NORÜ NGUꞌ 2
WIYAE 132 Rü toma nhama wüitama i duü̃ü̃rüü̃ tiĩgü
Pa ãmaꞌü̃, meã cumaꞌü̃ nangetchaü̃
“Pa Yatügüx, rü name nixĩ i mea pexma̱xü̃ pengechaü̃gü.” — 1 PE. 3:7.
TAꞌACÜ NÜNA ÍNGUGÜTCHAÜ̃
Nanaweꞌ na nhuãcü ãmaꞌü̃ rü meã namaꞌü̃ nangetchaü̃ i norü deawa rü taꞌacü naüwa.
1. Tüꞌcüü̃ Yeuwa nanaü i ngĩ?
YEUWA rü Tupana ya taãẽcü niĩ, rü nanawaꞌe na yiãgü itaãẽgüü̃. (1 Tim. 1:11) Rü ngẽmacaꞌ, nüma rü tüna naã i muü̃tchi i ãmaregü na taãẽãcü imaẽü̃caꞌ. (Tia. 1:17) Wüi ãmare niĩ ngĩgü. Ngẽguma wüi yatüü̃ rü ngeꞌemaã ningĩgu, nümagü rü nügümaã inauneta na nügü nangetchaü̃güü̃ rü nügümaã namecümagüü̃ rü meã nügümaã niĩgü. Ngẽma marü ingĩgüü̃ rü poraãcü nügü ingetchaü̃güü̃ rü aicuma tá taãẽãcü namaẽ. — Pro. 5:18.
2. Taꞌacü namaã nangupetügü i muü̃tchi i ngĩgüwa i nhamaãcüü?
2 Rü wüi ngetchaü̃ü̃tchi niĩ, muü̃tchi i ãmagüü̃ i nhuꞌma rü nüü̃ inarüngümaẽ nügümaã naunetagütchireü̃ ngẽguma ningĩgütchaü̃gu. Ngẽma rü nüü̃ niu na tüꞌcüü̃ muü̃tchi i ãmaꞌgüü̃ tama taãẽãcü namaẽü̃. Wüi deapane nüü̃ niu nawa i Organização Mundial da Saúde ngẽma rü nanaweꞌ i muü̃tchi i ãmaꞌgüü̃ rü namaꞌmaã tchiri namaeü̃ rü tümamaã nagutchigagü rü tüü̃ nimáü̃ rü toomatchigü i tchieü̃ tümamaã naüü̃. Nümaü̃ ãmaꞌgüü̃ rü meã namaꞌmaã naĩneta i togüepeꞌewa notürü ngẽguma nüíca niĩgu rü tchiri tümamaã naüpetü. Rü nhuꞌmatchi, nanatchieẽẽ i muü̃tchi i ngĩgü ngẽguma ãmaꞌgüü̃ nüü̃ daugu i ngẽãẽü̃tchicünaꞌãgü.
3. Tüꞌcüü̃ nümaü̃gü ãmaꞌgüü̃ tchiri namaꞌmaã niĩgü?
3 Tüꞌcüü̃ nümaü̃ ãmaꞌgüü̃ rü tchiri namaꞌmaã niĩgü? Bemana nümaü̃gü nanatüwa nacaꞌ nadauü̃taegü erü naemaã tchiri namaü̃ rü ngẽmacaꞌ rü nacaꞌ rü wüi meü̃ niĩ. Togü rü nanaü i namaꞌgümaã na tchiri namaẽü̃ erü ngetá inamaẽü̃wa nacümaãcü niĩgü. Cuaꞌatchiruü̃, nümaü̃ i nacümagüwa, nümaü̃ yatüü̃ nügü narüporaü̃ na ngeꞌemaã ínacuáü̃caꞌ erü nanaweꞌtchaü̃ na tümamaã ínacuátchaü̃. Rü togü i yatügü rü tama nüü̃ nacuaꞌ na meã nüna nadau i norü ĩnü rü ngẽmacaꞌ nanuü̃waꞌe. Rü nhuꞌmatchi, nümaü̃gü tama meã nagu narüĩnüẽ i ngeꞌetchiga na nhuãcü tümamaã namaü̃ erü guü̃guma nüü̃ nadau i ngẽãẽü̃tchicünaꞌãgü. Ngẽmaarü yeera, nümaü̃ i deagüpanewa nanaweꞌ ngẽguma daꞌaweane covid-19 yane, yeera ãmaꞌgüü̃ tchiri namaꞌmaã niĩgü. Notürü tama ngẽmagagu niĩ na ãmaꞌgüü̃ namaꞌmaã tchiri namaẽü̃.
