Ngẽguma wüi i buü̃ ínangugu rü wüi taãẽ niĩ notürü nangẽma i gutchaü̃gü i nacaꞌ i papa rü mama. Nhuꞌma na papa rü mama piĩü̃gü rü namaã pebaiãtchie tá i taü̃ma i puracü i peügüü̃ tá na nüna pedauü̃caꞌ i peacügü. Ngẽmacaꞌ peoegaãẽgü tá rü tãũü̃táma meã tchütacü pepeꞌe rü ngẽmagagu tá pewa gutchaü̃ íniadau. Peyatoraü̃ẽẽ i perü maü̃ na nüü̃ pecuaꞌü̃caꞌ na nhuãcü tá peacüna pedau rü pegüna. Nhuãcü peü̃ narüngü̃ẽẽ i Tupanaarü ucuꞌẽgü?

TUPANAARÜ ORE RÜ NHANAGÜRÜ: “Rü yíema tümamücüü̃ ngetchaü̃ẽ, rü yana namaã taĩnü, rü namaã tamecüma”. Rü nhuꞌmatchi “tama tügüguicatama tarüĩnü, rü tama tanuwaꞌe”. (1 Corĩ́tiucü̃ãꞌ 13:4, 5) Ngẽguma nabugu i cuacü rü cuma na mama quiĩü̃ rü cunawaꞌe na cuacüna ricaꞌ cudauü̃. Notürü cute rü nagu narüĩnü na nüica ngẽma natamareü̃. Taũ nüü̃ curüngümaü̃ ya cute rü name ta na nüna cudau. Yana naĩnü rü mecümaãcü namaã idea, na cuma rü cunawaeꞌü̃ i norü ngü̃ẽẽ rü nameẽtchi na nüma rü ta buena nadauü̃.

“Pa yatügü, rü name niĩ i meã pemaꞌü̃ pengetchaü̃gü rü aicuma yana ngĩmaã peĩnüẽ.” (1 Pedru 3:7) Nüü̃ nacuaꞌ na ãũrima tapuracüü̃ tá ya cumaꞌ na cuacüna tadauü̃caꞌ. Ngĩma rü nüü̃ nangẽma i muü̃ma i puracüe, ngẽmagagu rü tatchieãẽ rü tipaü̃tchi rü tangetchaü̃. Nhuguãcü i ngĩma rü tá cumaã inuãtchi, notürü cuma rü nanawaꞌe na yana cuĩnüü̃. “Ngẽma na yigü írüporaü̃arü yeera narümemae na yana namaã iĩnüü̃ i guchaü̃gü.” (Provérbios 16:32) Tüü̃ nangugu ya cumaꞌ na nüü̃ cucuaꞌü̃caꞌ na nhugu niĩ tanawaꞌeü̃ i curü ngü̃ẽẽ. — Provérbios 14:29.

TAꞌACÜ TA CUÜÜ̃:

• Papa: Cuacüna nadau woo ngaü̃cüü yiĩgu na ngẽmaãcü tüü̃ curüngü̃ẽẽü̃caꞌ ya cumaꞌ. Taũ toomaãmaregu cugü cugutchaãẽü. Narümemaẽ na cuacügügu cugutchaãẽü̃.

• Mama: Taũ nüü̃ cuoü i norü ngü̃ẽẽ ya cuteꞌ ngẽguma nanawaꞌegu na cuü̃ narüngü̃ẽẽ na naacüna nadauꞌü̃. Taũ namaã cunuü̃ ngẽguma nüma yagutchinügu, mecümaãcü nüü̃ nawe na nhuãcü naüü̃.

TUPANAARÜ ORE RÜ NHANAGÜRÜ: “Rü nhama wüitama i duü̃ü̃rüü̃ yiĩgüü̃caꞌ i ngẽma tare.” (Gênesis 2:24) Name na nüna pecuaꞌãtchiü̃ na pema rü wüitama i duü̃ü̃ peĩgüü̃ woo peü̃́ nangẽma i wüi i buü̃. Rü ngẽgumarüü̃ rü name na pegü peporaeẽẽ na yeera pegü pengetchaü̃güü̃caꞌ.

Cuma pa ngeꞌe name na moẽ cutena cuãü̃ nacaꞌ ngẽma norü ngü̃ẽẽ cuna naãü̃. Ngẽguma moẽ nüna cuãꞌgu ya cute rü yeera tá nataãẽ. (Provérbios 12:18) Cuma pa yatü cumaꞌmaã nüü̃ iu na cuma rü poraãcüü̃tchima tüü̃ cungetchaü̃ü̃ rü ãũrima cuü̃́ tameetchiü̃. Guü̃guma tüü̃ icuaꞌüü̃ nacaꞌ i ngẽma natanüü̃caꞌ taüü̃.— Provérbios 31:10, 28.

