Yeguma ga Yeuwa yatüü̃ rü ngeü̃ naügu, rü nüma rü papaü̃ rü mamaü̃ namu na naacügüna nadauü̃caꞌ. (Corochacü̃ãꞌ 3:20) Cuma na papa quiĩü̃ rü mama quiĩü̃, curü puracü niĩ nagü cuacügüü̃ cunguꞌẽẽ na Yeuwaü̃ nangetchaü̃güü̃caꞌ rü nayaegu naãẽ nacuaꞌgüü̃caꞌ. (2 Timúteu 1:5; 3:15) Nangugü i norü maü̃ i cuacügü na nüü̃ cucuaꞌü̃caꞌ taꞌacü niĩ nagu narüĩnüẽ. Curü cuaꞌãtchiruü̃ rü nameẽtchima. Meã cuacügüü̃ cunguꞌẽẽü̃caꞌ narümemaẽ niĩ na ãũrima Yeuwaü̃ cungetchaü̃ü̃. — Salmo 40:8.

TUPANAAARÜ ORE RÜ NHANAGÜRÜ: “Rü name niĩ i meã iperüinüẽ.” (Tiagu 1:19) Cuma rü cuü̃́ nangútchaü̃ na Cuacügü cumaã yadeagüü̃. Nümagü rü nüü̃ nacuaꞌgü tá na cuma rü meã nüü̃́ curüĩnüü̃ ngẽguma cumaã yadeagügu. Tchi ngẽguma cuacügümaã cumecümagu rü tá nüü̃́ nangútchaü̃gü na cumaã yadeagüü̃. (Tiagu 3:18) Ngẽguma namaã cunucüraü̃gu i cuacü rü tãũü̃táma marü cumaã nidea. Rü cuacügümaã yana naĩnü rü guü̃gutama nawe na nüü̃ cungetchaü̃ü̃. — Mateu 3:17 rü 1 Corĩ́tiucü̃ãꞌ 8:1.

TAꞌACÜ TÁ CUÜÜ̃:

• Aicuma nüü̃ rü naĩnü i cuacügü ngẽguma cumaã yadeagütchaü̃gu.

• Guü̃guma cuacümaã idea rü taũü̃táma ngẽguma gutchaü̃gü naügüguricaꞌ.

TUPANAARÜ ORE RÜ NHANAGÜRÜ: “Ngẽma duü̃ü̃ i naãẽü̃ cuáü̃ rü mea nagu narüĩnü i ngẽma naüü̃.” (Provérbios 13:16) Nhuguãcü̃ rü name na cuacü arü dea cuĩnüü̃ na nüü̃ cucuaꞌü̃caꞌ na nhuãü̃gü yiĩü̃ ínarüĩnüü̃ i norü aiepewa. Ngetüü̃güü̃ rü paeü̃ rü aitchima nanaugü tá norü deawa rü eꞌna ngẽma namaã yadeaatchigüü̃ rü tamatchire ngẽma norü aiepewa ngẽmaü̃ niĩ. “Tama taãẽü̃ tacuaꞌ, rü wüi i ãne niĩ ega yatacüma tüü̃ itchoü̃gagu ya wüi ya duü̃e naü̃pa na nüü̃ iĩnüü̃ i tümaarü dea.” (Provérbios 18:13) Rü ngẽmacaꞌ yana peĩnüemare ngẽguma peacügü peetü i deagu. — Provérbios 19:11.

TAꞌACÜ TÁ CUÜÜ̃:

• Rü yana ĩnüãcüma nüü̃ naĩnü i peacügü arü dea rü nüetama yadeagu rü tãũü̃táma penuẽ.

• Rü nüna nacuaꞌãtchi yeguma cuna arü taunecüãraü̃gu i cuacü. Nanhunhaü̃ curü ĩnü ga yeguma? Rü taꞌacü niĩ cucaꞌ rümemaẽü̃?

