Ngẽguma nüü̃ cucuaꞌtchaü̃gu i duü̃ü̃ rü taꞌacü cuü̃ narüngü̃ẽẽ? Nüü̃ cucuaꞌ niĩ i taꞌacü marü naü rü ngeü̃rüüü̃ i gutchaü̃güü̃ marü narüporamaẽ. Ngẽgumarüü̃ ta tá tchi cuma rü meãma nüü̃ cucuaꞌtchaü̃gu ya Tupana rü nawaꞌe niĩ nüü̃ cucuaꞌü̃ i taꞌacü nüma rü marü naü. Bemana namaã cubaiãtchi tá ngẽguma nüü̃ cucuaꞌgu i taꞌacü Tupana marü naü rü torü mecaꞌ niĩ rü ta taꞌacü tá naüü̃ na taãẽãcü tamaẽü̃caꞌ.

Yeuwa ya Tupana rü guü̃ma Ücü niĩ rü norü ü “meama duü̃xü̃güxü̃ nüxü̃ nadauxẽẽxü̃ nax aixcüma Tupana nax yixĩxü̃ rü guxü̃guma nax naporaxü.” (Romacü̃ãꞌ 1:20) Rü Tupanaarü Ore nüü̃ niu na nüma rü “norü poramaxã nanaxü ga ñoma i naane. Rü norü cua̱xmaxã nanamexẽxẽ. Rü yexgumarüxü̃ ta norü cua̱xmaxã nayangeechi ga daxũguxü̃ i naane.” (Jeremias 10:12) Rü Tupana üü̃ nanaweꞌ i nacüma rü ta nanaweꞌ na nüma tacaꞌ nagutchaãẽ i wüitchigü i yiemagü.

Cuaꞌãtchiruü̃, torü maü̃ rü nameẽtchi erü Tupana “rü nügüraxü̃ãcü nanaxü ga duü̃.” (Gênesis 1:27) Ngẽma rü nhaü̃tchiga niĩ na Yeuwa nanaü i duü̃ü̃gü na nanaweꞌü̃caꞌ i nacümagü rü ta nüü̃ nacuaꞌü̃caꞌ i norü ĩnü i natchiga i weꞌguü̃ rü gutchinü. Ngẽguma yigü iporaẽẽgügu na naga iĩnüẽü̃caꞌ i Tupanaarü ucuꞌẽgü rü taãẽãcü tamaẽ rü nüü̃ icuaꞌgüü̃ rü taꞌacücaꞌ tamaẽ. Rü nhuꞌmatchi, Tupana nanaü i duü̃ü̃gü na namaã naãmücügüü̃caꞌ.

Ngẽguma nüü̃ tarüdaunügu i nhama i naãne rü taꞌacü nawa ngẽmaü̃, nüü̃ ticuaꞌãtchi i Tupanaarü ngetchaü̃ i tacaꞌ. Pauru ya Tupanaarü duü̃ü̃ rü nüü̃ niu na ‘Tupana rü taguma nüxü̃ narüchau nax duü̃xü̃güxü̃ nangü̃xẽẽxü̃. Rü yemaacü nügü tüxü̃ nacua̱xẽxẽ nax aixcüma Tupana yixĩxü̃ i nümax. Rü nümatama nixĩ i núma namuaxü̃ ya pucü rü mea tüxü̃́ nayaexẽẽãxü̃ i tanetügü. Rü nüma nixĩ i tüxna naxããxü̃ i tawemü nax ngẽmaãcü tataãẽgüxü̃ca̱x.’ (Puracügü 14:17) Tupana tüna naã i taꞌacü tanawaꞌegüarü yeera na tamaẽü̃caꞌ. Nüma rü nanaü rü tüna naã muü̃tchi i ngẽmaü̃gü na tüü̃ nataãẽẽẽü̃caꞌ. Ngẽma rü wüi cuaꞌruü̃ niĩ natchiga i meü̃gü i tüna naãtchaü̃ tá.