4. Taꞌacü õtanüü̃ i ãmaꞌü̃ nawaꞌe nacaꞌ nauãẽ, rü tüꞌcüü̃?
4 Wüi õtanüü̃ i ãmaꞌü̃ rü nawaꞌe nacaꞌ nauãẽ na tama nagu nanguü̃ i tchieü̃ i ngeꞌetchiga. a Tüꞌcüü̃? Erü torü ĩnü tüü̃ nanangútchaü̃ẽẽ na tchieü̃ iüü̃caꞌ rü meü̃ iüü̃caꞌ. Orearü Uruü̃ ga Pauru nüü̃ niu namaã ga yaõgüü̃tanüü̃ i Romacü̃ãꞌ na ‘tama name i nhama i naãnecü̃ãꞌ i duü̃ü̃gücümagu naĩü̃’. (Rom. 12:1, 2) Yeguma Pauru nanaümatügu ga yema ore nacaꞌ ga yaõgüü̃ ga Romacü̃ãꞌ, rü marü nümaü̃ i taunecügu nangẽma i natücumü. Woo i ngẽma, yema Pauruarü ore rü nanaweꞌ na natchiü̃ãnecü̃ãꞌarü ĩnügü rü namaã ínacuáü̃ ga nümaü̃ ga yaõgüü̃tücumü ga Romacü̃ãꞌgüwa ngẽmagüü̃. Rü yemagagu ga Pauru rü nüü̃ ucuꞌẽ na naütchicüügüü̃caꞌ i norü ĩnügü rü nacümagü. Rü ngẽma ucuꞌẽ rü nacaꞌ niĩ i õgütanüü̃ i ãmaꞌgüü̃ i nhuꞌma. Rü ngetchaü̃ü̃tchi niĩ, erü natchiü̃ãnecü̃ãꞌarü ĩnügü rü nümaü̃ i ãmaꞌgüü̃maã ínacuáü̃ rü ngẽmacaꞌ nümagü rü namaꞌmaã tchiri namaẽü̃. b Nhuãcü Yeuwa nanawaꞌe ãmaꞌgüü̃ meã namaꞌmaã niĩgüü̃? Nhaa nguꞌarü wetchicuru nanangãü̃ tá.
5. Rü 1 Pedru 3:7wa nüü̃ niurüü̃, nhuãcü niĩ i ãmaꞌü̃ nawaꞌe meã namaꞌmaã niĩ?
5 Nawa naugütae 1 Pedru 3:7. Yeuwa nanamu na ãmaꞌü̃ rü meã namaꞌü̃ nangetchaü̃. Rü yatü i meã namaꞌü̃ nangetchaü̃ rü tümamaã nangetchaü̃waꞌe rü tümamaã namecüma. Nhaa nguꞌwa, nüü̃ tadaugü na nhuãcü ãmaꞌü̃ nanaü tá i ngẽma. Notürü, naü̃pa nüü̃ tadaugü ngeü̃rüüü̃ i nacümagü nanaweꞌ na tama namaꞌü̃ nangetchaü̃ rü bai meã tümamaã niĩü̃.
TAÜ̃ CUNAÜÜ̃ NA CUMAꞌGU QUIDAUCÜRAÜ̃!
6. Taꞌacügu narüĩnü i Yeuwa natchiga i namaꞌü̃ imáẽtchaü̃? (Corochacü̃ãꞌ 3:19)
6 Taguma name na ãmaꞌü̃ tüü̃ nadagü i namaꞌ. Yeuwa natchi naai ya teé cuáigu rüĩnüeü̃. (Sal. 11:5) Tupanaarü Orewa nanaweꞌ na tauwama nameü̃ i ãmaꞌgüü̃ i namaꞌmaã tchiri maẽü̃. (Mal. 2:16; nawa naugütae Corochacü̃ãꞌ 3:19.) Nhaa nguꞌarü wetchicuru i 1 Pedru 3:7wa nüü̃ niurüü̃, ngẽguma wüi ãmaꞌü̃ tümamaã natchiecümagu, ngẽma rü Yeuwana nüü̃ niũgatchiẽẽ. Bemana Yeuwa nüü̃ nauneta tama nüü̃ naĩnü i norü yumüẽgü i ngẽmagagu.
