Cuma rü cumücü rü cuacügü penawaꞌe na petaãẽẽtchagüü̃ notürü gutchaü̃ i ngupetüü̃ rü nayaguẽẽ i ngẽma taãẽ. (Eclesiastes 9:11) Notürü Tupana rü tüü̃ narüngü̃ẽẽ i ngetchaü̃ãcü ngeguma gutchaü̃gü tüü̃́ ngẽmagu. Pema rü nüü̃ pecuaꞌ tá na penameẽẽ i ngeü̃rüü̃mare i gutchaü̃gü ngẽguma tá penaügu i nhaa ucuꞌẽgü i Tupanaarü iígüü̃.

TUPANAARÜ ORE RÜ NHANAGÜRÜ: “Rü name niĩ i Tupanameꞌẽgu penaü i guü̃ma i perü oegaãẽgü, erü nüma ya Tupana rü guü̃guma pegu narüĩnü rü aicuma pena nadau.” (1 Pedru 5:7) Nüna nacuaꞌãtchi na “Tupana rü taguma nagu narüĩnü na tchieü̃ naüü̃ rü taúenama naĩnü na tchieü̃ taüü̃caꞌ”. (Tiagu 1:13) Ngẽguma Yeuwana cungaicamagu rü guü̃gutama cuü̃ narüngü̃ẽẽ. (Isaías 41:10) “Rü taṹ nüü̃ pemuü̃ẽü̃ na perü yumüẽwa namaã nüü̃ piuü̃ i perü gutchaü̃gü.” — Salmo 62:8.

Wüitchigü i nguneü̃gu nawa naugütae rü meãma nacaꞌ nanguꞌ i Tupanaarü Ore. Ngẽma rü cuü̃ nataãẽẽẽ tá. Ngẽmaãcü tá nüü̃ cucuaꞌ na nüma ya Yeuwa “rü toü̃ nataãẽẽẽ i ngẽguma ngúꞌü̃ tingegu”. (2 Corĩtiucü̃ãꞌ 1:3, 4 rü Romacü̃ãꞌ 15:4) Nüma rü nüü̃ nauneta na ‘ngẽma taãẽ i Tupana cuna ãü̃ rü tá nüna cuü̃ ínapoü̃ i ngẽma tchieü̃ i nagu curüĩnüetchaü̃’. — Piripucü̃ãꞌ 4:6, 7, 13.

TAꞌACÜ TÁ CUÜ̃Ü̃:

• Nayumüẽ rü Yeuwana nacaꞌ ínacaꞌ na tama cuoegaãẽü̃caꞌ rü meü̃gu curüĩnüü̃caꞌ.

• Ngẽmawena nangugü na taꞌacü tá cuüü̃ rü ngeü̃rüü̃ niĩ rümemaẽü̃ na cunameẽẽü̃caꞌ i curü gutchaü̃.

TUPANAARÜ ORE RÜ NHANAGÜRÜ: “Ngẽma duü̃ü̃gü i cuaꞌ nüü̃́ ngẽmagüü̃, rü ngẽma naãẽü̃ icuáꞌü̃, rü nüü̃ inayangaugü i ngẽma cuaꞌ i nacaꞌ nadaugüü̃.” (Provérbios 18:15) Cugü naporaẽẽ na nüü̃ cucuaꞌü̃ i ngẽma íngupetüü̃. Nacaꞌ nadau na nüü̃ cucuaꞌü̃caꞌ i ngẽma nanawaꞌeü̃ i cumücü rü cuacügü. Namaã ideꞌagü rü nüü̃ perüĩnüẽ. — Provérbios 20:5.

Taꞌacü tá cuüü̃ ngeguma wüi duü̃ü̃ i nüü̃ cungetchaü̃ü̃ nayugu? Taũ i cuãneü̃ na cunaweꞌü̃ i curü ngetchaü̃ rü cuau. Nüna nacuaꞌãtchi na Ngetchutchu rü naau yeguma namücü nayugu. (Juã́ũ 11:35 rü Eclesiastes 3:4) Name na meã curüngüü̃ rü meã cupeü̃. (Eclesiastes 4:6) Ngẽmagü rü cuü̃ narüngü̃ẽẽ tá na cunameẽẽ i ngeü̃rüü̃mare i gutchaü̃gü.

TAꞌACÜ TÁ CUÜÜ̃:

• Guü̃gutama cumücümaã rü cuacügümaã idea, ngẽmacaꞌ ngẽguma tchieü̃ ngupetügu rü natautcha tá na cumaã yadeagüü̃.

• Namaã i dea i togü i duü̃ü̃gü i ngẽmatama gutchaü̃wa üpetügüü̃.

TUPANAARÜ ORE RÜ NHANAGÜRÜ: “Ngẽma aicuma tamücü iĩü̃, rü guü̃guma tüü̃ nangetchaü̃, rü ngẽguma gutchaü̃ tacaꞌ íngugu, rü nhoma wüi i taeneẽü̃tchirüü̃ niĩ.” (Provérbios 17:17) Rü cumücügü rü cuü̃ narüngü̃ẽẽgütchaü̃, notürü beꞌmana tama nüü̃ nacuaꞌgü na nhuãcü tá cuü̃ narüngü̃ẽẽgüü̃. Ngemacaꞌ cumücügümaã nüü̃ iu na taꞌacü niĩ cunawaꞌe. (Provérbios 12:25) Norü ngü̃ẽẽcaꞌ nadau i duü̃ü̃gü i meã Tupanaarü Oreü̃ cuaꞌgüü̃. Nümagü rü cuü̃ nanaweꞌgü tá i Tupanaarü ucuꞌẽgü rü cuü̃ narüngü̃ẽẽgü tá.—Tiagu 5:14.

Cugü curüngü̃ẽẽ ngeguma naü̃tawa cungẽmagu i duü̃ü̃gü i Tupanaü̃́ yaõgüü̃ rü nagu yaõ. Rü ta cugütama curüngü̃ẽẽ ngẽguma tüü̃ curüngü̃ẽẽgu ya duẽẽgü yanawaꞌegüe i taãẽ. Tümamaã nangau i curü õ nagu ya Yeuwa rü nagu i norü unetagü. Ãũrima togü rüngü̃ẽẽ rü taũ tüna curümagu rica rüãũ rü duẽẽgü ya cuü̃ ngetchaü̃güe rü tawaꞌegüe na cumeü̃. — Provérbios 18:1 rü 1 Corĩ́tiucü̃ãꞌ 15:58.

TAꞌACÜ TÁ CUÜÜ̃:

• Cumücü i aicumaü̃maã idea na cuü̃ narüngü̃ẽẽü̃caꞌ.

• Cumücümaã nüü̃ iu i ngẽma aicuma cunawaꞌe.