Yatüü̃ rü ngeü̃ nügümaã ingĩgüü̃ rü nhuguãcü rü muü̃ma i gutchaü̃gü nüü̃ nangẽma. Ngẽma nangupetü erü tama wüigu perü inüẽ, wüitchigü rü tüü̃́ name i ngẽma tüü̃ meü̃ rü perü maü̃ tama nawüigu. Notürü nangẽma i gutchaü̃gü i düetüwa ne ĩü̃ i tama yatüü̃ rü ngeü̃ ngupetügü rü ngürümare íngugüü̃ tá.

Natautcha na tama nameẽẽü̃ i tórü gutchaü̃gü, notürü Tupanaarü Ore rü tüü̃ naucuꞌẽ nanameẽẽ. (Mateu 5:23, 24) Ngẽma taꞌacü i Tupanaarü Ore nüü̃ yauü̃ rü tüü̃ narüngü̃ẽẽ nanameẽẽgüü̃caꞌ torü i gutchaü̃gü.

TUPANAARÜ ORE RÜ NHANAGÜRÜ: “Rü nangẽma . . . i nguneü̃ i nagu ideagüü̃.” (Eclesiastes 3:7) Nangẽmagu i gutchaü̃, pegümaã natchiga pideagü. Pegümaã piaicumagü rü pegü nüü̃ picuaꞌẽẽ i ngẽma nagu perüĩnüẽ. Guü̃guma pegümaã piaicumagü. (Epéchiucü̃ãꞌ 4:25) Tãũü̃táma name na pegü pedaiü̃ woo ngẽguma penuẽgu rü pegü pengetchaü̃gu. Rü ngẽma ngãü̃ga i memareü̃ rü dai íniãtchaãtchiẽẽ ngẽguma duü̃ü̃ nügü iutagagügu. — Provérbios 15:4; 26:20.

Cuma pa yatüü̃ rüeꞌna ngeü̃ meã idea, ngetchaü̃ naweꞌ rü taũ nagu idauꞌcüraü̃ü̃ i cumücü woo ngẽguma tama cuü̃́ namegu i ngẽma nüü̃ yauü̃. (Corochacü̃ãꞌ 4:6) Paꞌama penameẽẽ i gutchaü̃ rü guü̃guma pegümaã natchiga pideagü i toomatchigü i gutchaü̃gü. — Epéchiucü̃ãꞌ 4:26.

TAꞌACÜ TÁ CUÜÜ̃:

• Wüi nguneü̃ i meü̃ peuneta na gutchaü̃tchiga pideagüü̃caꞌ.

• Tãũü̃táma quideaü̃ ngẽguma cumücü ideagu. Marü yaguegagu tá quideaü̃.

TUPANAARÜ ORE RÜ NHANAGÜRÜ: “Rü name niĩ i wüichigü pegü pengechaü̃gü, ngẽma pegüeneẽü̃chiü̃ pengechaü̃ü̃rüü̃. Rü name niĩ i nacaꞌ pedaugü na nhuãcü peeneẽgüü̃ petaẽẽü̃ rü nhuãcü pegü perüngü̃ẽẽü̃.” (Romacü̃ãꞌ 12:10) Nameẽtchi na meã nüü̃ cuĩnüü̃ i cumücü. Nüü̃ nacuaꞌ i taꞌacü cute urü cumaꞌ nagu narüĩnüü̃ rü naweꞌ na cumücüü̃ cungetchaü̃ü̃ na cugü írüira. (1 Pedru 3:8 rü Tiagu 1:19) Aicuma rüĩnü. Name na ícuyatchaãtchiẽẽ i ngẽma taꞌacü ícuügu na nüü̃ cuĩnüü̃caꞌ i cumücü, urü to nguneü̃gu rüeꞌna to ngoragu namaã idea. Yatüü̃ rü ngeü̃ rü tãũü̃táma nügü nangetchaü̃güẽẽmare ngẽguma aicumaü̃tchima nügümücü yaĩgügu rü bai nügütchi naaiꞌẽãcü. — Eclesiastes 7:9.

TAꞌACÜ TÁ CUÜÜ̃:

• Cugü naporaẽẽ na nüü̃ cucuaꞌü̃caꞌ na taꞌacügu inarüĩnü ya cumücü woo tama cuü̃́ namegu i ngẽma nüü̃ yauu.

• Meãma nüü̃ nangugü i cumücü i ngẽma taꞌacü nüü̃ yauü̃wa rü nacümawa. Nangugü i naga ta. Yanhugaraü̃ü̃?

TUPANAARÜ ORE RÜ NHANAGÜRÜ: “Rü guü̃ma i puracüwa tanayau i meü̃gü, notürü ngẽma na ideatchamareü̃, rü tauü̃ma i meü̃ nawa tayau.” (Provérbios 14:23) Tama name na nüü̃ piumareü̃ na penameẽẽü̃ tá i gutchaü̃. Narümemaü̃ na aicumaü̃tchi tá penameẽẽü̃ i perü gutchaü̃. Nagutcha tá na ngẽma peüü̃, notürü pegü peporaeẽẽama erü meü̃ ínanguutchi tá. (Provérbios 10:4) Ngẽguma tá wüigu pepuracüegu rü penayaugü tá i perü puracütanü. — Eclesiastes 4:9.

TAꞌACÜ TÁ CUÜÜ̃:

• Wüitchigü i pema pepuracüe na penameẽẽü̃caꞌ i perü gutchaü̃.

• Nhuguãcü wüitchigü na pema penangugü i taꞌacü peüü̃ penameẽẽü̃caꞌ i perü gutchaü̃.