7. Rü Epéchiucü̃ãꞌ 4:31, 32wa nüü̃ niurüü̃, taꞌacü taguma name na ãmaꞌü̃ naüü̃?
7 Taguma name na ãmaꞌü̃ rü tümamaã nagutchigagü i namaꞌ. Nümaü̃gü i ãmaꞌgüü̃ rü nuãcüma namaꞌmaã nideagü urü nüü̃ niugü i taꞌacü tüü̃ nangetchaü̃ẽẽ. Notürü Yeuwa natchi naai i ngẽma ‘nügütchi naaieü̃, rü nügümaã nanueü̃, rü nügü na nangaeü̃, rü nügümaã nagutchigagüü̃’. c (Nawa naugütae Epéchiucü̃ãꞌ 4:31, 32.) Yeuwa guü̃ma naĩnü. Rü ngẽmaãcü, nüma rü nacaꞌ nagutchaãẽ na nhuãcü ãmaꞌü̃ rü namaꞌmaã nidea, woo nüíca nangẽmagu. Ngẽma ãmaꞌü̃ i tümamaã nagutchigagü rü nanatchieẽẽ i norü ngĩ, rü ta ngẽma rü Yeuwana nüü̃ niũgatchiẽẽ. — Tia. 1:26.
8. Taꞌacügu narüĩnü ya Yeuwa i ngẽãü̃tchicünaꞌãtchiga, rü tüꞌcüü̃me?
8 Ãmaꞌgüü̃ rü tama name na nüü̃ nadau i ngẽãü̃tchicünaꞌãgü. Taꞌacügu narüĩnü ya Yeuwa i ngẽãü̃tchicünaꞌãtchiga? Nüma rü natchi naai i ngẽãẽ. Ãmaꞌgüü̃ i nüü̃ daugüü̃ i ngẽma natchicünaꞌãgü rü nanatchieẽẽ na Yeuwamaã naãmücü rü namaꞌgu nidaucüraü̃. d Wüi ãmaꞌü̃ i aicumaü̃ rü taguma to ngeü̃maã nangẽãẽü̃. Rü nüma rü taguma nagu narüĩnü na ngẽma naüü̃. Ngetchutchu nüü̃ niu i wüi yatü i ãmaꞌü̃ rü ngẽguma wüie i ngeü̃ nüü̃ nadawenügu rü nüü̃́ nangútchaü̃ na ngĩmamaã napeü̃ rü Tupanapeꞌewa rü marü tchieü̃ ngĩmaã taü i naãẽwa. e — Mat. 5:28, 29.
9. Tüꞌcüü̃ Yeuwa natchi naai ngẽguma ãmaꞌü̃ tüü̃ natchieweü̃tchi i namaꞌ na taüü̃caꞌ i taꞌacü tüma rü tama tanawaꞌe ngẽguma tümamaã napegu?
9 Ãmaꞌgüü̃ tama name namaꞌü̃ natchiãẽ ngẽguma tümamaã napetchaü̃gu rü tama tanawaꞌegu. Nümaü̃ i ãmaꞌgüü̃ tüü̃ natchieweü̃tchi i namaꞌ na tanaüü̃caꞌ i taꞌacü tüü̃ natchiãẽü̃ ngẽguma tümamaã napegu. Yeuwa natchi naai i ngẽma nacüma erü ãmaꞌü̃ nügüguicatama narüĩnüü̃ rü tama tüü̃ nangetchaü̃. Nüma rü nanawaꞌe na ãmaꞌgüü̃ rü tüü̃ nangetchaü̃ i namaꞌ rü namaꞌgu narüĩnüü̃. (Epé. 5:28, 29) Tchi wüi ãmaꞌü̃ i õtanüüü̃ tchiri namaꞌmaã namaü̃gu rü nüü̃ nadaugu i ngeãẽü̃tchicünaꞌã? Nhuãcü tá nüma rü nanameẽẽ i nacüma rü norü ĩnü?