Yeuwa nanaü i nhama i naãne na duü̃ü̃gü guü̃gutáma nawa namaẽü̃caꞌ. Tupanaarü Ore rü nhanagürü: “Duü̃xü̃güna nanaxã i ñoma i naane” rü “naxücü i . . . ñoma i naane rü guxü̃ma i nawa ngẽxmagüxü̃ nax tama nangeãcuxü̃ca̱x.” (Salmo 115:16, Isaías 45:18) Notürü ngeü̃rüüü̃ i duü̃ü̃gü nawa namaẽ? Rü nhure i tempu? Tupanaarü Ore nanangãü̃: “Natürü ngẽma mexü̃gü rü noxrü tá nixĩ i ñaa naane rü guxü̃gutáma nawa namaxẽ.” — Salmo 37:29.

 Ngẽgumarüü̃ i Tupanaarü ngútchaü̃ nacaꞌ i naãne rü duü̃ü̃gü, Yeuwa nanaü ga nüíraü̃ i yatü rü ngee, Adáũ rü Ewa, rü nüna naã wüi meẽtchiü̃ i natchica i naãnewa “nax mea nüxna nadauxü̃ca̱x ga guxü̃ma ga yema naanewa yexmaxü̃.” (Gênesis 2:8, 15) Tupana rü nüna naã ga puracügü i meẽtchigüü̃: “¡Pexãxacü rü pimu! ¡Rü penapaxẽxẽ i ñaa naane, rü namaxã ipecuá!” (Gênesis 1:28) Adáũ rü Ewa nüü̃́ nangẽma i norü uneta na guü̃gutáma namaẽü̃caꞌ. Notürü, nangetchaü̃ erü nümagü norü ngútchaü̃maã tama Tupanaga naĩnüẽ. Rü yemacaꞌ nümagü rü marü tama maü̃ i taguma gúü̃ nüü̃́ nayema. Notürü taꞌacü ga Adáũ rü Ewa naügüü̃ tama nanaütchicüü i Yeuwaarü ngútchaü̃, rü yicama yeera ngẽmatchigaü̃ icuaꞌgüü̃. Naü̃pa, ngiã nüü̃ tadaugü to i ngẽmaü̃ i Tupana tacaꞌ naüü̃.

Tüꞌcüü̃ Yeuwa tüna naã i Norü Ore? Erü nüma rü nanawaꞌe na nüü̃ icuaꞌgüü̃. (Provérbios 2:1-5) Aicuma niĩ na Tupanaarü Ore tama nanangãü̃ i guü̃ma i torü cagü i Tupanatchiga. Natauma i popera i ngẽma naü. (Eclesiastes 3:11) Notürü guü̃ma i taꞌacü Tupanaarü Orewa ngẽmaü̃ tüü̃ narüngü̃ẽẽ na Tupanaü̃ icuaꞌgüü̃caꞌ. Nawa iugütae natchiga na nhuãcü Tupana togüemaã namecüma, rü ta natchiga i ngeü̃rüüü̃ i duü̃ü̃gü nüü̃́ name rüeꞌna tama. (Salmo 15:1-5) Tupanaarü Ore tüü̃ nanguꞌẽẽ ta i Tupanaarü ĩnü natchiga i norü cuaꞌüü̃, taꞌacü weꞌguü̃ rü gutchinü niĩ, rü dĩẽru rü ngẽmaü̃gü. Rü nhuꞌmatchi, nüü̃ niu natchiga i taꞌacü Ngetchutchu ya Tupana nane naüü̃ rü nüü̃ niuü̃, rü Tupanaarü Ore rü tüü̃ narüngü̃ẽẽ na meã nüü̃ icuaꞌgüü̃ i Yeuwacümagütchiga. — Juã́ũ 14:9.

