Rü nümaü̃gü i Dutúrugü rü tüü̃ narüngü̃ẽẽ ya duü̃ü̃gü ya tümaãẽwa i daꞌawegüe nüü̃ niugü na nangẽmaü̃ nagúü̃raü̃ü̃ i nacüma na duü̃ü̃gü nanaweꞌü̃ na ngúü̃ iyangeü̃ rü ngẽma nhuãcü norü papa rü mama nayaẽẽü̃ãcü tá naãcüma rü ngẽma na nhuãcü gutchaü̃gümaã inacuaꞌü̃ãcü tá niĩ. Ngẽmacaꞌ nangema i duü̃ü̃gü rü ngẽma ngúü̃maã auü̃ rü nümaü̃gü na irarüwamare nauü̃ rü togü na tama naaueü̃ notürü guü̃ma nioẽgü.

Ngẽguma nayugu i wüi duü̃ü̃ ingetchaü̃güü̃, aiꞌruguma tüü̃ nangẽma ngẽma ĩnügü rü gutchaü̃gü. Nüü̃ nadau i nümaü̃gü cuaꞌruü̃gü:

Tama i norü ĩnügümaã inacuaꞌ. Ngẽmacaꞌ i duü̃ü̃ poraãcü nacaꞌ nangetchaü̃ rü naau rü namaã naãnegü rü nhuguãcü nataãẽ rü to poraãcü naĩꞌãtchiãẽ. Nüü̃ nadau i Tinaarü cuaꞌruü̃, ngẽguma ngürüãtchi tümaté nayugu, ngĩgürügü: “Tchama tama nagu tchayaõü̃ taꞌacü namaã nangupetüü̃ rü tama tchaau rü tchaĩꞌãtchiãẽ na tchaucaꞌ nagutcha tchingü̃ãcüü.”

Īꞌãtchiãẽ rü nu’ rü cugagu niĩü̃ma. Ivan nhanagürü: “Yeguma tone nayugu rü nüü̃́ nayema ga 24 taunecü rü tchama rü tchamaꞌ togümaã tanue rü ta nagu tarüĩnüe na togagu niĩ, erü tanawaꞌegü yeeraãcü na toneü̃ tarüngü̃ẽẽgüü̃ i norü yuü̃pa.” Alejandro rü ta nagu narüĩnüü̃ na nagagu niĩ yeguma tümamaꞌ tayugu rü wüi daꞌawegagu. Alejandro nhanagürü: “Rü nori naügügu ga nagu tcharüĩnüü̃ na Tupana tchoü̃ nanapocuü̃ yerü tchama wüi duü̃ü̃ tchieü̃cü niĩ. Notürü tchama yemamaã tchangetchaü̃ yerü nagu tcharüĩnüü̃ na Tupanagagu niĩ taꞌacü tchamaꞌmaã nangupetüü̃. Rü Kostas na marü nüü̃ tiuü̃ ga natchiga rü nhanagürü: Nhureeꞌpüꞌcüna rü Sophiamaã tchanuü̃ rü tayugagu rü yemamaã tchangetchaü̃ erü tama tagagu niĩ.”

Naãẽwa nügü ínatüẽẽ. Cuaꞌãtchiruü̃ bemana i duü̃ü̃ nagu narüĩnü na tüü̃ nadauü̃ i yíema yue rüeꞌna tüü̃ naĩnügaü̃. Rü nhuguãcü nacaꞌ nagutcha meãma inarüĩnü ngẽguma togü duü̃ü̃gü namaã ideagu rü ngemaü̃güna nacuaꞌãtchiü̃. Rü Tina ngĩgürügü: “Nhuguãcü tchama tama meã itcharüĩnü yeguma wüi duü̃ü̃ tchamaã nideagu yerü nagu tcharüĩnü taꞌacü nanangupetüü̃ yeguma Timo nayugu rü yemagagu poraãcü tchanaĩꞌãtchiãẽ.”

Nüü̃ nangútchaü̃ nüicatama narüãũ. Ngẽguma wüi duü̃ü̃ nangetchaü̃gu erü wüi duü̃ü̃ nüü̃ nangetchaü̃ü̃ nayu, bemana nanu rü nacaꞌ nagutcha i duü̃ü̃gütanüwa nangẽmaü̃. Rü Kostas nhanagürü: “Tchaucaꞌ nagutcha tchamücügüü̃tawa tchayemaü̃ ingĩgüü̃ rü ta namaã tchamücügü na taũta ingĩgüü̃.” Rü Ivan tümamaꞌ ya Yolanda ngĩgürügü: “Rü tocaꞌ nagutchaü̃tchi yeguma nüü̃ taĩnügu ga togü tchiri nideagü i maü̃tchiga rü norü gutchaü̃gagu, erü tocaꞌ ga tórü gutchaü̃gü rü norü yeera niĩ, rüeꞌna yeguma ga papagü rü mamagü tomaã nideagügu na naacügümaã nataãẽgüü̃ rü woo nacaꞌ tataãẽgü, notürü yema tocaꞌ nagutchaü̃tchi ga tone ya nayuü̃caꞌ.”

