NATCHIPEE 4
Nhuãcü tá Meã Namaã Cucuaꞌü̃ i Curü Dĩẽru
“Ngẽguma taꞌacü cuütchaü̃gu, rü name i togüena ucuꞌẽcaꞌ cuca, na meã ínanguutchiü̃caꞌ i ngẽma nagu curü ĩnüü̃.” — Provérbios 20:18
Yiema rü tanawaꞌegü i dĩẽru na tapatacü̃ãna idaugüü̃caꞌ. (Provérbios 30:8) Dĩẽru rü ngẽmaãcü tüü̃ narüngü̃ẽẽ. (Eclesiastes 7:12) Beꞌmana nagutcha na cumücümaã dĩẽrutchigagu quidea, notürü taũ dĩẽrucaꞌ pegü peüagü. (Epéchiucü̃ãꞌ 4:32) Pegügu peyaõgü tüü̃ penayau na taꞌacü tá dĩẽrumaã ne petae.
1 MEÃ NAGU RÜĨNÜ NA NHUÃCÜ TÁ DĨẼRUMAÃ CUCUAꞌÜ̃
TUPANAARÜ ORE RÜ NHANAGÜRÜ: “Rü ngẽguma tchi wüie i petanüwa rü wüi ya ĩpata ya taü̃ne taütchaü̃gu, rü tama eꞌna i nori i tanangugüiraü̃ na nhure i dĩẽru ta nagu ngĩü̃ ítataü̃? Rü ngẽmawa nüü̃ tacuaꞌ rü marü tüü̃ iyangu i ngẽma tümaãrü dĩẽru i tüü̃ ngẽmacü na tayanguꞌẽẽü̃caꞌ ya yima ĩ.” (Luca 14:28) Poraãcü nameẽtchi na cuma rü cumücü pegümaã pideagü na wüigu meã nagu perüĩnüẽü̃caꞌ na nhuãcü tá dĩẽrumaã pecuaꞌü̃. (Amós 3:3) Rü cuma rü cumücü pegümaã pideagü na taꞌacücaꞌ ta petaegüü̃ rü nhure tá ngẽmaãgügu tüü̃ ípetae ya perü dĩẽru. (Provérbios 31:16) Woo ngẽguma peü̃́ tangemagu ya dĩẽru tãũü̃táma tüü̃ pegueü̃tchi. Tãũü̃táma ngeta penangetanü. Yíema dĩẽru peü̃́ ngẽmaẽmarica petaegü. — Provérbios 21:5; 22:7.
TAꞌACÜ TÁ CUÜÜ̃:
-
Ngẽguma tauwemacüarügugu peü̃́ ítayaügu ya perü dĩẽru, pegümaã pideagü na taꞌacü tá tümamaã peügüü̃.
-
Ngẽguma tagugu ya perü dĩẽru, meã nagu perü ĩnüẽ na nhuãcü tá pegümaã penameẽẽü̃ na wenagu peü̃ itaüü̃raü̃caꞌ perü ya dĩẽru. Cuaꞌãtchiruü̃, tama name na õna ímemareü̃gu tüü̃ cuguẽü̃ ya perü dĩẽru. Narümemaẽ na cupatawatama cuüwemüü̃.
2 GUÜ̃GUMA I AICUMAÜ̃ RÜ NAÜ
TUPANAARÜ ORE RÜ NHANAGÜRÜ: “Erü tama Tupanapeꞌewaicatama tanawaꞌe na meã tanaüü̃, notürü guü̃ i duü̃ü̃güpeꞌewa rü ta tanawaꞌe na meã tanaüü̃.” (2 Corĩ́tiucü̃ãꞌ 8:21) Guü̃gutama cumücümaã quiaicumaü̃ na nhure tiĩ ya dĩẽru cuü̃́ ngẽmaẽ rü nhure tiĩ ya marü tümamaã cutaee.
Naü̃pa na taꞌacücaꞌ cutaeꞌü̃ cuteꞌmaã urü cumaꞌmaã idea rü guũguma nüna nacaꞌ na taꞌacügu naĩnü natchiga na taꞌacü tá penawaꞌe pegüü̃́ ne petaeꞌgüü̃. (Provérbios 13:10) Ngẽguma meã pegümaã pideagügu dĩẽrutchigagu rü peü̃ tá narüngü̃ẽẽ na meã pegümaã pemaeü̃. Ngẽguma tüü̃ cuyaugu ya curü dĩẽru tãũü̃tama na nagu curüĩnü na curü ícatama tiĩü̃, notürü nagu ruĩnü rü perü tiĩü̃ ya yiema dĩẽru. — 1 Timúteu 5:8.
TAꞌACÜ TÁ CUÜÜ̃:
-
Narümemaẽ niĩ naü̃pa pegümaã pideagü na nhuretchigü i ngẽmaü̃caꞌ petaegüü̃ i tümamaã perü dĩẽru.
-
Rü name niĩ pegümaã pideagü i dĩẽrutchigagu na nhuãcü tá tümamaã pecuaꞌü̃ rü tãũü̃táma ngẽguma gutchaü̃gü ngupetüguama.