Yeuwa tüna naã i Norü Ore ta na tüü̃ narüngü̃ẽẽü̃caꞌ na taãẽãcü tamaẽü̃caꞌ rü nüü̃ icuaꞌgüü̃ i taꞌacü iügüü̃ i torü maü̃wa. Tupanaarü Orewa, Yeuwa tamaã nidea natchiga i taꞌacü tanawaꞌe iügüü̃ na tatanüü̃maã wüigu taãẽãcüma tamaẽ, nhuãcü tataãẽgü namaã i taꞌacü marü tüü̃ ngẽmaü̃tama rü meã namaã ítacuaꞌ i torü oegaãẽgü. Rü yicama nüü̃ tiugü ta natchiga i Tupanaarü Orearü ngãü̃gü nacaꞌ i ngẽma cagü: Tüꞌcüü̃ ãũrima tioẽgü? Taꞌacü tá wipeꞌewa nangupetüü̃? Rü nhuꞌmatchi tüü̃ naweꞌ taꞌacü Tupana marü nanaü na nayanguẽẽü̃caꞌ i norü ngútchaü̃ i naãnecaꞌ rü duü̃ü̃gücaꞌ.

Tupanaarü Ore rü wüi meẽtchiü̃ i popera niĩ. Rü 1600 taunecügügu rü bemana 40 yatügü naümatügüü̃ i Tupanaarü Ore. Woo i ngẽma, wüirica i natchiga nidea rü ngẽma rü nanaweꞌ na Tupanawa ne naũ. (2 Timúteu 3:16) Rü Tupanaarü Ore rü tama nanaütchicüü i taunecügügu, notürü ngẽma rü nangupetüü̃ i yatügüarü poperagümaã. Rü nüü̃ icuaꞌgüü̃ i ngẽma erü muü̃tchi i poperagü i nũcümagüü̃ nanaweꞌ i ngẽma. Rü nhuꞌmatchi, muü̃tchi i duü̃ü̃gü nanatchuꞌutchaü̃ i Tupanaarü Ore i to nagawa naümatüü̃, rü bai na togü tama nanayaugü rü bai nawa naugütae. Woo i ngẽma Tupanaarü Ore nangẽmaetchaü̃ rü muü̃tchi i duü̃ü̃gü nüü̃ nangẽma i muü̃tchi i nagawa. Ngẽma rü nanaweꞌ na “Tupanaarü ore rü guxü̃gutáma nangẽxmaecha.” — Isaías 40:8.

Tupana rü nanatautchaẽẽ na norü ngútchaü̃ nacaꞌ i duü̃ü̃gü nayanguẽẽü̃caꞌ. Marü nüü̃ tadaugü na Tupana nanawaꞌe na duü̃ü̃gü guü̃guma namaẽ i nhama i naãnewa. Notürü yeguma Adáũ rü tama Tupanaga naĩnügu rü tchieü̃ naü, nüma rü nataagü marü tama maü̃ i taguma gúü̃ nüü̃́ nangẽma. Rü Tupanaarü Ore rü nhanagürü: “Rü nüxíraü̃cü ga yatü ga Adáü̃gagu nixĩ ga guxü̃ma ga duü̃xü̃güwa nanguxü̃ ga pecadu. Rü pecadugagu ínangu i yu. Rü yemaacü guxü̃ma ga duü̃xü̃güwa naxüe nax nayuexü̃, yerü guxü̃ma nipecaduã̱x.” (Romacü̃ãꞌ 5:12) Yeguma Adáũ tama Tupanaga naĩnügu, yema rü nanagutchaẽẽ i Tupanaarü ngútchaü̃. Taꞌacü Tupana naü?

Taꞌacü Yeuwa naü rü namaã nawüigu i nacümagü. Nüma rü weꞌguü̃ãcüma nüü̃ napocue ga Adáũ rü Ewa. Yeuwa ta nanaweꞌ i norü ngetchaü̃ erü nüü̃ narüngü̃ẽẽ i duü̃ü̃gü i nabue nawena ga Adáũ rü Ewa. Rü norü cuaꞌmaã nüü̃ nauneta taꞌacü ga naüü̃ ga yema ngupetüü̃wa rü nüü̃ niu na nhuãcü nanameẽẽ ga yema. (Gênesis 3:15) Tupana inanguü̃ẽẽ i duü̃ü̃gü i pecaduwa rü yuwa. Rü nüma rü nanaütchi i ngẽma i Ngetchutchuwa. Nhuãcü?

