Marü nügümaã yangĩgügu i yatüü̃ rü ngeü̃ rü wüitama duü̃ü̃rüü̃ niĩgü. Cuma rü nüü̃ cungetchaü̃ama rü taũtama tümagu quidauꞌcüraü̃ ya cunatü rü cue notürü cumücü tá niĩ ãũrima cuü̃́ meü̃. Beꞌmana írarüwa nüü̃ nagutcha i cutanüü̃ na ngemaü̃ nacuaꞌgüü̃. Beꞌmana tama nüü̃́ name i cutanüü̃ i ngẽma. Notürü Tupanaarü Orearü ucuꞌẽgü rü cuü̃ tá narüngü̃ẽẽ na cutanüꞌü̃gümaã meã cutaãẽü̃caꞌ rü name na pegü pengetchaü̃güü̃.

TUPANAARÜ ORE RÜ NHANAGÜRÜ: “Rü tüü̃ nangetchaü̃ rü tüü̃ rüngü̃ẽẽ ya cunatü rü cue.” (Epéchiucü̃ãꞌ 6:2) Cumaü̃guyane name na tüü̃ cunaweꞌü̃ i cunatü rü cue na tüü̃ cungetchaü̃güü̃ rü tãũü̃táma tümagu quidauꞌcüraü̃gü. Notürü nüna nacuaꞌãtchi na cumücü rü naãnatüü̃ rü naẽ rü nanawaꞌeü̃ na ngẽma taregüü̃ naĩnüü̃. Teé ya ‘ngetchaü̃waꞌee rü tama tiꞌãũãtchiwaꞌe’. Ngẽmacaꞌ tãũü̃táma quiãũãtchiwaꞌe ngẽguma cumücü nanatüü̃tawa rü naẽü̃tawa nangẽmagu. — 1 Corĩ́tiucü̃ãꞌ 13:4 rü Gárataanecü̃ãꞌ 5:26.

TAꞌACÜ TÁ CUÜÜ̃:

• Tãũü̃táma nhacuü̃: “Cutanüꞌü̃ rü guü̃guma tchiri tchautchiga nidea” urü “guü̃ma i taꞌacü tchaüü̃ rü tauguma cuecaꞌ name”.

• Cugü naporaẽẽ na nüü̃ cucuaꞌü̃ ngẽma cumücü nagu narüĩnüü̃.

TUPANAARÜ ORE RÜ NHANAGÜRÜ: “Rü ngẽmacaꞌ ya yatü, rü ta nanatüna rü naéna niũgatchi na namaꞌmaã wüiwa namaẽü̃caꞌ, rü nhama wüitama i duü̃ü̃rüü̃ yiĩgüü̃caꞌ i ngẽma tare.” (Gênesis 2:24) Woo marü nügümaã yangĩgügu i yatüü̃ rü ngeü̃ beꞌmana curü mama rü papa nanawaꞌegü na cuna nadaugüü̃ama tá, ngẽmacaꞌ pena tünadaãetcha.

Pema rü wüigu tá penangugü na ngeü̃rüü̃ i penatüarü rü peearü ucuꞌẽgü tá peüü̃ rü ngeü̃rüü̃ tãũü̃táma peüü̃. Ngẽmawena namaã nüü̃ piugü ngetchaü̃waꞌeãcü na ngeü̃rüü̃ tá i ucuꞌẽgü peüü̃ rü tauü̃táma peüü̃. Piaicumagü rü tauü̃tama penuẽãcü pideagü. (Provérbios 15:1) Pema rü petanüꞌü̃maã petaãẽgü tá ngẽguma ‘pegü íperüíragu rü pemecümagü rü yana peĩnüẽ rü pegü pengetchaü̃gu’. — Epéchiucü̃ãꞌ 4:2.

TAꞌACÜ TÁ CUÜÜ̃:

• Cumücümaã idea natchigagu ngẽma cutanüꞌü̃gü i cuü̃ oegaãẽẽẽ nagagu na guü̃guma pena tünadaãetcha. Taũ nuẽgu pegümaã pideagü.

• Pegümaã peuenü na nhuãcü tá penameẽgüü̃ i ngẽma.