NATCHIPEE 9
Wüigu Yeuwaü̃ Picuaꞌüüü̃gü
“Rü nüü̃ picuaꞌüüü̃gü ya yima naücü i daũguü̃ i naãne rü nhama i naãne!” — Apocaríchiu 14:7
Cuma marü nüü̃ cucuaꞌ na nhaa poperawa rü na muü̃ma i Tupanaarü Orearü ucuꞌẽgü i cuü̃ rü cumücüü̃ rü cuacügüü̃ narüngü̃ẽẽ tá. Erücü Yeuwa rü nanawaꞌe na cutaãẽ. Rü nüma rü tamaã nanauegu na ngẽguma tá nüü̃ íra quicuaꞌüüü̃gu rü ‘naẽ́tü tá cuna nanaã i guü̃ma i taꞌacü i cuü̃́ tauü̃’. (Mateu 6:33) Tupana rü nanawaꞌe na ãũrima namücü quiĩü̃. Ngẽmacaꞌ cugü naporaẽẽ na Yeuwamücü quiĩü̃caꞌ. Erü nameẽtchima na Yeuwamücü quiĩü̃. — Mateu 22:37, 38.
1 CUGÜ NAPORAẼẼ YA YEUWAMÜCÜ QUIĨÜ̃
TUPANAARÜ ORE RÜ NHANAGÜRÜ: “Rü tchama rü Penatü tá tchiĩ, rü pemagü rü tá tchauacügü peiĩgü, nhanagürü ya torü Cori ya Tupana.” (2 Corĩ́tiucü̃ãꞌ 6:18) Tupana rü nanawaꞌe na namücüü̃tchi quiĩü̃. Ngemacaꞌ name niĩ cuyumüẽ. Erü Yeuwa nhanagürü: ‘Guü̃guma nayumüẽ.’ (1 Techarónicacü̃ãꞌ 5:17) Rü Yeuwa rü nüü̃ nacuaꞌtchaü̃ i curü oegaãẽgü rü ngẽma aicumaü̃tchi nagu curüĩnüü̃. (Piripucü̃ãꞌ 4:6) Ngẽguma wüigu namaã cuyumüẽgu i cumücü rü cuacügü rü nüü̃ nacuaꞌgü tá na cuma rü ãũrima Yeuwamücü quiĩü̃.
Name na Tupanaü̃ cuĩnüü̃ rü tama yumüẽrica cuüü̃. Nhuãcü tá Tupanaü̃ cuĩnüü̃? Ngẽguma meã norü orecaꞌ cunguꞌgu rü ngẽma poperagü i natchiga ideagüwa. (Salmo 1:1, 2) Ngẽguma meã nagu curü ĩnügu i ngẽma nüü̃ cucuaꞌü̃. (Salmo 77:11, 12) Rü nhuꞌmatchi ngẽguma guü̃gutama ngutaqueꞌegüwa cuũgu. — Salmo 122:1-4.
Na Yeuwamaã cuãmücüü̃ rü yeera tá napora ngẽguma togümaã natchiga quiugu. Ngẽguma guü̃gutama ngẽma cuügu rü yeera tá Yeuwana cungaicama. — Mateu 28:19, 20.
TAꞌACÜ TÁ CUÜÜ̃:
-
Wüi nguneü̃ ínaüütchi na Tupanaarü Orewa cuugütaeü̃caꞌ rü nayumüẽ.
-
Nüiratchi cupatacü̃ãꞌmaã Yeuwaü̃ icuaꞌüüü̃. Wiwena naüẽẽ i iãwaegü rü toomatchigü i taꞌacü i peüü̃ i peü̃́ meü̃.
2 GUÜ̃GUTAMA MEÃ CUPATACÜ̃ÃꞌMAÃ YEUWAÜ̃ ICUAꞌÜÜÜ̃
TUPANAARÜ ORE RÜ NHANAGÜRÜ: “Tupanana pengaicamagü! Rü nüma rü tá ta pena nangaicama.” (Tiagu 4:8) Name niĩ wüi nguneü̃ icuüütchi na wüigu cupatacü̃ãꞌmaã Yeuwaü̃ quicuaꞌüüü̃caꞌ rü yanguẽẽ i ngẽma uenü. (Gênesis 18:19) Notürü name na Tupanacaꞌ cumaü̃ü̃ guü̃ i nguneü̃gu. Cupatacü̃ãꞌ rü aũritama Yeuwamücü niĩgü ngẽguma tá cuma natchigagu namaã quideagu ‘pepatawa rü ngeté ípeĩü̃wa, rü ngẽguma pepeetchaü̃gu rü ngẽguma íperüdagügu’. (Deuteronômio 6:6, 7) Yutchuérüü̃ cugü naporaẽẽ. Nüma rü nhanagürü: “Notürü i tchama, rü tchauacügü rü Cori ya Tupanawe tá niĩ i tarüĩü̃.” — Josué 24:15.
TAꞌACÜ TÁ CUÜÜ̃:
-
Nagu rüĩnü na taꞌacü niĩ aicumaü̃tchima nanawaꞌeü̃ i wüitchigü i cupatacü̃ãꞌ. Poperagu nawü na nhuãcü tá wüitchigü i cupatacü̃ã curüngü̃ẽẽ.