 Na nüü̃ inanguü̃ẽẽü̃caꞌ i duü̃ü̃gü i Adáũarü pecaduwa, Yeuwa nanamu ga Ngetchutchu nua ga naãnewa. Nua, Ngetchutchu duü̃ü̃güü̃ nanguꞌẽẽ i taꞌcü nawaꞌegü naügüü̃ na maü̃ i taguma gúü̃ nüü̃́ ngẽmagüü̃caꞌ rü “naxca̱x inaxããxü̃ca̱x i norü maxü̃, nax ngẽmaãcü muxü̃ma i duü̃xü̃güarü maxü̃ naxütanüxü̃ca̱x.” a (Mateu 20:28; Juã́ũ 14:6) Rü name i Ngetchutchu tüna inanaã i norü maü̃ erü ngearü pecaduãü̃ ga Adáũrüü̃. Notürü Ngetchutchu guü̃guma Tupanaga naĩnü nhuꞌmata norü yuwa nangu. Nüma rü tama nawaꞌe nayu, rü yemacaꞌ, Tupana ínadaẽẽ ga Ngetchutchu na dauü̃guü̃ i naãnewa namaü̃ü̃caꞌ. Rü ngẽmacaꞌ Ngetchutchu duü̃ü̃güna naã i taꞌacü Adáũ taücürüwama nanaã: wüi uneta i maü̃ i taguma gúü̃tchiga. Tupanaarü Ore nhanagürü: “Rü gumá nüxíraü̃cü ga yatü ga Adáü̃ rü tama Tupanaga naxĩnü. Rü yemaacü wüxitama ga yatügagu rü muxü̃ma ga duü̃xü̃gü rü nipecaduã̱x. Natürü gumá yatü ga Ngechuchu, rü mea Tupanaga naxĩnü. Rü gumágagu rü muxü̃ma i duü̃xü̃gü rü tá nime i Tupanape̱xewa.” (Romacü̃ãꞌ 5:19) Nawa i Ngetchutchuarü yu, Yeuwa nayanguẽẽ i norü ngútchaü̃ na duü̃ü̃gü guü̃gutáma namaẽü̃caꞌ i nhama i naãnewa.

Nawa icuaꞌgüü̃ i Yeuwacümagü ngẽguma nüü̃ idaugügu taꞌacü nüma rü naü i Adáũarü pecaduwena. Nüü̃ tadaugü na taúema Yeuwaü̃ nanagutchaẽẽ na nayanguẽẽü̃caꞌ i norü ngútchaü̃. Nüma rü guü̃guma nayanguẽẽ i Norü Ore. (Isaías 55:11) Rü nhuꞌmatchi nawa icuaꞌgüü̃ na Yeuwa ãũrima tüü̃ nangetchaü̃. Tupanaarü Ore nhanagürü: “Tupana rü ñoma ga naanewa nanamu ga Nane ya nügümaxã wüxicacü nax yimágagu tüxü̃́ nangẽxmaxü̃ca̱x i maxü̃ i taguma gúxü̃. Rü yemawa Tupana tüxü̃ nüxü̃ nadauxẽxẽ nax tüxü̃ nangechaü̃xü̃. Rü ngẽma ngechaü̃ i aixcüma ixĩxü̃ rü tama Tupanaxü̃ tangechaü̃wa nango̱x. Natürü Tupana rü ñoma ga naanewa nanamu ga Nane nax taxca̱x nayuxü̃ca̱x rü naxütanüãxü̃ca̱x ga tórü pecadugü. Rü yemawa inanawe̱x i ngẽma ngechaü̃ i aixcüma ixĩxü̃.” — 1 Juã́ũ 4:9, 10.

“Nüma ga Tupana rü tama tüxna nayanuxũ ga Nanexü̃chi, natürü taxca̱x inanamu ga Nane nax taxca̱x nayuxü̃ca̱x i guxãma i yixema”, rü aicuma nagu tayaõgüü̃ na nüma rü “tüxna naxããxü̃ i guxü̃ma i ngẽma inaxwa̱xexü̃ nax mea naxca̱x imaxẽxü̃ca̱x.” (Romacü̃ãꞌ 8:32) Taꞌacü tá Tupana tamaã iunetaü̃? To naátüwa tüü̃ naweꞌ i ngẽma.