NHUÃCÜ WÜI ÃMAꞌÜ̃ INATCHAÃTCHI NA TCHIRI NAMAꞌMAÃ NAMAÜ̃?
10. Nhuãcü Ngetchutchuarü cuaꞌruü̃ rü nüü̃ narüngü̃ẽẽ i ãmaꞌgüü̃?
10 Taꞌacü tá nüü̃ rüngü̃ẽẽ a ãmaꞌgüü̃ na tama tchiri namaꞌmaã namaẽü̃caꞌ? Wüi nacüma niĩ nügü naporaẽẽ na Ngetchutchuü̃ narüdauü̃güü̃. Aicuma niĩ na Ngetchutchu taguma naãmaꞌü̃, notürü nhuãcü nüma rü norü ngúeü̃güü̃maã niĩ rü wüi cuaꞌruü̃ nacaꞌ i ãmaꞌgüü̃. (Epé. 5:25) Ngiã nüü̃ tadaugü i taꞌacü nawa nüü̃ nacuaꞌü̃ tá i ãmaꞌü̃ i nacüma na nhuãcü Ngetchutchu norü ngúegüü̃maã niĩü̃ rü nhuãcü namaã nideaü̃.
11. Nhuãcü Ngetchutchu norü ngúeü̃gümaã niĩ?
11 Ngetchutchu rü guü̃guma norü ngúeü̃gümaã namecüma. Nüma rü taguma tchiriãcüma namaã niĩ. Woo nüma rü norü cori yiĩ rü taguma norü poramaã nüü̃ namuü̃ẽgü. Notürü Ngetchutchu nügü írüíraãcüma nüü̃ narüngü̃ẽẽ i norü ngúeü̃gü i norü puracüwa. (Juã́ũ 13:12-17) Rü nüma rü nhanagürü: “Naxca̱x pedauxü̃taegü i chaucüma! Erü choma rü yáxna pemaxã chaxĩnü rü tama chaugü chicua̱xüxü̃. Rü ngẽmaãcü tá nüxna iperüngügü i perü guxchaxü̃gü.” (Mat. 11:28-30) Ngẽma wetchicuru nanaweꞌ na Ngetchutchu rü meãmare niĩ. Wüi duü̃ü̃ i meãmare iĩ rü tama niĩ naturaü̃. Notürü, nüma rü napora erü meã nügümaã ínacuá. Woo nhuguãcü nanugu, nüma rü guü̃guma meã niĩ rü nügümaã meã ínacuá.
12. Nhuãcü Ngetchutchu duẽẽgümaã nideaü̃?
12 Ngetchutchu norü deamaã nanataãẽẽẽ rü nanaporaẽẽ i duü̃ü̃gü. Nüma rü tama nuãcüma norü ngúeü̃gümaã nidea. (Luca 8:47, 48) Yeguma norü uwanügü tchieü̃ namaã niugügügu rü nagu nidaucüraü̃gügu, rü nüma “taxuxü̃ma ga chixexü̃maxã nanangãxü̃”. (1 Pe. 2:21-23) Rü nhuguãcü Ngetchutchu natchianemare na tama tchieü̃maã nanangãü̃caꞌ. (Mat. 27:12-14) Ngẽma rü wüi i cuaꞌruü̃ niĩ nacaꞌ i ãmaꞌgüü̃ i õgütanüü̃gü!
