Ngẽguma wüi duü̃ü̃ü̃ cucuaꞌtchaü̃gu, aiꞌrügumaraü̃ nüna ícuca i nhaü̃: “Taꞌacü niĩ i cuéga?” Notürü tchi cuma rü Tupanana ícucagu i ngẽma, taꞌacü nüma rü nanangãü̃tchi?

“Rü choma nixĩ ya Tupana [ya Yeuwa] i Guxãétüwa Changexmaxü̃, rü ngẽma nixĩ i chauéga.” — Isaías 42:8.

Nacaꞌ narümemaẽ niĩ. Taúema nüna naã i naéga. Yeuwatama nüü̃ nauneta i naéga. Nüma rü nhanagürü: “Rü nhaa niĩ i tchauéga i guü̃gutáma nangẽmaetchaü̃, rü ngẽma tchauégamaã tá niĩ i guü̃gutáma duü̃ü̃gü tchoü̃ cuaꞌü̃.” (Êxodo 3:15, TNN) Tupanaarü Orewa, Tupanaéga rü guü̃ma i norü caégagüarü yeera nangoꞌ, cuaꞌãtchiruü̃, Guãẽtüwa Ngẽmacü, Tanatü, Cori rü Tupana. Rü ta, to i naégagüarü yeera nangoꞌ, cuaꞌãtchiruü̃ Abraáü̃, Moiché, Dawí rü Ngetchutchu. Rü nhuꞌmatchi, Tupana nanawaꞌe na togü nüü̃ nacuaꞌ i naéga. Tupanaarü Ore rü nhanagürü: “Rü ngẽmaãcü tá nüxü̃ nacua̱xgü nax cuxicatama yixĩxü̃ i [Yeuwa ya] Cori ya Tupana quixĩxü̃, rü cuxicatama yixĩxü̃ i Guxãétüwa Cungexmaxü̃ i ñoma i naanewa.” — Salmo 83:18.

Ngetchutchucaꞌ narümemaẽ niĩ. Yeguma Ngetchutchu norü ngúegüü̃ nanguꞌẽẽgu na nhuãcü nayumüẽgü, nüma rü Tupanaü̃ nhanagürü: “Üünecü nixĩ i cuéga.” (Mateu 6:9) Ngetchutchu ta nayumüẽ i nhaü̃: “Pa tchaunatü, nüü̃ natatchigaẽẽ i cuéga.” (Juã́ũ 12:28, TNN) Nüü̃ natatchigaẽẽ i Tupanaéga rü Ngetchutchucaꞌ narümemaẽ niĩ. Rü yemacaꞌ, nüma rü Tupanaü̃ nhanagürü: “Marü tüü̃ nüü̃ tchacuaꞌẽẽ i cuéga, rü ngẽma tá tchanaüama.” — Juã́ũ 17:26.

Tümacaꞌ narümemaẽ niĩ ya teé nüü̃ ticuaꞌüü̃gü. Tupanaarü duü̃ü̃gü i nũcümagüü̃ nüü̃ nacuaꞌgüü̃ ga Tupanaéga rü narümemaẽ niĩ nacaꞌ nüü̃ ínapoü̃ rü nüü̃ ínanguü̃ẽẽ ga nümagü. Tupanaarü Ore rü nhanagürü: “Naéga ya [Yeuwa ya] Cori ya Tupana, rü wüxi i poxü̃ruxü̃ i poraxü̃ nixĩ. Rü ngẽmaca̱x ngẽma mexü̃gu maxü̃xü̃ i duü̃xü̃, rü naxca̱x nixũ nax naxü̃tagu nügü yanacúxü̃ca̱x.” (Provérbios 18:10) Rü nhanagürü ta: “Guãma ya yíema Yeuwana cae rü tá tanayau i tümaarü maü̃ i taguma gúü̃.” (Joel 2:32, TNN) Rü nhuꞌmatchi, Tupanaarü Ore rü nüü̃ nanguꞌẽẽ na Tupanaéga rü nanaweꞌ teé niĩ i norü duü̃ü̃gü. “Rü ngẽma togü i nachixü̃anecüã̱x  i duü̃xü̃gü rü noxrütama tupanagüga naxĩnüe, natürü i yixema rü guxü̃gutáma naga taxĩnüe ya yimá tórü [Yeuwa ya] Cori ya Tupana.” — Miqueias 4:5, Puracügü 15:14.