“Rü tama name niĩ i tórütama meü̃caꞌ tadaugü, notürü name niĩ i togüarü meü̃caꞌ na idaugüü̃.” (1 Corĩ́tiucü̃ãꞌ 10:24) Guü̃guma naü i ngẽma cumücücaꞌ meü̃. Wüi nguneü̃ ípeüütchi na pegümaã pideagüü̃caꞌ rü meü̃ pegümaã nüü̃ piugüü̃caꞌ rü pegü peĩnüẽü̃caꞌ. Rü Tupanaarü Ore rü nhanagürü: “Rü tama name i wüi ya yatü rü namaꞌna nügü ninuũ, rü eꞌna wüi i ngecü rü ngĩtena ngĩgü iyanuũ, ega tama nügümaã nameẽẽãgu na nhure i nguneü̃ tama nügümaã namaẽü̃.” (1 Corĩ́tiucü̃ãꞌ 7:3-5) Pa yatücü rü pa ngeꞌe nangugü i norü ngútchaü̃ i cumücü ngẽguma nacuwaꞌegu. Taũ cugügurica rüĩnüü̃. Ngẽmatchigagu pegümaã pideagü. Pema rü yeeraãcü tá pegü pengetchaü̃gü ngẽguma yana peĩnüẽgu rü nangugü i ngẽma cumücü nagu rüĩnüü̃.

TAꞌACÜ TÁ CUÜÜ̃:

• Taũ nüü̃ perüngümaẽü̃ na pegücaꞌ ípenaüütchiü̃ i wüi i nguneü̃ na pegüü̃tawa pengẽmagüü̃caꞌ.

• Nawü i wüi popera i cumücücaꞌ rü tüna naã wüi ãmare. Ngẽmagü tá niĩ peü̃ rüngü̃ẽẽ na yeeraãcü pegü pengetchaü̃güü̃caꞌ.

TUPANAARÜ ORE RÜ NHANAGÜRÜ: “Rü cuma nüü̃ cucuaꞌ rü cubugumamatama nawa cunguꞌ i ngẽma Tupanaarü ore i üüneü̃. Rü ngẽmawa cunayau i cuaꞌ na nüü̃ cucuáꞌü̃caꞌ i nhuãcü tüü̃́ na nangẽmaü̃ i maü̃ i taguma gúꞌü̃.” (2 Timúteu 3:15) Nagu rüĩnü na taꞌacü tá cuüü̃ na cuacüü̃ cunguꞌẽẽü̃ca. Naü̃pa na nabuü̃ rü marü nüü̃ nacuaꞌ i ngẽma norü mama nacaꞌ nüü̃ nguꞌẽẽ. Cupütüwewa nangẽmagutama i cuacü rü nüü̃ nacuaꞌü̃ i cuga rü curü taãẽ rü curü ngetchaü̃. Namaã naugütae noritama nabugu i cuacü. Beꞌmana tama nüü̃ nacuaꞌ i ngẽma taꞌacü nawa cuugütae, notürü ngẽma rü tá yeeraãcü nüü̃ narüngü̃ẽẽ na ugütae nüü̃́ meü̃ ngẽguma nayagu.

Narümemaẽ na nabugutama Tupanatchiga namaã quidea. Curü yumüẽ nüü̃ naĩnüẽ i buü̃. (Deuteronômio 11:19) Ngẽguma peacügümaã peĩãwaegu rü name niĩ i ngẽma guü̃ma i taꞌacü i nhama naãnewa Tupana üütchigagu namaã pideagüü̃. (Salmo 78:3, 4) Ngẽguma nayagu i peacü rü nüü̃ nacuaꞌ tá na cuma rü Yeuwaü̃ cungetchaü̃. Ngẽma rü nananguꞌẽẽ tá na Yeuwaü̃ nangetchaü̃ü̃.

TAꞌACÜ TA CUÜÜ̃:

• Yumüẽwa nacaꞌ ínacaꞌ i cuaꞌ na cuacüü̃ cunguꞌẽẽü̃caꞌ.

• Namaã nüü̃ iuetcha i meẽtchiü̃ deagü na ngẽmaãcü i cuacü nabugutama nüü̃ nacuaꞌü̃caꞌ.