13. Rü Mateu 19:4-6wa nüü̃ iurüü̃, nhuãcü ãmaꞌgüü̃ meã namaꞌmaã ínaã́ũ tá? (Nüü̃ nadau ta i natchicünaꞌã.)
13 Ngetchutchu nüü̃ niu na ãmaꞌgüü̃ rü taguma tüü̃ ínawogü i namaꞌgü. Nüma rü nüü̃ niu i Yeuwaarü ore na ãmaꞌgüü̃ nawaꞌe meã “naxma̱xmaxã inaxã́ũxü̃ca̱x”. (Nawa naugütae Mateu 19:4-6.) Ngẽma dea i gregugawa “ã́ũ” rü “nügüwa nanhaü̃” nhaü̃tchiga niĩ. Ngẽma rü nanaweꞌ na ãmaꞌü̃ rü ãteꞌü̃ nawaꞌe ãũrima nügü nangetchaü̃gü nhama nügüwa naã́ũgürüü̃ niĩ. Rü ngẽguma nügüna ninhaãtchigügu nümagü rü ãũrima niõẽgü. Ngẽguma ãmaꞌü̃ ãũrima namaꞌna nangaicamagu, nüma rü nüü̃ nao i ngeü̃rüüü̃mare i ngẽãẽü̃tchicünaꞌãgü. Paaütchi nüna idaugatchiü̃ i ngẽma taꞌacü tchieü̃. (Sal. 119:37) Nhama Yórüü̃ nüma rü nanaü na nügüna nanuü̃ na taguma ngeü̃ü̃ nadawenü i tama namaꞌ niĩẽ. — Jó 31:1.
Ãmaꞌü̃ iaicumaü̃ rü namaꞌü̃ nangetchaü̃ rü nüü̃ nao i ngẽãẽü̃tchicünaꞌã (Nüü̃ nadau i natchimaü̃ 13wa.) g
14. Taꞌacü tá naüü̃ i ãmaꞌü̃ i tchiri namaꞌmaã maü̃cü na nanameẽẽü̃ca na ngẽmaãcü Yeuwana ru namaꞌna nangaicamaü̃caꞌ?
14 Wüi ãmaꞌü̃ i tchiri namaꞌmaã cuáü̃, nüma rü nawaꞌe nameẽẽ i ngẽma i Yeuwamaã rü namaꞌmaã. Nhuãcü nüma nanaü i ngẽma? Nüíra, nüma rü nawaꞌe nüü̃ nacuaꞌü̃ na ngẽma rü gutchaü̃ i taütchiü̃ niĩ. Yeuwa nüü̃ nadau i guü̃ma i taꞌacü naüü̃ rü nüma nüü̃ niuü̃. (Sal. 44:20, 21; Ecl. 12:14; Ebr. 4:13) Norü tare, nüma rü nanawaꞌe naütchicüü i nacüma rü inatchaãtchi nawa tchiri namaꞌmaã namaü̃. (Pro. 28:13) Norü tamaẽꞌpüꞌ, nüma rü nanawaꞌe ngetchaü̃caꞌ ínacaü̃ i namaꞌna rü Yeuwana rü aicumaü̃tchima nüü̃ nao i nacüma na ngẽmaãcü nüü̃ nüü̃ nangetchaü̃ü̃caꞌ i Yeuwa rü namaꞌ. (Pur. 3:19) Rü nüma rü ta nawaꞌe yeü̃cü Yeuwaü̃ nacaaꞌü̃ na nüna naãü̃caꞌ i meü̃ ngútchaü̃ rü pora na meã namaã ínacuáü̃caꞌ i norü ĩnügü, rü deagü rü nüma naüü̃wa. (Sal. 51:10-12; 2 Cor. 10:4, 5; Pir. 2:13) Norü ãgümücü, nüma nawaꞌe norü yumüẽwa nacaꞌ ínacaü̃ãcü nanaü rü na nüü̃ nacuaꞌü̃caꞌ na natchi naai i naguü̃raü̃ i tchieü̃gü rü dea i tchieü̃gü. (Sal. 97:10) Norü wüimeꞌpüꞌ, nawaꞌe paaütchi nacaꞌ nadau i anciãogüarü ngü̃ẽẽgü. (Tia. 5:14-16) Norü seis, nüma rü nawaꞌe naãẽwa nüü̃ nacuaꞌ i taꞌacü tá naü na tama wenaarü tchiri namaꞌmaã namaü̃ü̃caꞌ. Rü wüi ãmaꞌü̃ i nüü̃ nadaugu i ngẽãẽü̃tchicünaꞌã nawaꞌe nagu niũ i ngẽma 6 nacümagü. Tchi nüma rü nanaügu i ngẽma, Yeuwa naétü nawémeꞌ rü nüü̃ narüngü̃ẽẽ na nanaütchicüüü̃caꞌ. (Sal. 37:5) Rü nüma nawaꞌe tama nagu nidaucüraü̃ i namaꞌ rü ngemaétüwa meã namaꞌü̃ nangetchaü̃. Ngiã nüü̃ tadaugü na nhuãcü nüma rü nanaü tá i ngẽma.
