Yeuwa * rü nanaügü nüíracü ga yatü ga Adaũ rü tüü̃ naü ta ga tüíra iꞌĩẽẽ ga ngeꞌe ga Ewa, guema erü Adaũü̃tawa tüü̃ naga Yeuwa na nayangĩgüẽẽ. Nüma ga Adaũ nataãẽü̃tchi nhanagürü: “Nhaa nge rü tchautchinaꞌãtama rü tchamatchitama ngĩcaꞌ iyiĩ.” (Gênesis 2:22, 23) Yeuwa ta nanawaꞌe pa ãmaü̃ rü ãteü̃ na cumücümaã cutaãẽ.

Yeguma cuingĩgü, beꞌmana cucaꞌ rü tautchima nayema i gutchaü̃gü. Notürü woo yatüü̃ rü ngeꞌeü̃ i nügü ngetchaü̃güü̃ rü nangẽma tá i norü gutchaü̃gü. (1 Corĩ́tiucü̃ãꞌ 7:28) Nhaa popera rü nawa nangẽma i ucuꞌẽgü i Tupanaarü Orewa yaugüü̃ i cumücüü̃ rüngü̃ẽẽ tá rü i cupatacü̃ãꞌ. — Salmos 19:8-11.

TUPANAARÜ ORE RÜ NHANAGÜRÜ: “Erü nüma ya yatü rü namaꞌẽru niĩ.” — Epéchiucü̃ãꞌ 5:23.

Cuma pa yatücü, cumaꞌna nadau. Ngẽma niĩ Yeuwa nanawaꞌe. (1 Pedru 3:7) Nüma niĩ ngeꞌe tüü̃ naüü̃ na cumücüruü̃ tiĩü̃caꞌ rü cuü̃ tarüngü̃ꞌẽẽü̃caꞌ rü Tupana nanawaꞌe na meã tüü̃ cungetchaü̃ ya cumaꞌ. (Gênesis 2:18) Ngẽma na ãũrima cumaꞌü̃ cungetchaü̃ü̃ rü tümaarü ngútchaü̃íra naü tá, wiweama naüẽẽ i curü ngútchaü̃. — Epéchiucü̃ãꞌ 5:25-29.

Cuma pa ngecü, taũ nagu quidauꞌcüraü̃ü̃ ya cute. Erü ngẽma rü Yeuwa tama nanawaꞌe. Rü nüü̃ rüngü̃ꞌẽẽ na cumaã nacuaꞌü̃. (1  Corĩ́tiucü̃ãꞌ 11:3 rü Epéchiucü̃ãꞌ 5:33) Cutega naĩnü rü aicuma nüü̃ rüngü̃ẽẽ. (Corochacü̃ãꞌ 3:18) Ngẽguma tá cuma ngẽma cuügü, cute rü yeera tá cuü̃ nangetchaü̃ rü nagagu i taꞌacü cuüü̃ rü Tupanapeꞌewa cumeẽtchi tá. — 1 Pedru 3:1-6.

TAꞌACÜ TÁ CUÜÜ̃:

• Cuma cumücüna nacaꞌ na nhuãcü tá yatü i meü̃ quiĩü̃ rüeꞌna ngecü i meü̃ quiĩü̃. Rü meã rüĩnü ngẽguma cumücü cumaã ideagu rü naü i ngẽma ucuꞌẽgü cumaã yauu.

• Yana naĩnü. Erü pema tãũü̃táma paꞌa nüü̃ pecuaꞌü̃ na nhuãcü tá pegü petaãẽẽẽ.

TUPANAARÜ ORE RÜ NHANAGÜRÜ: Nacaꞌ ínauãẽ i taꞌacü cumücü nagu rüĩnü rü nanawaꞌe. (Piripucü̃ãꞌ 2:3, 4) Meã nüna nadau i cumücü, nüna nacuaꞌãtchi na Yeuwa rü nanawaꞌeü̃ na guü̃ma i norü duü̃ü̃gü rü ‘guü̃ma i duü̃ü̃gümaã namecümagüü̃’. (2 Timúteu 2:24) “Rü nangema i duü̃ü̃ i norü deamaã tüü̃ tchieẽẽü̃, notürü ngẽma duü̃ü̃ i aicuma nüü̃ cuáꞌü̃ rü norü deamaã tüü̃ nataãẽẽẽ.” Ngẽmacaꞌ meã nagu curüĩnü i curü deagü. (Provérbios 12:18) Tupanaãẽ üüneü̃ rü cuü̃ ta narüngü̃ꞌẽẽ namecümaãcü rü ngetchaü̃ãcüma quideaü̃. — Gárataanecü̃ãꞌ 5:22, 23 rü Corochacü̃ãꞌ 4:6.

TAꞌACÜ TÁ CUÜÜ̃:

• Naũpa na pegümaã pideagüü̃ i taꞌacütchiga peü nameẽtchima niĩ, yumüẽ rü Tupana naca icaꞌãü̃ na yana naꞌĩnüü̃caꞌ nüü̃ cucuaꞌü̃caꞌ na taꞌacü cumücü narü ĩnüẽ.

• Meã nagu rüĩnü rü taꞌacü tá quiuü̃ rü nhuã tá quiuü̃.

TUPANAARÜ ORE RÜ NHANAGÜRÜ: Naü̃pa na ipingĩgüü̃, pema rü tare duü̃ü̃gü peiĩgü, notürü marü pingĩgügu rü ‘wüitama duü̃ü̃rüü̃ peiĩgü’. (Mateu 19:5) Ngẽmaẽtüwa pema rü tama pewüigu, perü ĩnüwa rü penatoraꞌü̃. Ngẽmacaꞌ name niĩ nüü̃ pecuaꞌü̃ na wüigu perüĩnüẽ. (Piripucü̃ãꞌ 2:2) Nameẽtchi na wüigu perüĩnüẽü̃ ngẽguma taꞌacü peügütchaü̃gu. Rü Tupanaarü Ore rü nhanagürü: “Ngẽguma taꞌacü cuütchaü̃gu, rü name i toguena ucuꞌẽcaꞌ cuca, na meã ínanguutchiü̃caꞌ i ngẽma nagu curü ĩnüü̃.” (Provérbios 20:18) Ngẽguma taꞌacü i meü̃ peügutchaü̃gu Tupanaarü Orearü ucuꞌẽgücaꞌ pedaugü. — Provérbios 8:32, 33.

TAꞌACÜ TÁ CUÜÜ̃:

• Cumücümaã nüü̃ iu i ngẽma curü maü̃newa nagu curüĩnüü̃, tãũü̃táma namaã nüü̃ quiuü̃ i ngẽma wüitchigü i nguneü̃gu ngupetüü̃rica.

• Cumücümaã ideaíra naü̃pa na taꞌacü cuüü̃.