Teé niĩ ya Tupana?
Muẽma ya duẽẽgü nüü̃ iugü na Tupanagu nayaõgü. Notürü ngẽguma nacaꞌ ínacagu teé niĩ ya Tupana, norü ngãü̃gü natoraü̃ niĩ i natchiga. Nümaü̃caꞌ, Tupana nuãcüma duü̃ü̃güü̃ nangugü rü nüü̃ napocutchaü̃ i norü tchieü̃gagu. Togü nagu rüĩnüẽ na Tupana ngetchaü̃waꞌecü niĩ, rü nüü̃ nüü̃ nangetchaü̃ guü̃ma i norü tchieü̃gü, nüétama ngeü̃rüüü̃ i tchieü̃ niĩ. Rü togü nagu rüĩnüẽ na Tupana tama nacaꞌ nagutchaãẽ. Nagagu nangẽma muü̃tchi i ĩnügü i Tupanatchiga, rü muü̃tchi i duü̃ü̃gü nagu rüĩnüẽ na taguma nüü̃ nacuaꞌgüü̃ i aicumaü̃ i Tupanatchiga.
Eꞌna narümemaẽ niĩ nüü̃ nacuaꞌ i teé niĩ ya Tupana? Ngü̃, meã nüü̃ cucuaꞌ a Tupana rü curü maü̃arü mecaꞌ niĩ. (Puracügü 17:26-28) Ngẽguma yeera nüü̃ cucuaꞌgu i Tupanatchiga, nüma rü yeera cuü̃ nangetchaü̃ rü cuü̃ narüngü̃ẽẽ tá. (Tiagu 4:8) Rü nhuꞌmatchi, meãma nüü̃ cucuaꞌ i Tupana rü cuü̃́ nanatautchaẽẽ na maü̃ i taguma gúü̃ cuü̃́ ngẽmaü̃caꞌ. — Juã́ũ 17:3.
Nhuãcü tá nüü̃ cucuaꞌü̃ ya Tupana? Nagu rüĩnü i wüi duü̃ü̃ na meãma nüü̃ cucuaꞌü̃, cuaꞌãtchiruü̃ wüi cumücü. Nhuãcü pemücügü pegü piĩẽẽ? Bemana nüü̃ cucuaꞌ i naéga, rü nacümagü, rü taꞌacü nüü̃́ name rü taꞌacü tama nüü̃́ name, rü taꞌacü marü naü i norü maü̃wa, rü ta taꞌacügü nüna nangútchaü̃ rü toomatchigü. Taꞌacü cuü̃́ nanatautchaẽẽ na namaã cuãmücüü̃caꞌ? Mẽama nüü̃ cucuaꞌü̃ i ngẽma duü̃ü̃.
Ngẽgumarüü̃, Tupanaü̃ icuaꞌgüü̃ ngẽguma nawa icuaꞌgügu i nhaü̃:
Nhaa poperawa nanaweꞌ i ngẽma cagüarü ngãü̃gü i Tupanaarü Orewa. To naátügü cuü̃ narüngü̃ẽẽ na meãma nüü̃ cucuaꞌü̃ a Tupana rü ta na nhuãcü Tupanamaã cuãmücü rü curü mecaꞌ niĩ.