TAꞌACÜ TÁ ÃMAꞌÜ̃ NAÜÜ̃ NA MEÃ NAMAꞌÜ̃ NANGETCHAÜ̃Ü̃CAꞌ?
15. Nhuãcü i ãmaꞌü̃ nanaweꞌ na namaꞌü̃ nangetchaü̃?
15 Naweꞌ na cumaꞌü̃ cungetchaü̃. Nümaü̃ i ãmaꞌgüü̃ i taãẽãcü namaẽ i norü ngĩgüwa rü tüü̃ nanaweꞌ i guü̃ i nguneü̃gu na namaꞌü̃ nangetchaü̃. (1 Juã́ũ 3:18) Wüi ãmaꞌü̃ rü nanaweꞌ na namaꞌü̃ nangetchaü̃ i tautchamareü̃maã, cuaꞌãtchiruü̃ tümameꞌe niyauãtchiü̃ rüeꞌna ngetchaü̃ãcü tüna nipaãtchiü̃. Rü nguneü̃guyane, nüma rü bemana tümacaꞌ nayamu i wüi ore i nhaü̃: “Tchoü̃ cutautchica” rüeꞌna tüna naca: “Nhunhaü̃ i curü nguneü̃?”. Rü nhuguãcü, bemana nüma rü nanawü i poperaátügu i meü̃ma i ore na tüü̃ nanaweꞌü̃caꞌ na tüü̃ nangetchaü̃. Ngẽguma ãmaꞌü̃ ngẽmaãcü nanaügu nüma rü namaꞌü̃ nangetchaü̃ rü nanaporaẽẽ i norü ngĩgü.
16. Tüꞌcüü̃ ãmaꞌü̃ nanawaꞌe namaꞌü̃ nicuaꞌüü̃?
16 Tümamaã nüü̃ iu ya cumaꞌ na aicuma cuü̃ ta meü̃. Wüi ãmaꞌü̃ i namaꞌü̃ nangetchaü̃ rü tümamaã nüü̃ niu i taꞌacü tüü̃ meü̃. Cuaꞌãtchiruü̃, nüma rü guü̃guma tüna moẽ naã nagagu i guü̃ma i tümaarü ngü̃ẽẽ. (Co. 3:15) Ngẽguma ãmaꞌü̃ namaꞌü̃ nicuaꞌüü̃gu rü nüü̃ niu na tüꞌcüü̃ tüü̃ nangetchaü̃, tüma rü tama tamuü̃, rü nüü̃ ticuaꞌãtchi na aicuma tüü̃ nangetchaü̃. — Pro. 31:28.
17. Nhuãcü ãmaꞌü̃ meã namaꞌmaã niĩ?
17 Meã cumaꞌü̃ nangetchaü̃ rü meã tümamaã iĩ. Rü ãmaꞌü̃ namaꞌü̃ ngetchaü̃ü̃ rü ãũrima nüü̃́ tame rü nhama Yeuwaarü ãmarerüü̃ niĩ i nacaꞌ. (Pro. 18:22; 31:10) Rü ngẽmacaꞌ, nüma rü guü̃ i nguneü̃gu rü tümamaã namecüma rü meã tümamaã niĩ woo ta ngẽguma tümamaã napetchaü̃gu. Nüma rü tama tüü̃ natchiewe na tanaü i taꞌacü tüü̃ yaãẽẽẽ rüeꞌna i taꞌacü tüma rü tama tanawaꞌeü̃. f Rü nhuꞌmatchi, nüma rü nügü naporaẽẽü̃ na naãẽwa nangẽmaü̃caꞌ i meü̃ na ngẽmaãcü tama nayaãẽü̃caꞌ. — Pur. 24:16.
