NATCHIPEE 2
Nawe na Aicuma Cumücüü̃ Cungetchaü̃ü̃
“Rü ngẽmacaꞌ taucürüwa teé nügüna tayaĩgatchiẽẽ i ngẽma tare i Tupana nügüna mugüü̃.”— Marcu 10:9
Yeuwa nanawaꞌe na norü duü̃ü̃gü aicuma nügü nangetchaü̃güü̃. (Miqueias 6:8) Nameẽtchi na aicuma nügü nangetchaü̃güü̃ i yatü rü ngeü̃ i nügümaã ingĩgüü̃, erü ngẽguma tama aicuma nügü nangetchaü̃gu rü tama nügüü̃́ nayaõgü. Rü nügüü̃́ nayaõgüü̃ rü nameẽtchima na poraãcü nügü nangetchaü̃güü̃caꞌ.
Nhuꞌma rü nagutcha na ngẽma nügümaã ingĩgüü̃ na aicuma nügü nangetchaü̃güü̃. Tare i puracü naü na ícunapoü̃ü̃caꞌ i curü ngĩ.
1 CURÜ NGĨ NIĨ ÃŨRIMA MEÜ̃
TUPANAARÜ ORE RÜ NHANAGÜRÜ: Name niĩ i “penangugüü̃ i tacü niĩ i aicuma meü̃ i Tupanapeꞌewa.” (Piripucü̃ãꞌ 1:10) Ngẽma curü maü̃wa ãũrima meü̃ rü curü ngĩ niĩ. Ngẽmacaꞌ wipeꞌewa naüẽẽ i cumücü.
Yeuwa nanawaꞌe na cumücücaꞌ cumaü̃ü̃ rü guü̃gutama petaãẽgüü̃. (Eclesiastes 9:9) Yeuwa tama nanawaꞌe na tama nüü̃ cucuaꞌtchaü̃ i cumücü, notürü nüma rü nanawaꞌe na nüü̃ picuaꞌü̃ na nhuãcü tá pegü petaãẽẽẽü̃. (1 Corĩ́tiucü̃ãꞌ 10:24) Nüü̃ nawe i cumücü na aicuma cuü̃́ nameẽtchi rü cunawaꞌeü̃ i norü ngü̃ẽẽ.
TAꞌACÜ TÁ CUÜÜ̃:
-
Rü guü̃gutáma wüi i nguneü̃gu cumücümaã wüiwa nangẽma rü meã nüü̃ naĩnü i cumücü.
-
Guü̃guma nagu rüĩnü na duü̃ü̃ ãmücüü̃ quiĩü̃. Rü taũ nagu curüĩnü na nhama cungeteü̃rüü̃ rü cungẽmaꞌü̃rüü̃ cugü quiĩẽ.
2 NÜNA NADAU I CURÜ ĨNÜ
TUPANAARÜ ORE RÜ NHANAGÜRÜ: “Rü yíema teé ya wüi i ngeü̃ dawenüẽ rü tüü̃́ nangútchaü̃ẽ na ngĩmaã itapeü̃, rü Tupanapeꞌewa rü marü tchieü̃ ngĩmaã taü i tümaãẽwa.” (Mateu 5:28) Tchi wüi duü̃ü̃ naü̃nearü ngútchaü̃ i tchieü̃gurica narüĩnügu, rü nanaweꞌ na tama aicuma namücüü̃ nangetchaü̃ü̃.
Yeuwa rü cumaã nüü̃ niu na nüna cudauü̃ i curü ĩnü. (Provérbios 4:23 rü Jeremias 17:9) Rü ngemacaꞌ niĩ nameü̃ na nüna cudauü̃ i ngẽma nüü̃ cudawenüü̃. (Mateu 5:29, 30) Yotchiga rü ngẽmatchigawa tüü̃ narüngü̃ẽẽ. Rü nügümaã nanauegu na taugutchima tchiri tüü̃ nadawenüü̃ rü nüü̃ tangútchaü̃ü̃ ga ngeꞌe ga tama norü iĩẽ. (Jó 31:1) Taũ nüü̃ cudawenüü̃ i terevisãowa, rü cerurarwa, rü poperawa i natchicunaã i ngeü̃ i ngetchiruü̃ rü yatüü̃ i ngetchiruü̃, rü bai ngẽma nügümaã ngeãẽgüü̃. Rü tãũü̃táma nüü̃ cungee i ngẽma tama cumücü iĩü̃.
TAꞌACÜ TÁ CUÜÜ̃:
-
Rü togüü̃ naweꞌ na aicuma cumaꞌü̃ cungetchaü̃ rüeꞌna cuteü̃.
-
Rü nüü̃ nacuaꞌ rü nacaꞌ nadau na nüü̃ cucuaü̃ꞌcaꞌ i ngẽma taꞌacü i cumücü nagu narüĩnüü̃. Tchi ngẽguma cumücü cuü̃ natchiewegu i wüi duü̃ü̃ i namaã cuãmücüü̃, notacüma ngerü namaã cuãmücüü̃ i ngẽma duü̃ü̃.