Daꞌawegü. Nümaü̃gü i duü̃ü̃gü i ĩꞌãtchiãẽgagu tama nanawaꞌe natchibü rüeꞌna nanawaꞌeü̃tchi natchibü rü togü meã tama napee, rü cuaꞌãtchiruü̃ ya Aaron nüna nacuaꞌãtchi na norü papa yuguwena rü wüi taunecüyane nacaꞌ nagutchaü̃tchi nape yerü guü̃ma ga tchütacü ga norü papaarü yuna nacuaꞌtchiü̃.

 Rü Alejandro nidaꞌaweü̃ rü nacaꞌ nadau ga wüi duturu rü nhanagürü: “Rü meãma tchoü̃ nangugü rü tchaucaꞌ naca na tchanaüü̃caꞌ nagúü̃raü̃ü̃ i examegü, notürü tama nüü̃ nayangau i daꞌawegü, nhuꞌmatchi nagu tcharüĩnü na tchidaꞌaweü̃ erü ãũrima tchangetchaü̃ i tchamaꞌarü yugagu.” Nhuꞌmatchi ngẽguma wüi duü̃ü̃ poraãcü ngúü̃ ningegu i teéarü yugagu rü nhuguãcü naturaü̃ne rü nidaꞌawegü rü ngẽmacaꞌ name na nacaꞌ nadau i duturu.

Nacaꞌ nagutcha naü i ngẽmaü̃gü. Rü Ivan nhanagürü: “Nayuwena ya Eric, rü taturaü̃ne rü tanaĩꞌãtchiãẽ rü yemacaꞌ ga tacaꞌ nagutchaü̃tchi rü togümaã nüü̃ tiugü na nayuü̃ rü tinue ga norü ngẽmaü̃gü.”

Nümaü̃gü i duü̃ü̃gücaꞌ nagutchaü̃tchi i nguneü̃gü i wipeꞌewa erü nanawaꞌegü naü nümaü̃gü i ngẽmaü̃gü naü̃pa i duü̃ü̃ na nayuü̃ naüü̃. Rü ngẽma ga Tinamaã nangupetüü̃, rü ngĩgürügü: “Tchauté ya Timo namaã inacuaꞌü̃ i tórü dĩẽru, rü nayuwena tchama tchanawaꞌeü̃ namaã itchacuaꞌü̃ i dĩẽru, rü yemagagu yeera tchanaĩꞌãtchiãẽü̃.”

Nhuꞌmatchi ngẽma gutchaü̃gügagu tacaꞌ nagutchaü̃tchi tanangupetüẽẽ i ngẽma ngúü̃ na tüü̃ nangẽmaü̃ ega nayugu wüi duü̃ü̃ nüü̃ tangetchaü̃gü. Notürü bai guü̃ma i duü̃ü̃gü nangẽma tá i ngẽma gutchaü̃gü na nüü̃ tiugüü̃ ngẽma artchiguwa. Notürü nüü̃ nacuaꞌ na aiꞌrüguma i duü̃ü̃güü̃ nangẽmaü̃ i ngẽma gutchaü̃gü ega nayugu wüi duü̃ü̃ nüü̃ nangetchaü̃ü̃ rü ngẽma tüü̃ nataãẽẽẽü̃.

Taꞌacü tá nangupetüü̃?: Ngẽma ngúü̃ rü ngetchaü̃ tá narüoü̃, notürü ngẽma tama nüü̃ niutchaü̃ na nüü̃ curüngüma tá i duü̃ü̃ yuü̃, erü nhuguãcü cuma tá nüna cucuaꞌãtchi rü ngẽmagagu tá cungetchaü̃. Muü̃ma i duü̃ü̃gü rü natanüü̃arü rü namücügüarü ngü̃ẽẽmaã rü togü i ngẽmaü̃gü írarüwatchigü i ngẽma ngúü̃ü̃ narüporamae rü wenaarü nanaügüü̃ i ngẽmaü̃gü nüü̃ namegütchire ga naügü.

Notürü nhure i nguneü̃gügu na poraãcü ngúü̃ ningegü? Nümaü̃gü i duü̃ü̃gü poraãcü ngúü̃ ningegü i nümaü̃gü i tawemacüyane rü nayuguwena ga duü̃ü̃ nüü̃ nangetchaü̃ü̃ rü ngẽmawena írarüwatchigü i ngẽma ngúü̃ü̃ narüporamae. Notürü muü̃ma i duü̃ü̃gü poraãcü ngúü̃ ningegü i nümaü̃ i taunecügu. a Rü cuaꞌãtchiruü̃ Alejandro nhanagürü: “Tchama poraãcü ga ngúü̃ tchingeü̃ rü tamaepüꞌ ga taunecüyane.”

Nacaꞌ cudau meãma nüü̃ cucuaꞌ rü nacüma na cunangupetüẽẽ i ngẽma ngúü̃ rü cugümaã cumecüma, rü ngẽmana cucuaꞌãtchi na ngẽma ngúü̃ nayaguü̃ tá. Notürü taꞌacü tá cuü̃ narüngü̃ẽẽ na nüü̃ curüporamaẽü̃caꞌ i ngẽma ngúü̃?