18. Taꞌacü ãmaꞌgüü̃ nanawaꞌe norü ngútchaü̃maã nanaü? (Nüü̃ nadau ta i quadru “ Ãgümücü i nacüma niĩ na meã namaꞌmaã niĩü̃caꞌ”.)
18 Pa ãmaꞌü̃, Yeuwa nataãẽü̃tchi ngẽguma nüü̃ nadaugu na nhuãcü cuma rü cugü cuporaẽẽü̃ na meã cumaꞌü̃ cungetchaü̃ i curü deawa rü taꞌacü i cuüwa. Curü ngútchaü̃maã meã tüü̃ nangetchaü̃ rü taṹ cunaü i taꞌacü ngúü̃ tüü̃ ingeẽẽü̃. Rü nhuꞌmatchi, tümamaã namecüma, rü meã tümamaã niĩ rü tüü̃ nangetchaü̃. Tchi ngẽma naügu, tüma rü nüü̃ tadau na nhuãcü tüü̃ cungetchaü̃ rü cuü̃́ tame. Meã tüü̃ nangetchaü̃ i cumaꞌ rü ngẽmagagu meãma cugüna cudau na Yeuwamaã cuãmücüamaü̃caꞌ. — Sal. 25:14.
WIYAE 131 Yeuwa rü nügüna nanangugüẽẽ i yatü rü ngeü̃
a Nüü̃́ name i ãmaꞌgüü̃ i nhaa ucuꞌẽ “Você trata as mulheres como Jeová quer?”, nawa i popera Sentinela i yaneruarü 2024gu.
b Ngeü̃gü i yatüü̃ tchiri tümamaã ícuáü̃ rü bemana tüü̃ rüngü̃ẽẽ i nhaa ucuꞌẽ “Ajuda para as vítimas de violência doméstica”, i natchipeꞌe “Outros assuntos” nawa i site jw.org rüeꞌna aplicativo JW Library®.
c NA MEÃ NÜÜ̃ CUCUAꞌÜ̃CAꞌ: Nhaa deagü “nügümaã nagutchigagüü̃” natchiga niĩ na tchieü̃ tümamaã naugüü̃ wüie duẽẽ na tümagu nidaucüraü̃ rü tüü̃ natchieẽẽ. Rü ta natchiga niĩ guü̃guma tüü̃ niuetchaü̃ i tchieü̃maã urü cuü̃ nawaꞌtümü i tümacüma i tümawa nüü̃ cudau. Ngẽmaãcü, guü̃ma i taꞌacü i ãmaꞌgüü̃ nüü̃ niu nacaꞌ namaꞌgu nidaucüraü̃ rü tchieü̃ tümamaã niugü i norü deawa rüeꞌna ngúü̃ tüü̃ ningeẽẽ.
d Nüü̃ nadau nhaa ucuꞌẽ “A pornografia pode destruir seu casamento”, nawa i site jw.org rü nawa i aplicativo JW Library.
e Wüi ãteü̃ i tümate nüü̃ nadau i ngẽãẽtchicünaꞌã rü nhaa ucuꞌẽ tümaarü mecaꞌ ta niĩ “O que você pode fazer se seu marido vê pornografia?”, nawa i popera Sentinela i agostuarü 2023gu.
f Tupanaarü Ore tama nüü̃ niutchiga i guü̃ma i taꞌacü meü̃ rüeꞌna tchieü̃ ngẽguma ãmaꞌü̃ rü ãteü̃ nügümaã napegu. Ngẽma natchigagüwa, wüitchigü i ngĩgüü̃ nanawaꞌe nüü̃ nauneta i taꞌacü naüü̃, notürü nümagü nanawaꞌe nanaü i ngẽma i Tupana nawaꞌeãcü, rü na nügü nataãẽü̃güü̃caꞌ rü tama nayaãẽü̃güü̃caꞌ. Notürü ngẽma ngĩgüü̃ tama name togüegü i duẽẽgümaã nüü̃ niuü̃ i taꞌacü naügüü̃ i norü ngĩgüwa.
g NATCHICÜNAꞌÃWA NGÓÜ̃TCHIGA: Wüi taenemücügü i puracüwa rü nüü̃ natchiewe na nüü̃ nadauü̃caꞌ i popera i ngeãẽü̃tchicünaꞌãtchiga.