Tüü̃ nanguꞌẽẽ teé niĩ ya nüma rü ta nanaweꞌ i taꞌacü nanaü. Muü̃tchi i nacaꞌ daugüü̃ nüü̃ nicuaꞌãtchitanü na Yeuwaéga nhaü̃tchiga niĩ “Nüma rü nanangupetüẽẽ i taꞌacü nanawaꞌe”. Yeuwa tüü̃ narüngü̃ẽẽ na meã nüü̃ icuaꞌgüü̃ i taꞌacütchiga niĩ i naéga, yeguma Moichéü̃ nhanagürü: “Tchaugü tchiĩẽẽ tá i taꞌacü tchanawaꞌe.” (Êxodo 3:14, TNN) Ngẽmaãcü, Tupanaéga tüü̃ nanguꞌẽẽ na nüma rü torü Üruü̃ niĩ. Rü nhuꞌmatchi, na nüma rü nügü rüeꞌna norü ügüü̃ niĩẽẽ na nayanguẽẽü̃caꞌ i norü ngútchaü̃. Rü Tupanaarü caégagü rü nanaweꞌ na nüma rü naporacü i guü̃arü yeera niĩ rü taúema naétüwa ngẽmae. Notürü Tupanaégaicatama nanaweꞌ i guü̃ma i taꞌacü nüma rü niĩ rü taꞌacü nügü niĩẽẽ tá.

Tüü̃ naweꞌ na tamaã naãmücütchaü̃. Tupanaéga rü tüü̃ naweꞌ na Tupana rü nacaꞌ nagutchaãẽ i norü üü̃ rü wüitchigü i yiemagü ta. Tupana tüü̃ nüü̃ nacuaꞌẽẽ i naéga, ngẽma rü nanaweꞌ na nüma rü nawaꞌe na nüü̃ tacuaꞌgüü̃. Rü nhuꞌmatchi, Tupana rü norü ngútchaü̃maã rü tüü̃ nanguꞌẽẽ i naéga, tama inawaꞌegü nüna ítaca i ngẽma. Ngẽma rü nanaweꞌ na Tupana tama nawaꞌe na duü̃ü̃gü nagu narüĩnüẽ na yaü̃wa nangẽma, rü taucürüwama nüü̃ nacuaꞌgüü̃. Norü ngútchaü̃ niĩ nüü̃ icuaꞌgüü̃ na nüma rü aicuma namaü̃ rü tamücü niĩ rü tacüwawa nangẽma. — Salmo 73:28.

Ngẽguma Tupanaégaü̃ tiugügu tanaweꞌgü na namaã taãmücügütchaü̃. Cuaꞌãtchiruü̃, nagu rüĩnü na cuma rü wüi duü̃ü̃maã cuãmücütchaü̃ rü namaã cuégaü̃ quiu. Notürü, taꞌacügu curüĩnü tchi ngẽma duü̃ü̃ tama cuü̃ nacagu i cuégamaã? Bemana cuma rü tama meã nüü̃ cucuaꞌ na nüma rü cumaã naãmücütchaü̃. Ngẽgumarüü̃ nangupetüü̃ i Tupanamaã. Yeuwa tamaã nüü̃ niu i naéga rü tüü̃ nataãẽẽẽ na nüü̃ icagüü̃caꞌ i naégamaã. Ngẽguma naégaü̃ tiugügu, tanaweꞌgü na Yeuwamaã taãmücügütchaü̃. Ngẽguma duẽẽ Tupanaégagu rüĩnügu, nüma rü nüü̃ nicuaꞌãtchi i ngẽma. — Malaquias 3:16.

Tupanaégaü̃ nacuaꞌü̃ rü nüíra nacüma niĩ na duü̃ü̃ Tupanaü̃ nacuaꞌü̃caꞌ. Naü i ngẽma rü narümemaẽ niĩ, notürü nawaꞌe yeera naü. Inawaꞌegü nüü̃ icuaꞌü̃ nhuãcü niĩ ya Yeuwa rü nacümagü.