TUPANAARÜ ORE RÜ NHANAGÜRÜ: “Pa tchaune naga naĩnü i nhaa cunatüarü ucuꞌẽ! Rü taṹ i nüü̃ cuoü̃ i ngẽma cué namaã cuü̃ nguꞌẽẽü̃!” (Provérbios 1:8) Yeuwa rü papagüü̃ rü mamagüü̃ namu na naacügümaã inacuaꞌgüü̃caꞌ. Rü ngẽmacaꞌ nhure ya mamagü rü papagü rü name na tümaacüü̃ tanguꞌẽẽgü na tama tümagu yadaucüraü̃güü̃ rü tümaga naĩnüẽcaꞌ. (Epéchiucü̃ãꞌ 6:1-3) Buü̃gü nüü̃ nacuaꞌgü tá ngẽguma papagü rü mamagü tama nawüigu arü ĩnüãgu. (1 Corĩ́tiucü̃ãꞌ 1:10) Ngẽguma tama ípewüigu arü ĩnüãgu rü taũ peacügüpeꞌewa pideagü erü nümagü rü tá pegu nidaucüraü̃gü.

TAꞌACÜ TÁ CUÜÜ̃:

• Natchiga pideagü na nhuãcü tá peacügüü̃ ucuꞌẽgümaã peweãtchiẽẽgüü̃.

• Cugü naporaẽẽ na nüü̃ cucuaꞌü̃caꞌ i cumücü arü ĩnü ngẽguma cuma rü cumücümaã tama pewüigu arü ĩnüãgu na nhuãcü tá penanguꞌẽẽ i peacügü.

TUPANAARÜ ORE RÜ NHANAGÜRÜ: “Nabugutama, meü̃ i ucuꞌẽmaã naucuꞌẽ i curü buü̃.” (Provérbios 22:6) Poraãcü nameẽtchi na peacügüü̃ pengúꞌeẽẽ. Meã nagu perüĩnüẽ na nhuãcü tá peacügümaã meã pecuaꞌgüü̃ rü ta nhuãcü tá ucuꞌẽgümaã penaweãtchiẽẽgüü̃. (Salmo 127:4 rü Provérbios 29:17) Ngẽguma peacügüü̃ peucuꞌẽgu rü taũtama nüü̃ peüaꞌmare, notürü tawi nüü̃ perüngü̃ẽẽ na nüü̃ nacuaꞌgüü̃caꞌ i ngẽma mugü. (Provérbios 28:7) Peacügü nacaꞌ pengúꞌeẽẽ i Tupanaarü Ore na nüü̃ nangetchaü̃güü̃caꞌ rü aicuma nüü̃ nacuaꞌgüü̃caꞌ i Tupanaarü ucuꞌẽgü. (Salmo 1:2) Rü ngẽma rü tá nüü̃ narüngü̃ẽẽ na naãẽü̃ nacuaꞌgüü̃caꞌ rü nüü̃ nacuaꞌgüü̃caꞌ tá na ngeü̃rüü̃ yiĩü̃ i ngẽma taꞌacü i meü̃ rü taꞌacü i tchieü̃. — Ebréugü 5:14.

TAꞌACÜ TÁ CUÜÜ̃:

• Peacügü perüngü̃ẽẽgü na aicuma Yeuwamücügü yiĩgüü̃caꞌ.

• Peacügüü̃ perüngü̃ẽẽgü na nüü̃ nacuaꞌgüü̃caꞌ na nhuãcü tá guü̃ma i tchieü̃güwa nügü ínapoü̃güü̃. Cuaꞌãtchiruü̃: Internetwa rü nangẽma i tchieü̃gü rü natanüwa i ngẽma nügümaã ídeagüü̃. Peacügügüü̃ pengúꞌeẽgü na nüü̃ nacuaꞌgüü̃caꞌ na nhuãcü tá nügü ínapoü̃güü̃ ngẽguma duü̃ü̃ nagu yadaugütchaü̃gu.