puracüe,

Natücumü i Wipeꞌe Ãgüü̃ i Yeuwaarü Orearü Uruü̃güna