Pa taenegü rü taeyagü ya peü̃ tangetchaü̃güe:

Nüü̃ ingetchaü̃ i Yeuwa rü duü̃ü̃gü rü tüü̃ nanangútchaü̃ẽẽ na ‘guü̃ i natchiü̃anewa taĩ i guü̃ i duü̃ü̃gütanüwa’ na nümagü Ngetchutchuwe narüĩü̃caꞌ rü ínabaieü̃caꞌ. (Mat. 28:19, 20, Mar. 12:28-31) Ngetchaü̃ i aicumaü̃ rü poraütchicü niĩ. Ngẽma ngetchaü̃ rü duü̃ü̃güarü maü̃newa ínangu erü ngẽma duü̃ü̃gü rü nawaꞌe yeera nüü̃ cuaꞌgüü̃tchaü̃ i maü̃ i taguma i gúü̃tchiga. — Pur 13:48.

Nũcüma, yigü iporaẽẽgü na togüna iãgüü̃caꞌ i poperagü rü meã taãẽwa nüü̃ icuaꞌgüü̃ i taꞌacü tideaü̃. Notürü, nhuꞌma inawaꞌegü ítanameẽẽ i tacümagü na meã togümaã tideagüü̃caꞌ. Rü duü̃ü̃gümaã ingetchaü̃waꞌetchaü̃ ngẽguma namaã tideagügu i taꞌacü nacaꞌ nagutchaãẽtchiga. Na ngẽmaãcü taügüü̃caꞌ inawaꞌegü ítameẽẽ i torü dea rü yigü iporaẽẽgü na nagu tarüĩnüẽü̃caꞌ i taꞌacü duü̃ü̃güarü gutchaü̃gü rü taꞌacü nüü̃́ name. Nhuãcü tá nhaa popera rü tüü̃ narüngü̃ẽẽ na ngẽma taügüü̃caꞌ?

Nhaa poperawa nangẽma 12 ngúeruü̃gü na nanaweꞌ i nacümagü na inawaꞌegü tüü̃́ nangẽma na togümaã tangetchaü̃waꞌegüü̃caꞌ rü nüü̃ tanguꞌẽẽü̃caꞌ. Wüitchigü i ngúeruü̃wa nangẽma wüi meü̃ i nacüma na Ngetchutchu rüeꞌna to i nüíraü̃ü̃ ga yaõgüü̃ nanaweꞌ ga norü puracüwa. Torü ngútchaü̃ niĩ nüü̃ icuaꞌgüü̃ na nhuãcü duü̃ü̃gümaã tangetchaü̃waꞌe. Aicuma niĩ na wüitchigü i ngẽma nacümagü rü name i guü̃ i torü puracü ya Yeuwacaꞌ notürü ngiã nüü̃ tadaugü na nhuãcü nanaweꞌ i ngẽma nacümagü nacaꞌ i inaügü i torü dea, wenaarü namaã ideagü rü nüü̃ inguꞌẽẽ.

Ngẽguma nacaꞌ cunguꞌgu wüitchigü i ngúeruü̃, nagu rüĩnü na nhuãcü cunaweꞌ tá i ngẽma nacüma i ngẽguma duü̃ü̃gümaã quideagu i cutchiü̃ãnewa. Cugü naporaẽẽ na yeera nüü̃ cungetchaü̃ü̃caꞌ i Yeuwa rü duü̃ü̃gü. Ngetchaü̃waꞌe rü ngeü̃rüüü̃mare i nacümaarü yeera niĩ na cuü̃ narüngü̃ẽẽ tá na togüü̃ cunguꞌẽẽü̃caꞌ.

Tocaꞌ nameẽtchima pemaã tapuracüe. (Sof. 3:9) Tayumüẽgü na Yeuwa peétü nawémeꞌamaü̃caꞌ ngẽguma pegü peporaẽẽgügu na togümaã pengetchaü̃waꞌegüü̃caꞌ rü Ngetchutchuwe narüĩü̃caꞌ!